Wɛ̀ɖɛ̀ɓèɖésĩ̀ɔ̀ 18 - Ɓǎsɔ́ɔ̀ Báɓòɔ̀

Báɓèɖɔ́ùn-hwɔ̀ɖɔ̀ɔ̀ wáɖá-wáɖá

¹ Ti ɖɛ nìà kɛ ɖǎ ma dyi ziɛɛ, ḿ dyé ma ínjà ɖò ɖe, ké ɔ sɔ̀ìn ma ɖé dyɔún. Ɔ ɓéɖé ma kpé vɛ̀nɛ̀, ké ɔ dĩ́ín-dĩ̀ìnɔ̀ nyuɛ ké ɓóɖó-kpà gànáà fã ma.

² Ké ɔ páná ma mú ɖé wuɖu zoo mú, ké ɔ ɖá, “Báɓèɖɔ́ùn-hwɔ̀ɖɔ̀ vɛ̀nɛ̀ɔ̀ ɖǎ wáɖá! Ɔ ɖǎ wáɖá! Ɔ ɖǎ zùù gbà ɓěɛ̀ cĩ́-naín jǔ. Ɖɛ nyìnììn dyíin séín ɓě kè naà séín ɓě se dyíin nɔ̀mɔ̀, ɓɛ́ wa nyɛ́ múɛɛ cĩ́ ɖé ɔ mú.

³ Sepóɛɖé ɓóɖó-dù séín ɖǎ ɔ wã́ìn kàmà-kàmà mɔ̀à ɔ gbàɖàùn-po-poɔ̀ kɛɛ ɖò ná. Ɔ kè ɓóɖó-kpàɔ̀ kã́á ɓěɔ̀ po ma gbàɖàùn, ké ɓóɖó-kpàɔ̀ ɖɛ-peɖe-nyɔ̀ ɓěɔ̀ ɖǎ bã sɔ̀ìn ɖé ɖɛ séín ɓě kɔ̃̀ tó nyu ma kà ɔ teeɛɛ mú.”

⁴ Ké ḿ wɔ̃́ ma wuɖu ɖò sɔ̀ìn ɖé dyɔún ɖe, ké wuɖuɔ̀ ɖá, “Ní nyɔ ɓě, ɓě sɔ̀ ɔ mú, ɓě ní kɔ̃̀ ɖà ɔ nàmàǔn ɓěɔ̀ hwìɛ̀ kpá, ɓɛ́ ɓě kèɔ̀ kè ní kɔ̃̀ ɖà ɔ gǎ-dyéìn-ɖɛ̀ ɓěɔ̀ mú peɖeìn.

⁵ Sepóɛɖé ɔ nàmàǔn ɓěɔ̀ deìn kɔ̃in, ké wa nyini ɖé dyɔún, ké ɔ ɖɛ gbà ɓěɔ̀ jè ɖǎ Gèɖèpɔ́ɔ̀ hwìɖǐi dyi.

⁶ Ɓě mɛ kpɔ̃ ɔ kà ɔ nyu ma kà ɓě mɔ̀ùn kpɔ̃ɔ nyɛ̀nɛ̀ɛ̀ kɛ. Ɖɛ ɓě ɓɛ́ ɔ nyu ma kà kɛɛ, ɓě mɛ zàìn ɔ kpa dyí kpa sɔ̃́. Náá-ɖɛ̀ ɓɛ́ ɔ nyu ma kà ɓě bììɛɛ, ɓě mɛ dyíìn ɔ kópòɔ̀ náá-ɖɛ̀ kàmà-kàmàɔ̀ sɔ̃́.

⁷ Ɔ gǎ-dyéìn-dyéìn kè wìì ɓɛ́ ɓě mɛ nyí ɔ kɛ kè bɛ̃̀ìn-ɖɛ̀ kè hwòɖǒ-dyi-dè-ɖɛ̀ ɓě ɓɛ́ ɔ nyí ma ɔ mìɔùn wɛ̃ɛ mɛ ɓɛ́ìn wɔ̃. Sepóɛɖé ɔ cɛ̃ɛ ɖé ɔ mìɔùn mú, ké ɔ ɖá, ‘Ḿ mɔ̀ nyɔ-wuɖuí-kɔ̃̀-nyɔ̀, ké ḿ kòà dà dyiɛ̀. Ḿ se jɔ̌ɔ̀-màà. Ḿ se wìì jè dyuòɛ̌ mu.’

⁸ Ɓó ɖɛ ɓě nìà kɛ jèɛɛ, ɔ gǎ-dyéìn-ɖɛ̀ séín ɓěɔ̀ mu ɔ kɔ̃ dyiìn ɓó wé dyúáɖò xwíníín. Ɔ mɔ̀ wɛ́ kè wìì ɔ kè mɔ́. Ké nyɛ mu ɔ fɔ̃ùn, sepóɛɖé Bounɓo Gèɖèpɔ́ɔ̀ mɔ̀ nyɔ ɓɛ́ ɔ poà ɔ zaaɔ̀ wɔ̃ɛɛ ɓéɖé gana.”

⁹ Ké ɓóɖó-kpàà kã́á ɓě ɓɛ́ wa kèɔ̀ kè po ma gbàɖàùn, ké wa kèɔ̀ kè peɖeìn ma ɔ hwòɖǒ-dyi-dè-ɖɛ̀ ɓěɔ̀ múɛɛ, wa mu vĩ̌ìn, ké wa mu kpé poùn ɓó ɔ jè, ɔ jǔ ké wa dyi nyɛ muà ɔ fɔ̃uń nììn nyɛɛ nyànà-sòɔ̀ dyéín.

¹⁰ Wa mu kà ɖé nya nyànàùn vɛ̃in, sepóɛɖé wa fɛ̃̀ìn ɔ gǎ-dyé-dyéɔ̀ dyi. Ké wa ɖá, “Éé, ḿ ɖíí ɓě, Báɓèɖɔ́ùn-hwɔ̀ɖɔ̀ vɛ̀nɛ̀ kpa ɖɛ, nì jè mɔ̀ wìì-ɖɛ̀. Ɖé áɓà dyúáɖò múɛɛ, gǎ ɖǎ m̀ kɔ̃ dyi.”

¹¹ Ké ɓóɖó-kpàà ɖɛ-peɖe-nyɔ̀ ɓěɔ̀ vĩ̌, ké wa po kpé ɓó ɔ jè, sepóɛɖé nyɔ ɖò ní dɔ̃ waà peɖee-ɖɛ̀ ɓěɔ̀ ɖò ɖe.

¹² Waà peɖee-ɖɛ̀ ɓěɔ̀ mɔ̀ góò kè séɓàɖà kè sɔ́ɔ́ kpa ɖɛ ɓě kè ɖɛ púú hìɖìì kpa ɖɛ ɓě kè ɖénì-ɖɔ̀ kè ɓùɖǔù-ɖɔ̀ kè sékè kè ɖɔ zĩ-zã kè cu kò-kò ɓéɖé nyɔ́ ɓě kè ɖɛ kò-kò ɓě ɓɛ́ wa nyùìn dyuɛ-nyɛ̀nɛ̀ kè cu kpa ɖɛ kè bàɖàsǐ kè nɛɛ̀-kpà ɔ kè sɔ́ɔ́ púú kpa ɖɛ ɓě múɛ

¹³ kè nyɔ́ún-nɔ̀mɔ̀-ɖɛ̀ ɓě ɓɛ́ wa ɖáìn sínímà kè sápáà kè ĩ́sɛ̃̀ kè mɛ́ɛ̀ kè fánákésĩ̀ìn kɛ kè wã́ìn kè cáná kè fáɖáɓà kè hwítì kè ɓìɖǐ ɓě kè ɓáɖáá ɓě kè sǒ ɓě kè hwíì-sǒ ɓě kè gǐì ɓě ɔ kè nyɔǔn-dyùɛ̀ fɛ̀ɛ̀.

¹⁴ Wa ɖá, “Ɖɛ nɔ̀mɔ̀ dyíin kɔ̃̀ tó nyu ma kà m̀ wɛ̃ɛ ɖǎ m̀ gbo sɔ̀. Nì bã-ɖɛ̀ séín ɓěɔ̀ kè nì ɖɛ nɔ̀mɔ̀ dyíin séín ɓěɔ̀ ɖǎ m̀ xwa sɔ̀, ké m̀ se wa dyéɛ mu ɖe.”

¹⁵ Ké ɖɛ ɓě nìà kɛ peɖe-nyɔ̀ ɓě ɓɛ́ wa bãà dyììn ɖé ɖɛ-peɖe-peɖe mú ɖé hwɔɖɔɔ̀ múɛɛ, wa mu kà ɖé nya nyànàùn vɛ̃in, sepóɛɖé wa fɛ̃̀ìn ɔ gǎ-dyé-dyéɔ̀ dyi. Wa mu vĩ̌ìn, ké wa mu kpé poùn,

¹⁶ ké wa mu níiń, “Éé, ḿ ɖíí ɓě, hwɔɖɔ vɛ̀nɛ̀ ɓɛ́ ɔ ɓéɖé ma kà ɖénì-ɖɔ̀ kè ɖɔ dyéɖé ɖàɓàìn kpèɛ̀ ɔ kè ɖɔ zĩ-zã, ké ɔ bɛ̃̀ìn ma kà góò kè sɔ́ɔ́ kpa ɖɛ ɓě ɔ kè ɖɛ púú hìɖìì kpa ɖɛ ɓěɛɛ, ɔ jè mɔ̀ wìì-ɖɛ̀.

¹⁷ Wa wáɖá ma ɔ bã-ɖɛ̀ séín ɓěɔ̀ ɓó áɓà dyúáɖò xwíníín.” Ké méè-càpè ɓěɔ̀ kè méè-gbo-nàìn-nyɔ̀ ɓěɔ̀ kè méèǐn-gɔ̀ɖɔ̀ɔ̀ ɓěɔ̀ ɔ kè nyɔ ɓě ɓɛ́ wa ziìn ma mú, ké wa kpa ma ɖɛ ɓě ɓó peɖe jèɛɛ, wa séín nyànà ma ɖé nya vɛ̃in.

¹⁸ Ké ti wa dyé ma nyɛ nì ma kà hwɔɖɔɔ̀ fɔ̃uń wɛ̃ɛ nyànà-sòɔ̀ kɛɛ, wa páná ma mú, ké wa ɖá, “Hwɔɖɔɔ̀ nyɛ́ kè hwɔɖɔ vɛ̀nɛ̀ nìà kɛ hwɔìn ma kɛ́?”

¹⁹ Wa wáɖá ma púu-púu ɓě dúún, ké wa vĩ̌ ma, ké wa po ma kpé, ké wa ɖá, “Éé, ḿ ɖíí ɓě, hwɔɖɔ vɛ̀nɛ̀ nìà kɛ jè mɔ̀ wìì-ɖɛ̀. Ɔ mɔ̀ hwɔɖɔ kɔ̃̀ mú ɓɛ́ nyɔ séín ɓě ɓɛ́ wa ɓéɖéà séè-xwì-hwɔ̀ ɓěɛɛ bã ma ɓó ɔ bã-ɖɛ̀ ɓěɔ̀ kɔ̃ún wɛ̃. Ɔ ɖɛ séín ɓěɔ̀ hwɛ̀ ma ɔ xwai ɓó áɓà dyúáɖò xwíníín.

²⁰ Dyɔɔ̀ wè, m̀ mɛ kpá múàǔn ɓó ɔ jè. Ɓě mɔ̀à Gèɖèpɔ́ɔ̀-nyɔ̀ ɓě kè àpɔ́sò ɓě ɔ kè kpáá-ɖɛ̀-cɛ̃-nyɔ̀ ɓěɛɛ, ɓě mɛ kpá múàǔn. Sepóɛɖé Gèɖèpɔ́ɔ̀ ɖǎ ɔ zaa wɔ̃ po ɓó ɖɛ ɔ nyuà ɓě bũ̌ɛɛ jè.”

²¹ Ké ínjà ɓéɖé gana vɛ̀nɛ̀ ɖò ɓɛ́ ɔ ɖú ma sɔ́ɔ́-kpò ɖò nì ma kà ɖɛ-kɔ̃-sũ̀ìn-sɔ̀ɔ̌-kpò vɛ̀nɛ̀ nìà kɛɛ dyí, ké ɔ poɛ ma ɖéɛ dyóóɔ̀ kɔ̃. Ké ɔ ɖá, “Kǎà wa mu kà Báɓèɖɔ́ùn-hwɔ̀ɖɔ̀ vɛ̀nɛ̀ɔ̀ wáɖáa nyuùn gana-kà, ké wa se ɔ dyéɛ mu ɖe fɔɔ.

²² Gbǎɖí-ɓaɖa-wùɖù kè ɓeɖe-wùɖù kè péé-poo-ɓaɖa-wùɖù ɔ kè gã̀à-ɓaɖa-wùɖù, wa seɛ m̀ mú wɔ̃́ɔ mu ɖe. Ké wa se sɛ́ɖɛ́-nyɔ̀ ɖò ɖé m̀ mú dyéɛ mu ɖe, ké wa se nyɔǔn ɓěɛ̀ ɖɛ-sɔ́ɔ́-kɔ̃-sũ̀ìn-wùɖù ɖò m̀ mú wɔ̃́ɔ mu ɖe.

²³ Ké ɖáùnpòɛ̀ ce ɖò se wãá mu ɖe ɖé m̀ mú, ké wa se nyɔ́nɔ́ ɖìè kè nyɔ́nɔ́-ɓǎ ɖòɛ̀ wuɖu wɔ̃́ɔ mu ɖe ɖé m̀ mú. Nì ɖɛ-peɖe-nyɔ̀ ɓěɔ̀ mɔ̀ ma nyɔ vɛ̀nɛ̀ ɓě ɖé ɓóɖó-kpàɔ̀ dà séín, ké m̀ ɖǎ ɓóɖó-dù séín cá ɖé nì hwĩɔ̀-nyu-nyuɔ̀ mú.”

²⁴ Wa dyé ma kpáá-ɖɛ̀-cɛ̃-nyɔ̀ ɓěɔ̀ kè Gèɖèpɔ́ɔ̀-nyɔ̀ ɓěɔ̀ nyɔmɔɔ ɖé ɔ mú. Wa dyé ma nyɔ séín ɓě ɓɛ́ wa ɖǎ ma wa ɖáɓá nɔ̄ ɓóɖó-kpàà kɔ̃ɛɛ nyɔmɔɔ ɖé ɔ mú.