Nɔ́ɔ́ 5 - Ɓǎsɔ́ɔ̀ Báɓòɔ̀

Ná-wùɖù ɓá gbàɖàùn po jè dyíɛ

¹ Ní dyú, tò ní fɔ̀nɔ̀-hwòɖǒɔ̀ kè ní ɖɛ-múin-wɔ̃́-wɔ̃́ɔ̀ gbo ɖùǔ kóɖó-kóɖó,

² ɓɛ́ m̀ ké ɖɛ múin ɖeɛ dyuò, ɓɛ́ m̀ ké fɔ̀nɔ̀-hwòɖǒ-kà wùɖùɛ̀ dyuò.

³ Gbàɖàùn-mààɔ̀ ɖéè wĩín dyi kà ɖo ɖéèà kɛ, ké ɔ wĩín-wùɖù ɓɔɖɔɔ̀ ké ɔ zi cáná dyí.

⁴ Kɛɛ ɖé mánáín ní, ɔ wĩín-wùɖù nɛɛ̀ ké ɔ zi wɛ̃́ìn dyí, ké ɔ námá ké ɔ zi gàsíà ɓéɖé dyéɖé sɔ̃́ dyí.

⁵ Hwìè ɔ nà xwíníín nyɛɛ mɔ̀ hwìè mu ɖé gĩɔ kɛ. Ɔ dyi m̀ kpa ní, ɔ kpa m̀ ɖé xwɛ́-ɓìɔ̀ mú.

⁶ Ɔ ní nà hwìè mu ɖé fɛ̀ɛ̀ múɛɛ xwíníín. Hwìè ɓɛ́ ɔ kpa kɛɛ kíɖíìn múin, kɛɛ ɔ seɛ dyuò.

⁷ Ɔ jèɛɛ, ní dyú, tò ní wuɖuɔ̀ gbo ɖùǔ. Mɔ̀ǔn ɖá m̀ ké wuɖu ḿ nìà m̀ gbo cɛ̃iń nyɛɛ dyi pɛ̃́ìn.

⁸ Ɓàɖàìn gbàɖàùn-mààɔ̀ dyi. Mɔ̀ǔn ɖá m̀ ké ɔ ɓíɖí-gbǒ wĩín dyi xwɛ̃́ìn.

⁹ Ɓɔ́ɔ náa nyuɛ, mɔ̀ǔn kɔ̃̀ ɖà nì dya-dè-dèɔ̀ nyɔ kà kò ɖò nyí. Ɔ dyi ná nìǐn, nì mu nì fɛ̀ɛ̀ɔ̀ nyɔ ɓě ɓɛ́ wa ní dyé nyɔ ɖò wìǐn nyɛɛ xwaún dèìn, ké wa muɛ m̀ xwa zàǔn fṹàùn.

¹⁰ Ké nyɔ kà kò ɖò mu nì kɔ́mɔ́-ɖɛ̀ ɓěɔ̀ dyí ɖúùn. Ɖɛ kɔ̃̀ kũ̀à ɓɛ́ m̀ ɖǎ nyuɛɛ mu nyɔ kà kò ɖò nììn gbǒ-xwíníín bã̀ìn.

¹¹ Ké ɖé nì fɛ̀ɛ̀ɔ̀ mánáín ní, nì mu kpòɛ̌n nììn ti ɓɛ́ nì fɔ́ kè nì kpóɖó-dyùà gànáɔ̀ ɖǎ ɓó dyi ɖiɛ hwɛ̀ kɛ.

¹² Ɔ ɖǎ ná nìǐn, nì muɛ cɛ̃ìn, ɓɛ́ m̀ ké níiń, “Ɖɛ́ kɔ̃̀ jè ḿ nyɛ́ ma ná-wùɖù múɛ́? Ɖɛ́ kɔ̃̀ jè ḿ se ma nyɔ-dyí-ɓàɖàìn-wùɖù dyi kpɔ̃ɛ́?

¹³ Ḿ se ma ní ɖɛ-tɛ̀mɛ̀ìn-nyɔ̀ ɓěɔ̀ wuɖu múin wɔ̃́ fɔɔ cá, hwɛ̀ ḿ po níiń, ḿ ké ma wa ɖùǔ gbo tò dyɛ mɔ̀ùn.

¹⁴ Dyéɛ kà ḿ nìǎ dɛ̃-ɖɛ̀ dyí dyéɛń ɓó vòò-nyɔ̀ ɓě dyéɖé waí kɛ.”

¹⁵ Ná ní sɔ̀à ɖé m̀ mìɔùn nììn ní-dyààɔ̀ múɛ, ɔ kè zii-nì sɔ̀ìn ɖé m̀ mìɔùn nììn ní-píní-naínɔ̀ kɛ.

¹⁶ Nì hwòɖǒ ɖá ɔ nɔ̀mɔ̀ dyíin ɓɛ́ m̀ ké m̀ mìɔùn dyi hwɔ̀ìn ɖé màa séín gbo pūe?

¹⁷ M̀ mɛ nì ɓó nì gmààɔ̀ ɖòùn bìì. M̀ mɛ ɓɔ́ m̀ mìɔùn dyi hwɔ̀ìn ɖé màa kà kò ɖò ɓě gbo.

¹⁸ Nì hwòɖǒ mɛ dèìn màa ɓɛ́ m̀ ɖǎ dyi kpɔ̃ɛɛ múin. M̀ mɛ kpá múàǔn ɓó ɔ jè.

¹⁹ Ɔ nɔ̀mɔ̀ dyíin kà déɖé nyɔ́nɔ́ nìà kɛ. Nì hwòɖǒ mɛ dèìn ɔ nììn ɖɛ̀ɓɛ̀ǐn-ɖɛ̀ɓɛ̀ǐnɔ̀ múin kánáá pū. Ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ mɛ bĩìn m̀ dyi.

²⁰ Ní dyú, ɖɛ́ kɔ̃̀ jè màa kà kò ɖòɛ̀ ɖɛ̀ɓɛ̀ǐn-ɖɛ̀ɓɛ̀ǐn kéà m̀ dyi bĩìn nyɛ́? Ɖɛ́ kɔ̃̀ jè m̀ kéà gàa kà kò ɖò nììn gmàà hwòɖǒ gbèɖèìn nyɛ́?

²¹ Sepóɛɖé Bounɓoɔ̀ dyé ɖɛ séín ɓɛ́ nyɔǔn-dyù nyuɛɛ ní, ké ɔ dè nyɔ ɖò-ɖò séínɛ̀ nà-ɓò dyéɖé gbo.

²² Hwòɖǒ-kɔ̃in-nyìnììn-nyɔ̀ɔ̀ ɖɛ gbà ɓɛ́ ɔ nyuɛɛ mɔ̀ xwáɖá-gbǎ-mú ɓó ɔ mìɔùn bìì. Nàmàǔn ɓɛ́ ɔ nyuɛɛ mɔ̀ xwáɖá, ké ɔ kpɔ̃ ɔ.

²³ Ɔ mu mɛ́ìn, sepóɛɖé ɔ se ná-wùɖù ɖò dyi kpɔ̃ jè. Ɔ mìɔùn nììn zuɖu-zuɖuɔ̀ muɛ nyuùn ɓɛ́ ɔ ké xwáɖáún sè.