Wɛ̀ɖɛ̀ɓèɖésĩ̀ɔ̀ 10 - Ɓǎsɔ́ɔ̀ Báɓòɔ̀

Ínjàɔ̀ kè céè-ɖɛ̀-mì páɖá-páɖá dyùwèɔ̀

¹ Ké ḿ dyé ma ínjà ɓéɖé gana ɖò ɖe, ɔ sɔ̀ ma ɖé dyɔún, ké ɔ nì ma ɓíɖíi dyiɛń. Ní-kpò ɖò bĩìn ma ɔ dyi, ké ní-mɛ̀nɛ̀ ɖò bĩìn ma ɔ dúɔ̀ dyi. Ɔ dyúa-kpàɔ̀ nì ma kà dyóɖóɔ̀ nìà kɛ, ké ɔ ɓo ɓěɔ̀ nì ma kà cu nì sĩɛń nìà kɛ.

² Ké ɔ ɓéɖé ma céè-ɖɛ̀-mì páɖá-páɖá dyùwè ɓɛ́ ɔ ɖǎ ma dyí kaà kɛɛ xwa. Ké ɔ síìn ma ɔ ɖiaùn-ɓòɔ̀ dyóóɔ̀ kɔ̃, ké ɔ síìn ma ɔ kunuà-ɓòɔ̀ toɖoí.

³ Ké ɔ páná ma mú ɖé wuɖu zoo mú kà ganìǎ kuɖuà kɛ. Ké ti ɔ páná ma múɛɛ, zɛ-kpà mɛ̀nɛ̌ìn-sɔ̃́ páná ma.

⁴ Ti ɓɛ́ wa páná maa, ḿ mɔ́ ɓɛ́ ḿ ké ma ɖɛ céèɛ̀ gbɔ dè. Kɛɛ ḿ wɔ̃́ ma wuɖu ɖò sɔ̀ìn ɖé dyɔún, ké ɔ ɖá, “Nyɔ ɖò ní dyuò ɖɛ zɛ-kpà mɛ̀nɛ̌ìn-sɔ̃́ɔ̀ cɛ̃à kɛ. Mɔ̀ǔn ɖá ɓɛ́ m̀ kéɛ céè.”

⁵ Ké ínjà ɓɛ́ ḿ dyé ma kà, ké ɔ ɓo ɖò nì ma kà dyóóɔ̀ kɔ̃, ké ɖò nì ma kà toɖoíɛɛ tò ma ɔ ɖiaùn-sɔ̃̀ɔ̀ ɖé dyɔún.

⁶ Ké ɔ gboò ma ɖé Gèɖèpɔ́ɔ̀ mɔ̀à nyɔ muà cĩ́ìn kánáá pū, ɓɛ́ ɔ mɛà dyɔɔ̀ kè ɖɛ ɓě nì ɖé dyɔɔ̀ dyí, ké ɔ mɛà ɓóɖó-kpàà kè ɖɛ ɓě nì ɖé ɓóɖó-kpàà kɔ̃, ké ɔ mɛà dyóóɔ̀ kè ɖɛ ɓě nì ɖé níɔ̀ gboɛɛ dyí. Ɔ ɖá, “Ti zĩ̀ìn-zĩ̀ìn ɖò se nìɛ̌ mu ɖe.

⁷ Kɛɛ ti ínjàɔ̀ mɛ̀nɛ̌ìn-sɔ̃́ nììnɔ̀ mu ɔ gã̀àɔ̀ ɓaɖaùn wɛ̃ɛ, ɖɛ ɓě ɓɛ́ Gèɖèpɔ́ɔ̀ hwòɖǒ poà gbɔ, ɓɛ́ ɔ vǐè ma kĩ́ín nyɛɛ, ɔ mu ná kpáùn kà ɓɛ́ ɔ cɛ̃ɛ ma kà ɖé ɔ gbo-nì-nyɔ̀ ɓě mɔ̀à ɔ kpáá-ɖɛ̀-cɛ̃-nyɔ̀ ɓěɔ̀ kɛɛ gbo kĩ́ín nyɛ.”

⁸ Ké wuɖu ɓɛ́ ḿ wɔ̃́ ma kà sɔ̀ìn ɖé dyɔún wɛ̃ɛ wùɖù ma ḿ gbo ɖe, ké ɔ ɖá, “Mu, ɓɛ́ m̀ ké céè-ɖɛ̀ kaà dyí, ɓɛ́ ínjà ɓɛ́ ɔ nyànàà dyóóɔ̀ kè ɓóɖó-kpàà kɔ̃ɛɛ ɓéɖéà xwaa ɔ xwaún zà.”

⁹ Ɔ jèɛɛ, ḿ mu ma ínjàɔ̀ gbo, ké ḿ cɛ̃ɛ ma ɔ gbo, ɓɛ́ ɔ ké ḿ céè-ɖɛ̀-dyùɔ̀ nyí. Ké ɔ cɛ̃ɛ ma ḿ gbo, ké ɔ ɖá, “Kpɔ̃ɔ dyi, ɓɛ́ m̀ kéɛ ɖi. Ɔ mu m̀ wĩín ɖéèìn kà ɖo nìà kɛ, kɛɛ ɔ mu nɛɛ̀ìn ɖé m̀ xwíníín.”

¹⁰ Ké ḿ zà ma céè-ɖɛ̀-dyùɔ̀ ínjàɔ̀ xwaún, ké ḿ tàà ma. Ɔ ɖéè ma ḿ wĩín kà ɖo-nì nìà kɛ. Kɛɛ ti ḿ manaa ma kɛɛ, ɔ nɛɛ̀ ma ɖé ḿ xwíníín.

¹¹ Ké wa cɛ̃ɛ ma ḿ gbo, ké wa ɖá, “Wuɖu ɓě ɓɛ́ Gèɖèpɔ́ɔ̀ muà m̀ wĩín dèìn ɓá nyɔ-dù kò-kò pàɖǎ kè ɓóɖó-dù pàɖǎ kè wuɖu pàɖǎ ɔ kè ɓóɖó-kpàà nàìn-nyɔ̀ pàɖǎ dyíɛɛ, m̀ mɛ cɛ̃ɛ ɖe.”