Nɔ́ɔ́ 4 - Ɓǎsɔ́ɔ̀ Báɓòɔ̀

Kpáná nì hwòɖǒ-fɔ̀nɔ̀-fɔ̀nɔ̀ múɛ

¹ Ní dyú ɓě, ɓě tò ɓěɛ̀ ɓǎà ná-wùɖùɔ̀ ɖùǔ gbo, ɓɛ́ ɓě kéɛ dyi kpɔ̃, nìí ɓɛ́ ɓě ké ɖɛ múin wɔ̃́.

² Ɖɛ ḿ nìà ɓě tɛ̀mɛ̀ǐn nyɛɛ nɔ̀mɔ̀ dyíin mìɔ. Ɔ jèɛɛ, ɓě ní táà dyi.

³ Ti ɓɛ́ ḿ mɔ̀ ma gàa-dyù-gbɔ́ɔ́, ké ḿ nì ma ḿ ɓǎ woɖoún, ké ḿ mɔ̀ ma ḿ ɖeɛ̀ ɖɛ̀ɓɛ̀-dyùɛɛ,

⁴ ḿ ɓǎ tɛ̀mɛ̀ìn ma ḿ ɖɛ. Ɔ cɛ̃ɛ ma ḿ gbo, ké ɔ ɖá, “M̀ mɛ pɛ̃́ìn ní wuɖu ɓěɔ̀ hwìɖǐi kóɖó-kóɖó. Nyu ɖɛ ɓě ɓɛ́ ḿ cɛ̃ m̀ gboɛ, ɓɛ́ m̀ ké cĩ́.

⁵ Cɛ̃́ fɔ̀nɔ̀-hwòɖǒ. Cɛ̃́ ɖɛ-múin-wɔ̃́-wɔ̃́. Ní wuɖu ɓěɔ̀ mɛ ɓɔ́ m̀ hwìɖǐi sɔ̀ɔ̀. Mɔ̀ǔn ɖá ɓɛ́ m̀ ké wa kɔ̃ín pòìn.

⁶ Mɔ̀ǔn ɖá ɓɛ́ m̀ ké fɔ̀nɔ̀-hwòɖǒ dyi táà. Ɔ mu m̀ dyí gmɔ̀ùn. Ɖɛ̀ɓɛ̀ ɔ mú, ké ɔ mu m̀ dyéɖé gbo dèìn.

⁷ Fɔ̀nɔ̀-hwòɖǒ mɔ̀ ɖɛ kpa ɖɛ ɖé ɖɛ séín hwìɛ̀ jèɛɛ, kpɔ̃ fɔ̀nɔ̀-hwòɖǒ. Ɖé ɖɛ séín nì mu kpɔ̃ùn wɛ̃ɛ hwìɛ̀ kɛɛ, kpɔ̃ ɖɛ-múin-wɔ̃́-wɔ̃́.

⁸ Ɔ jè mɛ kpa ɖɛ mìɔ ɖé m̀ gbo, nìí, ɔ mu m̀ dyií ɖúùn. Gbèɖèìn ɔ hwòɖǒ, nìí, ɔ mu m̀ nyɔ-dya-dè-pà mú poùn.

⁹ Ɔ mu nì dúɔ̀ bɛ̃̀ìn-ɖɛ̀ jǔùn. Ɔ mu m̀ kã́á-gbàǎ kpa ɖɛ kɛɛ dú dèìn.”

¹⁰ Tò ɖùǔ, ní dyú. Kpɔ̃ ní wuɖu ɓěɔ̀ dyi, ɓɛ́ nì zɔ̃ ké dyí vò.

¹¹ Ḿ ɖǎ m̀ ɖɛ mɔ̀ fɔ̀nɔ̀-hwòɖǒɛɛ tɛ̀mɛ̀ìn, ké ḿ ɖǎ m̀ hwìè sɛ́ɖɛ́ìn dyíɔ̀ xwíníín kpàìn.

¹² M̀ dyi nàǔn nìǐn, ɖɛ ɖò se nì hwìèɔ̀ kãá mu. Ké m̀ dyi peɖeɛ kpa ní, m̀ se gbǒɛ mu.

¹³ Pɛ̃́ìn ní ná-wùɖùɔ̀ hwìɖǐi kóɖó-kóɖó. Mɔ̀ǔn ɖá ɓɛ́ m̀ kéɛ dyi táà. Dèɛ̀ dyéɖé gbo, sepóɛɖé ɔ mɔ̀ nì cĩ́-cĩ́.

¹⁴ Mɔ̀ǔn ɖá ɓɛ́ m̀ ké hwòɖǒ-kɔ̃in-nyìnììn-nyɔ̀ɔ̀ nììn hwìèɔ̀ xwíníín kpá. Mɔ̀ǔn ɖá ɓɛ́ m̀ ké ɖɛ-gbà-nyu-nyɔ̀ɔ̀ nyuu-ɖɛ̀ dyéìn, ɓɛ́ m̀ kéɛ nyu.

¹⁵ Ɓɔ́ɔ nyuɛ. Ɓɔ́ɔ bũ̌in xwɛ̃́ìn. Ɓàɖàìn dyi, ɓɛ́ m̀ ké zi.

¹⁶ Hwòɖǒ-kɔ̃in-nyìnììn-nyɔ̀ ɓěɔ̀ ní mɔ́, ɔ sèìn ké wa nyu ɖɛ gbà ɖò hwɛ̀. Wa se nyíɔ-ɓò ɖò dyéɖéí dèɛ̌ mu, ɔ sèìn ké wa nyuɛ ké nyɔ ɖò ɓuɖu hwɛ̀.

¹⁷ Hwòɖǒ-kɔ̃in-nyìnììn-ɖɛ̀ nyu-nyu mɔ̀ waà ɖii-ɖɛ̀, ké nyɔ-ɖɛ-gana-xwa-zàìn-zàìn mɔ̀ waà náá-ɖɛ̀.

¹⁸ Dyí-sɛ́ɖɛ́ìn-nyɔ̀ ɓěɔ̀ nììn hwìèɔ̀ nì kà zɔ̃-wĩín-cè nìà kɛ. Ceɔ̀ gã̀ kɔ̃ kpáuń dyi tee ké zɔ̃ wáɖá hwɔɖɔún dyi pùɖùé.

¹⁹ Kɛɛ hwòɖǒ-kɔ̃in-nyìnììn-nyɔ̀ ɓěɔ̀ nììn hwìèɔ̀ hwɔìn tíe-kpòǔn-hwìè. Wa gbǒ, ké wa ɓuɖu, kɛɛ wa se ɖɛ wa gbǒà dyíɛɛ dyéɛ ɓɛ́ìn.

²⁰ Ní dyú, tò ní wuɖuɔ̀ ɖùǔ gbo. Tò ɖɛ ɓě ɓɛ́ ḿ nìà cɛ̃iń nyɛɛ ɖùǔ gbo kóɖó-kóɖó.

²¹ Mɔ̀ǔn ɖá ɓɛ́ wa ké m̀ xwaún dyi zɛ̀nɛ̌. M̀ mɛ pɛ̃́ìn wa hwìɖǐi kóɖó-kóɖó.

²² Wa dyà fɛ̀ɛ̀ kè dyi-káná-káná nyɔ séín ɓě ɓɛ́ wa wɔ̃́ɔ múin nyɛɛ gbo.

²³ Ma mú ɓá ɖɛ ɓě nì mu hwìɖǐi poìn nyɛɛ jè dyí, sepóɛɖé nyɔǔn-dyùɛ̀ cĩ́-cĩ́ gàná sɔ̀ ɖé ɔ hwòɖǒ bũ̌.

²⁴ Táà nyɔ-hwìǐ-zàìn-kà wùɖù-wùɖù dyi. Táà se-tɔ́mɔ́-tɔ́mɔ́ dyi.

²⁵ Nì dyéɖéɔ̀ mɛ gmɔ̀ ɖé m̀ dyúa déín cá. Mɔ̀ǔn ɖá ɓɛ́ m̀ ké dyéɖé hwìǐ zàìn.

²⁶ Gmɔ̀ nì ɓo-bɛ̃̀ɔ̀ dyí, nìí, nì nyuu-ɖɛ̀ séín mu súɖúúí kpáùn.

²⁷ Ɓɔ́ hwìè sɛ́ɖɛ́ìn dyíɔ̀ dyí sɔ̀ɔ̀, ɓɛ́ m̀ ké ɖiaún mɔɔ kunuaún pàìn. Ɓàɖàìn ɖɛ gbà dyi, ɓɛ́ m̀ ké dyúa mu déín.