Wɛ̀ɖɛ̀ɓèɖésĩ̀ɔ̀ 13 - Ɓǎsɔ́ɔ̀ Báɓòɔ̀

Xwáɖá-xwíɖíi-nìmìì sɔ̃́ ɓěɔ̀

¹ Sɔ̀ìn ɓóɛ gboɛɛ, ḿ dyé ma xwáɖá-xwíɖíi-nìmìì ɖò ɖé dyóóɔ̀ kɔ̃ sɔ̀ìn. Ɔ ɓéɖé ma gmɛ̌ ɓaɖa-bùè kè dú mɛ̀nɛ̌ìn-sɔ̃́, ké ɔ ɓéɖé ma gbàǎ ɓaɖa-bùè ɖé ɔ gmɛ̌ ɓěɔ̀ mánáín. Ké ɔ ɓéɖé ma nyɛ́nɛ́ nyìnììn kɔ̃in ɓě ɖé ɔ dyúa-kpà ɓěɔ̀ kɔ̃.

² Ké nimii ɓɛ́ ḿ dyé ma kà kɛɛ nì ma kà ji nìà kɛ. Ɔ ɓo ɓěɔ̀ nì ma kà kìɖìǒɛ̀ ɓo nìà kɛ. Ɔ wɔ̃ nì ma kà ganìǎà wɔ̃ nìà kɛ. Ké ɖɔ-sɛ̀ɔ̀ nyí ma nimiiɔ̀ ɔ kpéɔ̀ kè ɔ zèèɔ̀ ɔ kè ɔ nyɔ-wuɖuí-kɔ̃̀-kpè vɛ̀nɛ̀ɔ̀.

³ Nimiiɔ̀ dú ɓěɔ̀ ɖò nì ma pū kà nyɔ ɖò ɖǎ ma ɔ ɖáɓáa, kɛɛ ɔ nyɔ-ɖáɓá-jèɔ̀ ɖǎ ma ɓɔ́. Ké ɓóɖó-kpà gànáà giniìn ma dyi, ké wa sí ma nimiiɔ̀ kíɖíí.

⁴ Nyɔǔn ɓě ɓiè ma ɖɔ-sɛ̀ɔ̀, sepóɛɖé ɔ ɖǎ ma ɔ kpéɔ̀ xwáɖá-xwíɖíi-nìmììɔ̀ nyí. Ké wa ɓiè ma xwáɖá-xwíɖíi-nìmììɔ̀, ké wa ɖá, “Nyɛ́ nì kà xwáɖá-xwíɖíi-nìmììɔ̀ nìà kɛ́? Nyɛ́ ɓɛ́ìn ɔ gbo vɔ̃ɔ kɛ́?”

⁵ Ké wa nyí ma xwáɖá-xwíɖíi-nìmììɔ̀ kpé, ɓɛ́ ɔ ké ma nyɔǔn dyí-ɓúáìn-wùɖù ɓě cɛ̃, ɔ kè ɓɛ́ ɔ ké ma Gèɖèpɔ́ɔ̀ ɖɛ gbà ɓě kɔ̃ún cɛ̃. Ké wa nyí ma ɔ kpé, ɓɛ́ ɔ ké ma nyɔǔn wuɖuí kɔ̃̀ ɓó dɛ̀nɛ̀ kpáɖá-nyɔ sɔ̃́ sè sɔ̃́ xwíníín.

⁶ Ɔ ɖú ma Gèɖèpɔ́ɔ̀ kè Gèɖèpɔ́ɔ̀ nyɛ́nɛ́ɔ̀ kè ɔ cĩ́-naínɔ̀ ɔ kè nyɔ ɓě cĩ́ ma ɖé dyɔún wɛ̃ɛ ɖɛ gbà ɓě kɔ̃ún cɛ̃ kpàǐ.

⁷ Ké wa nyí ma ɔ kpé, ké ɔ po ma Gèɖèpɔ́ɔ̀-nyɔ̀ ɓěɔ̀ to kɔ̃, ké ɔ ɖu ma wa toún. Ké wa nyí ma ɔ kpé ɓó xwéɖé-dù séín kè nyɔ-dù kò-kò séín kè nyɔ ɓě po wuɖu kò-kò ɓěɛ ɔ kè ɓóɖó-dù séín kɔ̃in.

⁸ Nyɔ séín ɓě cĩ́à ɓóɖó-kpàà kɔ̃ɛɛ mu ɔ ɓièìn. Ɔ mɔ̀ nyɔ séín ɓě kɔ̃̀ nyɛ́nɛ́ ɓě se ma céè ɖé fɛ̀ɛ̀-cèè-ɖɛ̀ ɓɛ́ Ɓáɖáá-dyù ɓɛ́ wa ɖáɓá ma kà kɛɛ kɔ̃̀à kɛɛ mú, hwɛ̀ ɓɛ́ ɓóɖó-kpàà ké ma gbɔ dèɛ.

⁹ Nyɔ ɖò dyi ɖùǔ ɓéɖéín, nìí, ɔ mɛ tò ɖùǔ.

¹⁰ Ɔ dyi nyɔ ɖòɛ̀ kpɔ̃-tì jǔǐn, wa mu ɔ kpɔ̃ùn wɛ̃́ɛ́ pū. Nyɔ ɖò dyi gàsíà dyí ɖú, ɓɛ́ ɔ ké nyɔ ɖò ɖáɓáín, wa mu ɔ mɔ̀ùn gàsíà dyí ɖáɓáùn wɛ̃́ɛ́ pū. Ɖɛ nìà kɛ xwíníín mɔ̀, Gèɖèpɔ́ɔ̀-nyɔ̀ ɓěɔ̀ ɓéɖé wa ké hwòɖǒ ku, ɓɛ́ wa ké Gèɖèpɔ́ɔ̀ hwìɖǐǐ taɓa tee.

¹¹ Ké ḿ dyé ma xwáɖá-xwíɖíi-nìmììɔ̀ ɖò ɖe, ké ɔ sɔ̀ìn ma ɖé ɓóɖó-kpàà hwuɖu. Ɔ ɓéɖé ma gmɛ̌ sɔ̃́ kà Ɓáɖáá-dyùɛ̀ gmɛ̌ nìà kɛ. Ɔ wùɖù ma kà ɖɔ-sɛ̀ wùɖùà kɛ.

¹² Ɔ nyùìn ma xwáɖá-xwíɖíi-nìmìì kĩ́ín-kĩ́ínɔ̀ kpé vɛ̀nɛ̀ɔ̀ kũ̀à mú ɓó ɔ dyúa. Ɔ nɛ́ ma ɓóɖó-kpàà kè ɔ nyɔ séín ɓěɔ̀ kɔ̃, ɓɛ́ wa ké ma xwáɖá-xwíɖíi-nìmìì kĩ́ín-kĩ́ín ɓɛ́ ɔ nyɔ-ɖáɓá-jèɔ̀ ɖǎ ma kà ɓɔ́ɛɛ ɓiè.

¹³ Xwáɖá-xwíɖíi-nìmììɔ̀ sɔ̃́ nììnɔ̀ nyu ma zɛ̃̀ìn-ɖɛ̀ vɛ̀nɛ̀ ɓě. Ɔ nyuɛ ké nyɛ sɔ̀ìn ma ɖé dyɔún, ké ɔ dyi ma ɓóɖó-kpàà kɔ̃ ɖé nyɔǔn dyúa.

¹⁴ Ɔ zɛ̃̀ìn-ɖɛ̀ ɓɛ́ wa wɔ̃́ ɓɛ́ ɔ ké ma kà nyu ɖé xwáɖá-xwíɖíi-nìmìì kĩ́ín-kĩ́ínɔ̀ dyúa kɛɛ, ɔ cáìn ma nyɔ ɓě cĩ́ ma ɓóɖó-kpàà kɔ̃ɛɛ mú. Ɔ cɛ̃ɛ ma wa gbo, ɓɛ́ wa ké ma hwɔìn-ɖɛ̀ ɖò nyu ɓó nimii ɓɛ́ wa puàìn ma kà gàsíà, ké ɔ cĩ́ ma kà kɛɛ bìì.

¹⁵ Wa wɔ̃́ ɓɛ́ nimiiɔ̀ sɔ̃́ nììnɔ̀ ké ma nimii kĩ́ín-kĩ́ínɔ̀ hwɔìn-ɖɛ̀ɔ̀ fɛ̀ɛ̀ nyí, ɓɛ́ hwɔìn-ɖɛ̀ɔ̀ ké wùɖù, ɓɛ́ ɔ ké nyɔ séín ɓě se ɔ ɓièɛ̌ muɛɛ ɖáɓá.

¹⁶ Ké nimiiɔ̀ nyuɛ ɓɛ́ wa ké nyɔ séín, dyú kè vɛ̀nɛ̀, bã-nyɔ̀ kè gǎ-dyé-nyɔ̀, nyɔ ɓě nì gǐì-kũ̀à múɛ ɔ kè nyɔ ɓě se gǐìɛɛ bɛ̃̌ ɖò wa ɖiaùn-sɔ̃̀ɔ̀ mɔɔ wa dyúa-kpàɔ̀ kɔ̃ po.

¹⁷ Nyɔ ɖò se ma ɖɛ dɔ̃ɔ ɓɛ́ìn mɔɔ ɖɛ peɖeɛ ɓɛ́ìn, ɔ ɓéɖé dyɛɛ bɛ̃̌ɔ̀ hwɛ̀. Bɛ̃̌ɔ̀ mɔ̀ xwáɖá-xwíɖíi-nìmììɔ̀ nyɛ́nɛ́ mɔɔ nyɛ́nɛ́ɔ̀ nɔ̀ɓà.

¹⁸ Ɖɛ nìà kɛ mɔ́ hwòɖǒ-fɔ̀nɔ̀-fɔ̀nɔ̀. Nyɔ ɓéɖé ɖɛ-múin-wɔ̃́-wɔ̃́ɛɛ mɛ poìn nimiiɔ̀ nɔ̀ɓàɔ̀ jè hwìɖǐi, sepóɛɖé nɔ̀ɓàɔ̀ mɔ̀ gàa ɖòɛ̀ nɔ̀ɓà. Ɔ nɔ̀ɓàɔ̀ mɔ̀ hɔ̃dɛ̀ɖɛ̀ mɛ̀nɛ̌ìn-ɖò kè kpáɖá-nyɔ tã sè mɛ̀nɛ̌ìn-ɖò.