Nɔ́ɔ́ 27 - Ɓǎsɔ́ɔ̀ Báɓòɔ̀

¹ Ɓɔ́ ɓɔ́ɖɔ́ɔ ɓá ɖɛ nì mu nyuùn ɓó gàɖàà kɛɛ jè, sepóɛɖé m̀ se dyuò ɖɛ wéɔ̀ mu dyàùn wɛ̃.

² Ɓɔ́ m̀ mìɔùn ɓàìn. Nyɔ kà kò ɖò mɛ nyuɛ. Ɖéè ɖò mɔ̀ nyɔ mɛ nyuɛ náa.

³ Sɔ́ɔ́-kpò ku xwa, ké pĩ́ɔ ku xwa, kɛɛ zuɖuu-nyɔ̀ɛ̀ dyoɖo ku xwa ké ɔ zi wa sɔ̃́ɔ̀ dyí.

⁴ Dyoɖo nyìnììn hwòɖǒ kɔ̃in, ké ɔ gbɔɔ̀ ɖɛ mú dyɛo, kɛɛ nyɛ́ ɓɛ́ìn hwɛ̀nɛ̌ dyúa dyi nyànàà kɛ́?

⁵ Ɔ kpa ɖɛ ɓɛ́ m̀ ké nyɔ ɖò dyí ɓàɖàìn ɓó ɖɛ gbà ɓɛ́ ɔ nyuɛɛ jè, ké ɔ zi ɖɛ̀ɓɛ̀ǐn-ɖɛ̀ɓɛ̀ǐn ɓɛ́ ɔ vǐè ɖé m̀ hwòɖǒ bũ̌ ɓá nyɔɔ̀ dyíɛɛ dyí.

⁶ Ɔ kpa ɖɛ ɓɛ́ ɖɛín-ɖɛ̀ ɓɛ́ m̀ ɓǎto nyu m̀ bũ̌ɛɛ ké m̀ puà, ké ɔ zi ɓɛ́ nì mú-nyɛ́-nyɔ̀ ké m̀ gbèɖèìn nyɛɛ dyí.

⁷ Nyɔ ɓɛ́ ɔ ɖǎ ɖoɓoɛɛ se ɖo ɖiɛ mɔ́, kɛɛ nyɔ ɓɛ́ mɔ́ nì nyuɛń mìɔ kɛɛ, ɖɛ nɛɛ̀-nɛɛ̀ séín ɖéè ɔ wĩin pū.

⁸ Gàa ɓɛ́ ɔ kpá ɓóɖó gboɛɛ hwɔìn naà ɓɛ́ ɔ téɖé sèìn ɔ dyéɖéín xwáɖáún wɛ̃.

⁹ Nyɔ́ún-nɔ̀mɔ̀-cànàà dú kò-kò ɓě nyuɛ ké nyɔ hwòɖǒ kpá múàǔn. Kà dyúáɖòɔ̀ kǎà náún-po-wùɖù sɛ́ɖɛ́ìn dyí sɔ̀ìn ɓǎto gboɛɛ jè nyu nìɛ̀.

¹⁰ Mɔ̀ǔn ɖá ɓɛ́ m̀ ké nì ɓǎto mɔɔ m̀ ɓǎ nììn ɓǎto dyi táà. Ké ti ɓɛ́ fũ̀à-fṹá-tì mu m̀ kɔ̃ dyiìn nyɛɛ, mɔ̀ǔn ɖá ɓɛ́ m̀ ké nì ɖíí-gàà kúmúìn ɓó gbo-kpá-kpá jè. M̀ mǔè ɓɛ́ ɔ xwɛ̃́ìn m̀ bũ̌in nyɛɛ, ɔ kpa ɖɛ ké ɔ zi m̀ ɖíí-gàà ɓɛ́ ɔ tɔ̀mɔ̀ gboɛɛ dyí.

¹¹ Ní dyú, cɛ̃́ hwòɖǒ fɔ̀nɔ̀ɔ̀, ɓɛ́ ní hwòɖǒ ké dyi dè, ɓɛ́ ḿ ké nyɔ ɓɛ́ ɔ kɔ́ìn kà ní nyɛ́nɛ́ɛ gɔ̃̌-jǔìn-wùɖù ɓéɖé.

¹² Hwòɖǒ-fɔ̀nɔ̀-nyɔ̀ dyé nàdǐ dyiɛ ɖéé ɖé dyúa, ké ɔ vǐè. Kɛɛ nyɔ ɓɛ́ ɔ se hwòɖǒ kɔ̃in cɛ̃̀ɛ muɛ wɔ̃, ké ɔ wáɖáìn mú, ké ɔ dyéɛ gǎ dyí.

¹³ Nyɔ mɔ̀ nyɔ ɓɛ́ ɔ ɖú ɖéè ɖòɛ̀ bɔ̃́ùn dyíɛɛ, wa mɛ kpa ɔ mú-po-ɖɔ̀ɔ̀, ɓɛ́ ɔ ké tɔ̀ɔ̀-má jǔ, ɓɛ́ ɔ ké kpaɔ̀ pɛ́ɛ̀ hwɛ̀.

¹⁴ Nyɔ mɔ̀ nyɔ mu dyí sɔ̀ǔn dùnùìn, ɓɛ́ ɔ ké ɔ mǔè ɓɛ́ ɔ kè ɔ taà deìn bũ̌ɛɛ nyíɔún zàǔn dùnùìn ɖé wuɖu zoo múɛɛ, ɔ nyíɔún-zà-wùɖùɔ̀ mu gboò-wùɖù hwɔìn ɖé ɔ mǔèɔ̀ gbo.

¹⁵ Zàǔn-zàǔn-màà kè ní-ɓò ɓɛ́ ɔ téà dà dyúáɖò kà-kà tee ɓó ní-ɖaɓa-tìǐn nyɛɛ hwɔìn ní. Ɔ ní kã́ wĩín.

¹⁶ Ɔ jǔ ké nyɔ ɖò dyi pìɔ̌ ɓɔ́í poɛ ɓɛ́ìn, mɔɔ ké ɔ dyi cáná xwa-wè xwaí mɔ́ìn ɓɛ́ìn, ɓɛ́ ɖò ké se dyi té ní, ɔ ɓɛ́ìn màa nì náa ɓɔ́í poɛ.

¹⁷ Kà nɛɛ̀ nyuà ɔ mǔè-nɛ̀ɛ̀ samaa kɛɛ, kǎà nyɔǔn-dyù nyu fɔ̀nɔ̀-hwòɖǒ gbo cɛ̃́ìn cɛ̃̀ìn.

¹⁸ Nyɔ ɓɛ́ ɔ gmɔ̀ féè-cù gboɛɛ ɖiɛ ɓo, ké nyɔ ɓɛ́ ɔ gmɔ̀ ɔ gbo-nì-ɓǎɔ̀ gboɛɛ mu dya-dè-dè ɓéɖéìn.

¹⁹ Kà nyɔ nyuà nyɔ mìɔùn nììn dyúa dyéɛ ɖé ní gboɛɛ, kǎà ɖɛ nì ɖé nyɔǔn-dyù hwòɖǒ bũ̌ɛɛ zaìn nyɔ ɔ jǔɛɛ jè kɔ̃in.

²⁰ Gĩɔ kè mú-gbɔɔ̀-gbɔɔ̀, waà hwòɖǒ ní dè dyi, ké nyɔǔn-dyùɛ̀ hwòɖǒɛ̀-mɔ́ɔ́-ɖɛ̀ jè ɔ hwòɖǒ ní dè dyi sɔ̃̀ùn.

²¹ Nyɛ mɔ̀ séɓàɖà kè góò ɖe-nyɔ̀, kɛɛ ɓàìn-ɓàìn ɓɛ́ nyɔǔn-dyù dyéɛɛ mɔ̀ wa jè múin-gmɔìn-ɖɛ̀.

²² Kɛbì m̀ mɛ po zuɖuu-nyɔ̀ ɖé dòò mú, ɓɛ́ m̀ ké ɔ ɖu kà nyɔ ɖuà mɔɔ́ kɛɛ, m̀ se ɔ zuɖuu-kpèɖè mú zàà ɓɛ́ìn.

²³ M̀ mɛ gmɔ̀ nì nyúà-ɖɛ̀ ɓě gbo nɔ̀mɔ̀ dyíin,

²⁴ sepóɛɖé kɔ́mɔ́ se sè-kpáà ɖɛ, ké kã́á-ɓòɖò ɖò ní sè ná kánáá pū.

²⁵ Ti ɓɛ́ m̀ ɖǎ pìǐ tɔ̀mɔ̀ dya cɛ̃ ɓó nyúà-ɖɛ̀ ɓěɔ̀ bìì, ké pìǐɔ̀ nìǎ mí ɖìè poɛń, ké m̀ ɖǎ pìǐ nìà ɖé toɖo ɓě dyaa dyí poìn nyɛɛ,

²⁶ nìí, mí sɔ̀à ɓáɖáá ɓěɔ̀ bũ̌in nyɛɛ mu m̀ mú-po-ɖɔ̀ nyíìn, ké wíɖí nì mu wiɖi ɓěɔ̀ kɔ̃ún dyéìn nyɛɛ muɛ nyuùn ɓɛ́ m̀ ké pá ɖò dɔ̃ ɖe.

²⁷ Ké nì wiɖi ɓěɔ̀ mu nɛɛ̀-nì ɓáún-ɓáún tòùn ɓó m̀ kè nì gbǒ-xwíníínɔ̀ kè nì gbo-nì-màà ɓěɔ̀ ɖii-ɖɛ̀ jè.