Nɔ́ɔ́ 25 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Sã́ɖómàà nɔ́ɔ́ ɓěɔ̀ ɖíɛ́ ɓě ɓɛ́ Hɛ́sèkádyà mɔ̀à Júɖà-ɓòɖòɔ̀ kã́áɔ̀ kɛɛ gɔ̌mànà-nyɔ̀ ɓěɔ̀ céè ma céè-ɖɛ̀ ɖò múɛɛ, wa kɛà kɛ̀.

² Gèɖèpɔ́ɔ̀ dyé ɓàìn-ɓàìn ɓó ɖɛ ɓě ɓɛ́ ɔ gàìn nyɔǔn-dyù dyíɛɛ jè, kɛɛ kã́á dyé ɓàìn-ɓàìn ɓó ɖɛ ɓě ɓɛ́ ɔ ɖe múin nyɛɛ jè.

³ Dyɔɔ̀ dyí tɔ̀mɔ̀ gbo, ké ɓóɖóɔ̀ hwuɖu tɔ̀mɔ̀ mú. Kà dyúáɖòɔ̀ kǎà nyɔ ɖò se ɖɛ nì ɖé kã́á hwòɖǒ bũ̌ɛɛ dyí dyuòɛ̀ ɓɛ́ìn.

⁴ Ɖe séɓàɖà, ɓɛ́ m̀ kéɛ zɛ̀nɛ̌ séín múin zà. Nìí, ɖɛ nì mu dyéìn nyɛɛ mɔ̀ séɓàɖà hwɛ̀ zɛ̀nɛ̌ǐn ɓɛ́ séɓàɖà ɖɛ-mú-mɛ-nyɔ̀ ɓɛ́ìn ɖɛ nɔ̀mɔ̀ dyíin ɖò mú mɛɛ kɛ.

⁵ Zà hwòɖǒ-kɔ̃in-nyìnììn-nyɔ̀ ɓó kã́á dyúa. Nìí, ɔ wuɖuí-kɔ̃̀-kpèɔ̀ mu dúi kuùn ɖé dyí-sɛ́ɖɛ́ìn-ɖɛ̀ nyu-nyu mú.

⁶ Mɔ̀ǔn ɖá ɓɛ́ m̀ ké m̀ mìɔùn dyií ɖú ɓó kã́á dyúa, mɔɔ ké mɔ̀ǔn ɖá ɓɛ́ m̀ ké m̀ mìɔùn nyɔ vɛ̀nɛ̀ ɖòɛ̀ pá mú po.

⁷ Ɔ kpa ɖɛ ɓɛ́ kã́áɔ̀ ké m̀ ɖá, ɓɛ́ ɔ ké níiń, “Dyi nɔ̄ à hwìɛ̀, nɔ̄ pá kpa ɖɛɛ̀ mú,” ké ɔ zi ɓɛ́ ɔ ké m̀ kò-naín nyɔ se ɖɛ kpaa gbo ɖe ɖoɓo ɓó nyɔ kpa ɖɛ ɓě dyéɖé waíɛɛ dyí.

⁸ Ɓɔ́ fṹàà ɓó ɖɛ ɖò ɓɛ́ m̀ dyéɛɛ zaa-wɔ̃-po-nyɔ̀ dyúa kpa jè. Ɔ jǔ ké zàse ɖò dyi m̀ zɔ̃́ínɔ̀ dúún wáɖá ní, ɔ mu m̀ dɛ̃ nyùìn mìɔ.

⁹ Ɔ jǔ ké ɖɛ ɖò dyi ɓó m̀ kè m̀ mǔè ɖò pṹa nìǐn, ɓě cɛ̃ɛ, ɓɛ́ ɔ ké ɓó ɓě sɔ̃́ɔ̀ ɖòùn pṹa sèìn. Mɔ̀ǔn ɖá ɓɛ́ m̀ ké m̀ mǔè ɖò nììn sáná-ɖɛ̀ píé po,

¹⁰ ɓɛ́ nyɔ muà wɔ̃́ùn wɛ̃ɛ ní kɔ̃̀ ɖà m̀ dɛ̃ín po. Ɔ dyi ná nìǐn, nì nyɛ́nɛ́ mu kɔ́ùn mìɔ.

¹¹ Wuɖu ɓɛ́ nyɔ ɖò cɛ̃, ké ɔ kpá páún wɛ̃ɛ nì kà góò-kpò ɖò ɓɛ́ ɔ wɛ̃̀ìn ɖé séɓàɖà-kɛ̀ɓɛ̀ɛ̀ mú dyiɛɛ nìà kɛ.

¹² Kà góò-ɖùǔn-po-ɖɛ̀ mɔɔ góò ɖɔ-po-ɖɛ̀ kpaà ɖɛɛ, kà dyúáɖòɔ̀ kǎà hwòɖǒ-fɔ̀nɔ̀-nyɔ̀ɛ̀ nyɔ-náún-po-wùɖù kpa ɖɛ.

¹³ Kà ní pɛ̀ɛ̀ dèà nyɔ ɓɛ́ zùzù nì nyuɛń nyɛɛ hwòɖǒ dyiɛɛ, kà dyúáɖòɔ̀ kǎà kíá ɓɛ́ ɔ sɛ́ɖɛ́ìn dyíɛɛ nyu ɔ gbo-nì-ɓǎ ɖoɓoà ɔ kɛɛ hwòɖǒ dyi dèɛ̀.

¹⁴ Kà pìɔ̌ pɛ̀ɛ̀ ɓaɖaà, ɓɛ́ ní-kpò dyià ɖé dyií dyi kpɔ̃, hwɛ̀ ké níɔ̀ seà ɖaɓa ɖeɛɛ nyuà nìɛ̀ kɛɛ, kà dyúáɖòɔ̀ kǎà ɔ nyu nìɛ̀ ɓá nyɔ ɓɛ́ ɔ ɓɔ́ɖɔ́ ɓó nyɔ ɖò ɖɛ nyí jè ké ɔ seɛ tòɛɛ jè dyí.

¹⁵ Kà sɔ̃ ɓɛ̀ɖɛ̀ɛ̀-ɓɛ̀ɖɛ̀ɛ̀ zàà ɖo ɓíín nyɛɛ, kà dyúáɖòɔ̀ kǎà hwòɖǒ-ku-ku ɓɛ́ìn nyuɛ ɓɛ́ gɔ̌mànà ké ɖɛ ɖò jè gbo wɔ̃́ìn.

¹⁶ M̀ dyi ɖo da dyéín, ɖi nyɔ ɓɛ́ìn m̀ dyíɛ. Ɔ dyi wɔ̃ kɔ̃ zi ní, ɔ mu m̀ nyuùn, ké nì muɛ zàùn.

¹⁷ Mɔ̀ǔn ɖá ɓɛ́ m̀ ké m̀ mǔè ɖò ɓíɖí-taún mu kpɛ́-kpɛ́, ɔ ní kɔ̃̀ ɖà nì jè dyí sa, ɔ ní kɔ̃̀ ɖà m̀ mú nyɛ́.

¹⁸ Nyɔ mɔ̀ nyɔ ɓɛ́ ɔ nyu seɛ̀-zàse ɓɛ́ zɔ̃́ín ké ɔ mǔè ɖò dúún wáɖá jèɛɛ mɔ̀ nyɔ-bũ̌in-puà-nyɔ̀ kà kpó-kpó-ɓà-cù mɔɔ gàsíà mɔɔ sé-kpìì nìà kɛ.

¹⁹ Ɔ jǔ ké m̀ dyi nyɔ ɓɛ́ ɔ se hwòɖǒ-kɔ̃-dè-nyɔ̀ɛɛ hwòɖǒ kɔ̃ dè ɖé fũ̀à-fṹá-tì mú ní, ɔ hwɔìn kà nyɔ kéɔ́ kà nyɛ́nɛ́ nì puàǔn wɛ̃ɛ ɖɛ tàìn, mɔɔ ɓɛ́ nyɔ kéɔ́ kà ɓo sɔ̀ìn kò-naín nyɛɛ kɔ̃in nàìn nyɛ.

²⁰ Ɔ jǔ ké m̀ dyi nyɔ kɔ̃̀ hwòɖǒ nì fũ̀à-fṹá múɛɛ gbo ɓèɖèìn ní, ɔ hwɔìn kà sɔ̃̀ɔ̀ ké nyɔ ɖò nyuɛń nì, hwɛ̀ ɓɛ́ m̀ ké ɔ ɖɔún zà kɛ, mɔɔ ɓɛ́ nyɔ ɖòɛ̀ jě ké ɔ puàǔn nì, hwɛ̀ ɓɛ́ m̀ kéɛ tɔ̃́ dyí poɛ.

²¹ Mɔ́ dyi nì mú-nyɛ́-nyɔ̀ nyuɛń nìǐn, nyí ɔ ɖii-ɖɛ̀. Ní-ná-tò dyi ɔ nyu ní, nyí ɔ ní.

²² M̀ dyiɛ náa nyu ní, nì mu ɔ mú gbɔɔ̀ùn kà nyɔ gbǒìn kà nyɔ nyɛ-kɛ̀nɛ̀-kòò dúɛ, ké Bounɓoɔ̀ mɔ̀ nyɔ mu m̀ pɛ́ɛ̀ìn.

²³ Kà pìɔ̌ pɛ̀ɛ̀ dyàà ní-ɖaɓa-ɖaɓa kɛɛ, kà dyúáɖòɔ̀ kǎà nyɔ-nyɛ́nɛ́-zeɖe-zeɖe dyà dyoɖo.

²⁴ Ɔ kpa ɖɛ ɓɛ́ m̀ ɖòùn ké ɓí-dyù ɖò mú cĩ́ ɖé gbǒ ɖò dya, ké ɔ zi ɓɛ́ m̀ kè zàǔn-zàǔn-màà ɖò ké gbǒ vɛ̀nɛ̀ ɖò mú cĩ́ɛɛ dyí.

²⁵ Kà ní pɛ̀ɛ̀ nyuà nyɔ ɓɛ́ ní-ná-tò nì nyuɛń nyɛɛ hwòɖǒ dyi dèɛ̀ kɛɛ, kà dyúáɖòɔ̀ kǎà bɔ̃̌ nɔ̀mɔ̀ dyíin ɓɛ́ ɔ sɔ̀ ɓóɖó vɛ̃in ɖò kɔ̃ɛɛ nyu nyɔ hwòɖǒ dyi dèɛ̀.

²⁶ Dyí-sɛ́ɖɛ́ìn-nyɔ̀ ɓɛ́ ɔ wɔ̃́ìn hwòɖǒ-kɔ̃in-nyìnììn-nyɔ̀ɛ̀ nyuu-ɖɛ̀ gboɛɛ hwɔìn ní-ɓì kɔ̃̀ mú ɓɛ́ zɛ̀nɛ̌-nì sɔ̀ kɛ, mɔɔ ní-dyù kɔ̃̀ kɔ̃ ɓɛ́ nyɔ ɖò po ɓóó kɛ.

²⁷ Ɔ se dyíin nɔ̀mɔ̀ ɓɛ́ nyɔ ɖò ké ɖo ɖi ɓɛ́ ɔ ké wɔ̃ kɔ̃ zi. Kà dyúáɖòɔ̀ kǎà ɔ se dyíin nɔ̀mɔ̀ ɓɛ́ nyɔ ɖò ké ɔ mìɔùn nììn ɓàìn-bɔ̃̀ dyi po mìɔ.

²⁸ Nyɔ ɓɛ́ ɔ se ɔ mìɔùn dyí kpɔ̃ɔ ɓɛ́ìn nyɛ kè hwɔɖɔ ɓɛ́ ɔ se gmɔ ɖò ɖei nìɛɛ hwɔìn ní.