Nɔ́ɔ́ 29 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Nyɔ mɔ̀ nyɔ kùmùìn ɔ dú kánáá pū, ké ɔ se mɔ́ ɓɛ́ ɔ ké ná-wùɖù múin wɔ̃́ɛɛ, ɔ mu dyi wɛ̀ìn kà dyéɖé-kpɔ̀ɔ̌ kpáà kɛ, ké ɖɛ ké ɔ dyi kánáìn nyɛɛ ɖò se nìɛ̌ mu.

² Dyí-sɛ́ɖɛ́ìn-nyɔ̀ dyi ɓóɖó-wuɖuí-kɔ̃̀-nyɔ̀ jǔ ní, nyɔ ɓěɔ̀ kpá múàǔn. Kɛɛ hwòɖǒ-kɔ̃in-nyìnììn-nyɔ̀ dyi ɓóɖó-wuɖuí-kɔ̃̀-nyɔ̀ jǔ ní, nyɔ ɓěɔ̀ kpò-wùɖù sɔ̀ dyí.

³ Gàa-dyù gmɔ̀ ɓɛ́ ɔ ɖɛ̀ɓɛ̀ fɔ̀nɔ̀-hwòɖǒ múɛɛ jè po ɔ ɓǎà hwòɖǒ múàǔn, kɛɛ nyɔ ɓɛ́ ɔ sí gbàɖàùn-màà kíɖííɛɛ pèɖèìn ɔ kɔ̃̀ɔ̀-ɖɛ̀ séín ɔ dyéɖéín.

⁴ Kã́á ɖòɛ̀ gɔ̌mànà ku dúi dyììn ɖé dyí-sɛ́ɖɛ́ìn-ɖɛ̀ nyu-nyu mú, kɛɛ kã́á ɓɛ́ ɔ kpɔ̃ nyɔ-gbo-pa-wìɖì dyiɛɛ wáɖá ɓóɖóɔ̀ ní.

⁵ Nyɔ ɓɛ́ ɔ cá ɔ mǔè ɖòɛɛ gbǎ xwáɖá ɓó ɔ bìì.

⁶ Hwòɖǒ-kɔ̃in-nyìnììn-nyɔ̀ mìɔùn nììn nàmàǔn mɔ̀ xwáɖá, ké ɔ kpɔ̃ ɔ. Kɛɛ dyí-sɛ́ɖɛ́ìn-nyɔ̀ póɛ xwaún jèɛɛ, ɔ kpá múàǔn, ké ɔ kpa ɓeɖeɛ.

⁷ Dyí-sɛ́ɖɛ́ìn-nyɔ̀ dyuò ɖɛ mɔ̀ dyí-sɛ́ɖɛ́ìn-ɖɛ̀ɛ dyí ɓó gǎ-dyé-nyɔ̀ bìì, kɛɛ hwòɖǒ-kɔ̃in-nyìnììn-nyɔ̀ se ɖɛ nì náa ɖò jè gbo kɔ̃̀.

⁸ Ɖɛ-dyɔ́-ɓaɖa-nyɔ̀ mɔ̀ zà-ɖɛín-dyi-po-nyɔ̀ ɖé hwɔɖɔún, kɛɛ hwòɖǒ-fɔ̀nɔ̀-nyɔ̀ mɔ̀ dyoɖo-hwòɖò-ɓɔ́í-po-nyɔ̀.

⁹ Ɔ jǔ ké hwòɖǒ-fɔ̀nɔ̀-nyɔ̀ kè zuɖuu-nyɔ̀ dyi zaa ɖò zɔ̃́ín-wɔ̃-pòìn-naín kpa ní, zuɖuu-nyɔ̀ɔ̀ gã̀ kuɖu-kuɖu nyuɛń dyi, ké ɔ gã̀ dyɔ́ wauń dyi tee, ké gìɖìǐ ɖò se nì.

¹⁰ Nyɔ ɓɛ́ ɔ nyuà dyɔɔ̀ cà-cà ɓó nyɔmɔɔ dyi wáɖáìn jèɛɛ nyɛ́ dyí-sɛ́ɖɛ́ìn-nyɔ̀ mú, ké ɔ mɔ́ ɔ ɖáɓáa dyi.

¹¹ Zuɖuu-nyɔ̀ dyi dyoɖoún kpá ní, ɔ ɓáà wɔ̃, ké ɔ cɛ̃ ɖɛ séín. Kɛɛ hwòɖǒ-fɔ̀nɔ̀-nyɔ̀ kpɔ̃ ɔ mìɔùn dyí, ké ɔ ku hwòɖǒ.

¹² Ɔ jǔ ké ɓóɖó-wuɖuí-kɔ̃̀-nyɔ̀ ɖò dyi se-ɖɛ̀ jǎà po ní, ɔ gɔ̌mànà-nyɔ̀ séín mu hwòɖǒ-kɔ̃in-nyìnììn-nyɔ̀ jǔùn.

¹³ Gǎ-dyé-nyɔ̀ kè ɔ dyi-pĩ́à-nyɔ̀ peɖeìn ɖɛ dyúáɖò nìà kɛ mú. Ɖɛɔ̀ mɔ̀, Gèɖèpɔ́ɔ̀ dè wa sɔ̃́ɔ̀ dyéɖé dú, ké wa dyé dyi.

¹⁴ Kã́á ɓɛ́ ɔ po gǎ-dyé-nyɔ̀ zɔ̃́ín wɔ̃ dyí-sɛ́ɖɛ́ìn-kà kɛɛ, ɔ wuɖuí-kɔ̃̀-kpèɔ̀ mu dúi kuùn kánáá pū.

¹⁵ Ɓàɖàìn-ɓà-cù kè náún-po-wùɖù sɛ́ɖɛ́ìn dyí dyà dyú-gbɔ́ɔ́ hwòɖǒ-fɔ̀nɔ̀-fɔ̀nɔ̀, kɛɛ dyú ɓɛ́ wa táà dyi, ɓɛ́ ɔ ké ɔ mìɔùn nììn hwòɖǒɛ̀-mɔ́ɔ́-ɖɛ̀ nyuɛɛ dyà ɔ xwíníín-zà-ɖè dɛ̃ kɔ̃.

¹⁶ Hwòɖǒ-kɔ̃in-nyìnììn-nyɔ̀ dyi ɓóɖó-wuɖuí-kɔ̃̀-nyɔ̀ jǔ ní, hwòɖǒ-kɔ̃in-nyìnììn-nyìnììn kpá kɔ̃. Kɛɛ ɔ mu ɓíɖíi dyi kpáùn ɓó dyí-sɛ́ɖɛ́ìn-nyɔ̀ dyéɖé waí.

¹⁷ Zà nì dyúɔ̀ kpeɖe, nìí, ɔ muɛ nyuùn ɓɛ́ m̀ ké fɔ̀. Ɔ muɛ nyuùn ɓɛ́ nì hwòɖǒ ké dyi dè.

¹⁸ Ɓóɖó-dù kɔ̃̀ nyɔ ɓě ɓɛ́ wa se Bounɓoɔ̀ wuɖuɔ̀ ɖɛ ɖáa, wa nyu ɖɛ gbà séín waà hwòɖǒ mɔ́ nyuɛ dyiɛ. Kɛɛ mana nì nyɔ ɓɛ́ ɔ kpɔ̃ Bounɓoɔ̀ gmaɔ̀ dyiɛɛ kɔ̃.

¹⁹ Wuɖu ɖòùn se gbo-nì-nyɔ̀ kpeɖe zàà ɓɛ́ìn. Kɛbì ɔ mɛ wɔ̃́ ɖɛ m̀ cɛ̃à kɛɛ múin nyɛɛ, ɔ seɛ nyuɛ́ mu.

²⁰ M̀ ɖǎ nyɔ ɖò ɓɛ́ ɔ wɔ̃ fṹà xwai ɓó wùɖù jèɛɛ dyée? Hwòɖǒ-po-naín tííwè nì ní ɓó zuɖuu-nyɔ̀ mɔ̀ùn bìì, ké ɔ zi nyɔ nì náa dyí.

²¹ Nyɔ mɔ̀ nyɔ ɓɛ́ ɔ gmɛ̀ìn ɔ gbo-nì-nyɔ̀ sɔ̀ìn ɖé ɔ dyú-gbɔ́ɔ́-tìǐn dyììn ɖé ɔ ɖɛ nɔ̀mɔ̀ kɔ̃in kúɖúú ɔ wɔ̃ nyí-nyí múɛɛ, wé ɖò mu ɓó nyiniìn ɓɛ́ gbo-nì-nyɔ̀ɔ̀ ké ɔ dú-hwìɛ̀ dyá.

²² Nyɔ kɔ̃̀ dyoɖo-hwòɖò xwɛ̃́ìn dyiɛɛ po zà-ɖɛín dyi, ké ɔ wáɖá gma kúɖúú.

²³ Nyɔ-mìɔùn-dyí-ɓúáìn-ɓúáìn dyà nyɔ-ɓíɖíi-dyi-kpá-kpá, kɛɛ nyɔ ɓɛ́ ɔ ɓéɖé ɔ mìɔùn ɓíɖíi-dyà-hwòɖò-dyùà kɛɛ, wa dè ɔ dya.

²⁴ Nyɔ ɓɛ́ ɔ kè dyíɖíí-nyɔ̀ kpáìn gboɛɛ nyɛ́ ɔ mìɔùn nììn fɛ̀ɛ̀ɔ̀ mú. Ɔ ɖi wuɖu kà ɔ mu jǎà cɛ̃ìn nyɛɛ dyɛo, kɛɛ ɔ se jǎà cɛ̃ɛ ɓɛ́ìn.

²⁵ Nyɔǔn-dyù fã̀à mú peɖe-peɖe mɔ̀ xwáɖá-gbǎ-mú, kɛɛ nyɔ ɓɛ́ ɔ taɓa Bounɓoɔ̀ hwìɖǐǐɛɛ pó ɖɛ gbà xwaún.

²⁶ Nyɔ ɓáún-ɓáún mɔ́ ɓɛ́ ɓóɖó-wuɖuí-kɔ̃̀-nyɔ̀ɛ̀ hwòɖǒ ké wa múin dèìn, kɛɛ dyí-sɛ́ɖɛ́ìn-ɖɛ̀ wɔ̃-po-po sɔ̀ìn ɖé Bounɓoɔ̀ gbo.

²⁷ Hwòɖǒ-kɔ̃in-nyìnììn-nyɔ̀ jè nyàìn dyí-sɛ́ɖɛ́ìn-nyɔ̀ dyi, ké dyí-sɛ́ɖɛ́ìn-nyɔ̀ jè nyàìn hwòɖǒ-kɔ̃in-nyìnììn-nyɔ̀ dyi.