Wɛ̀ɖɛ̀ɓèɖésĩ̀ɔ̀ 2 - Ɓǎsɔ́ɔ̀ Báɓòɔ̀

Bɔ̃̌ mu ɖé Ɛ́fɛ́sà-cɔ̀cìɔ̀ gboɛ

¹ “Céè ɖɛ ɓě nìà kɛ ɖé cɔ́cì nìà ɖé Ɛ́fɛ́sà-hwɔ̀ɖɔ̀ɔ̀ múɛɛ ínjàɔ̀ gbo. “Ɖɛ ɓě ɓɛ́ nyɔ mɔ̀ nyɔ kpɔ̃à dɛ̀nɛ̀-dyù mɛ̀nɛ̌ìn-sɔ̃́ ɓěɔ̀ dyi ɖé ɔ ɖiaùn-sɔ̃̀ɔ̀ mú, ké ɔ nàà ɖé ɖáùnpò-kɔ̃-dè-ɖɛ̀ ɓɛ́ wa mɔ̀à góòɛɛ mɛ̀nɛ̌ìn-sɔ̃́ ɓěɔ̀ hwìɛ̀ kɛɛ, ɖɛ ɓě ɓɛ́ ɔ cɛ̃ɛ kɛà kɛ̀. Ɔ ɖá,

² ‘Ḿ dyuò ɖɛ ɓě m̀ ɖǎ nyuɛɛ dyí. Ḿ dyuò kà m̀ nyu ma kũ̀à nyuɛ kɛ kè kà ɓɛ́ m̀ ku ma hwòɖǒɛ. Ḿ dyuò kà m̀ se ɖɛ-gbà-nyu-nyɔ̀ ɓěɔ̀ kpeɖe hwòɖǒ kùɛ̀n ɓɛ́ìn nyɛ. Ké m̀ ɖǎ nyɔ ɓě ɖáìn wa mìɔùn àpɔ́sò, ké wa seà ɔ mɔ̀ jɛ́ɛ́ kɛɛ mú dɔ̃̌. Ké m̀ ɖǎa dyé kà wa mɔ̀ se-tɔ́mɔ́-nyɔ̀ ɓěɛ.

³ M̀ ku hwòɖǒ, ké m̀ ɖǎ gǎ-dyé-dyé hwòɖǒ kùìn ɓó ní jè, ké m̀ séè sa ke.

⁴ Kɛɛ ɖɛ ḿ se mú ɖɛ̀ɓɛ̀ ɓá m̀ dyíɛɛ, ɔ kɛ̀. M̀ se ḿ mú ɖɛ̀ɓɛ̀ kàǔn kà ɓɛ́ m̀ nyu ma ḿ mú ɖɛ̀ɓɛ̀ɛ̀ kĩ́ín nyɛ.

⁵ M̀ mɛ dyuòɛ̀ kà ɓɛ́ dɛ̀ ɓɛ́ m̀ ɖǎà ɓuɖuɛɛ tɔ̀mɔ̀ dyaa. M̀ mɛ táà nì kpeɖeɔ̀ dyi, ɓɛ́ m̀ ké ɖɛ ɓě ɓɛ́ m̀ nyu ma kĩ́ín nyɛɛ nyu. Kɛɛ m̀ se nì kpeɖeɔ̀ dyi táà ní, nìí, ní mu m̀ gbo dyiìn, ɓɛ́ ḿ ké nì ɖáùnpò-kɔ̃-dè-ɖɛ̀ɔ̀ daí zàìn.

⁶ Kɛɛ kpeɖe m̀ ɓéɖé ɓɛ́ ḿ ɖɛ̀ɓɛ̀ múɛɛ, ɔ kɛ̀. Ɔ mɔ̀, m̀ nyɛ́ ɖɛ ɓě ɓɛ́ Nìkòɖétà-nyɔ̀ ɓěɔ̀ nyuɛɛ mú. Ké mɔ́ún nyɛ́ wa mú ɖekè.

⁷ Nyɔ ɓéɖé ɖùǔɛɛ, ɔ mɛ tò ɖɛ ɓě ɓɛ́ Zùùɔ̀ nìà cɔ́cì-nyɔ̀ ɓěɔ̀ gbo cɛ̃iń nyɛɛ gbo ɖùǔ. Ní mu nyɔ ɓě ɓɛ́ wa ɖu toɛɛ kpé nyíìn, ɓɛ́ wa ké fɛ̀ɛ̀-cù ɓɛ́ ɔ nìà ɖé pá nɔ̀mɔ̀ dyíin mɔ̀à dyɔún ɖé Gèɖèpɔ́ɔ̀ gboɛɛ ɓoɔ̀ ɖò ɖi.’

Bɔ̃̌ mu ɖé Sámánà-cɔ̀cìɔ̀ gboɛ

⁸ “Céè ɖɛ ɓě nìà kɛ cɔ́cì nìà ɖé Sámánà-hwɔ̀ɖɔ̀ɔ̀ múɛɛ ínjàɔ̀ gbo. “Ɖɛ ɓě ɓɛ́ nyɔ mɔ̀à nyɔ kĩ́ín-kĩ́ínɔ̀ kè ɔ hwɛ̀ìn-gbɔɔ̀, nyɔ ɓɛ́ ɔ mɛ́ ma, ké ɔ cĩ́ ma ɖeɛɛ, ɖɛ ɓě ɓɛ́ ɔ cɛ̃ɛ kɛà kɛ̀. Ɔ ɖá,

⁹ ‘Ḿ dyuò nì gǎ-dyéìn-dyéìnɔ̀ dyí. Ḿ dyuòɛ̀ kà m̀ dyé gǎa, kɛɛ m̀ bã jɛ́ɛ́ cá. Ḿ dyuò ɖɛ gbà ɓɛ́ nyɔ ɓě ɖá wa mɔ̀à Júù-nyɔ̀ ɓě kɛɛ cɛ̃ m̀ kɔ̃ún wɛ̃ɛ dyí. Wa se Júù-nyɔ̀. Wa mɔ̀ Sétɔ̃̀ɛ̀ cɔ́cì-nyɔ̀ ɓě.

¹⁰ Mɔ̀ǔn fɛ̃̀ìn ɓó gǎ m̀ muà dyéìn kàǔn wɛ̃ɛ jè. Dyéɛ, Nɔɔ́-nàmàǔn mu ɓě ɖíɛ́ ɓě kpɔɖɔ ɖeín poùn, ɓɛ́ ɔ ké ɓě mú dɔ̃̌. Ɓě mu gǎ dyéìn ɓó wé ɓaɖa-bùè xwíníín. M̀ mɛ mɔ̀ hwòɖǒ-kɔ̃-dè-nyɔ̀ tee ɓɛ́ m̀ ké mɛ́. Ké ní mu m̀ fɛ̀ɛ̀-gbàǎɔ̀ nyíìn.

¹¹ Nyɔ ɓéɖé ɖùǔɛɛ, ɔ mɛ tò ɖɛ ɓě ɓɛ́ Zùùɔ̀ nìà cɔ́cì-nyɔ̀ ɓěɔ̀ gbo cɛ̃iń nyɛɛ gbo ɖùǔ. Nyɔ ɓě mɔ̀ nyɔ ɓɛ́ wa ɖu toɛɛ, gĩɔ sɔ̃́ nììnɔ̀ se wa puàǎ mu.’

Bɔ̃̌ mu ɖé Pógòmà-cɔ̀cìɔ̀ gboɛ

¹² “Céè ɖɛ ɓě nìà kɛ ɖé cɔ́cì nìà ɖé Pógòmà-hwɔ̀ɖɔ̀ɔ̀ múɛɛ ínjàɔ̀ gbo. “Ɖɛ ɓě ɓɛ́ nyɔ ɓéɖéà gàsíà ɓéɖé dyéɖé sɔ̃́ námá-námáɔ̀ kɛɛ cɛ̃à kɛɛ kɛà kɛ̀. Ɔ ɖá,

¹³ ‘Ḿ dyuò dɛ̀ m̀ cĩ́ɛɛ, ɖéɛ̀ Sétɔ̃̀ ɓéɖéà ɔ zèèɔ̀ kɛ̀. Kɛɛ m̀ kpɔ̃ ní jè dyi kóɖó-kóɖó, ké m̀ taɓa ma ḿ hwìɖǐǐ kánáá pū. M̀ se ma ní jè dyi táà, hwɛ̀ ḿ po níiń, ti ɓɛ́ wa ɖáɓá ma kà Ã́típà mɔ̀ ma kà ní zàse kè ní hwòɖǒ-kɔ̃-dè-nyɔ̀ɔ̀ kɛ. Wa ɖáɓáìn ma ɔ ɖé ɓě gbo, dɛ̀ ɓɛ́ Sétɔ̃̀ cĩ́à kɛ.

¹⁴ Kɛɛ ɖɛ gbɛ̀ǐ-gbɛ̀ǐ ɓɛ́ ḿ se mú ɖɛ̀ɓɛ̀ ɓá m̀ dyíɛɛ kɛà kɛ̀. M̀ ɓéɖé ɖé nyɔ ɖíɛ́ ɓě, ké wa kpɔ̃ Béɖàùn nììn tɛ̀mɛ̀ìn-ɖɛ̀ ɓěɔ̀ dyi. Béɖàùn tɛ̀mɛ̀ìn ma Béɖà kà ɓɛ́ ɔ kéɛ ma nyu ní, ɓɛ́ Éézùɖùɛ̀-nyɔ̀ ɓěɔ̀ ké ma nàmàǔn nyu ɖé ɖii-ɖɛ̀ ɓě ɓɛ́ wa ɖǎ kũùn-kpò gbo sáa zàìn nyɛɛ ɖi-ɖi mú, ɔ kè ɖé gbàɖàùn-po-po múɛ.

¹⁵ Kà dyúáɖòɔ̀ kǎà m̀ ɓéɖé nyɔ ɖíɛ́ ɓě ɓɛ́ wa kpɔ̃ Nìkòɖétà-nyɔ̀ ɓěɔ̀ tɛ̀mɛ̀ìn-ɖɛ̀ ɓěɔ̀ dyiɛ.

¹⁶ M̀ mɛ táà nì kpeɖeɔ̀ dyi. Ɔ se ná nìǐn, ní mu ɖé m̀ gbo dyiìn kàǔn, ɓɛ́ ḿ ké nyɔ ɓě nìàǒ wɛɛ gàsíà ɓɛ́ ɔ sɔ̀ìn ɖé ḿ wĩín nyɛɛ gbo vɔ̃̀ìn.

¹⁷ Nyɔ ɓéɖé ɖùǔɛɛ, ɔ mɛ tò ɖɛ ɓě ɓɛ́ Zùùɔ̀ nìà cɔ́cì-nyɔ̀ ɓěɔ̀ gbo cɛ̃iń nyɛɛ gbo ɖùǔ. Nyɔ ɓě ɓɛ́ wa ɖu toɛɛ, ní mu wa mánà vǐè-vǐèɔ̀ ɖò nyíìn. Ké ní mu wa sɔ́ɔ́ púú ɖò nyíìn. Ké nyɛ́nɛ́ ɖìè ɖò mu sɔ́ɔ́ɔ̀ dyéɖéí céèìn, ké nyɔ ɖò seɛ dyí dyuòɛ̌ mu, ɔ sèìn nyɔ mɔ̀ nyɔ ɓɛ́ ɔ muɛ kɔ̃̀ùn wɛ̃ɛ ɖòùn.’

Bɔ̃̌ mu ɖé Táɖàtádyà-cɔ̀cìɔ̀ gboɛ

¹⁸ “Céè ɖɛ ɓě nìà kɛ ɖé cɔ́cì nìà ɖé Táɖàtádyà-hwɔ̀ɖɔ̀ɔ̀ múɛɛ ínjàɔ̀ gbo. “Gèɖèpɔ́ɔ̀ Dyú-gàà mɔ̀ nyɔ kɔ̃̀ dyéɖé nìà kà nyɛ-mìɔ̀, ké ɔ ɓo nìà kà bàɖàsǐ fã-fã nìà kɛ, ɖɛ ɓě ɓɛ́ ɔ cɛ̃ɛ kɛà kɛ̀. Ɔ ɖá,

¹⁹ ‘Ḿ dyuò ɖɛ ɓě m̀ ɖǎ nyuɛɛ dyí. Ḿ dyuò nì ɖɛ̀ɓɛ̀ǐn-ɖɛ̀ɓɛ̀ǐn kè nì hwìɖǐǐ-taɓa-taɓaɔ̀ kè nì kũ̀à-nyu-nyu ɔ kè nì hwòɖǒ-ku-kuɔ̀ dyí. Ḿ dyuò kà m̀ nì kũ̀à pàɖǎ nyuɛń kàǔn, ké ɔ zi nyɔ m̀ nyu ma kĩ́ín nyɛɛ dyíɛ.

²⁰ Kɛɛ ɖɛ ḿ se mú ɖɛ̀ɓɛ̀ ɓá m̀ dyíɛɛ, ɔ kɛ̀. M̀ wɔ̃́ ɓɛ́ màa mɔ̀à Jɛ́séɓɛ̀ ɓɛ́ ɔ ɖáìn ɔ mìɔùn kpáá-ɖɛ̀-cɛ̃-nyɔ̀ kɛɛ ké ɖé ɓě hwìɛ̀ nì. Ɔ nì ní gbo-nì-nyɔ̀ ɓěɔ̀ ɖɛ tɛ̀mɛ̀ǐn, ké ɔ nì wa cáuń, ké ɔ nyuɛ ké wa po gbàɖàùn, ké wa ɖi ɖii-ɖɛ̀ ɓɛ́ nyɔǔn ɖǎ kũùn-kpò gbo sáa zàìn nyɛ.

²¹ Ḿ nyí ma ɔ ti, ɓɛ́ ɔ ké ma ɔ kpeɖeɔ̀ dyi táà, kɛɛ ɔ se mɔ́ ɓɛ́ ɔ ké ɔ kpeɖe gbàɔ̀ dyi táà.

²² Gmɔ̀ nɔ̄, ní mu ɔ béè kɔ̃ poùn. Ké nyɔ ɓě ɓɛ́ wa kèɔ̀ kè ɖǎ ma kà gmaɖe poɛɛ, ní muɛ nyuùn ɓɛ́ wa ké gǎ dyé mìɔ cá, wa táà dyɛ kpeɖe ɓɛ́ wa kèɔ̀ kè nì ma kà nyuɛń nyɛɛ dyi hwɛ̀.

²³ Ní mu ɔ dyú ɓěɔ̀ ɖáɓáùn. Ké cɔ́cì-nyɔ̀ ɓě nìà dà séín nyɛɛ muɛ dyí dyuòùn kà ɓɛ́ ḿ mɔ̀ nyɔ gmɔìn nyɔǔn-dyùɛ̀ fɔ̀nɔ̀-hwòɖǒ kè waà hwòɖǒ ɓěɔ̀ múin nyɛ. Ké ní mu ɓě ɖò-ɖò séín pɛ́ɛ̀ìn kà ɓěɛ̀ kũ̀à-sɔ̃̀ mu nìɛ̀ nyuùn wɛ̃.

²⁴ Kɛɛ ɓěɛ̀ nyɔ tɔ̀ɔ̀ ɓě nìà ɖé Táɖàtádyà-hwɔ̀ɖɔ̀ɔ̀ múɛɛ, ɓě se tɛ̀mɛ̀ìn-ɖɛ̀ ɓě nìàǒ wɛɛ dyi kpɔ̃. Ɓě séè ɖɛ ɓě ɓɛ́ nyɔ ɖíɛ́ ɓě ɖáìn ɖɛ ɓě nìà Sétɔ̃̀ hwòɖǒ bũ̌ vɛ̃in nyɛɛ cɛ̃́ ke. Ḿ se gbɛ̌ ɖò ɓě mɔ̀ùn kɔ̃ poɛ́ mu ɖe.

²⁵ Kɛɛ ɓě mɛ kpɔ̃ ɖɛ ɓě ɓéɖéɛɛ dyi kóɖó-kóɖó tee, ɓɛ́ ḿ ké dyi hwɛ̀.

^26-28 Nyɔ ɓě mɔ̀ nyɔ ɖu to, ké wa mu ɖɛ ɓɛ́ ḿ mɔ́ ɓɛ́ wa ké nyuɛɛ nyuùn tee, ɓɛ́ ɖɛ séín ké mánáín hwɛ̀ɛ, ní mu wa kpé dyúáɖò ɓɛ́ ḿ Ɓǎ nyí ma ḿ wɛ̃ɛ nyíìn. Ní mu wa kpé nyíìn ɖé ɓóɖó-dù ɓěɔ̀ kɔ̃in, ké wa mu wa wuɖuí kɔ̃̀ùn ɖé gana-sɔ̃̀ mú. Ké wa mu nyɔ ɓěɔ̀ dyi wàìn kà nyɔ wàìn mɛ-dyàà ɖò dyiɛ. Ké ní mu wa zɔ̃-wĩín-dɛ̀nɛ̀-dyùɔ̀ nyíìn.

²⁹ Nyɔ ɓéɖé ɖùǔɛɛ, ɔ mɛ tò ɖɛ ɓě ɓɛ́ Zùùɔ̀ nìà cɔ́cì-nyɔ̀ ɓěɔ̀ gbo cɛ̃iń nyɛɛ gbo ɖùǔ.’