Wɛ̀ɖɛ̀ɓèɖésĩ̀ɔ̀ 5 - Ɓǎsɔ́ɔ̀ Báɓòɔ̀

Céè-ɖɛ̀-mì páɖá-páɖáɔ̀ kè Ɓáɖáá-dyùɔ̀

¹ Ké ḿ dyé ma céè-ɖɛ̀-mì páɖá-páɖá ɖò ɖé nyɔ dèɖě ma kà zèèɔ̀ kɔ̃ dyaa ɖiaùn-xwàɔ̀ mú. Céè-dyèɖè nì ma céè-ɖɛ̀-mìɔ̀ wáká sɔ̃́ɔ̀ kɔ̃. Ké céè-ɖɛ̀ɔ̀ kã̀ìn-ɖɛ̀ mɛ̀nɛ̌ìn-sɔ̃́ nì ma ɓó céè-ɖɛ̀ɔ̀ kɔ̃.

² Ké ḿ dyé ma ínjà ɓéɖé gana ɖò, ké ɔ nì ma zio poɛń, ké ɔ ɖá, “Nyɛ́ kpa ɖɛ ɓɛ́ ɔ ké céè-ɖɛ̀-mìɔ̀ kã̀ìn-ɖɛ̀ ɓěɔ̀ dyíin nyìnììn, ɓɛ́ ɔ kéɛ kaà kɛ́?”

³ Kɛɛ nyɔ ɖò se ma ɖé dyɔún nì, ké nyɔ ɖò se ma ɓóɖó-kpàà kɔ̃ nì, ké nyɔ ɖò se ma ɖé ɓóɖó-kpàà hwuɖu nì, ɓɛ́ ɔ ké ma céè-ɖɛ̀-mìɔ̀ kaà ɓɛ́ìn, ɓɛ́ ɔ ké ɖé ɔ xwíníín gmɔ̀.

⁴ Ké ḿ vĩ̌ ma mìɔ, sepóɛɖé wa se ma nyɔ ɖò dyé, ɓɛ́ ɔ ké ma ɖɛ kpa ɓɛ́ ɔ ké céè-ɖɛ̀-mìɔ̀ kaà, ɓɛ́ ɔ ké ɖé ɔ xwíníín gmɔ̀.

⁵ Kɛɛ nyɔ vɛ̀nɛ̀ ɓěɔ̀ ɖò cɛ̃ɛ ma ḿ gbo, ké ɔ ɖá, “Ɓɔ́ vĩ̌ɛ. Gmɔ̀ nɔ̄, Ganìǎ sɔ̀àìn ɖé Júɖàà xwéɖé-dùɔ̀ mú, ɓɛ́ ɔ mɔ̀à Dèɓéɛ̀ nyúà-dyú vɛ̀nɛ̀ɔ̀ kɛɛ ɖǎ toɔ̀ ɖu, ké ɔ ɓɛ́ìn céè-ɖɛ̀-mìɔ̀ kã̀ìn-ɖɛ̀ mɛ̀nɛ̌ìn-sɔ̃́ɔ̀ dyíin nyìnìɛ̀n, ɓɛ́ ɔ kéɛ kaà.”

⁶ Ké ḿ dyé ma Ɓáɖáá-dyù ɖò, ké ɔ nyànà ma ɖé zèèɔ̀ hwòɖǒǔn dyi. Mɛɛ-ɖɛ̀ cĩ́-cĩ́ hĩinyɛ ɓěɔ̀ kè nyɔ vɛ̀nɛ̀ ɓěɔ̀ nì ma ɔ ɖei. Ɓáɖáá-dyùɔ̀ nì ma pū kà wa ɖǎ ma kà ɔ ɖáɓáa. Ɔ ɓéɖé ma gmɛ̌ mɛ̀nɛ̌ìn-sɔ̃́ kè dyéɖé-ɓò mɛ̀nɛ̌ìn-sɔ̃́ ɓɛ́ wa mɔ̀à Gèɖèpɔ́ɔ̀ gbo-nì-ɖɛ̀ mɛ̀nɛ̌ìn-sɔ̃́ ɓě, ɓɛ́ ɔ ɖǎà ɓóɖó-kpàà dà séín tòɛ.

⁷ Ɓáɖáá-dyùɔ̀ mu, ké ɔ zà ma céè-ɖɛ̀-mìɔ̀ ɖé nyɔ dèɖě ma kà ɖé zèèɔ̀ kɔ̃ dyaa ɖiaùn-xwàɔ̀ mú.

⁸ Ké ti ɓɛ́ ɔ ɖǎa ma dyí ɖúɛɛ, mɛɛ-ɖɛ̀ cĩ́-cĩ́ hĩinyɛ ɓěɔ̀ kè nyɔ vɛ̀nɛ̀ kpáɖá-nyɔ sè hĩinyɛ ɓěɔ̀ ɓùɖùìn ma Ɓáɖáá-dyùɔ̀ dyúa. Ké wa séín ɓéɖé ma gbǎɖí, ké wa ɓéɖé góò-pǎni ɓě, ké nyɔ́ún-nɔ̀mɔ̀-ɖɛ̀ dyí ma wa mú. Gèɖèpɔ́ɔ̀-nyɔ̀ ɓěɔ̀ ɓaà-ɓaàɔ̀ nìàǒ wɛ̀.

⁹ Ké wa ɓeɖe ma wɛ́ɖɛ́ ɖìè ɖò. Wɛ́ɖɛ́-wùɖùɔ̀ ɖá, “M̀ kpa ɖɛ ɓɛ́ m̀ ké céè-ɖɛ̀-mìɔ̀ dyí ɖú, ɓɛ́ m̀ ké ɔ kã̀ìn-ɖɛ̀ ɓěɔ̀ kaà. Sepóɛɖé wa ɖáɓá ma m̀, ké m̀ dɔ̃ ma nyɔǔn ɓó Gèɖèpɔ́ɔ̀ bìì dyììn ɖé nì nyɔmɔɔ̀ mú. M̀ dɔ̃ ma nyɔǔn sɔ̀ìn ɖé xwéɖé-dù séín kè nyɔ ɓě po ma wuɖu-dù kò-kò ɓěɛ kè nyɔ-dù kò-kò séín ɔ kè ɓóɖó-dù séín hwìɛ̀.

¹⁰ Ké m̀ ɖǎa nyu ké wa mɔ̀ nyɔ ɓě m̀ kɔ̃̀ wuɖuíɛ, ké wa mɔ̀ sáa-zà-nyɔ̀ ɓě, ɓɛ́ wa ké à Gèɖèpɔ́ɔ̀ ɓiè. Ké wa mu nyɔǔn wuɖuí kɔ̃̀ùn ɓóɖó-kpàɔ̀ kɔ̃.”

¹¹ Ḿ gmɔ̀ ma ɖé, ké ḿ wɔ̃́ ma ínjà táázĩ̀ìn kè táázĩ̀ìn ɓɛ́ wa se dyí gbɛ̌ìn ɓɛ́ìn nyɛɛ wuɖu ɓě. Wa nyanaìn ma zèèɔ̀ kè mɛɛ-ɖɛ̀ cĩ́-cĩ́ ɓěɔ̀ ɔ kè nyɔ vɛ̀nɛ̀ ɓěɔ̀ ɖei.

¹² Ké wa páná ma mú, ké wa ɖá, “Ɓáɖáá-dyù ɓɛ́ wa ɖáɓá ma kà kɛɛ kpa ɖɛ, ɓɛ́ ɔ ké kpé kè bã-ɖɛ̀ kè hwòɖǒ-fɔ̀nɔ̀-fɔ̀nɔ̀ kè gana kè dya-dè-dè kè dĩ́ín-dĩ̀ìn ɔ kè ɓàìn-ɓàìn dyé.”

¹³ Ké ḿ wɔ̃́ ma mɛɛ-ɖɛ̀ séín nì ma ɖé dyɔún wɛ̃ kè nɔ̄ ɓóɖó-kpàà kɔ̃ɛ kè ɖé ɓóɖó-kpàà hwuɖuɛ kè ɖé dyóóɔ̀ múɛ ɔ kè mɛɛ-ɖɛ̀ séín nì dà séín nyɛɛ wuɖu ɓěɔ̀. Ké wa ɖá, “Ɓàìn-ɓàìn kè dya-dè-dè kè dĩ́ín-dĩ̀ìn ɔ kè gana mɛ nì nyɔ mɔ̀ nyɔ ɓɛ́ ɔ dèɖěà zèèɔ̀ kɔ̃ dyaa kè Ɓáɖáá-dyùɔ̀ kɛɛ kɔ̃ ɓó sè-ná-sèɛ̀ tiín.”

¹⁴ Ké mɛɛ-ɖɛ̀ cĩ́-cĩ́ hĩinyɛ ɓěɔ̀ ɖá, “Kǎà ɔ mɛ nì.” Ké nyɔ vɛ̀nɛ̀ ɓěɔ̀ kpá ma ɓíɖíi dyi, ké wa ɓiè ma Gèɖèpɔ́ɔ̀.