Wɛ̀ɖɛ̀ɓèɖésĩ̀ɔ̀ 4 - Ɓǎsɔ́ɔ̀ Báɓòɔ̀

Ɓiè-ɓiè ɓɛ́ ɔ nì ɖé dyɔún wɛ̃

¹ Ti ɖɛ nìà kɛ ɖǎ ma dyi ziɛɛ, ḿ dyé ma ɖɛ ɖò ɖe. Gmɔ̀ nɔ̄, gbǒ-wɔ̃̀ ɖò kaà ma ɖé dyɔún. Ké wuɖu hwɔìn gã̀à-wùɖù kĩ́ín-kĩ́ín ɓɛ́ ḿ wɔ̃́ ma kà kĩ́ín nyɛɛ ɖá, “Dyi nɔ̄ ɖé dyií, ké ní mu m̀ ɖɛ mu kpáùn ɖé ɖɛ nìà kɛ ɖeín nyɛɛ dyí tɛ̀mɛ̀ìn.”

² Wàɖà kɛɛ, Zùùɔ̀ dyi ma ḿ kɔ̃. Gmɔ̀ nɔ̄, zèè ɖò nì ma ɖé dyɔún, ké nyɔ ɖò dèɖě ma ɔ kɔ̃ dya.

³ Ké nyɔ dèɖě ma kà ɓó dyaa fã ma kà sɔ́ɔ́ kpa ɖɛ ɓě mɔ̀à jásàpà kè kàníɖìà kɛɛ fãà kɛ. Ké ɖé zèèɔ̀ ɖei dà séín nyɛɛ, ní-mɛ̀nɛ̀ ɖò nì ma ɓó. Ɔ dyéɖé nì ma kà sɔ́ɔ́ kpa ɖɛ mɔ̀à ɛ́mɛ́wòɖò kɛɛ dyéɖé nìà kɛ.

⁴ Ɖé zèèɔ̀ ɖeiɛɛ, zèè kpáɖá-nyɔ sè hĩinyɛ nì ma ɓó ɖe. Ké nyɔ vɛ̀nɛ̀ kpáɖá-nyɔ sè hĩinyɛ nì ma wa kɔ̃ ɖò-ɖò. Wa po ma ɖɔ púú mú, ké wa dèìn ma góò-gbàǎ dú.

⁵ Ké wɛ́ɖɛ́-wɛ́ɖɛ́ po ma, ké wuɖu ɓě kè zɛ-páná-wùɖù ɓě sɔ̀ìn ma ɖé zèèɔ̀ nyɔ nì ma kà ɖé hwòɖǒǔn wɛ̃ɛ mú. Dɔ̀ɔ̀-kpà mɛ̀nɛ̌ìn-sɔ̃́ nì ma ɓó zèèɔ̀ dyúa wãuń. Ɖɛ ɓě nìà kɛ mɔ̀ Gèɖèpɔ́ɔ̀ gbo-nì-ɖɛ̀ mɛ̀nɛ̌ìn-sɔ̃́ ɓěɔ̀.

⁶ Ké ɓó zèèɔ̀ dyúa kɛɛ, ɖɛ ɖò nì ma ɓó, ké ɔ kè dyóó ɓɛ́ wa nyùàìn sɛ́ɓɛ́ɛ̀ kɛɛ hwɔìn ní. Ɔ nì ma kà sɔ̃̀ɔ̀-kpò nìà kɛ. Ké ɓó zèèɔ̀ ɖeiɛɛ, mɛɛ-ɖɛ̀ nì cĩ́ɛń hĩinyɛ nì ma ɔ wáká hĩinyɛ ɓěɔ̀ kɔ̃. Ké dyéɖé ɓě ɓáìn ma ɖɛ ɓěɔ̀ dyúa kè wa ɖeín dyi.

⁷ Mɛɛ-ɖɛ̀ nì cĩ́ɛń ɓěɔ̀ kĩ́ín-kĩ́ínɔ̀ nì ma kà ganìǎ nìà kɛ. Ɔ sɔ̃́ nììnɔ̀ nì ma kà ɓìɖǐ-dyù nìà kɛ. Ɔ tã nììnɔ̀ dyúa-kpàɔ̀ nì ma kà nyɔǔn-dyùɛ̀ dyúa-kpà nìà kɛ. Ké ɔ hĩinyɛ nììnɔ̀ nì ma kà ke nì wãuń nìà kɛ.

⁸ Ké mɛɛ-ɖɛ̀ nì cĩ́ɛń hĩinyɛ ɓěɔ̀ séín nì ma pìɔ̌-kpà mɛ̀nɛ̌ìn-ɖò gbɔ ɖò-ɖò. Ké dyéɖé ɓě nì ma ɖɛ ɓěɔ̀ pìɔ̌-kpà ɓěɔ̀ xwíníín, ké dyéɖé ɓě nì ma wa bũ̌in dà séín. Wa ɓeɖe ma tee ɓó máaún kè dyóɖóaún. Ké wɛ́ɖɛ́ wa ɓeɖe ma kɛɛ, ɔ kɛà kɛ̀. Wɛ́ɖɛ́-wùɖùɔ̀ ɖá, “Bounɓo mɔ̀à kpé-séín-ɓéɖé-Gèɖèpɔ́ɔ̀ kɛɛ hwɛ̀ mú. Ɔ hwɛ̀ mú. Ɔ hwɛ̀ mú. Ɔ nì ma, ké ɔ nì, ké ɔ mɔ̀ nyɔ kéà dyiɛ.”

⁹ Mɛɛ-ɖɛ̀ cĩ́-cĩ́ ɓěɔ̀ nyí nyɔ nìà zèèɔ̀ kɔ̃, ɓɛ́ ɔ muà cĩ́ìn kánáá pūɛɛ ɓàìn-ɓàìn, ké wa dè ɔ dya, ké wa po ɔ zùo. Ké ti séín ɓɛ́ wa nyu ɖɛa kɛɛ,

¹⁰ nyɔ vɛ̀nɛ̀ kpáɖá-nyɔ sè hĩinyɛ ɓěɔ̀ ɓùɖùìn ɓó nyɔ nìà zèèɔ̀ kɔ̃ɛɛ dyúa, ké wa ɓiè nyɔ mɔ̀ nyɔ ɓɛ́ ɔ muà cĩ́ìn kánáá pūɛ. Wa wáɖá waà gbàǎ ɓěɔ̀ ɓó zèèɔ̀ dyúa dyi, ké wa ɖá,

¹¹ “À Bounɓo kè à Gèɖèpɔ́ɔ̀, m̀ kpa ɖɛ, ɓɛ́ m̀ ké ɓàìn-ɓàìn kè dya-dè-dè ɔ kè kpé ɓéɖé. Sepóɛɖé m̀ mɛ ma ɖɛ séín. Ɔ mɔ̀ ma nì mɔ́ɔ́-ɖɛ̀, ké m̀ mɛ ma wa, ké wa nìà kɛ̀.”