Nɔ́ɔ́ 3 - Ɓǎsɔ́ɔ̀ Báɓòɔ̀

Gàa-dyù gmɔ̀ náún-po-wùɖù

¹ Ní dyú, ɖɛ ɓě ɓɛ́ ḿ ɖǎ m̀ tɛ̀mɛ̀ìn nyɛɛ ní ɖá wa ké m̀ hwìɖǐi sɔ̀. Kpɔ̃ ní gma ɓěɔ̀ dyi kóɖó-kóɖó.

² Wa muɛ nyuùn ɓɛ́ nì wé ké dyí vò, ɓɛ́ m̀ ké hwèɖèìn dà toɖo-kpàà kɔ̃, ɓɛ́ nì nyuu-ɖɛ̀ ké mú wóɖó.

³ Mɔ̀ǔn ɖá ɓɛ́ m̀ ké ɖɛ̀ɓɛ̀ǐn-ɖɛ̀ɓɛ̀ǐn kè jǎà-ɖɛ̀-nyu-nyu dyi táà. Nyu wa nì ɖɔ-po-ɖɛ̀ mú, ɓɛ́ m̀ kéɛ ɖɔ po. Céè wa ɖé nì hwòɖǒ-dyùàɔ̀ dyéɖéí.

⁴ M̀ dyiɛ náa nyu ní, Gèɖèpɔ́ɔ̀ kè nyɔǔn-dyùɛ̀ hwòɖǒ mu m̀ múin dèìn, ké nì nyɛ́nɛ́ mu muùn.

⁵ Taɓa Bounɓoɔ̀ hwìɖǐǐ hwòɖǒɛ̀-ɖé-hwɛ̀-kà. Mɔ̀ǔn ɖá ɓɛ́ m̀ ké m̀ mìɔùn nììn ɖɛ-múin-wɔ̃́-wɔ̃́ mú tè.

⁶ Bounɓoɔ̀ jè mɛ nì m̀ hwìɖǐi ɖé nì nyuu-ɖɛ̀ séín mú, nìí, ɔ mu m̀ hwìè poùn.

⁷ Mɔ̀ǔn ɖá ɓɛ́ m̀ ké hwòɖǒ-fɔ̀nɔ̀-nyɔ̀ jǔ ɖé m̀ mìɔùn dyéɖéín. Fɛ̃̀ìn Bounɓoɔ̀ dyi, ɓɛ́ m̀ ké ɖɛ gbà kɔ̃ín pòìn.

⁸ Ɔ mu nì kpóɖó-dyùàɔ̀ dyi-káná-káná gbo dyàùn, ɓɛ́ ɔ ké nì kpá ɓěɔ̀ dyi kùìn.

⁹ Dè Bounɓoɔ̀ dya dyììn ɖé nì kɔ́mɔ́-ɖɛ̀ ɓěɔ̀ mú, ɔ kè dyììn ɖé nì ɖii-ɖɛ̀ kĩ́ín-kĩ́ín sɔ̀ ɖé nì geɖeɔ̀ gboɛɛ mú.

¹⁰ M̀ dyiɛ náa nyu ní, ɖii-ɖɛ̀ mu ɖé nì ɖii-ɖɛ̀ dyi-dèìn-naínɔ̀ dyi dyíìn, ké wã́ìn ɓáún-ɓáún mu ɖé nì wã́ìn-mú-po-ɖɛ̀ɔ̀ mú dyíìn.

¹¹ Ní dyú, Bounɓoɔ̀ dyi m̀ náún po ní, mɔ̀ǔn ɖá ɓɛ́ m̀ ké ɔ ná-wùɖùɔ̀ dyií dyi po. Ɔ dyi m̀ dyí ɓàɖàìn ní, mɔ̀ǔn ɖá ɓɛ́ m̀ kéɛ gbo nɔ́ɔ̀,

¹² sepóɛɖé nyɔ ɓɛ́ Bounɓoɔ̀ ɖɛ̀ɓɛ̀ múɛɛ ɖé ɔ ɓàɖàìn dyí, kà ɓɛ́ ɓǎ nyuà dyú ɓɛ́ ɔ ɖɛ̀ɓɛ̀ múɛɛ dyí ɓàɖàìn nyɛ.

¹³ Mana nì nyɔ ɓɛ́ ɔ dyé fɔ̀nɔ̀-hwòɖǒ da ɔ kè ɓɛ́ ɔ wɔ̃́ ɖɛ múin nyɛɛ kɔ̃.

¹⁴ Kpáná ɓɛ́ nyɔ dyéɛ kɔ̃ún wɛ̃ɛ zi kpáná ɓɛ́ nyɔ ɓɛ́ìn séɓàɖà mɔɔ góò kɔ̃ún dyéɛ kɛɛ dyí.

¹⁵ Fɔ̀nɔ̀-hwòɖǒ kpa ɖɛ ké ɔ zi sɔ́ɔ́ kpa ɖɛ dyí. Ɔ kpa ɖɛ ké ɔ zi ɖɛ séín nì hwòɖǒ ɓɛ́ìn mɔ́ɔ kɛɛ dyí.

¹⁶ Hwèɖèìn-hwèɖèìn nì ɖé ɔ ɖiaùn-xwàɔ̀ mú, ké kɔ́mɔ́ kè dya-dè-dè nì ɖé ɔ kunuà-xwàɔ̀ mú.

¹⁷ Fɔ̀nɔ̀-hwòɖǒ ɓɛ́ìn nyuɛ ɓɛ́ nì cĩ́-cĩ́ ké m̀ wĩin ɖéè, ké ɖɛ nì ɖé ɔ nììn hwìèɔ̀ xwíníín nyɛɛ mɔ̀ gìɖìǐ.

¹⁸ Ɔ mɔ̀ fɛ̀ɛ̀-cù ɓó nyɔ ɓě gbèɖèìn ɔ hwòɖǒɛɛ bìì, ké mana nì nyɔ ɓě ɓɛ́ wa kpɔ̃ ɓó ɔ gboi kóɖó-kóɖóɛɛ kɔ̃.

¹⁹ Dyììn ɖé fɔ̀nɔ̀-hwòɖǒ múɛɛ, Bounɓoɔ̀ dè zɔ̃̌ɔ̀ ɓóɖó-kpàà hìɖì-kpàɔ̀. Dyììn ɖé ɖɛ-múin-wɔ̃́-wɔ̃́ múɛɛ, ɔ po zɔ̃̌ɔ̀ dyɔɔ̀ páún.

²⁰ Dyììn ɖé ɔ fɔ̀nɔ̀-hwòɖǒɔ̀ múɛɛ, ní nì ɖé ɓóɖó-hwùɖùɛɛ gè wɔ̃, ké ɔ nyu zii-nì ɓě. Ké ní-kpò ɓě nì ɖé dyɔɔ̀ dyí, ké wa nyuɛ ké ní ɖaɓa nɔ̄ ɓóɖó-kpàà kɔ̃.

²¹ Ní dyú, kpɔ̃ fɔ̀nɔ̀-hwòɖǒ sɛ́ɖɛ́ìn dyí kè ɖɛ-múin-ɖe-ɖe dyi kóɖó-kóɖó. Mɔ̀ǔn ɖá ɓɛ́ wa ké m̀ xwaún dyi zɛ̀nɛ̌.

²² Wa mu m̀ fɛ̀ɛ̀ nyíìn, ké wa mu bɛ̃̀ìn-ɖɛ̀ jǔùn, ɓɛ́ m̀ kéɛ ɖɔ po.

²³ Ɔ dyi ná nìǐn, nì mu nàdǐ séín xwaún póùn ɓó nì nà-hwìèɔ̀ kɔ̃, ké nì ɓo se ɖɛ ɖò dyí gbǒɛ mu.

²⁴ M̀ dyi dyi pɛ̃́ ní, m̀ se fã̀à ɖò peɖeɛ́ mu. Nì mu dyi pɛ̃́ìn, ké nì nyíɔɔ̀ mu m̀ wĩin ɖéèìn.

²⁵ Nì hwòɖǒ se ɓaɖaá mu ɓó nyɔ-mú-gbɔɔ̀-ɖɛ̀ ɓě ɓɛ́ wa ɓɛ́ìn nyɔ kɔ̃ dyiɛ wàɖà kɛɛ jè. Ɔ hwɔìn kà ɖɛ ɓɛ́ ɔ dyià hwòɖǒ-kɔ̃in-nyìnììn-nyɔ̀ ɓěɔ̀ mú gbɔɔ̀ùn wɛ̃.

²⁶ Sepóɛɖé Bounɓoɔ̀ mɔ̀ nì dyí-gmɔ̀-nyɔ̀. Ɔ se m̀ dyi táǎ mu, ɓɛ́ xwáɖá ɖò ké m̀ kpɔ̃.

²⁷ Nyu nyɔ ɓě ɓɛ́ wa mɔ́ gbo-kpá-kpá kɛɛ nɔ̀mɔ̀ dyíin dyí, ti ɓɛ́ m̀ ɓɛ́ìn kpé ɓɛ́ m̀ kéɛ nyuɛ. Mɔ̀ǔn ɖá ɓɛ́ m̀ kéɛ sɔ̃ kɔ̃ nɛ́ìn.

²⁸ Ɓɔ́ɔ m̀ mǔèɔ̀ gbo cɛ̃ɛ, ɓɛ́ m̀ ké níiń, “Mu, ɓɛ́ m̀ kéɔ̀ ɖe dyi ɓó gàɖàà, nìí, ní muɛ m̀ nyíìno,” ti ɓɛ́ ɖɛɔ̀ nì m̀ xwa ɓó ti déínɔ̀ ɓaɖa kɛ.

²⁹ Mɔ̀ǔn ɖá ɓɛ́ m̀ ké m̀ mǔè ɓɛ́ m̀ kè ɔ deìn bũ̌, ké ɓě taɓaìn hwìɖǐiɛɛ sɔ́.

³⁰ Mɔ̀ǔn ɖá ɓɛ́ m̀ ké nyɔ ɓɛ́ ɔ se m̀ ɖɛ gbà ɖò bũ̌ nyuɛɛ ɖɛ ɖò dúún po pídyi.

³¹ Mɔ̀ǔn ɖá ɓɛ́ m̀ ké nyɔ-ɖɛ-gana-xwa-zàìn-nyɔ̀ɔ̀ hwɛ̀nɛ̌ dyéìn, mɔɔ ké mɔ̀ǔn ɖá ɓɛ́ m̀ ké ɔ kpeɖe ɓěɔ̀ ɖò cɛ̃́.

³² Sepóɛɖé nyɔ nì ná ɓě kɔ̃̀ nyuu-ɖɛ̀ sɔ̀ìn kà hwìǐɛɛ jè nyàìn Bounɓoɔ̀ dyi, kɛɛ ɔ hwòɖǒ dèìn dyí-sɛ́ɖɛ́ìn-nyɔ̀ ɓěɔ̀ múin.

³³ Bounɓoɔ̀ hwòɛ̌-wùɖùɔ̀ nì hwòɖǒ-kɔ̃in-nyìnììn-nyɔ̀ ɓěɔ̀ gbǒ xwíníín, kɛɛ ɔ po dyí-sɛ́ɖɛ́ìn-nyɔ̀ ɓěɔ̀ gbǒ-xwíníín mana kɔ̃.

³⁴ Nyɔ ɓě ɓɛ́ wa se Bounɓoɔ̀ ɖɛ ɖá kɛɛ, ɔ se wa mɔ̀ùn ɖɛ ɖá, kɛɛ ɔ hwòɖǒ dèìn nyɔ ɓě ɓɛ́ wa dyà wa mìɔùn ɓíɖíiɛɛ múin.

³⁵ Dya-dè-dè mɔ̀ hwòɖǒ-fɔ̀nɔ̀-nyɔ̀ ɓěɔ̀ kɔ̃̀ɔ̀-ɖɛ̀, kɛɛ dɛ̃ mɔ̀ zuɖuu-nyɔ̀ ɓěɔ̀ nììn kɔ̃̀ɔ̀-ɖɛ̀.