Nɔ́ɔ́ 28 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Peɖeɛ nì hwòɖǒ-kɔ̃in-nyìnììn-nyɔ̀ ɓoún ti ɓɛ́ nyɔ ɖò se ɔ kíɖíí kpáuń nìɛ, kɛɛ dyí-sɛ́ɖɛ́ìn-nyɔ̀ ku hwòɖǒ kà ganìǎ nìà kɛ.

² Ɓóɖó ɖòɛ̀ kpeɖe dyi zɔ̃̌ ní, ɔ wuɖuí-kɔ̃̀-nyɔ̀ zi dyí vòɛ̌n. Kɛɛ dyììn ɖé nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ ké ɔ fɔ̀nɔ̀-hwòɖǒɛ múɛɛ, ɓóɖóɔ̀ gɔ̌mànà ku dúi kánáá pū.

³ Gǎ-dyé-nyɔ̀ ɓɛ́ ɔ pĩ́à ɔ mǔè gǎ-dyé-nyɔ̀ dyiɛɛ hwɔìn dìì dyi dyiɛń nìǐn, ní-kpà vɛ̀nɛ̀ ɓɛ́ ɔ ɖaɓaà kɛ. Ɔ ní sè ɓáá-ɖɛ̀ ɖò ɓíɖíi.

⁴ Nyɔ ɓɛ́ ɔ táà gmaɔ̀ dyiɛɛ ɓàìn hwòɖǒ-kɔ̃in-nyìnììn-nyɔ̀, kɛɛ nyɔ ɓɛ́ ɔ kpɔ̃ gmaɔ̀ dyiɛɛ vɔ̃ ɔ gbo.

⁵ Hwòɖǒ-kɔ̃in-nyìnììn-nyɔ̀ se dyí-sɛ́ɖɛ́ìn-ɖɛ̀ dyí dyuò, kɛɛ nyɔ ɓɛ́ ɔ sí Bounɓoɔ̀ kíɖíí kóɖó-kóɖóɛɛ, ɔ wɔ̃́ dyí-sɛ́ɖɛ́ìn-ɖɛ̀ múin pùɖùé cá.

⁶ Ɔ kpa ɖɛ ɓɛ́ m̀ ké gǎ-dyé-nyɔ̀ jǔ, ɓɛ́ nì cĩ́-cĩ́ ké se kɛɛ ɖò ɓéɖé, ké ɔ zi ɓɛ́ m̀ ké bã-nyɔ̀ ɓɛ́ ɔ mɔ̀ hwòɖǒ-kɔ̃in-nyìnììn-nyɔ̀ɛɛ jǔ kɛɛ dyí.

⁷ Dyú ɓɛ́ ɔ kpɔ̃ gmaɔ̀ dyiɛɛ mɔ̀ hwòɖǒ-fɔ̀nɔ̀-dyù, kɛɛ dyú ɓɛ́ ɔ kpɔ̃ fùɖù-fùɖù-nyɔ̀ ɓǎto múɛɛ dyà ɔ ɓǎ dɛ̃ kɔ̃.

⁸ Nyɔ mɔ̀ nyɔ ɓɛ́ ɔ poìn ɔ kɔ́mɔ́-ɖɛ̀ kɔ̃in dyììn ɖé wíɖí ɓɛ́ ɔ pòìn nyɔ ɖò kpaún wɛ̃ɛ kpáná kɔ̃in po-po múɛɛ, ɔ mɔ́ìn kɔ̃in ɓó nyɔ ɓɛ́ ɔ dyé gǎ-dyé-nyɔ̀ wìǐn nyɛɛ bìì.

⁹ Nyɔ mɔ̀ nyɔ ɓɛ́ ɔ se Bounɓoɔ̀ wuɖuɔ̀ ɖɛ ɖáa, Bounɓoɔ̀ nyɛ́ nyɔɔ̀ ɓaà-wùɖù mú.

¹⁰ Nyɔ mɔ̀ nyɔ kpàìn dyí-sɛ́ɖɛ́ìn-nyɔ̀ ɖɛ-gbà-nyu-hwìè ɖò xwíníín nyɛɛ, ɔ kpá ɔ mìɔùn nììn ɓí ɓɛ́ ɔ ɖǎ ɓúɖúɛ. Kɛɛ nyɔ kɔ̃̀ cĩ́-cĩ́ se kɛɛ ɖò ɓéɖéɛɛ sè ɖɛ nɔ̀mɔ̀ kɔ̃in dúí.

¹¹ Bã-nyɔ̀ fɔ̀nɔ̀ hwòɖǒ ɖé ɔ mìɔùn dyéɖéín, kɛɛ gǎ-dyé-nyɔ̀ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ dyé bã-nyɔ̀ɛ̀ nyuu-ɖɛ̀ múin pùɖùé cá.

¹² Dyí-sɛ́ɖɛ́ìn-nyɔ̀ dyi dyií-ɖú-ɖú ɓéɖé ní, nyɔ séín kpá múàǔn. Kɛɛ hwòɖǒ-kɔ̃in-nyìnììn-nyɔ̀ dyi kpé mú nìǐn, nyɔ séín mɔ́ vǐè-naín dyi.

¹³ Nyɔ mɔ̀ nyɔ ɓɛ́ ɔ ɓáìn ɔ nàmàǔn ɖɛ kɔ̃in nyɛɛ, ɔ nyuu-ɖɛ̀ se mú wóɖóɛ mu. Kɛɛ nyɔ ɓɛ́ ɔ wɔ̃́ìn ɔ nàmàǔn mú, ké ɔ táà dyiɛɛ, Bounɓoɔ̀ mu ɔ wìǐn dyéìn.

¹⁴ Mana nì nyɔ mɔ̀ nyɔ ɓɛ́ ɔ hwòɖǒ fɛ̃̀ìn Bounɓoɔ̀ dyi kánáá pūɛɛ kɔ̃. Kɛɛ nyɔ ɓɛ́ ɔ kùmùìn ɔ mìɔùn nììn hwòɖǒ-dyùà kɛɛ, fũ̀à-fṹá dyi ɔ kɔ̃.

¹⁵ Kà ganìǎ nì dyoɖo poɛń mɔɔ kìɖìǒ nì dyoɖo poɛń nìà kɛɛ, kǎà ɓóɖó-wuɖuí-kɔ̃̀-nyɔ̀ ɓɛ́ ɔ nyìnììn hwòɖǒ kɔ̃in nyɛɛ nyu nìɛ̀ ɓó gǎ-dyé-nyɔ̀ kɔ̃.

¹⁶ Ɓóɖó-wuɖuí-kɔ̃̀-nyɔ̀ ɓɛ́ ɔ se ɖɛ-múin-wɔ̃́-wɔ̃́ ɓéɖéɛɛ mɔ̀ nyɔ-dyi-pĩ́à-nyɔ̀, kɛɛ nyɔ ɓɛ́ ɔ nyɛ́ nyɔ-ɖɛ-gana-xwa-zàìn-zàìn múɛɛ mu toɖo-kpàà kɔ̃ hwèɖèìn.

¹⁷ Nyɔ mɔ̀ nyɔ ɓɛ́ ɔ mɔ̀ kú-ɖáɓá-nyɔ̀ɛɛ, ɔ mìɔùn mu gbǔɛ kpaùn, ɓɛ́ ɔ ké ɖé xwɛ́-ɓì mú wáɖáìn, ké nyɔ ɖò mɛ ɓɔ́ ɔ ɓɔ́í poɛ.

¹⁸ Nyɔ kɔ̃̀ cĩ́-cĩ́ se kɛɛ ɖò ɓéɖéɛɛ pó ɖɛ gbà xwaún, kɛɛ hwòɖǒ-kɔ̃in-nyìnììn-nyɔ̀ kpá ɓíɖíi dyi wàɖà.

¹⁹ Nyɔ mɔ̀ nyɔ ɓɛ́ ɔ nyu ɔ geɖe gbo kũ̀à gana-kà kɛɛ mu ɖii-ɖɛ̀ ɓáún-ɓáún ɓéɖéìn, kɛɛ nyɔ ɓɛ́ ɔ sí fùɖù-fùɖù-ɖɛ̀ kíɖííɛɛ mu gǎ vɛ̀nɛ̀ ɔ mìɔùn kɔ̃ dyàùn.

²⁰ Mana nì nyɔ ɓɛ́ nyɔǔn-dyù ɓɛ́ìn hwòɖǒ kɔ̃ dèɛ kɛɛ kɔ̃ mìɔ, kɛɛ nyɔ kɔ̃̀ dyɔɔ̀ tɛɖɛà ɓó bã jèɛɛ, Bounɓoɔ̀ mu ɔ gǎ kɔ̃ tòùn.

²¹ Ɔ se dyíin nɔ̀mɔ̀ ɓɛ́ zaa-wɔ̃-po-nyɔ̀ ké nyɔ ɖò hwòɖǒǔn gbo zĩ̀ìn ɖé zɔ̃́ín-wɔ̃-po-po mú, kɛɛ dyéɛ, nyɔ ɖíɛ́ ɓě nyuɛ ní ɓó ɖii-ɖɛ̀-bùǒ tííwè dyé jè.

²² Nyɔ-mìɔùn-jè-kàmà-nyɔ̀ɛ̀ dyɔɔ̀ nì tɛɖɛiń mìɔ ɓó bã jè, kɛɛ ɔ seɛ dyuò kà gǎ nì ɔ fòèɛ̌n nyɛ.

²³ Nyɔ ɓɛ́ ɔ ɓàɖàìn ɔ mǔè ɖòɛ̀ ɖɛ gbà dyíɛɛ, ɖé mánáín ní, ɔ mǔèɔ̀ mu ɔ mú ɖɛ̀ɓɛ̀ìn mìɔ, ɓɛ́ ɔ ké nyɔ ɓéɖéà nyɔ-cá-mìɔ̀ kɛɛ dyí zi.

²⁴ Nyɔ mɔ̀ nyɔ ɓɛ́ ɔ dyíɖí ɔ ɖe mɔɔ ɔ ɓǎ bũ̌, ké ɔ seɛ ɖɛ gbà ɖá kɛɛ, ɔ kè ɖɛ-mú-gbɔɔ̀-nyɔ̀ mɔ̀ nyɔ dyúáɖò.

²⁵ Nyɔ ɓɛ́ ɔ kàmà ɔ mìɔùn jèɛɛ mɔ̀ zàǔn-zàǔn-dyi-po-nyɔ̀, kɛɛ nyɔ ɓɛ́ ɔ taɓa Bounɓoɔ̀ hwìɖǐǐɛɛ, ɔ nyuu-ɖɛ̀ mu mú wóɖóùn.

²⁶ Nyɔ ɓɛ́ ɔ taɓa ɔ mìɔùn nììn fɔ̀nɔ̀-hwòɖǒɔ̀ hwìɖǐǐɛɛ mɔ̀ zuɖuu-nyɔ̀, kɛɛ nyɔ ɓɛ́ ɔ nà hwòɖǒ-fɔ̀nɔ̀-kà kɛɛ pó ɖɛ gbà xwaún.

²⁷ Nyɔ ɓɛ́ ɔ ɓáà xwa dyí ɖé gǎ-dyé-nyɔ̀ gboɛɛ, ɔ se ɖɛ ɖòɛ̀ gǎ dyéɛ mu. Kɛɛ nyɔ ɓɛ́ ɔ mɔ́ìn dyéɖé ɓó gǎ-dyé-nyɔ̀ gboɛɛ, gboò-wùɖù ɓáún-ɓáún nì ɔ kɔ̃.

²⁸ Hwòɖǒ-kɔ̃in-nyìnììn-nyɔ̀ dyi kpé mú nìǐn, nyɔ séín mɔ́ vǐè-naín dyi. Kɛɛ ɔ dyi mú gbɔɔ̀ ní, dyí-sɛ́ɖɛ́ìn-nyɔ̀ zaìn mú.