Nɔ́ɔ́ 26 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Kà sɔ̃̀ɔ̀ wáɖá-wáɖá seà wɛ̃̀ìn ɓó dyóɖó-bà-tìǐn nyɛ, mɔɔ kà ní hwèɖè-hwèɖè seà wɛ̃̀ìn ɓó geɖe-kɔ́-tìǐn nyɛɛ, kà dyúáɖòɔ̀ kǎà dya-dè-dè se zuɖuu-nyɔ̀ wɛ̃̀ìn.

² Kà tá-tá vũàà dyi ké ɔ ní dyéà dyi-kò-naín ɖòɛɛ, kà dyúáɖòɔ̀ kǎà gboò-wùɖù ɓɛ́ wa po nyɔ ɖò kɔ̃ ké ɔ se xwíníín jɛ́ɛ́ ɖò kɔ̃ɛɛ se ɔ kpɔ̃ɔ́ mu.

³ Fíò-fíò nì ɓó sǒ ɓàɖàìn jè, ké kpã́ nì ɓó jǎkasì wĩín po jè, ké nyɔ-ɓàɖàìn-ɓà-cù nì ɓó zuɖuu-nyɔ̀ kɔ̃ún mu jè.

⁴ Mɔ̀ǔn ɖá ɓɛ́ m̀ ké zuɖuu-nyɔ̀ zuɖuu-kà gɔ̃̌ jǔ, mɔ̀ǔn kɔ̃̀ ɖà nì kà ɔ mɔ̀ùn nìà kɛ.

⁵ Jǔ zuɖuu-nyɔ̀ zuɖuu-kà gɔ̃̌, ɓɛ́ ɔ kéɛ dyí dyuò kà ɔ zuɖuɛ.

⁶ Nyɔ ɖò dyi zuɖuu-nyɔ̀ cuò-wùɖù wĩín dèìn ní, ɔ hwɔìn kà nyɔ cɛ̃ɔ́ kà nyɔ mìɔùn ɓo gbɔɛ, mɔɔ kà nyɔ náɔ́ kà cɛ̃́-ɖɛ̀ ɖòɛ.

⁷ Kà nyɔ kɔ̃̀ ɓo mɛ́ɛ ɔ ɓoɔ̀ beè kà ɔ gbɔ dyi ké ɔ seà kɔ̃ dyi nàìn ɓɛ́ìn nyɛɛ, kà dyúáɖòɔ̀ kǎà nɔ́ɔ́ nyu nìɛ̀ ɖé zuɖuu-nyɔ̀ wĩín.

⁸ Zuɖuu-nyɔ̀ dya-dè-dè nì kà nyɔ sã̀ìn kà sɔ́ɔ́-kpò bǒ múin, hwɛ̀ ké nyɔ mɔ́à poɛ dyiɛ.

⁹ Kà wí ɓɛ́ ɔ taɓa nɔmɔɔ-nyu-nyɔ̀ xwaún wɛ̃ɛ nìà nàdǐ mú ɓó ɔ bììɛɛ, kǎà nɔ́ɔ́ nyu nìɛ̀ ɖé zuɖuu-nyɔ̀ wĩín.

¹⁰ Kà sé-po-nyɔ̀ puà kà nyɔ séín nyɛɛ, kǎà nyɔ ɓɛ́ ɔ tɔ́mɔ́ìn zuɖuu-nyɔ̀ mɔɔ nɔmɔɔ-ná-nyɔ̀ ɓó ɔ kũ̀à ɖò nyu jèɛɛ jè nyu nìɛ̀.

¹¹ Kà gbe nyuà ɖɛ ɓɛ́ ɔ ɖǎ hwaɖa kɛɛ gbo muɛ ɖeɛɛ, kǎà zuɖuu-nyɔ̀ nyu ɔ zuɖuu-ɖɛ̀ nyu-nyuɔ̀ gbo muɛ ɖe.

¹² M̀ ɖǎ nyɔ ɖò dyé ké ɔ ɖǎ hwòɖǒ-fɔ̀nɔ̀-nyɔ̀ jǔ ɖé ɔ mìɔùn dyéɖéíne? Hwòɖǒ-po-naín tííwè nì ní ɓó zuɖuu-nyɔ̀ mɔ̀ùn bìì ké ɔ zi nyɔ nì náa dyí.

¹³ Fóó-nyɔ̀ ɖá, “Ganìǎ ɖò nì ɖé hwìèɔ̀ xwíníín. Ganìǎ ɖò nì ɖé píéɔ̀ hwòɖǒǔn.”

¹⁴ Kà gbǒ-kĩ̀ǐn nyuà hĩ́íjè dyí beèɛ̀, ɓɛ́ ɔ dyià ɓó mú táɖáìn teeɛɛ, kǎà fóó-nyɔ̀ nyu mú táɖáìn ɓó ɔ kɔ̃-pɛ̃́-ɖɛ̀ kɔ̃.

¹⁵ Fóó-nyɔ̀ gbèɖèìn sɔ̃ hwòɖǒ, ké ɔ se sɔ̃ pɛ́ɛ̀ ɓɛ́ìn, ɓɛ́ ɔ ké ɔ mìɔùn nììn ɖii-ɖɛ̀ wɔ̃ún po dyɛ mɔ̀ùn.

¹⁶ Fóó-nyɔ̀ hwòɖǒ ɖá ɔ fɔ̀nɔ̀ hwòɖǒ ké ɔ zi hwòɖǒ-fɔ̀nɔ̀-nyɔ̀ mɛ̀nɛ̌ìn-sɔ̃́ ɓɛ́ wa ɓɛ́ìn xwíníín kɔ̃̀ jè wa cɛ̃ ɖɛ ɖòɛɛ kɔ̃in zaìn nyɛɛ dyí.

¹⁷ Nyɔ mɔ̀ nyɔ ɓɛ́ ɔ ɓaɖa zàǔn-zàǔn se ɔ dyí ɓáa wɔ̃ hwìɛ̀ dyiɛɛ hwɔìn nyɔ ɖò ké gbe nì ziɛń nyɛɛ ɖùǔ gbɔ sá, ɓɛ́ ɔ kéɛ dyií ɖúɛ.

^18-19 Nyɔ mɔ̀ nyɔ ɓɛ́ ɔ cá ɔ mǔè ɖò, hwɛ̀ ɓɛ́ ɔ dyi níiń, “Ḿ nyu dyɔ́-ɖɛ̀o” wɛɛ hwɔìn sã̀à-nyɔ̀ ɓɛ́ ɔ nì sé-kpìì nì cɛ̃́ mánáín nyɛɛ pééín nyùɛ̌n nyɛ.

²⁰ Dɛ̀ ɓɛ́ dyéɖé-kɔ-nyɛ̀ seà nìɛɛ, nyɛ mɔ́ ɓó dyi. Dɛ̀ ɓɛ́ nyɔ-nyɛ́nɛ́-zeɖe-zeɖe seà nìɛɛ, zà-ɖɛín pa ɓó dyi.

²¹ Kà kɔ̃̀ nìà ɓó nyɛ-kɛ̀nɛ̀ nyu jèɛ, kè kà nyɛ-kpóɖó nìà ɓó dyéɖé kɔ jèɛɛ, kà dyúáɖòɔ̀ kǎà zàǔn-zàǔn-nyɔ̀ nì ɓó zà-ɖɛín dyi po jè.

²² Nyɔ-nyɛ́nɛ́-zeɖe-nyɔ̀ɛ̀ wĩín-wùɖù nì kà ɖii-ɖɛ̀ ɖéé-ɖéé ɖò nìà kɛ. M̀ dyiɛ mana ní, ɔ mu ɖé m̀ xwíníín vɛ̃in cá.

²³ Wĩín-wùɖù ɖéé-ɖéé ɓɛ́ hwòɖǒ gbà nì ɖeín nyɛɛ hwɔìn mɛ-dyàà ɓɛ́ wa fiè séɓàɖà-nì bũ̌in nyɛ.

²⁴ Dyéɖéi-nyu-nyɔ̀ vǐè ɔ nyɛ́ín-nyɛ́ín-hwòɖò-dyùà ɖé ɔ nyɔ-cá-wùɖù ɖeín.

²⁵ Kɛbì ɔ mɛ cɛ̃ ɖɛ nɔ̀mɔ̀ kɔ̃in ɓěɛɛ, ɓɔ́ ɔ wuɖuɔ̀ jǎà poɛ, sepóɛɖé ɖɛ gbà dyíìn ɖé ɔ hwòɖǒ bũ̌ dyi.

²⁶ Kɛbì ɔ mɛ ɓáìn nyɛ́ín-nyɛ́ín nìà ɖé ɔ hwòɖǒ bũ̌ɛɛ ɖɛ kɔ̃in nyɛɛ, ɔ hwòɖǒ-kɔ̃in-nyìnììn-nyìnììnɔ̀ mu píé dyi wáɖáùn ɓó nyɔ kúɖúú dyéɖé waí.

²⁷ Nyɔ ɓɛ́ ɔ ɓúɖú ɓí ɓó ɔ mǔè ɖò bììɛɛ mìɔùn mu ɓíɔ̀ kpáùn. Nyɔ ɓɛ́ ɔ kiɖiò sɔ́ɔ́-kpòɛɛ, sɔ́ɔ́-kpòɔ̀ mu kiɖiòɛ̀ dyàùn ɖe, ɓɛ́ ɔ ké ɔ mìɔùn kɔ̃ kpá.

²⁸ Se-tɔ́mɔ́-nyɔ̀ nyɛ́ nyɔ ɓɛ́ ɔ seɔ̀ puà bũ̌in nyɛɛ mú, ké nyɔ ɓɛ́ ɔ ɓéɖé nyɔ-cá-mìɔ̀ kɛɛ mɔ̀ nyɔ-mú-gbɔɔ̀-nyɔ̀.