Wɛ̀ɖɛ̀ɓèɖésĩ̀ɔ̀ 6 - Ɓǎsɔ́ɔ̀ Báɓòɔ̀

Céè-ɖɛ̀-mìɔ̀ kã̀ìn-ɖɛ̀ ɓěɔ̀

¹ Ké ḿ dyéɛ ma, ké Ɓáɖáá-dyùɔ̀ nyìnììn ma céè-ɖɛ̀-mìɔ̀ kã̀ìn-ɖɛ̀ mɛ̀nɛ̌ìn-sɔ̃́ ɓěɔ̀ ɖò dyíin. Ké ḿ wɔ̃́ ma mɛɛ-ɖɛ̀ cĩ́-cĩ́ hĩinyɛ ɓěɔ̀ ɖòɛ̀ wuɖu. Ɔ wuɖuɔ̀ nì ma kà zɛ pánáà kɛ, ké ɔ ɖá, “Dyi.”

² Ḿ gmɔ̀ ma ɖé. Púɛɛ, ḿ dyé ma sǒ púú ɖò cá. Nyɔ nì ma ɔ kɔ̃ún wɛ̃ɛ ɓéɖé ma pɔnɔ ɖò xwa. Wa nyí ma ɔ gbàǎ ɖò, ké ɔ mu ma to-ɖu-kà, ɓɛ́ ɔ ké to ɖu.

³ Ké ti Ɓáɖáá-dyùɔ̀ nyìnììn ma kã̀ìn-ɖɛ̀ɔ̀ sɔ̃́ nììnɔ̀ dyíin nyɛɛ, ḿ wɔ̃́ ma mɛɛ-ɖɛ̀ cĩ́-cĩ́ɔ̀ sɔ̃́ nììnɔ̀ wuɖu, ké ɔ ɖá, “Dyi.”

⁴ Ké sǒɔ̀ ɖò dyi ma ɖe. Ɔ nì ma zĩ-zã. Wa nyí ma nyɔ nì ma ɔ kɔ̃ún wɛ̃ɛ kpé, ɓɛ́ ɔ ké gìɖìǐ nɔ̄ ɓóɖó-kpàà kɔ̃ zà, ɓɛ́ nyɔǔn ké ɖáɓáìn ɖàɓàìn. Wa nyí ma ɔ gàsíà vɛ̀nɛ̀ ɖò.

⁵ Ké ti Ɓáɖáá-dyùɔ̀ nyìnììn ma kã̀ìn-ɖɛ̀ɔ̀ tã nììnɔ̀ dyíin nyɛɛ, ḿ wɔ̃́ ma mɛɛ-ɖɛ̀ cĩ́-cĩ́ɔ̀ tã nììnɔ̀ wuɖu, ké ɔ ɖá, “Dyi.” Ḿ gmɔ̀ ma ɖé, ké ḿ dyé ma sǒ kpìǐ ɖò cá. Ké nyɔ kò ma ɔ kɔ̃ún wɛ̃ɛ ɓéɖé ma pṹá ɖò xwa.

⁶ Ké ḿ wɔ̃́ ma ɖɛ ɖòɛ̀ wuɖu kè nyɔǔn-dyùɛ̀ wuɖu hwɔìn nyɛɛ ɖé mɛɛ-ɖɛ̀ cĩ́-cĩ́ hĩinyɛ ɓěɔ̀ hwìɛ̀, ké ɔ ɖá, “Wé gàná ɖòɛ̀ wíɖí ɓó hwítì bòǎ-ɖà-wè dyúáɖò jè, ké wé gàná ɖòɛ̀ wíɖí ɓó báɖèɛ̀ bòǎ-ɖà-wè tã jè. Kɛɛ mɔ̀ǔn ɖá ɓɛ́ m̀ ké cánáɔ̀ kè wã́ìnɔ̀ dyíin nyìnììn.”

⁷ Ké ti Ɓáɖáá-dyùɔ̀ nyìnììn ma kã̀ìn-ɖɛ̀ɔ̀ hĩinyɛ nììnɔ̀ dyíin nyɛɛ, ḿ wɔ̃́ ma mɛɛ-ɖɛ̀ cĩ́-cĩ́ɔ̀ hĩinyɛ nììnɔ̀ wuɖu, ké ɔ ɖá, “Dyi.”

⁸ Ké ḿ gmɔ̀ ma ɖé. Púɛɛ, ḿ dyé ma sǒ wùu ɖò cá. Nyɔ nì ma ɔ kɔ̃ún wɛ̃ɛ nyɛ́nɛ́ mɔ̀ Gĩɔ, ké Xwɛ́-ɓì sí ma ɔ kíɖíí. Wa nyí ma wa kpé ɓó ɓóɖó-kpàà fáún-fáúnɔ̀ pĩ́á ɖò kɔ̃in, ɓɛ́ wa ké nyɔǔn to kè mɔ́ kè wɛ́ ɔ kè xwáɖá-xwíɖíi-nìmìì ɓě dyí ɖáɓá.

⁹ Ké ti Ɓáɖáá-dyùɔ̀ nyìnììn ma kã̀ìn-ɖɛ̀ɔ̀ hm̀m̌ nììnɔ̀ dyíin nyɛɛ, ḿ dyé ma nyɔ ɓě ɓɛ́ wa ɖǎ ma ɖáɓá ɓó Gèɖèpɔ́ɔ̀-wùɖùɔ̀ cɛ̃ jè, ɔ kè zàse ɓɛ́ wa nyu ma kɛ jèɛɛ zùù ɓěɔ̀. Wa nì ma sáa-kɔ̃-zàìn-gbààɔ̀ xwíɖíi.

¹⁰ Wa páná ma mú ɖé wuɖu zoo mú, ké wa ɖá, “Kpé-séín-ɓéɖé-Bounɓo, m̀ mɔ̀ mú-hwɛ̀-nyɔ̀ kè jǎà-nyɔ̀. Ti jĩ̀ xwɛ̌ ɔ mu nyuùn hwɛ̀ ɓɛ́ m̀ ké ɓóɖó-kpàɔ̀ nyɔ ɓě zaa wɔ̃ po, ɓɛ́ m̀ ké wa gǎ dyéìn ɓó nyɔ ɓě ɓɛ́ wa ɖáɓáa jè kɛ́?”

¹¹ Ké wa nyí ma wa ɖɔ púú ɖò-ɖò, ké wa cɛ̃ɛ ma wa gbo, ɓɛ́ wa ké ma fɔ̀ ke ɖɛ wè, ɓɛ́ wa mǔè ɓě ɓɛ́ wa mɔ̀ùn mɔ̀à Gèɖèpɔ́ɔ̀ gbo-nì-nyɔ̀ ɓě kɛ ɔ kè wa ɖíí ɓě ɓɛ́ wa mu ma kà wa mɔ̀ùn ɖáɓáùn kà ɓɛ́ wa ɖáɓá ma kà wa mɔ̀ùn wɛ̃ɛ ké ɖe hwɛ̀ kĩ́ín hwɛ̀.

¹² Ké ti Ɓáɖáá-dyùɔ̀ nyìnììn ma kã̀ìn-ɖɛ̀ɔ̀ mɛ̀nɛ̌ìn-ɖò nììnɔ̀ dyíin nyɛɛ, ḿ gmɔ̀ ma ɖé, ké ɓóɖó-kpàɔ̀ túò ma dyi mìɔ. Ké dyóɖóɔ̀ kpè ma cá kà ɖɔ kpìǐ kuún-kuún nìà kɛ, ké dɛ̀nɛ̀ɔ̀ nì ma zĩ-zã cá kà nyɔmɔɔ nìà kɛ.

¹³ Ké dɛ̀nɛ̀ mɛ́nɛ́ɛ́ ɓěɔ̀ ɓuɖu ma ɖé dyɔɔ̀ dyí, ké wa wáɖá ma ɓíɖíi kà ɓɛ́ féè-cùɛ̀ ɓo se ku wáɖáà ɓíɖíi, ɔ jǔ ké dìì dyi dyiín nyɛ.

¹⁴ Ké dyɔɔ̀ pa ma ɖé dyií dyi. Ti ɔ nì ma ɖé dyií dyi pauń wɛ̃ɛ, ɔ nì ma páɖáuń kà céè-ɖɛ̀-mì páɖá-páɖá nìà kɛ. Ké toɖo vɛ̀nɛ̀ séín kè tóó-kpò séín nì ma daí sɔ̀ǐn.

¹⁵ Púɛɛ, ɓóɖóɔ̀ nàìn-nyɔ̀ ɓěɔ̀ kè nyɔ vɛ̀nɛ̀ ɓěɔ̀ kè sójà vɛ̀nɛ̀-vɛ̀nɛ̀ ɓěɔ̀ kè bã-nyɔ̀ ɓěɔ̀ kè gana-nyɔ̀ ɓěɔ̀ kè gǐì ɓěɔ̀ kè nyɔ ɓě se gǐìɛ ɔ kè nyɔ tɔ̀ɔ̀ séín, wa vǐè ma wa mìɔùn ɖé ɓí ɓě mú, ɔ kè ɖé sɔ́ɔ́-kpò vɛ̀nɛ̀-vɛ̀nɛ̀ ɓě nì ma toɖo ɓěɔ̀ dyai kɛɛ xwíɖíi.

¹⁶ Wa páná ma mú ɖé toɖo ɓěɔ̀ kè sɔ́ɔ́-kpò ɓěɔ̀ gbo, ké wa ɖá, “Ɓě ɓáìn à kɔ̃in, ké ɓě mɛ vǐè à nììn nyɔ mɔ̀ nyɔ ɓɛ́ ɔ dèɖěà zèèɔ̀ kɔ̃ dyaa dyí, ké ɓě mɛ vǐè à ɓó Ɓáɖáá-dyùɔ̀ dyoɖoɔ̀ xwaún.

¹⁷ Sepóɛɖé waà dyoɖo-wè vɛ̀nɛ̀ɔ̀ ɖǎ dyi, ké nyɛ́ ɓɛ́ìn ɔ dyúa dyi nyànàà kɛ́?”