Wɛ̀ɖɛ̀ɓèɖésĩ̀ɔ̀ 17 - Ɓǎsɔ́ɔ̀ Báɓòɔ̀

Gbàɖàùn-màà vɛ̀nɛ̀ɔ̀ zaa-wɔ̃-po-poɔ̀

¹ Ké ínjà mɛ̀nɛ̌ìn-sɔ̃́ ɓě ɓɛ́ wa ɓéɖé ma kà páni mɛ̀nɛ̌ìn-sɔ̃́ ɓěɔ̀ kɛɛ ɖò dyi, ké ɔ cɛ̃ɛ ma ḿ gbo, ké ɔ ɖá, “Dyi. Ní muɛ m̀ dyí tɛ̀mɛ̀ìn kà ɓɛ́ gbàɖàùn-màà vɛ̀nɛ̀ ɓɛ́ ɔ kòà dɛ̀ ɓɛ́ ní ɓáún-ɓáún nìà kɛ dyiɛɛ zaaɔ̀ mu wɔ̃ kpáa nyuùn wɛ̃.

² Ɓóɖó-kpàɔ̀ kã́á ɓěɔ̀ kè gbàɖàùn-màà vɛ̀nɛ̀ɔ̀ po ma gbàɖàùn, ké ɓóɖó-kpàɔ̀ nyɔ ɓě ɖǎ ɔ wã́ìn mɔ̀à ɔ kpeɖe gbàɔ̀ kɛɛ ná, ké ɔ ɖǎ wa nyu.”

³ Ké Zùùɔ̀ dyi ma ḿ kɔ̃, ké ínjàɔ̀ kpa ma ḿ ɖé gbǎùn-fúɖúá ɖò kɔ̃. Ké ḿ dyé ma màa ɖò, ké ɔ kò ma xwáɖá-xwíɖíi-nìmìì zĩ-zã ɖò kɔ̃ún. Ké nyɛ́nɛ́ nyìnììn kɔ̃in ɓě céè ma nimiiɔ̀ bũ̌in, ké ɔ ɓéɖé ma dú mɛ̀nɛ̌ìn-sɔ̃́ kè gmɛ̌ ɓaɖa-bùè.

⁴ Màaɔ̀ po ma ɓùɖǔù-ɖɔ̀ kè ɖɔ zĩ-zã ɖò mú. Ɔ ɓéɖé ma bɛ̃̀ìn-ɖɛ̀ ɓě mɔ̀ góò kè sɔ́ɔ́ kpa ɖɛ ɓě ɔ kè ɖɛ púú hìɖìì kpa ɖɛ ɓěɛ. Ké ɔ ɓéɖé ma góò-kòpò ɖò xwa. Ɖɛ ɓě nyàìn Gèɖèpɔ́ɔ̀ dyiɛ kè ɖɛ ɓě nyìnììn kɔ̃in nyɛɛ dyí ma ɖé. Ɖɛ ɓě nìà kɛ mɔ̀ ɔ kpeɖe gbà ɓěɔ̀.

⁵ Ké nyɛ́nɛ́ ɓéɖé xwíníín ɓɛ́ nyɔ ɖò se dyí dyuò wɛɛ céè ma ɔ dyúa-kpàɔ̀ kɔ̃. Ɔ mɔ̀, “Báɓèɖɔ́ùn-hwɔ̀ɖɔ̀ vɛ̀nɛ̀ mɔ̀à gbàɖàùn-màà ɓěɔ̀ kè ɓóɖó-kpàɔ̀ ɖɛ ɓě ɓɛ́ wa nyàìn Gèɖèpɔ́ɔ̀ dyiɛɛ ɖe.”

⁶ Ké ḿ dyéɛ, ké màaɔ̀ ná ma Gèɖèpɔ́ɔ̀-nyɔ̀ ɓěɔ̀ kè Jízɛ̀ɛ̀ zàse ɓěɔ̀ nyɔmɔɔ, ké ɔ nyu ma ɔ. Ti ḿ dyéɛ ma kɛɛ, ḿ giniìn ma dyi mìɔ.

⁷ Kɛɛ ínjàɔ̀ cɛ̃ɛ ma ḿ gbo, ké ɔ ɖá, “Ɖɛ́ kɔ̃̀ jè m̀ giniàìn dyi kɛ́? Ní mu m̀ ɖɛ ɓɛ́ nyɔǔn se ma dyí dyuò ɓá màaɔ̀ kè xwáɖá-xwíɖíi-nìmìì ɓɛ́ ɔ ɓéɖéà dú mɛ̀nɛ̌ìn-sɔ̃́ kè gmɛ̌ ɓaɖa-bùè, ɓɛ́ ɔ nìà kɔ̃ún wɛ̃ɛ jè dyíɛɛ gbo cɛ̃ìn.

⁸ Nimii ɓɛ́ m̀ dyé ma kà kɛɛ cĩ́ ma ní, kɛɛ ɔ se cĩ́ɛń nì ɖe. Ɔ muá ɓí vɛ̀nɛ̀ tɔ̀mɔ̀ǔn-tɔ̀mɔ̀ǔnɔ̀ mú sɔ̀ùn, ɓɛ́ ɔ kéá mu, ɓɛ́ ɔ ké mú gbɔɔ̀. Ké nyɔ ɓě cĩ́à ɓóɖó-kpàɔ̀ kɔ̃, ké wa nyɛ́nɛ́ seà céè ɖé fɛ̀ɛ̀-cèè-ɖɛ̀ɔ̀ mú hwɛ̀ ɓɛ́ ɓóɖó-kpàɔ̀ ké gbɔ dèɛɛ, wa dyi nimiiɔ̀ dya gmɔ̀ǐn, wa mu dyi giniìn. Sepóɛɖé ɔ cĩ́ ma, kɛɛ ɔ se cĩ́ɛń nì ɖe, ké ɔ mu dyiìn ɖe.

⁹ “Ɖɛ nìà kɛ mɔ́ hwòɖǒ-fɔ̀nɔ̀-fɔ̀nɔ̀ kè ɖɛ-múin-wɔ̃́-wɔ̃́. Dú-ɓò mɛ̀nɛ̌ìn-sɔ̃́ ɓěɔ̀ mɔ̀ toɖo mɛ̀nɛ̌ìn-sɔ̃́ ɓě kɔ̃̀ dya màaɔ̀ kòà dyiɛ.

¹⁰ Ké wa mɔ̀ kã́á mɛ̀nɛ̌ìn-sɔ̃́ ɓě ɖekè. Waà nyɔ-kpò hm̀m̌ ɖǎ ɓuɖu, ké dyúáɖò mɔ̀ùn kɔ̃̀ nyɔǔn wuɖuí ke, ké nyɔ tɔ̀ɔ̀ mɔ̀ùn séè dyi ke. Ké ɔ dyi dyiín, ɔ mu nɔ̄ sèìn ɓó ti tííwè xwíníín pū.

¹¹ Ké xwáɖá-xwíɖíi-nìmìì ɓɛ́ ɔ nì ma kà cĩ́ɛń kĩ́ín, ké ɔ seà cĩ́ɛń nì ɖeɛɛ mɔ̀ kã́á mɛ̀nɛ̌ìn-tã nììnɔ̀. Kɛɛ ɔ mɔ̀ǎ kã́á mɛ̀nɛ̌ìn-sɔ̃́ ɓěɔ̀ ɖò. Ké ɔ mu, ɓɛ́ ɔ ké mú gbɔɔ̀.

¹² Ké gmɛ̌ ɓaɖa-bùè ɓɛ́ m̀ dyé ma kà kɛɛ, wa mɔ̀ kã́á ɓaɖa-bùè ɓɛ́ wa séè kã́á-ɓòɖòɔ̀ kɔ̃̀ keɛ. Kɛɛ wa kè xwáɖá-xwíɖíi-nìmììɔ̀ peɖeìn wa nyɔ-wuɖuí-kɔ̃̀-kpèɔ̀ mú ɓó áɓà dyúáɖò xwíníín.

¹³ Nyɔ ɓě nìà kɛ hwòɖǒ po ɖɛ dyúáɖòɔ̀ gbɔ, ké wa nyí wa kpéɔ̀ kè wa nyɔ-wuɖuí-kɔ̃̀-kpèɔ̀ xwáɖá-xwíɖíi-nìmììɔ̀.

¹⁴ Wa mu Ɓáɖáá-dyùɔ̀ gbo vɔ̃ùn, kɛɛ Ɓáɖáá-dyùɔ̀ mu wa ɖuùn, sepóɛɖé ɔ mɔ̀ nyɔ-wuɖuí-kɔ̃̀-nyɔ̀ séín ɓěɔ̀ nììn Wuɖuí-kɔ̃̀-nyɔ̀, ké ɔ mɔ̀ kã́á séín ɓěɔ̀ nììn Kã́á. Nyɔ ɓě nìà ɖé ɔ gboɛɛ mɔ̀ nyɔ ɓě ɓɛ́ ɔ ɖǎ ɖá, ké ɔ ɖǎ gã, ké wa mɔ̀ hwòɖǒ-kɔ̃-dè-nyɔ̀ ɓěɛ.”

¹⁵ Ké ínjàɔ̀ cɛ̃ɛ ma ḿ gbo, ké ɔ ɖá, “Ní ɓě ɓɛ́ m̀ dyé ma kà, dɛ̀ ɓɛ́ gbàɖàùn-mààɔ̀ kòà dyiɛɛ mɔ̀ nyɔ-dù kò-kò ɓě kè nyɔ kúɖúú ɓě kè ɓóɖó-dù ɓě ɔ kè nyɔ ɓě poà wuɖu kò-kò ɓěɛ.

¹⁶ Ké gmɛ̌ ɓaɖa-bùè ɓě ɓɛ́ m̀ dyé ma kà kɛɛ, wa kè xwáɖá-xwíɖíi-nìmììɔ̀ mu gbàɖàùn-mààɔ̀ mú nyɛ́ìn. Wa mu ɔ ɖɛ séín xwai zàùn, ɓɛ́ ɔ ké múin fɔ̀nɔ̀. Wa mu ɔ fɔ́ɔ ɖiìn, ké wa mu ɔ fɔ̃ùn.

¹⁷ Sepóɛɖé Gèɖèpɔ́ɔ̀ po kà wa ké ɔ mɔ́ɔ́-ɖɛ̀ nyu kɛɛ ɖé wa hwòɖǒ bũ̌, ɓɛ́ wa ké hwòɖǒ dyúáɖò ɓéɖé, ɓɛ́ wa ké wa wuɖuí-kɔ̃̀-kpèɔ̀ xwáɖá-xwíɖíi-nìmììɔ̀ nyí, ɓɛ́ Gèɖèpɔ́ɔ̀ wuɖu ɓěɔ̀ ké jǎà kpá hwɛ̀.

¹⁸ Ké màa ɓɛ́ m̀ dyé ma kà kɛɛ, ɔ mɔ̀ hwɔɖɔ vɛ̀nɛ̀ ɓɛ́ ɔ ɓéɖéà ɓóɖó-kpàɔ̀ kã́á ɓěɔ̀ kpé kɔ̃in nyɛ.”