Nɔ́ɔ́ 7 - Ɓǎsɔ́ɔ̀ Báɓòɔ̀

¹ Ní dyú, kpɔ̃ ní wuɖu ɓěɔ̀ dyi kóɖó-kóɖó. Ɖɛ ɓě ɓɛ́ ḿ ɖǎà m̀ náún pòìn nyɛɛ ní ɖá wa ké m̀ hwìɖǐi sɔ̀.

² Kpɔ̃ ɖɛ ɓě ɓɛ́ ḿ ɖǎà m̀ tɛ̀mɛ̀ìn nyɛɛ dyi kóɖó-kóɖó, ɓɛ́ m̀ ké cĩ́. Gmɔ̀ wa dyí kóɖó-kóɖó kà m̀ gmɔ̀à nì dyéɖé-dyùàɔ̀ dyíɛ.

³ Nyu wa ɖúú mú, ɓɛ́ m̀ kéɛ sɔ̃ po, ɓɛ́ wa ní kɔ̃̀ ɖà m̀ hwìɖǐi sɔ̀. Céè wa nì hwòɖǒ-dyùàɔ̀ dyéɖéí.

⁴ Cɛ̃ɛ fɔ̀nɔ̀-hwòɖǒ gbo, ɓɛ́ m̀ ké níiń, “M̀ mɔ̀ ḿ ɖíí-màào.” Kpɔ̃ ɖɛ-múin-wɔ̃́-wɔ̃́ ɓǎto mú.

⁵ Wa mu m̀ dyí gmɔ̀ùn sɔ̀ìn ɖé gàa kà kò ɖò nììn gmààɔ̀ xwaún. Ɔ mɔ̀ màa ɓɛ́ ɔ ɓéɖéà nyɔ-pɛ́í-po-wùɖùɛ.

Gbàɖàùn-màà

⁶ Wé ɖòɛ̀ ɓaɖaa, ḿ nì ma ní wúɖɛ̀-wɔ̃̀ɔ̀ cu ɓěɔ̀ pṹa gmɔ̀ǐn,

⁷ ké ḿ dyé ma gàa-dyù gmɔ̀ se hwòɖǒ kɔ̃in cɛ̃̀ ɓě, kɛɛ ḿ dè ma zuɖuu-gàà-dyù dyúáɖò dyéɖé gbo jɛ́ɛ́.

⁸ Ɔ nì ma hwìè zĩ̀ìn ɓó màa ɖò ɓíɖí-gbǒ wáún wɛ̃ɛ zĩ̀ɛ̌n, ké ɔ pàìn ma ɖé màaɔ̀ gbǒɔ̀ gbo.

⁹ Ɔ mɔ̀ ma hwìo pɛ̀ɛ ɓó xwaún-dyi-tìě-kpɔ̃-ɓàɖà.

¹⁰ Púɛɛ, màaɔ̀ dyi ma ɔ hwìǐ. Ɔ po ma ɖɔún kà gbàɖàùn-màà poà ɖɔún wɛ̃. Ɔ hwòɖǒ ɖǎ ma kà ɔ ké ɔ cáa nyuɛɛ gbɔ po.

¹¹ Ɔ mɔ̀ màa ɓɛ́ ɔ sùmù dyúa dyi, ké ɔ se dɛ̃ kɔ̃̀ɛ. Ɔ ní kò ɖé ɔ ɓíɖí-taún dyi.

¹² Nìǒ kpã́ún ní, ɔ wóɖóìn ɖé hwìè dyí. Nìǒ kpã́ún ní, ɔ wóɖóìn ɖé ɖɛ-pèɖèìn-naínɔ̀. Ɔ nì gã séín gbo, ké ɔ nì hwìè fòɛ̌n.

¹³ Ɔ kpɔ̃ ma gàa-dyù gmɔ̀ɔ̀, ké ɔ nyá ɔ wɔ̃. Ké ɔ gmɔ̀ gàa-dyù gmɔ̀ɔ̀ dyéɖéín gãa, ké ɔ ɖá,

¹⁴ “Ḿ nyu ní gbo-kpɔ̃ìn-sàǎ-zàìn-ɖɛ̀ ɓó zɛ̃̌ɛ̀, ɓá ɖɛ kɔ̃̀ wuɖu ḿ ɖi ma kɛɛ jè dyí, ké ɖii-ɖɛ̀ ɓáún-ɓáún sè ɓó.

¹⁵ Ɔ jèɛɛ, ḿ dyià m̀ hwìǐ kɛ̀. Ḿ dyà m̀ dyi mɔ́ɔ, ké ḿ dyéà m̀ wɛ̃̀.

¹⁶ Ḿ ɖǎ ɖénì-ɖɔ̀ ɓéɖé dyéɖé kò-kò sɔ̀ ɖé Íjè-ɓòɖòɔ̀ kɔ̃ɛɛ dyí ɖú, ké ḿ ɖǎ ní kɔ̃-pɛ̃́-ɖɛ̀ɔ̀ bɛ̃̀ìn.

¹⁷ Ké ḿ ɖǎ ní kɔ̃-pɛ̃́-ɖɛ̀ɔ̀ kɔ̃ nyɔ́ún-nɔ̀mɔ̀-ɖɛ̀ɛ̀ dú kò-kò ɓě mɔ̀à mɛ́ɛ̀-nì kè ááɖò ɔ kè sínímà kɛɛ po.

¹⁸ Dyi, ɓɛ́ à ké péé nyuɛń dyi gã̀ ɓɛ́ zɔ̃ ké zɔ̃. À nyu péé, ɓɛ́ à hwòɖǒ ké dyi dè,

¹⁹ sepóɛɖé ní dyú-ɓǎɔ̀ se dà nì. Ɔ ɖǎ dà vɛ̃in ɖò mu, ké ɔ mu ɖé hwèɖèìn.

²⁰ Ɔ kpa wíɖí-ɓɔ̀ɔ̌ ɖò. Dɛ̀nɛ̀ɛ̀ mu wɔ̃ gbǎùn hwɛ̀ ɔ ké ɖe dyi.”

²¹ Ɔ po ma gàa-dyù gmɔ̀ɔ̀ pɛ́í dyììn ɖé wuɖu mú. Ɔ kpɔ̃̀ìn ma ɔ ganaún dyììn ɖé wuɖu ɖéé-ɖéé mú.

²² Wàɖà cá kɛɛ, gàa-dyù gmɔ̀ɔ̀ sí ɔ kíɖíí kà nyɔ kpaà ɓìɖǐ ɖáɓá-naín nyɛ. Ɔ hwɔìn déɖé ɓɛ́ ɔ nì xwáɖá wɔ̃ún wáɖáǐn muɛń nyɛ.

²³ Ɔ mɔ̀ dɛ̀ ɓɛ́ wa muà ɔ ɖí pòìn, ɓɛ́ ɔ kéà ɔ hwòɖǒ-dyùàɔ̀ fíè kɛ. Ɔ hwɔìn naà ɓɛ́ ɔ nì xwáɖá wɔ̃ún wáɖáǐn muɛń nyɛ. Ɔ seɛ dyí dyuò kà ɔ fɛ̀ɛ̀ muɛ xwa sèìn nyɛ.

²⁴ Ɔ jèɛɛ, ní dyú, tò ḿ ɖùǔ gbo. Wɔ̃́ ní wuɖuɔ̀.

²⁵ Mɔ̀ǔn ɖá ɓɛ́ nì hwòɖǒ ké hwìǐ sɔ̀ìn, ɓɛ́ m̀ ké gbàɖàùn-mààɔ̀ gbo gmɔ̀ìn. Mɔ̀ǔn ɖá ɓɛ́ m̀ ké ɔ nììn hwìèɔ̀ xwíníín kpá,

²⁶ sepóɛɖé ɔ ɖǎ nyɔ ɓáún-ɓáún dyi pɛ̃́ìn. Ɔ ɖǎ nyɔ kúɖúú ɖáɓá mìɔ cá.

²⁷ Hwìè mu ɖé ɔ ɓíɖí-taún wɛ̃ɛ mu gĩɔ. Ɔ mɔ̀ hwìè mu ɖé gĩɔ nììn pɛ̃́-naín nyɛ.