Nɔ́ɔ́ 30 - Ɓǎsɔ́ɔ̀ Báɓòɔ̀

Ágùɛ̀ wuɖu

¹ Wuɖu nìà kɛ mɔ̀ Ágù ɓɛ́ ɔ mɔ̀ ma Jákɛ̀ɛ̀ dyú-gàà, ɓɛ́ ɔ sɔ̀ ma ɖé Másà-ɓòɖòɔ̀ kɔ̃ɛɛ wuɖu. Wuɖuɔ̀ dyi ma Ìfídyèò kè Dyúkàò gbo. Wuɖuɔ̀ ɖá,

² “Ḿ mɔ̀ zuɖuu-nyɔ̀ séín ɓíɔ́. Ḿ se nyɔǔn-dyùɛ̀ fɔ̀nɔ̀-hwòɖǒ ɓéɖé.

³ Ḿ séè fɔ̀nɔ̀-hwòɖǒ cɛ̃́, mɔɔ ké ḿ se Mú-hwɛ̀-nyɔ̀ɔ̀ dyí dyuò.

⁴ Nyɛ́ mɔ̀ nyɔ ɖǎ ɖé dyɔún mu, ké ɔ ɖǎ ɓíɖíi dyi ɖe kɛ́? Nyɛ́ mɔ̀ nyɔ ɖǎ pìɔ̌ɔ̀ dyí poìn, ké ɔ ɖǎa xwa dyí mɔ́ìn nyɛ́? Nyɛ́ mɔ̀ nyɔ ɖǎ ní kuɖu ɖò, ké ɔ ɖǎa ɔ mú-po-ɖɔ̀ dyi bĩìn nyɛ́? Nyɛ́ mɔ̀ nyɔ ɖǎ bã̀à mɔ̀ ɓóɖó-kpàà sèìn-naín nyɛɛ dyi dè kɛ́? Xwɛ̌ nyɔɔ̀ nyɛ́nɛ́ jǔ, ké xwɛ̌ ɔ dyú-gàà nyɛ́nɛ́ jǔɛ́? M̀ dyiɛ dyí dyuò ní, cɛ̃ɛ ḿ gbo.

⁵ “Gèɖèpɔ́ɔ̀ wuɖu séín ɓěɔ̀ ɖò se kɛɛ ɖò ɓéɖé. Ɔ mɔ̀ dyí-zĩ̀ìn-ɖɛ̀ ɓó nyɔ séín pèɖèìn ɖé ɔ gboɛɛ bìì.

⁶ Mɔ̀ǔn ɖá ɓɛ́ m̀ ké ɔ wuɖuɔ̀ kɔ̃ po. M̀ dyiɛ náa nyuín, ɔ mu m̀ dyí ɓàɖàìn, ké nì mu se-tɔ́mɔ́-nyɔ̀ jǔùn.

⁷ “Bounɓo, ɖɛ sɔ̃́ ḿ nì m̀ zɔ̀ǐn, ɓɛ́ m̀ ké ḿ nyí hwɛ̀ ɓɛ́ ḿ ké mɛ́. Mɔ̀ǔn ɖá ɓɛ́ m̀ ké wa ḿ ɓùɖùìn.

⁸ Ɔ kĩ́ín-kĩ́ínɔ̀ mɔ̀, zà ḿ se-ɖɛ̀ kè se-tɔ́mɔ́-tɔ́mɔ́ séín bũ̌. Ɔ sɔ̃́ nììnɔ̀ mɔ̀, ɓɔ́ ḿ gǎ-dyé-nyɔ̀ mú nyuɛ, ké ɓɔ́ ḿ bã-nyɔ̀ mú nyuɛ. Kɛɛ nyí ḿ ɖii-ɖɛ̀ ɓɛ́ ḿ kɔ̃̀ ḿ ké dyéɛ.

⁹ Ɓɔ́ ḿ bã-nyɔ̀ mú nyuɛ, mɔ́ún kɔ̃̀ ɖà bã ní, mɔ́ún kɔ̃̀ ɖà nì jè mú doìn, mɔ́ún kɔ̃̀ ɖà níiń, ‘Bounɓoɔ̀ mɔ̀ nyɛ́ɛ̌?’ Ké ɓɔ́ ḿ gǎ-dyé-nyɔ̀ mú nyuɛ, mɔ́ún kɔ̃̀ ɖà dyíɖí, nìí, mɔ́ún kɔ̃̀ ɖà mɔ̀ mɔ̀à ní Gèɖèpɔ́ɔ̀ kɛɛ nyɛ́nɛ́ɔ̀ dɛ̃ kɔ̃ dyà.

¹⁰ “Mɔ̀ǔn ɖá ɓɛ́ m̀ ké gbo-nì-nyɔ̀ ɖòɛ̀ cɛ́i cɛ̃ ɖé ɔ gbo-nì-ɓǎɔ̀ dyúa, ɔ ní kɔ̃̀ ɖà m̀ gboò, mɔ̀ǔn kɔ̃̀ ɖàà gǎ dyí dyé.

¹¹ “Nyɔ ɖíɛ́ ɓě nì ɓó, ké wa vàɖǎ waà xwíníín-zà-ɓǎ, ké wa ní po waà xwíníín-zà-ɖè zùo.

¹² “Nyɔ ɖíɛ́ ɓě nì ɓó, ké wa hwɛ̀ mú ɖé wa mìɔùn dyéɖéín, kɛɛ mɛ̀nɛ̌-kèǐn, waà ɖɛ gbà ɓěɔ̀ mɔ̀ zɛ̀nɛ̌, ké ɔ dyí wa mú ke.

¹³ “Nyɔ ɖíɛ́ ɓě nì ɓó, ké wa ɓúáìn wa mìɔùn dyí mìɔ cá, ké nyɔ dyéɛ ɖé wa dyéɖéín.

¹⁴ “Nyɔ ɖíɛ́ ɓě nì ɓó, ké waà nyɛ́nɛ́ námá kà gàsíà nìà kɛ, ɓɛ́ wa ké gǎ-dyé-nyɔ̀ ɓě tà, ɓɛ́ wa ké wa ɓóɖó-kpàà kɔ̃ dyi sámá, ɓɛ́ wa jè ké nyɔǔn hwìɛ̀ dyi zi.

¹⁵ “Paà ɓéɖé dyú-màà sɔ̃́. Wa nì mú pánáuń kánáá pū, ké wa ɖá, ‘Nyí ḿ! Nyí ḿ!’ Ɖɛ hĩinyɛ nì dà toɖo-kpàà kɔ̃, ké waà hwòɖǒ ní dè dyi kà paàɔ̀ nìà kɛ. Wa séèɛ̀ cɛ̃ ɖò, ɓɛ́ wa ké níiń, ‘Kǎ ɔ mɛ nìǎ!’

¹⁶ Ɖɛ ɓěɔ̀ mɔ̀, xwɛ́-ɓìɔ̀ kè ɖàà-màà kè ɓóɖó-kpà ɓɛ́ ɔ séè ní náa dyí sa ɖòɛ ɔ kè nyɛ-ɓɔ́ɔ́ ɓɛ́ ɔ séèɛ̀ cɛ̃ ɖò, ɓɛ́ ɔ ké níiń, ‘Kǎ nyɛɔ̀ mɛ nìǎ’ kɛ.

¹⁷ “Nyɔ mɔ̀ nyɔ zàìn ɔ ɓǎ zùǔn, mɔɔ ké ɔ se ɔ ɖeɛ̀ wuɖu nyuɛɛ, hwĩ́ín-hwã nì ɖé bɔɔ-kpà kɔ̃ɛɛ mu ɔ dyéɖé dú zàùn, ké fɔ́ɔ́ mu ɔ múin manaùn.

¹⁸ “Ɖɛ hĩinyɛ nì dà toɖo-kpàà kɔ̃, ké wa jè kpèìn ḿ hwìɖǐi, ké ḿ se wa jè múin wɔ̃́ɔ ɓɛ́ìn.

¹⁹ Ɖɛ ɓěɔ̀ mɔ̀, kà ke nyuà wãa ɖé dyɔɔ̀ dyíɛ, kè kà sɛ nyuà sɔ́ɔ́ kɔ̃ dyi nàà kɛ, kè kà méè nyuà ɖé dyóóɔ̀ kɔ̃ nàà kɛ, ɔ kè ɖɛ̀ɓɛ̀ǐn-ɖɛ̀ɓɛ̀ǐn nì ɓó gàa kè màa pṹa kɛ.

²⁰ “Kǎà gbàɖàùn-màà kpeɖe nyu kà nìɛ̀. Ɔ sɔ̀ hwɔɖɔ gbo, ké ɔ dèɖè, ké ɔ ɖá, ‘Ḿ se ɖɛ gbà ɖò nyu.’

²¹ “Ɖɛ hĩinyɛ nì dà toɖo-kpàà kɔ̃, ké wa tàɓàìn nyɔǔn díɖí, ké nyɔǔn se wa dyúa dyi nyànàà ɓɛ́ìn.

²² Ɖɛ ɓěɔ̀ mɔ̀, ɓɛ́ gǐì ké kã́á jǔ, mɔɔ ɓɛ́ zuɖuu-nyɔ̀ ké ɖoɓo,

²³ mɔɔ ɓɛ́ màa ɓɛ́ wa nyɛ́ múɛɛ ké dyú-ɓǎ dyé, mɔɔ ɓɛ́ gǐì-màà ké ɔ gbo-nì-ɖè dúí sè.

²⁴ “Ɖɛ hĩinyɛ nì dà toɖo-kpàà kɔ̃, ké wa ɓíè kɔ̃in, kɛɛ wa zi hwòɖǒ fɔ̀nɔ̀ǔn mìɔ cá.

²⁵ Ɔ kĩ́ín-kĩ́ínɔ̀ mɔ̀, kùɛ̀-dyù ɓě ɓɛ́ wa se kpé vɛ̀nɛ̀ ɓéɖéɛɛ poìn waà ɖii-ɖɛ̀ dyí ɓó dyóɖó-bà-tì mú.

²⁶ Ɔ sɔ̃́ nììnɔ̀ mɔ̀, bàà ɓě mɔ̀ nimii ɓɛ́ wa se kpé vɛ̀nɛ̀ ɓéɖéɛ, kɛɛ wa cĩ́ ɖé sɔ́ɔ́-ɓì ɓě mú.

²⁷ Ɔ tã nììnɔ̀ mɔ̀, kpã̌ùn ɓě se kã́á ɖò ɓéɖé, kɛɛ wa poìn dyí, ké wa kpa to.

²⁸ Ké ɔ hĩinyɛ nììnɔ̀ mɔ̀, je ɓɛ́ ɔ se nyɔ xwaún dyi kpáa nì ɖé kã́á ɓíɖí-gbǒǔn.

²⁹ “Ɖɛ hĩinyɛ nì dà toɖo-kpàà kɔ̃, ké waà nà-nà nì díɖí.

³⁰ Ɖò mɔ̀ ganìǎ ɓɛ́ ɔ ɓéɖé gana ké ɔ zi nimii séín dyíɛ. Ɔ se ɖɛ ɖò dyi fɛ̃̀ìn.

³¹ Ɔ tɔɔ ɓěɔ̀ mɔ̀ sòò ɓíɔ́ ɓɛ́ ɔ nà ɓɔ́ɖɔ́-kà kɛ kè vã́á ɔ kè kã́á ɓɛ́ ɔ nà ɓɔ́ɖɔ́-kà ɓó ɔ nyɔ ɓěɔ̀ dyúa kɛ.

³² “Ɔ jǔ ké m̀ ɖǎ zuɖuu-ɖɛ̀ nyu dyììn ɖé m̀ mìɔùn dyií-ɖú-ɖú mú, mɔɔ ké m̀ dyi ɖɛ gbà ɖò dyí sɔ́ ní, zàà sɔ̃ gbo.

³³ Kà ɓɛ́ ɓìɖǐ-nɛɛ̀-nì mú zĩ̀ìn-zĩ̀ìn tee nyuɛ ɓɛ́ ɔ dyià nya kɛ, mɔɔ kà máná mú vũ-vũ tee nyuɛ ɓɛ́ nyɔmɔɔ dyiɛ mú sɔ̀ɛɛ, kà dyúáɖòɔ̀ kǎà dyoɖoún-kpá-nyɔ̀ vã-kɔ̃-po-po dyà zà-ɖɛín.”