Wɛ̀ɖɛ̀ɓèɖésĩ̀ɔ̀ 16 - Ɓǎsɔ́ɔ̀ Báɓòɔ̀

Dyoɖo-pǎni ɓěɔ̀

¹ Ké ḿ wɔ̃́ ma wuɖu zoo ɖò sɔ̀ìn ma ɖé Gèɖèpɔ́ɔ̀ gbǒɔ̀ mú, ké ɔ cɛ̃ɛ ma ínjà mɛ̀nɛ̌ìn-sɔ̃́ ɓěɔ̀ gbo, ké ɔ ɖá, “Ɓě mu, ɓɛ́ ɓě ké páni mɛ̀nɛ̌ìn-sɔ̃́ ɓě ɓɛ́ wa mɔ̀ Gèɖèpɔ́ɔ̀ dyoɖoɔ̀ kɛɛ ɓóɖó-kpàɔ̀ kɔ̃ púè.”

² Ké ínjà kĩ́ín-kĩ́ínɔ̀ mu, ké ɔ púè ma ɔ nììn pániɔ̀ ɓóɖó-kpàà kɔ̃. Ké jě nyìnììn dyíin ɓɛ́ ɔ puà nyɔǔn wɛ̃ɛ kpɔ̃ ma nyɔ ɓě ɓɛ́ wa ɓéɖé ma kà xwáɖá-xwíɖíi-nìmììɔ̀ bɛ̃̌, ké wa ɓiè ma kà ɔ hwɔìn-ɖɛ̀ɔ̀ kɛ.

³ Ké ínjà sɔ̃́ nììnɔ̀ púè ma ɔ nììn pániɔ̀ dyóóɔ̀ kɔ̃, ké ɔ nì ma kà nyɔ ɖǎ mɛ́ɛ nyɔmɔɔ nìà kɛ. Ké ɖɛ nì cĩ́ɛń séín ɓě nì ma dyóóɔ̀ kɔ̃ɛɛ mɛ́ ma.

⁴ Ké ínjà tã nììnɔ̀ púè ma ɔ nììn pániɔ̀ ɖé ní ɓěɔ̀ kè ní-dù ɓěɔ̀ kɔ̃, ké wa zɛ̃̀ìn ma nyɔmɔɔ mú.

⁵ Ké ḿ wɔ̃́ ma ínjà kɔ̃̀ xwaún ɓɛ́ ní ɓěɔ̀ nì ma kà kɛɛ wuɖu, ké wuɖuɔ̀ ɖá, “Mɔ̀ Mú-hwɛ̀-nyɔ̀, m̀ nì, ké m̀ nì ma. Kà m̀ nyuà nyɔǔn zaa-wɔ̃-po-po ɓě nìà kɛ nyuɛ kɛɛ sɛ́ɖɛ́ìn dyí.

⁶ Sepóɛɖé wa ɖǎ nì nyɔ ɓěɔ̀ kè nì kpáá-ɖɛ̀-cɛ̃-nyɔ̀ ɓěɔ̀ nyɔmɔɔ̀ dyi wáɖáìn, ké m̀ ɖǎ wa nyɔmɔɔ nyí ɓɛ́ wa kéɛ ná. Ɔ mɔ̀ ɖɛ wa ké dyéɛ.”

⁷ Ké ḿ wɔ̃́ ma wuɖu ɖò sɔ̀ìn ɖé sáa-kɔ̃-zàìn-gbààɔ̀ gbo, ké wuɖuɔ̀ ɖá, “Ǹdye, Bounɓo Gèɖèpɔ́ɔ̀, mɔ̀ mɔ̀ nyɔ ɓéɖéà kpé séín nyɛɛ, nì zaa-wɔ̃-po-po ɓěɔ̀ sɛ́ɖɛ́ìn dyí, ké wa mɔ̀ jǎà.”

⁸ Ké ínjà hĩinyɛ nììnɔ̀ púè ma ɔ nììn pániɔ̀ dyóɖóɔ̀ kɔ̃, ɓɛ́ ɔ kéɛ kpé nyí, ɓɛ́ ɔ zùzùɔ̀ ké nyɔǔn fɔ̃.

⁹ Zùzù ku wɔ̃ɔ̀ fɔ̃ ma nyɔǔn-dyù, ké wa ɖaɓa Gèɖèpɔ́ɔ̀ mɔ̀ nyɔ ɓéɖéà gǎ-dyéìn-ɖɛ̀ ɓěa kpé kɔ̃ún wɛ̃ɛ wuɖu. Kɛɛ wa se ma wa kpeɖeɔ̀ dyi táà, ɓɛ́ wa ké ma ɔ ɓàìn-ɓàìn nyí.

¹⁰ Ké ínjà hm̀m̌ nììnɔ̀ púè ma ɔ pániɔ̀ ɖé xwáɖá-xwíɖíi-nìmììɔ̀ zèèɔ̀ kɔ̃. Ké tíe kpɔ̃ ma ɔ kã́á-ɓòɖòɔ̀ kɔ̃in, ké nyɔǔn tà ma miɔ, sepóɛɖé ɖɛɔ̀ puà ma wa mìɔ.

¹¹ Wa ɖaɓa ma Gèɖèpɔ́ɔ̀ nìà ɖé dyɔún wɛ̃ɛ wuɖu ɓó waà gǎ-dyéìn-ɖɛ̀ ɓěɔ̀ kè waà jě ɓěɔ̀ jè. Kɛɛ kpeɖe ɓě ɓɛ́ wa nì ma kà nyuɛń nyɛɛ, wa se ma wa dyi táà.

¹² Ké ínjà mɛ̀nɛ̌ìn-ɖò nììnɔ̀ púè ma ɔ nììn pániɔ̀ ɖé ní vɛ̀nɛ̀ mɔ̀à Dyùféɖétì kɛɛ kɔ̃. Ké níɔ̀ ma ma, ɓɛ́ ɔ ké hwìè ɖò nyu ɓó ɓóɖó-kpàà kã́á ɓě ɓɛ́ wa sɔ̀ìn ɖé dyóɖóɔ̀ xwáɖáún-wóɖóìn-naínɔ̀ kɛɛ bìì.

¹³ Ké ḿ dyé ma ɖɛ nyìnììn kɔ̃in tã ɓě ɓɛ́ wa kè dɔ́ɖɔ́ hwɔìn nyɛɛ ɖé ɖɔ-sɛ̀ɔ̀ kè xwáɖá-xwíɖíi-nìmììɔ̀ ɔ kè nyɔ ɖáìn ɔ mìɔùn kpáá-ɖɛ̀-cɛ̃-nyɔ̀ɔ̀ kɛɛ wɔ̃ún sɔ̀ɔ̀.

¹⁴ Ɖɛ ɓěɔ̀ mɔ̀ zùù gbà ɓě ɓɛ́ wa nyu zɛ̃̀ìn-ɖɛ̀ ɓěɛ. Wa mu ɓóɖó-kpà gànáà kã́á ɓěɔ̀ gbo, ɓɛ́ wa ké wa dyí poìn ɓó to vɔ̃ jè, ɓó Gèɖèpɔ́ɔ̀ mɔ̀à Kpé-séín-ɓéɖé-nyɔ̀ɔ̀ kɛɛ wé vɛ̀nɛ̀ɔ̀ ɓaɖa.

¹⁵ Bounɓoɔ̀ ɖá, “Tò ɖùǔ, ḿ nì dyiɛń kà dyíɖíí-nyɔ̀ dyià kɛ. Mana nì nyɔ mɔ̀ nyɔ se mɔ́ɔ mu, ké ɔ gmɔ̀à ɔ ɖɔ ɓěɔ̀ dyí, ɓɛ́ ɔ ní kɔ̃̀ ɖà múin fɔ̀nɔ̀, ɓɛ́ ɔ ní kɔ̃̀ ɖà dyi té, ɓɛ́ dɛ̃ ní kɔ̃̀ ɖà ɔ nyu ɖé nyɔǔn séín dyúa kɛɛ kɔ̃.”

¹⁶ Ké zùù gbà ɓěɔ̀ poìn ma kã́á ɓěɔ̀ dyí ɖé dɛ̀ ɓɛ́ Híìbúɖúù-nyɔ̀ ɓěɔ̀ ɖáìn Àmàgɛ́ɖɔ̀ùn kɛ.

¹⁷ Ké ínjà mɛ̀nɛ̌ìn-sɔ̃́ nììnɔ̀ púè ma ɔ nììn pániɔ̀ ɖé dyɔɔ̀ dyí. Ké wuɖu zoo ɖò sɔ̀ ma ɖé zèè ɓɛ́ ɔ nì ma kà ɖé Gèɖèpɔ́ɔ̀ gbǒɔ̀ múɛɛ gbo, ké wuɖuɔ̀ ɖá, “Ɔ ɖǎ kpá.”

¹⁸ Ké wɛ́ɖɛ́-wɛ́ɖɛ́ po ma, ké kuɖu-kuɖu dyi ma, ké zɛ páná ma, ké ɓóɖó-kpàà zi ma dyi túòɛ̌n mìɔ. Gèɖèpɔ́ɔ̀ ɖǎǒ nyɔǔn-dyù mɛɛ, ɓóɖó-kpàà séè ma kà ná dyi túò ɖò fɔɔ. Ɔ dyi-túò-túòɔ̀ zi ma kpé wɔ̃ ɓúáuń mìɔ.

¹⁹ Ké Báɓèɖɔ́ùn-hwɔ̀ɖɔ̀ vɛ̀nɛ̀ɔ̀ fá ma mú, ké ɔ ge ma mú tã. Ké ɓóɖó-dù ɓěɔ̀ hwɔɖɔ vɛ̀nɛ̀ ɓěɔ̀ wáɖá ma. Báɓèɖɔ́ùn-hwɔ̀ɖɔ̀ vɛ̀nɛ̀ɔ̀ jè dyi ma Gèɖèpɔ́ɔ̀ hwìɖǐi, ké ɔ nyuɛ ké ɔ ná ma wã́ìn nì ma ɔ kópòɔ̀ múɛɛ ɖò. Wã́ìnɔ̀ mɔ̀ ɔ dyoɖo ku wɔ̃ɔ̀.

²⁰ Ké tóó-kpò séín ɓěɔ̀ pa ma dyi nyɛ̀nɛ̀ɛ̀, ké nyɔ ɖò se toɖo ɖò dyéɛ ɓɛ́ìn ɖe fɔɔ.

²¹ Ké sɔ̃̀ɔ̀-kpò vɛ̀nɛ̀ ɓě ɓɛ́ wa ɖòɛ̀ xwa-ku-ku ɓɛ́ìn ma pṹá-dyèɖè hɔ̃dɛ̀ɖɛ̀ ɖò ɖuɛ kɛɛ ɓuɖu ma ɖé dyɔɔ̀ dyí, ké wa wáɖá ma nyɔǔn-dyù kɔ̃in. Ké nyɔǔn ɖaɓa ma Gèɖèpɔ́ɔ̀ wuɖu ɓó gǎ-dyéìn-ɖɛ̀ mɔ̀à sɔ̃̀ɔ̀-kpò ɓěɔ̀ kɛɛ jè, sepóɛɖé gǎ-dyéìn-ɖɛ̀ɔ̀ zi ma dyíin nyìnìɛ̌n mìɔ.