Wɛ̀ɖɛ̀ɓèɖésĩ̀ɔ̀ 3 - Ɓǎsɔ́ɔ̀ Báɓòɔ̀

Bɔ̃̌ mu ɖé Sádà-cɔ̀cìɔ̀ gboɛ

¹ “Céè ɖɛ ɓě nìà kɛ ɖé cɔ́cì nìà ɖé Sádà-hwɔ̀ɖɔ̀ɔ̀ múɛɛ ínjàɔ̀ gbo. “Ɖɛ ɓě ɓɛ́ nyɔ mɔ̀ nyɔ ɓéɖéà Gèɖèpɔ́ɔ̀ gbo-nì-ɖɛ̀ mɛ̀nɛ̌ìn-sɔ̃́ɔ̀ kè dɛ̀nɛ̀-dyù mɛ̀nɛ̌ìn-sɔ̃́ɔ̀ cɛ̃ɛ kɛà kɛ̀. Ɔ ɖá, ‘Ḿ dyuò ɖɛ ɓě m̀ ɖǎ nyuɛɛ dyí. Wa ɖá m̀ nì cĩ́ɛń dyɛo, kɛɛ m̀ se cĩ́ɛń nì.

² Wóɖó nyíɔún, ɓɛ́ m̀ ké ɖɛ m̀ ɓéɖéà keɛɛ dyi kùìn, ɓɛ́ ɔ ní kɔ̃̀ ɖà mɛ́, sepóɛɖé ḿ ɖǎa dyé kà ɓɛ́ ɖɛ ɓě m̀ ɖǎ nyuɛɛ séè gbɔ hwɛ̀ ke ɖé ní Gèɖèpɔ́ɔ̀ dyúa kɛ.

³ Ɔ jèɛɛ, tɛ̀mɛ̀ìn-ɖɛ̀ ɓě ɓɛ́ m̀ kpɔ̃ ma dyiɛɛ mɛ nì m̀ hwìɖǐi. M̀ mɛ nyu ɖɛ ɓě wa tɛ̀mɛ̀ìn ma m̀ wɛ̃, ɓɛ́ m̀ ké nì kpeɖeɔ̀ dyi táà. M̀ se nyíɔún wóɖóín, ní mu m̀ gbo dyiìn kà dyíɖíí-nyɔ̀ dyià kɛ, ké m̀ se ti jɛ́ɛ́ ní mu dyiìn nyɛɛ dyí dyuòɛ̌ mu.

⁴ Kɛɛ m̀ ɓéɖé nyɔ gbɛ̀ǐ-gbɛ̀ǐ ɖé m̀ gbo, ɖé Sádà-hwɔ̀ɖɔ̀ɔ̀ mú, ké wa séè waà ɖɔ ɓěɔ̀ dyíin nyìnììn ke. Ḿ kè wa kè mu mú naìn, ké wa mu ɖɔ púú mú poùn, sepóɛɖé wa kpa ɖɛ.

⁵ Nyɔ ɓě mɔ̀ nyɔ ɖu toɛɛ, kǎà wa mu kà ɖɔ púú mú poùn. Ké ḿ se wa nyɛ́nɛ́ɔ̀ ɖé fɛ̀ɛ̀-cèè-ɖɛ̀ɔ̀ mú zàǎ mu. Ní muɛ cɛ̃ìn kà ḿ kɔ̃̀ wa kɛɛ ɖé ḿ Ɓǎ kè ɔ ínjà ɓěɔ̀ dyúa.

⁶ Nyɔ ɓéɖé ɖùǔɛɛ, ɔ mɛ tò ɖɛ ɓě ɓɛ́ Zùùɔ̀ nìà cɔ́cì-nyɔ̀ ɓěɔ̀ gbo cɛ̃iń nyɛɛ gbo ɖùǔ.’

Bɔ̃̌ mu ɖé Fèɖòdɛ́fìà-cɔ̀cìɔ̀ gboɛ

⁷ “Céè ɖɛ ɓě nìà kɛ ɖé cɔ́cì nìà ɖé Fèɖòdɛ́fìà-hwɔ̀ɖɔ̀ɔ̀ múɛɛ ínjàɔ̀ gbo. “Ɖɛ ɓě ɓɛ́ nyɔ mɔ̀à mú-hwɛ̀-nyɔ̀ɔ̀ kè jǎà-nyɔ̀ɔ̀ ɔ kè nyɔ mɔ̀ nyɔ ɓéɖéà Kã́á Dèɓéɛ̀ gbǎà-ɖɛ̀ɔ̀ kɛ cɛ̃ɛ kɛà kɛ̀. Ɔ dyi ɖɛ ɖò kaà ní, nyɔ ɖò seɛ kãa ɓɛ́ìn, ké ɔ dyi ɖɛ ɖò kã ní, nyɔ ɖò seɛ kaà ɓɛ́ìn. Ɔ ɖá,

⁸ ‘Ḿ dyuò ɖɛ ɓě m̀ ɖǎ nyuɛɛ dyí. Tò ɖùǔ, ḿ ɖǎ hwìè ɖò kaà ɖé m̀ dyúa, ké nyɔ ɖò seɛ kãa ɓɛ́ìn. Ḿ dyuò kà ɓɛ́ m̀ ɓéɖé kpé tííwèɛ jèɛɛ, m̀ ɖǎ ní wuɖu nyu, ké m̀ se ní jè mú doìn.

⁹ Tò ɖùǔ, ní muɛ nyuùn ɓɛ́ nyɔ ɓě mɔ̀à Sétɔ̃̀ cɔ́cì-nyɔ̀ ɓě, ké wa tɔ́mɔ́à se, ké wa ɖá wa mɔ̀ Júù-nyɔ̀ ɓě, ké wa seà ɔ mɔ̀ kɛɛ ké dyi, ɓɛ́ wa ké m̀ ɓo zɔ̃̌ ɓùɖùìn, ɓɛ́ wa ké m̀ ɓiè. Wa muɛ dyí dyuòùn kà ḿ ɖɛ̀ɓɛ̀ m̀ múɛ.

¹⁰ Ḿ cɛ̃ɛ ma m̀ gbo, ɓɛ́ m̀ ké ma hwòɖǒ ku, ké m̀ ɖǎ ní wuɖuɔ̀ nyu jèɛɛ, ní mu m̀ dyí gmɔ̀ùn nɔ̀mɔ̀ dyíin ɖé gǎ-dyé-tì muà ɓóɖó-kpà gànáà kɔ̃ dyiìn, ɓɛ́ ɔ kéà ɓóɖó-kpàà nyɔ ɓě mú dɔ̃̌ɛɛ mú.

¹¹ Ḿ nì dyiɛń kàǔn. M̀ mɛ kpɔ̃ ɖɛ m̀ ɓéɖéɛɛ dyi kóɖó-kóɖó, ɓɛ́ nyɔ ɖò ní kɔ̃̀ ɖà pɛ́ɛ̀-ɖɛ̀ nì muà dyéìn, ɓɛ́ ɔ mɔ̀à gbàǎɔ̀ kɛɛ m̀ xwa zà.

¹² Nyɔ mɔ̀ nyɔ ɖu toɛɛ, ní muɛ nyuùn ɓɛ́ ɔ ké ní Gèɖèpɔ́ɔ̀ gbǒɔ̀ dà kui-kuiɔ̀ ɖò jǔ. Ɔ seɛ mú sɔ̀ɔ̌ mu ɖe. Ní mu ní Gèɖèpɔ́ɔ̀ nyɛ́nɛ́ɔ̀ ɔ kɔ̃ céèìn, ké ní mu ní Gèɖèpɔ́ɔ̀ hwɔɖɔ mɔ̀à Jùɖúsɛ̀ɖɛ̀ìn ɖìè, ɓɛ́ ɔ muà ɖé dyɔún sɔ̀ùn ɖé ní Gèɖèpɔ́ɔ̀ gboɛɛ nyɛ́nɛ́ɔ̀ ɔ kɔ̃ céèìn. Ké ní mu ní nyɛ́nɛ́ ɖìèɔ̀ ɔ kɔ̃ céèìn ɖekè.

¹³ Nyɔ ɓéɖé ɖùǔɛɛ, ɔ mɛ tò ɖɛ ɓě ɓɛ́ Zùùɔ̀ nìà cɔ́cì-nyɔ̀ ɓěɔ̀ gbo cɛ̃iń nyɛɛ gbo ɖùǔ.’

Bɔ̃̌ mu ɖé Ɖéòdùsíà-cɔ̀cìɔ̀ gboɛ

¹⁴ “Céè ɖɛ ɓě nìà kɛ ɖé cɔ́cì nìà ɖé Ɖéòdùsíà-hwɔ̀ɖɔ̀ɔ̀ múɛɛ ínjàɔ̀ gbo. “Ɖɛ ɓě ɓɛ́ nyɔ mɔ̀à Éémɛ̀ kè hwòɖǒ-kɔ̃-dè-nyɔ̀ ɔ kè jǎà-zàse, nyɔ kɔ̃̀ xwaún ɓɛ́ Gèɖèpɔ́ɔ̀ mɛɛ-ɖɛ̀ séín ɓěɔ̀ sɔ̀àìn nyɛɛ, ɖɛ ɓě ɓɛ́ ɔ cɛ̃ɛ kɛà kɛ̀. Ɔ ɖá,

¹⁵ ‘Ḿ dyuò ɖɛ ɓě m̀ ɖǎ nyuɛɛ dyí. M̀ se sùmù, ké m̀ se pɛɛ̀. Nyɛ́ ɖá m̀ sùmùɔ̌ mɔɔ m̀ pɛɛ̀ɔ̌ kɛ́?

¹⁶ Kɛɛ m̀ nì wɔ̀ɖɔ̀ì-wɔ̀ɖɔ̀ì. M̀ se sùmù, ké m̀ se pɛɛ̀. Ɔ jèɛɛ, ní mu m̀ dyi wanaùn kà nyɔ wanaà ní dyiɛ.

¹⁷ M̀ ɖá, “Ḿ bã ní. Ḿ ɖǎ ɖɛ goun ɓéɖé. Ḿ ɖǎ ɖɛ séín ɓě ɓɛ́ ḿ mɔ́ɛɛ ɓéɖé.” Kɛɛ m̀ seɛ dyí dyuò kà m̀ se múà ɖò ɓéɖé, ké m̀ nì wììɛ. M̀ dyé gǎ, ké m̀ kpè dyéɖéín dyi, ké m̀ fɔ̀nɔ̀ múin.

¹⁸ Ɔ jèɛɛ, ḿ po m̀ náún, ɓɛ́ m̀ ké góò ɓɛ́ ɔ ɖǎà ɖeɛɛ ḿ gbo dɔ̃, ɓɛ́ m̀ ké bã. Dɔ̃ ɖɔ púú, ɓɛ́ m̀ ké m̀ mìɔùn bɛ̃̀ìn, ɓɛ́ nì múin-fɔ̀nɔ̀-fɔ̀nɔ̀ ɓɛ́ ɔ mɔ̀à dɛ̃-ɖɛ̀ kɛɛ ké ɖɛ kɔ̃in ɓáìn. Dɔ̃ dyéɖéín-po-ɖɛ̀, ɓɛ́ m̀ ké dyi dyé.

¹⁹ Ḿ ɓàɖàìn nyɔ séín ɓě ɓɛ́ ḿ ɖɛ̀ɓɛ̀ múɛɛ dyí, ké ḿ zà wa kpeɖe. Ɔ jèɛɛ, nì hwòɖǒ mɛ fṹà, ɓɛ́ m̀ ké nì kpeɖeɔ̀ dyi táà.

²⁰ Tò ɖùǔ, ḿ nyànà gbǒ-wɔ̃̀ɔ̀ gboi, ké ḿ nìɛ̀ kɔ̃ún ɓaɖauń. Nyɔ ɖò dyi ní wuɖu wɔ̃́, ké ɔ dyi gbǒɔ̀ kaà ní, ní mu ɖé ɔ mú dyáùn, ké ní mu ɖé ɔ gbo ɖɛ ɖiìn, ké ɔ mu ɖé mɔ́ún gbo ɖɛ ɖiìn.

²¹ Nyɔ ɓě mɔ̀ nyɔ ɖu toɛɛ, ní mu wa kpé nyíìn, ɓɛ́ wa ké ɖé ḿ gbo dyi kò ɖé ní zèèɔ̀ kɔ̃, kà ɓɛ́ ḿ mìɔùn ɖu ma kà to, ké ḿ kòà nɔ̄ ḿ Ɓǎ gbo dyi ɖé ɔ zèèɔ̀ kɔ̃ɛ.

²² Nyɔ ɓéɖé ɖùǔɛɛ, ɔ mɛ tò ɖɛ ɓě ɓɛ́ Zùùɔ̀ nìà cɔ́cì-nyɔ̀ ɓěɔ̀ gbo cɛ̃iń nyɛɛ gbo ɖùǔ.’ ”