Wɛ̀ɖɛ̀ɓèɖésĩ̀ɔ̀ 19 - Ɓǎsɔ́ɔ̀ Báɓòɔ̀

¹ Ti ɖɛ nìà kɛ ɖǎ ma dyi ziɛɛ, ḿ wɔ̃́ ma ɖɛ ɖòɛ̀ wuɖu ɖé dyɔún. Ɔ nì ma kà nyɔǔn-dyù kúɖúúɛ̀ wuɖu nìà kɛ. Ɔ ɖá, “À mɛ ɓàìn Bounɓoɔ̀. À Gèɖèpɔ́ɔ̀ kɔ̃̀ pó-pó kè ɓàìn-ɓàìn ɔ kè kpé.

² Ɔ zaa-wɔ̃-po-po ɓěɔ̀ sɛ́ɖɛ́ìn dyí, ké wa mɔ̀ jǎà. Sepóɛɖé ɔ ɖǎ gbàɖàùn-màà vɛ̀nɛ̀ ɓɛ́ ɔ nyìnìàìn ɓóɖóɔ̀ nyɔ ɓě dyíin ɖé ɔ gbàɖàùn-po-poɔ̀ múɛɛ gǎ dyéìn, ké ɔ ɖǎ ɔ gbo-nì-nyɔ̀ ɓěɔ̀ nyɔmɔɔ kpa ɔ dyí zàìn.”

³ Wa páná ma mú ɖe, ké wa ɖá, “À mɛ ɓàìn Bounɓoɔ̀. Nyànà-sò sɔ̀à nyɛ nìà ɔ fɔ̃uń wɛ̃ɛ múɛɛ nì dyií muɛń kánáá pū.”

⁴ Ké nyɔ vɛ̀nɛ̀ kpáɖá-nyɔ sè hĩinyɛ ɓěɔ̀ kè mɛɛ-ɖɛ̀ cĩ́-cĩ́ hĩinyɛ ɓěɔ̀ wáɖá ma ɓíɖíi, ké wa ɓiè ma Gèɖèpɔ́ɔ̀ mɔ̀ nyɔ dèɖěà ɖé zèèɔ̀ kɔ̃ dya kɛ. Ké wa ɖá, “Kǎà ɔ mɛ nì. À mɛ ɓàìn Bounɓoɔ̀.”

⁵ Ké wuɖu ɖò sɔ̀ìn ma ɖé zèèɔ̀ gbo, ké ɔ ɖá, “Ɓě mɔ̀à Gèɖèpɔ́ɔ̀ gbo-nì-nyɔ̀ séín ɓěɛɛ, ɓěɛ̀ dyú mɛ́nɛ́ɛ́ kè vɛ̀nɛ̀, ɓɛ́ ɓě fɛ̃̀ìn kà ɔ kɛɛ, ɓě ɓàìn à Gèɖèpɔ́ɔ̀.”

Ɓáɖáá-dyùɔ̀ nyɔ́nɔ́-dyi-kpɔ̃-hwɔ̀ɔ̀

⁶ Sɔ̀ìn ɓóɛ gboɛɛ, ḿ wɔ̃́ ma ɖɛ ɖòɛ̀ wuɖu. Ɔ nì ma kà nyɔǔn-dyù kúɖúúɛ̀ wuɖu nìà kɛ, ké ɔ nì ma kà ní-dyèɖè síà kɛ, ké ɔ nì ma kà zɛ-páná-wùɖù nìà kɛ. Wuɖuɔ̀ ɖá, “Ɓěà mɛ ɓàìn Bounɓoɔ̀, sepóɛɖé Bounɓo mɔ̀à à kpé-séín-ɓéɖé-Gèɖèpɔ́ɔ̀ kɛɛ kɔ̃̀ nyɔǔn wuɖuí.

⁷ Ɓěà kpá múàǔn, ɓɛ́ ɓěà ké ɔ ɓàìn, sepóɛɖé Ɓáɖáá-dyùɔ̀ nyɔ́nɔ́-dyi-kpɔ̃-tìɔ̀ ɖǎ dyi, ké nyɔ ɔ kéà dyi kpɔ̃ɛɛ ɖǎ ɔ mìɔùn ti dyéìn.

⁸ Wa ɖǎ nyɔ́nɔ́ ɖìèɔ̀ kpé nyí, ɓɛ́ ɔ ké ɖénì-ɖɔ̀ wee ɖò mú po. Ɖɔɔ̀ se zɛ̀nɛ̌ kpɔ̃.” Ɖɔɔ̀ mɔ̀ Gèɖèpɔ́ɔ̀-nyɔ̀ ɓěɔ̀ dyí-sɛ́ɖɛ́ìn-ɖɛ̀ nyu-nyu.

⁹ Ké ínjàɔ̀ cɛ̃ɛ ma ḿ gbo, ké ɔ ɖá, “Céè ɖɛ nìà kɛ. Nyɔ ɓě ɓɛ́ wa ɖáà wa ɖé Ɓáɖáá-dyùɔ̀ nyɔ́nɔ́-dyi-kpɔ̃-hwɔ̀ɔ̀ kɔ̃ɛɛ, mana nì wa kɔ̃.” Ké ɔ cɛ̃ɛ ma ḿ gbo ɖe, ké ɔ ɖá, “Wuɖu ɓě nìà kɛ mɔ̀ Gèɖèpɔ́ɔ̀ jǎà-wùɖù ɓě.”

¹⁰ Púɛɛ, ḿ ɓùɖùìn ma ɓó ɔ ɓo zɔ̃̌, ɓɛ́ ḿ ké ma ɔ ɓiè, kɛɛ ɔ cɛ̃ɛ ma ḿ gbo, ké ɔ ɖá, “Mɔ̀ǔn nyuɛ náao! Mɔ́ún mɔ̀ gbo-nì-nyɔ̀ ɖekè kà m̀ kè nì ɖíí ɓě ɓɛ́ wa mɔ̀à zàse ɓó Jízɛ̀ bììɛɛ mɔ̀à gbo-nì-nyɔ̀ ɓě kɛ. M̀ mɛ ɓiè Gèɖèpɔ́ɔ̀. Sepóɛɖé kà Gèɖèpɔ́ɔ̀ dèàìn ɔ kpáá-ɖɛ̀-cɛ̃-nyɔ̀ ɓěɔ̀ wuɖu wĩín nyɛɛ, kǎà ɔ dèìn nyɔ ɓě mɔ̀ zàse ɓě ɓó Jízɛ̀ bììɛɛ wuɖu wĩín.”

Nyɔ nì sǒ púúɔ̀ kɔ̃ún wɛ̃

¹¹ Ké ḿ dyéɛ ma, ké dyɔɔ̀ kaà ma wɔ̃. Púɛɛ, ḿ dyé ma sǒ púú ɖò cá. Nyɔ kò ma ɔ kɔ̃ún wɛ̃ɛ, ɔ nyɛ́nɛ́ mɔ̀ Hwòɖǒ-kɔ̃-dè-nyɔ̀ ɔ kè Jǎà-nyɔ̀. Ɔ dyi zaa wɔ̃ po, ké ɔ dyi to vɔ̃ ní, ɔ nyu wa dyí-sɛ́ɖɛ́ìn-kà.

¹² Ɔ dyéɖé ɓěɔ̀ nì kà nyɛ-mìɔ̀ nìà kɛ, ké ɔ dèìn ma gbàǎ kúɖúú ɓě dú. Nyɛ́nɛ́ ɖò céè ma ɔ bũ̌, ké nyɔ ɖò se ɔ dyí dyuò. Ɔ ɖòùn mɔ̀ nyɔ dyuòɛ̀.

¹³ Ɖɔ ɓɛ́ ɔ po ma múɛɛ mɔ̀ ma nyɔmɔɔ saá-saá. Nyɛ́nɛ́ ɓɛ́ wa ɖáìn ma ɔ kɛɛ mɔ̀ Gèɖèpɔ́ɔ̀-wùɖù.

¹⁴ Ké to-vɔ̃-nyɔ̀ ɓě nì ma ɖé dyɔún wɛ̃ɛ sí ma ɔ kíɖíí. Ké wa nì ma sǒ púú ɓě kɔ̃ún, ké wa po ma ɖénì-ɖɔ̀ púú se zɛ̀nɛ̌ kpɔ̃ɛɛ mú.

¹⁵ Ké gàsíà námá-námá ɓɛ́ ɔ muà ɓóɖó-dù ɓěɔ̀ ɖùìn nyɛɛ sɔ̀ ma ɖé ɔ wĩín. Ɔ mu wa wuɖuí kɔ̃̀ùn gana-kà, ké ɔ mu wa mú píníìn ɖé ɖɛ-mú-píníìn-ɖɛ̀ mɔ̀à kpé-séín-ɓéɖé-Gèɖèpɔ́ɔ̀ dyoɖo ku wɔ̃ɔ̀ kɛɛ mú.

¹⁶ Nyɛ́nɛ́ nìà kɛ céè ma ɔ ɖɔɔ̀ kè ɔ ɓoɔ̀ kɔ̃. Ɔ mɔ̀, “Kã́á séín ɓěɔ̀ nììn Kã́á kè nyɔ-wuɖuí-kɔ̃̀-nyɔ̀ séín ɓěɔ̀ nììn Wuɖuí-kɔ̃̀-nyɔ̀.”

¹⁷ Ké ḿ dyéɛ, ké ínjà ɖò nyànà ma ɖé dyóɖóɔ̀ múin. Ɔ páná ma mú ɖé wuɖu zoo mú, ɖé naà ɓě nì ma ɖéé ɖé dyɔɔ̀ dyí ziɛń nyɛɛ gbo, ké ɔ ɖá, “Ɓě dyi. Ɓě poìn dyí ɓó Gèɖèpɔ́ɔ̀ hwɔ vɛ̀nɛ̀ɔ̀ jè.

¹⁸ Ɓě dyi, ɓɛ́ ɓě ké kã́á ɓěɔ̀ kè sójà vɛ̀nɛ̀ ɓěɔ̀ kè gana-nyɔ̀ ɓěɔ̀ kè sǒ ɓěɔ̀ kè nyɔ ɓě nì wa kɔ̃ún wɛ̃ ɔ kè nyɔǔn-dyù tɔ̀ɔ̀ séín ɓě, gǐì ɓě kè nyɔ ɓě se gǐìɛ, ɔ kè dyú mɛ́nɛ́ɛ́ kè vɛ̀nɛ̀, fɔ́ múin mana.”

¹⁹ Ké ḿ dyé ma xwáɖá-xwíɖíi-nìmììɔ̀ kè ɓóɖó-kpàà kã́á ɓěɔ̀. Wa kè waà to-vɔ̃-nyɔ̀ ɓěɔ̀ poìn ma dyí, ɓɛ́ wa ké ma nyɔ kò ma kà sǒɔ̀ kɔ̃ún wɛ̃ kè ɔ nììn to-vɔ̃-nyɔ̀ ɓěɔ̀ gbo vɔ̃.

²⁰ Ké wa kpɔ̃ ma xwáɖá-xwíɖíi-nìmììɔ̀ kè nyɔ ɖáìn ɔ mìɔùn Gèɖèpɔ́ɔ̀ kpáá-ɖɛ̀-cɛ̃-nyɔ̀, ɓɛ́ ɔ ɖǎ zɛ̃̀ìn-ɖɛ̀ nyu ɓó nimiiɔ̀ dyúa kɛ. Ɔ ɖǎ ma nyɔ ɓě ɓɛ́ wa ɓéɖé ma xwáɖá-xwíɖíi-nìmììɔ̀ bɛ̃̌, ké wa ɖǎ ma ɔ hwɔìn-ɖɛ̀ɔ̀ ɓièɛɛ cá ɖé zɛ̃̀ìn-ɖɛ̀ ɓěa nyu-nyu mú. Nimiiɔ̀ kè nyɔ ɖáìn ɔ mìɔùn kpáá-ɖɛ̀-cɛ̃-nyɔ̀ kɛɛ se ma mɛ́, ké wa po ma wa nyɛ-gbà-wɔ̃̀ kɔ̃̀ mú sɔ́fà-sɔ̀ɔ̌ nì wãuń wɛ̃ɛ mú.

²¹ Ké gàsíà ɓɛ́ ɔ sɔ̀ ma nyɔ kò ma kà sǒɔ̀ kɔ̃ún wɛ̃ɛ wĩín nyɛɛ ɖáɓá ma kà nyɔ tɔ̀ɔ̀ ɓěɔ̀ kɛ̀. Ké naà séín ɓěɔ̀ mana waà fɔ́ ɓěɔ̀ tee, ké wa sa ma.