Nɔ́ɔ́ 8 - Ɓǎsɔ́ɔ̀ Báɓòɔ̀

Fɔ̀nɔ̀-hwòɖǒ ɓàìn-ɓàìn

¹ Tò ɖùǔ, kà fɔ̀nɔ̀-hwòɖǒ nì ɖáuń wɛ̃. Ɖɛ-múin-wɔ̃́-wɔ̃́ nì mú pánáuń.

² Ɔ nyànà ɖé toɖo ɓě dya dyi ɓó hwìèɔ̀ gbìǐ, ɔ kè ɓó hwìè-gmǎà ɓěɔ̀ dyíin.

³ Ɔ nyànà ɓó hwɔɖɔɔ̀ gmɔ-wɔ̃̀ɔ̀ gbo dyi, ɔ kè ɓó gbǒ-wɔ̃̀ ɓěɔ̀ gbo.

⁴ Ɔ ɖá, “Ɓě mɔ̀ nyɔǔn-dyù ɓěɛɛ, ɓě mɔ̀ nyɔ ḿ nì ɖáuń. Ḿ nì mú pánáuń, ɓɛ́ nyɔǔn-dyù ké ní wuɖuɔ̀ wɔ̃́.

⁵ Ɓě mɔ̀ nyɔ ɓě seà hwòɖǒ kɔ̃in cɛ̃̀ɛ, ɓě cɛ̃́ hwòɖǒ kɔ̃in cɛ̃̀ɛ̀. Ɓě mɔ̀ nyɔ ɓě mɔ̀à zuɖuu-nyɔ̀ ɓěɛɛ, ɓě cɛ̃́ hwòɖǒ-fɔ̀nɔ̀-fɔ̀nɔ̀.

⁶ Ɓě tò ɖùǔ. Ní mu ɖɛ kpa ɖɛ ɓě cɛ̃ìn. Ɖɛ ɓě mɔ̀ dyí-sɛ́ɖɛ́ìn-ɖɛ̀ kɛɛ mu ɖé ḿ wĩín sɔ̀ùn.

⁷ Ní mu ɖɛ ɓě mɔ̀ jǎà-ɖɛ̀ ɓě kɛɛ cɛ̃ìn. Ḿ nyɛ́ se mú.

⁸ Wuɖu séín sɔ̀ ḿ wĩín nyɛɛ mɔ̀ jǎà nyɛ̀nɛ̀ɛ̀. Ɖɛ sɔ̀ìn hwìǐ mɔɔ ɖɛ kíɖíìn múin ɖò se ɖéɛ mú nì fɔɔ.

⁹ Wa séín nì wáɖáá ɓó nyɔ ɓě ɓɛ́ wa ɓéɖé ɖɛ-múin-wɔ̃́-wɔ̃́ɛɛ gbo, ké wa nì pùɖùé ɓó nyɔ ɓě dyuò ɖɛ kɛɛ gbo.

¹⁰ Ɓě ɓɔ́ séɓàɖà dyí ɖúɛ. Ɖɛ ɓě mɛ ɖú dyíɛɛ mɔ̀ ní nyɔ-náún-po-wùɖù ɓěɔ̀. Ɓě gã ɖɛ-dyuò-dyuò, ké ɔ mɛ ɓɔ́ góò hwɛ̀ zɛ̀nɛ̌ǐn jǔɛ.

¹¹ Sepóɛɖé fɔ̀nɔ̀-hwòɖǒ kpa ɖɛ ké ɔ zi bɛ̃̀ìn-ɖɛ̀ dyí. Ɔ kpa ɖɛ ké ɔ zi nyɔǔn-dyùɛ̀ mɔ́ɔ́-ɖɛ̀ séín dyí.

¹² “Mɔ̄ mɔ̀ fɔ̀nɔ̀-hwòɖǒ. Ḿ kè ɖɛ-múin-ɖe-ɖe cĩ́ dà dyúáɖò. Ḿ dyuò ɖɛ-dyuò-dyuò kè ɖɛ-múin-wɔ̃́-wɔ̃́ da.

¹³ Bounɓoɔ̀ dyi-fɛ̃̀ìn-fɛ̃̀ìn xwíníín mɔ̀ ɓɛ́ nyɔ ké ɖɛ gbà mú nyɛ́. Ḿ nyɛ́ nyɔ-mìɔùn-dyí-ɓúáìn-ɓúáìn dú kò-kò ɓě kè ɖɛ-gbà-nyu-kpèɖè ɓě ɔ kè wĩín-dyi-nyìnììn-nyìnììn mú.

¹⁴ Nyɔ-náún-po-wùɖù kè fɔ̀nɔ̀-hwòɖǒ sɛ́ɖɛ́ìn dyí mɔ̀ ní kɔ̃̀ɔ̀-ɖɛ̀, ké ḿ ɓéɖé ɖɛ-múin-wɔ̃́-wɔ̃́ kè kpé.

¹⁵ Kã́á ɓě kɔ̃̀ ɓóɖó wuɖuí dyììn ɖé ḿ mú, ké mɔ̄ mɔ̀ nyɔ nyuɛ ké gɔ̌mànà-nyɔ̀ ɓě po gma sɛ́ɖɛ́ìn dyíɛ.

¹⁶ Gɔ̌mànà-nyɔ̀ vɛ̀nɛ̀-vɛ̀nɛ̀ ɓě kɔ̃̀ ɓóɖó wuɖuí dyììn ɖé ḿ mú. Ɓóɖóɛ̀ cu-kpà ɓě kɔ̃̀ ɓóɖó wuɖuí dyììn ɖé ḿ mú.

¹⁷ Ḿ ɖɛ̀ɓɛ̀ nyɔ ɓě ɓɛ́ wa ɖɛ̀ɓɛ̀ ḿ múɛɛ mú, ké nyɔ ɓě ɓɛ́ wa mɔ́ ḿ dyi kóɖó-kóɖóɛɛ mu ḿ da dyéìn.

¹⁸ Ḿ ɓéɖé bã-bã kè dya-dè-dè, ɓɛ́ ḿ kéɛ nyɔǔn nyí. Ḿ ɓéɖé sɔ̃ún-kpa-ɖɛ̀ mú-wóɖó-wóɖó kè kpáná, ɓɛ́ ḿ kéɛ nyɔǔn nyí.

¹⁹ Ɓo ɓɛ́ ní tòɖò kà cu tòɖòà kɛɛ kpa ɖɛ mìɔ, ké ɔ zi góò hwɛ̀ zɛ̀nɛ̌ǐn kè séɓàɖà hwɛ̀ zɛ̀nɛ̌ǐn dyí.

²⁰ Ní nà dyí-sɛ́ɖɛ́ìn-hwìèɔ̀ xwíníín. Hwìè ɓɛ́ ɔ mu ɖé dyí-sɛ́ɖɛ́ìn-ɖɛ̀ gboɛɛ mɔ̀ hwìè ní sè xwíníín.

²¹ Nyɔ ɓě ɓɛ́ wa ɖɛ̀ɓɛ̀ ḿ múɛɛ, ḿ nyí wa kɔ́mɔ́. Ḿ nyuɛ ké dyi-dè-ɖɛ̀ dyíìn ɖé waà ɖɛín-dyi-dèìn-naín ɓěɔ̀ múin.

²² “Bounɓoɔ̀ mɛ zɔ̃̌ɔ̀ ḿ kĩ́ín ɖé ɔ mɛɛ-ɖɛ̀ séín ɓěɔ̀ gbɔ-dè-tìǐn. Mɔ̄ mɔ̀ ɖɛ séín ɓě ɓɛ́ ɔ mɛ zɔ̃̌ɔ̀ kà kɛɛ kĩ́ín-kĩ́ín nììnɔ̀.

²³ Bounɓoɔ̀ ɖǎ zɔ̃̌ɔ̀ ḿ dyi dè see kĩ́ín, hwɛ̀ ké ɓóɖó-kpàà dè zɔ̃̌ɔ̀ gbɔ.

²⁴ Ɔ mɔ̀ ti ɓɛ́ dyóó ɓě séè zɔ̃̌ɔ̀ nì keɛ, mɔɔ ti ɓɛ́ ní-dù ɖò séè ma ní tò keɛ.

²⁵ Ti ɓɛ́ ɔ séè ma toɖo mɛ́nɛ́-mɛ́nɛ́ kèɛ̀ vɛ̀nɛ̀-vɛ̀nɛ̀ ɓěɔ̀ páún po keɛɛ, ɔ mɔ̀ ti ɔ mɛ zɔ̃̌ɔ̀ ḿ.

²⁶ Ɔ mɛ zɔ̃̌ɔ̀ ḿ, hwɛ̀ ké ɔ mɛ ɓóɖóɔ̀ kè xwáɖá ɓěɔ̀, hwɛ̀ ḿ po níiń, ɓóɖóɔ̀ púu-púu ɖò.

²⁷ Ḿ nì zɔ̃̌ɔ̀ ɓó, ti ɓɛ́ ɔ ké zɔ̃̌ɔ̀ dyɔɔ̀ páún poɛ. Ḿ nì zɔ̃̌ɔ̀ ɓó, ti ɓɛ́ ɔ ké bã̀à ɓó dyɔɔ̀ kè ɓóɖó-kpàà dyí-deìn-naín po ɓó níɔ̀ kɔ̃ɛ.

²⁸ Ḿ nì zɔ̃̌ɔ̀ ɓó, ti ɓɛ́ ɔ ké zɔ̃̌ɔ̀ ní-kpò ɓěɔ̀ ɖé dyɔɔ̀ dyí dèɛ. Ḿ nì zɔ̃̌ɔ̀ ɓó, ti ɓɛ́ ɔ ké zɔ̃̌ɔ̀ ní-dù ɓěɔ̀ nyuɛ.

²⁹ Ḿ nì zɔ̃̌ɔ̀ ɓó, ti ɓɛ́ ɔ ké dyóóɔ̀ nììn sèìn-naínɔ̀ bã̀à cɛ̃ ɓɛ́ níɔ̀ ní kɔ̃̀ ɖà ɓó péɖéɛ. Ḿ nì zɔ̃̌ɔ̀ ɓó, ti ɓɛ́ ɔ ké ɓóɖóɔ̀ hìɖì-kpà dèɛ.

³⁰ Ḿ mɔ̀ ma sɛ́ɖɛ́-dyuò-nyɔ̀ ɓó ɔ wáún. Ɔ hwòɖǒ dèìn ma ḿ múin ɓó wé séín, ké ḿ nì ma múà mú kánáá pū ɓó ɔ gbo.

³¹ Ḿ kpá ma múàǔn ɓó nyɔ ɓě nìà ɓóɖó-kpàà kɔ̃ɛɛ jè. Ní hwòɖǒ dèìn ma nyɔǔn-dyù múin.

³² “Ɔ jèɛɛ, ní dyú ɓě, ɓě tò ḿ gbo ɖùǔ. Mana nì nyɔ ɓě ɓɛ́ wa kpɔ̃ ní wuɖuɔ̀ dyiɛɛ kɔ̃.

³³ Ɓě kpɔ̃ ná-wùɖù dyi, ɓɛ́ ɓě ké hwòɖǒ fɔ̀nɔ̀. Ɓě ní ɖá ɓě kéɛ ɖùǔn dyi zàìn.

³⁴ Mana nì nyɔ ɓě ɓɛ́ wa tò ḿ gbo ɖùǔɛɛ kɔ̃. Wa mɔ̀ nyɔ ɓě ɓɛ́ wa nì ɓó ní gmɔ-wɔ̃̀ɔ̀ gbo ɓó wé kè wé xwíníín, ké wa nì fòèɛ̌n ɓó ní gbǒ-wɔ̃̀ɔ̀ gbo kɛ.

³⁵ Sepóɛɖé nyɔ kã̀ìn séín ɓɛ́ wa dyé ḿ da kɛɛ, wa dyé fɛ̀ɛ̀ da, ké Bounɓoɔ̀ hwòɖǒ dèìn wa múin.

³⁶ Kɛɛ nyɔ kã̀ìn séín ɓɛ́ wa se ḿ dyi mɔ́ ɓɛ́ wa ké ḿ da dyéɛɛ puà wa mìɔùn bũ̌in, ké nyɔ ɓě ɓɛ́ wa nyɛ́ ḿ múɛɛ ɖɛ̀ɓɛ̀ gĩɔ mú.”