Nɔ́ɔ́ 31 - Ɓǎsɔ́ɔ̀ Báɓòɔ̀

Náún-po-wùɖù dyi kã́á gboɛ

¹ Wuɖu nìà kɛ mɔ̀ wuɖu ɓɛ́ Ɖɛ̀múè ɓɛ́ ɔ mɔ̀ ma Másà-ɓòɖòɔ̀ kã́á kɛɛ ɖe tɛ̀mɛ̀ìn ma ɔ kɛ. Ɔ ɖá,

² “Óó ní dyú, mɔ̀ mɔ̀à ní xwíníín-zà-dyù kpɔ̀ɖɔ̀ɔ́ kɔ̃̀ jè ḿ ɖǎà wuɖu kɔ̃in ɖììn nyɛɛ, tò ɖùǔ.

³ Mɔ̀ǔn ɖá ɓɛ́ m̀ ké nì kpé séínɔ̀ màa nyí. Nyɔ ɓěa mɔ̀ kã́á ɓě mú-gbɔɔ̀-nyɔ̀.

⁴ Óó Ɖɛ̀múè, ɔ se wɛ̃̀ìn ɓɛ́ kã́á ké wã́ìn ná, mɔɔ ɓɛ́ gɔ̌mànà-nyɔ̀ ké náá-ɖɛ̀ kàmà-kàmà ná,

⁵ náá-ɖɛ̀ɔ̀ ní kɔ̃̀ ɖà ɔ nyu ní, gmaɔ̀ ní kɔ̃̀ ɖà ɔ hwìɖǐi sɔ̀, ɔ ní kɔ̃̀ ɖà dyí-sɛ́ɖɛ́ìn-ɖɛ̀ wɔ̃-po-poɔ̀ hwìǐ zàìn ɓó gǎ-dyé-nyɔ̀ séín bìì.

⁶ M̀ mɛ nyí náá-ɖɛ̀ kàmà-kàmàɔ̀ nyɔ ɓɛ́ ɔ nì mɛ́iń nyɛ kè nyɔ kɔ̃̀ hwòɖǒ-dyùà kpá ɖé ɖei mìɔ kɛ.

⁷ Ɔ mɛ ná, ɓɛ́ ɔ gǎɔ̀ jè ké ɔ hwìɖǐi sɔ̀, ɓɛ́ ɔ wìì-ɖɛ̀ ɓěɔ̀ ɖò ké se ɔ hwìɖǐi nì ɖe.

⁸ “Ɓáà wɔ̃, ɓɛ́ m̀ ké wùɖù ɓó nyɔ ɓɛ́ ɔ seà ɔ mìɔùn bìì wùɖùɛ̀ ɓɛ́ìn nyɛɛ bìì. Cɛ̃ dyí-sɛ́ɖɛ́ìn-ɖɛ̀ɔ̀ ɓó nyɔ nìà mú gbɔɔ̀ǔn muɛń nyɛɛ bìì.

⁹ Ɓáà wɔ̃, ɓɛ́ m̀ ké dyí-sɛ́ɖɛ́ìn-ɖɛ̀ wɔ̃ po ɓó gǎ-dyé-nyɔ̀ bìì.”

Nyɔ́nɔ́ún-nyɔ̀nɔ̀

¹⁰ Ɔ kàmà mú ɓɛ́ gàa ɖò ké kpeɖeɛ̀-dyíin-nɔ̀mɔ̀-màà ɖò dyé, sepóɛɖé kpeɖeɛ̀-dyíin-nɔ̀mɔ̀-mààɔ̀ kpa wíɖí ké ɔ zi sɔ́ɔ́ kpa ɖɛ ɓě dyí.

¹¹ Ɔ dyú-ɓǎ dè ɔ hwòɖǒ kɔ̃, ké ɔ se ɖɛ kpa ɖɛ ɖòɛ̀ gǎ dyéɛ mu sɔ̃̀ùn-sɔ̃̀ùn.

¹² Ɔ nyu ɔ dyú-ɓǎɔ̀ nɔ̀mɔ̀ dyíin dyí ɖé ɔ fɛ̀ɛ̀-wè séín xwíníín, ké ɔ ní nyu ɔ ɖɛ gbà ɖò bũ̌.

¹³ Ɔ mɔ́ ɓáɖáá-mì kè ɓáá-ɖɛ̀ ɖò kɔ̃̀ nyɛ́nɛ́ mɔ̀ fáɖáà kɛɛ dyi, ké ɔ nyùìn ɔ sɔ̃ɔ̀ kũ̀à mú ɖé hwòɖǒ-wɔ̃́-wɔ̃́ mú, ké ɔ ɖaɓa ɖɛ ɓěa ɖɔ mú.

¹⁴ Ɔ hwɔìn méè ɓɛ́ ɔ mɔ̀ peɖee-ɖɛ̀ dyà-nyɔ̀ kɛ. Ɔ zà ɔ ɖii-ɖɛ̀ ɖéé ɖé dà vɛ̃in.

¹⁵ Tíe kpɔ̃ ɓíɖíi dyi ke, ké ɔ dùnùìn dyí sɔ̀ǔn ɓó ɔ taà gànáɔ̀ ɖii-ɖɛ̀ dyi mɔ́ jè, ɔ kè ɓɛ́ ɔ ké ɔ gbo-nì-màà ɓěɔ̀ nììn kũ̀à wa da zàìn.

¹⁶ Ɔ dyé pá ɖò da, ké ɔ ɖeɛ jè múin nɔ̀mɔ̀ dyíin, ké ɔ dɔ̃ɔ. Ké ɔ ɓá géɖéè-gbǎ ɖò dyììn ɖé wíɖí ɓɛ́ ɔ mìɔùn mɔ́ɛɛ mú.

¹⁷ Ɔ ku dúún, ké ɔ ɖɛ̀ɓɛ̀ gana-kũ̀à nyu-nyu mú.

¹⁸ Ɔ dyuòɛ̀ dyí kà ɓɛ́ ɖɛ ɓě ɓɛ́ ɔ nyuɛɛ mɔ̀ ɖɛ ɓě ɓɛ́ wa mu wíɖí pàɖǎ mú dɔ̃ùn wɛ̃. Ɔ ɖáùnpòɔ̀ ní mɔ́ ɓó máaún.

¹⁹ Ɔ nyu ɔ mìɔùn nììn dyèě, ké ɔ ɖaɓa ɔ mìɔùn nììn ɖɔ.

²⁰ Ɔ ɓáà xwaí ɓó gǎ-dyé-nyɔ̀ gbo, ké ɔ pɛ́ɛ̀ sɔ̃ ɓó nyɔ ɓɛ́ ɔ se ɖɛ ɖò ɓéɖéɛɛ bìì.

²¹ Ɔ se hwòɖǒ dyií gbǎìn ɓó sɔ̃̀ɔ̀-tìɔ̀ jè ɓá ɔ taà gànáɔ̀ jè dyí, sepóɛɖé ɔ nyuɛ ké wa séín po sɔ̃̀ɔ̀-ɖɔ̀ jɔ̃-jɔ̃ mú nyɛ̀nɛ̀ɛ̀.

²² Ɔ nyu ɔ mìɔùn nììn kɔ̃-pɛ̃́-ɖɔ̀, ké ɔ mìɔùn po ɖénì-ɖɔ̀ nɔ̀mɔ̀ kɔ̃in mú.

²³ Ɔ dyú-ɓǎɔ̀ se dyí kĩà. Ɔ nì díɖí ɖé ɓóɖó-nyɔ̀ vɛ̀nɛ̀ ɓě hwìɛ̀, ɖé zɔ̃́ín-wɔ̃-pòìn-naín.

²⁴ Ɔ nyu ɖénì-gã̀ùn ɓě kè gbo-jìnììn-ɖɛ̀ ɓě, ké ɔ pèɖèìn wa ɖɛ-peɖe-nyɔ̀ ɓě gbo.

²⁵ Kpé kè kpéín-dyé-dyé mɔ̀ ɔ bɛ̃̀ìn-ɖɛ̀, ké ɔ ní gbǎìn gàɖàà jè hwòɖǒ dyií.

²⁶ Ɔ dyi wɔ̃ ɓáà ní, ɖɛ sɔ̀ ɖéɛɛ mɔ̀ fɔ̀nɔ̀-hwòɖǒ. Ké tɛ̀mɛ̀ìn-ɖɛ̀ ɓá ɖɛ̀ɓɛ̀ǐn-ɖɛ̀ɓɛ̀ǐn jè dyíɛɛ nì ɔ miɔ kɔ̃.

²⁷ Ɔ gmɔ̀ ɔ taà gànáɔ̀ gbo nɔ̀mɔ̀ dyíin, ké ɔ ní wáɖá sɔ̃ pĩ́ín.

²⁸ Ɔ dyú ɓě po ɔ zùo ɓáún-ɓáún, ké ɔ dyú-ɓǎɔ̀ ɓàìn ɔ ɖekè.

²⁹ Ɔ dyú-ɓǎɔ̀ ɖá, “Màa ɓáún-ɓáún kpeɖe nɔ̀mɔ̀ dyíin, kɛɛ mɔ̀ùn zi wa séín kɔ̃.”

³⁰ Ɖɛ-mú-ɖɛ̀ɓɛ̀-ɖɛ̀ɓɛ̀ mɔ̀ nyɔ-cá-ɖɛ̀, ké dyíin-nɔ̀mɔ̀-nɔ̀mɔ̀ mɔ̀ ɖɛ fóɖóún. Kɛɛ màa ɓɛ́ ɔ hwòɖǒ fɛ̃̀ìn Bounɓoɔ̀ dyiɛɛ mɔ̀ nyɔ ɓéɖé ɔ ké dya-dè-dè ɓéɖé.

³¹ Ɓě nyí ɔ dya-dè-dè ɔ kɔ̃̀ ɔ ké dyéɛ. Ké ɓě mɛ ɓàìn ɔ ɖé hwɔɖɔɔ̀ píé hwòɖǒǔn, ɓó ɔ kũ̀à ɓě ɓɛ́ ɔ ɖǎ nyuɛɛ jè.