Nɔ́ɔ́ 24 - Ɓǎsɔ́ɔ̀ Báɓòɔ̀

-19-

¹ Mɔ̀ǔn ɖá ɓɛ́ m̀ ké hwòɖǒ-kɔ̃in-nyìnììn-nyɔ̀ ɓě hwɛ̀nɛ̌ dyéìn, mɔɔ ké wa hwìɛ̀-nì-tò ní nyu m̀.

² Sepóɛɖé ɖɛ waà hwòɖǒ po gbɔ nyɛ̀nɛ̀ɛ̀ kɛɛ mɔ̀ nyɔ ɖɛ gana xwa zàìn jè, ké waà wɔ̃ɔ̀ wùɖù ɖɛ gbà saá-saá. -20-

-20-

³ Nyɔǔn-dyù po gbǒ dyììn ɖé fɔ̀nɔ̀-hwòɖǒ mú, ké ɖɛ-múin-wɔ̃́-wɔ̃́ nyuɛ ké taà ku dúi.

⁴ Ɖɛ nɔ̀mɔ̀ kɔ̃in kúɖúú ɓě dyíìn ɖé gbǒɔ̀ ɓí-dyù ɓě múin dyììn ɖé ɖɛ-dyuò-dyuò mú. -21-

-21-

⁵ Hwòɖǒ-fɔ̀nɔ̀-nyɔ̀ ɓéɖé kpé ké ɔ zi gana-nyɔ̀ dyí. Ɖɛ-múin-wɔ̃́-wɔ̃́ ɓéɖé kpé ké ɔ zi kpé-ɓéɖé-nyɔ̀ dyí.

⁶ Nyɔ ɖò ɓéɖé ɔ ké náún-po-wùɖù sɛ́ɖɛ́ìn dyí dyé hwɛ̀ ɓɛ́ ɔ ké to po. Náún-po-wùɖù nɔ̀mɔ̀ kɔ̃in kúɖúú dyà to-ɖu-ɖu. -22-

-22-

⁷ Fɔ̀nɔ̀-hwòɖǒ tɔ̀mɔ̀ xwíníín mìɔ ɓó zuɖuu-nyɔ̀ bìì, ké ɔ seɛ múin wɔ̃́ɔ ɓɛ́ìn. Ti wa mu ɖɛ kpa ɖɛ ɓě cɛ̃iń nììn nyɛɛ, ɔ se wɔ̃ ɓáà ɓɛ́ìn, ɓɛ́ ɔ ké ɖɛ ɖò cɛ̃. -23-

-23-

⁸ Nyɔ mɔ̀ nyɔ ɓɛ́ ɔ sɔ́ ɖɛ gbà saá-saá dyí kánáá pū ɓɛ́ ɔ kéɛ nyuɛɛ, wa mu ɔ ɖɛ-dya-zà-nyɛ̀nɛ̀ jǔìn.

⁹ Zuɖuu-nyɔ̀ dyí-sɔ́-ɖɛ̀ mɔ̀ nàmàǔn, ké nyɔǔn nyɛ́ nyɔ-dyɔ́-ɓaɖa-nyɔ̀ mú. -24-

-24-

¹⁰ Nì fũ̀à-fṹá-ɖɛ̀ dyi m̀ ɓíɖíi dyi po ní, nì kpé ɓíè dyí mìɔ. -25-

-25-

¹¹ Póìn nyɔ ɓě se ɖɛ gbà ɖò nyu ké wa nì wa kpauń, ɓɛ́ wa ké wa ɖáɓá pídyiɛ. Póìn nyɔ ɓě nì dyi ɓuɖuɛ̌n kpauń, ké wa nì nyɔ-ɖáɓá-nyɔ̀ wɔ̃ muɛń nyɛ.

¹² Kɛɛ m̀ se wa póìn, ké wa dyi m̀ dyi diè, ké m̀ dyi níiń, “Ḿ seɛ dyuòo” ní, Gèɖèpɔ́ɔ̀ mɔ̀à nyɔǔn-dyùɛ̀ hwòɖǒ-múin-ɖe-nyɔ̀ɛɛ seɛ dyée? Nì hwòɖǒ ɖá nyɔ mɔ̀à nyɔǔn-dyùɛ̀ fɛ̀ɛ̀ɔ̀ dyí-gmɔ̀-nyɔ̀ɛɛ seɛ dyuòe? Nì hwòɖǒ ɖá ɔ se nyɔǔn-dyù pɛ́ɛ̌ mu dyììn ɖé waà kũ̀à-sɔ̃̀ múe? -26-

-26-

¹³ Ní dyú, ɖi ɖo, sepóɛɖé ɔ ɖéè ní. Ɖi ɖo sɔ̀à ɖé ɖo-kpã̀ɔ̀ múɛ, sepóɛɖé ɔ ɖéè nyɔ wĩin.

¹⁴ Kà dyúáɖòɔ̀ kǎà fɔ̀nɔ̀-hwòɖǒ jè nyu nìɛ̀ ɓá nì fɛ̀ɛ̀ɔ̀ jè dyí. M̀ dyiɛ da dyé ní, ɔ nɔ̀mɔ̀ dyíin ɓó nì cĩ́-cĩ́ nì ɖé dyúa kɛɛ bìì, ké nì hwòɖǒ-kɔ̃-dè-ɖɛ̀ɔ̀ se dyí cɛ̃̀ǐn mu. -27-

-27-

¹⁵ Mɔ̀ǔn ɖá ɓɛ́ m̀ ké nì kà hwòɖǒ-kɔ̃in-nyìnììn-nyɔ̀ ɓɛ́ ɔ fòà dyí-sɛ́ɖɛ́ìn-nyɔ̀ hwìè, nìí ɓɛ́ ɔ kéà ɔ taàɔ̀ ɔ xwa zà kɛɛ nìà kɛ.

¹⁶ Kɛbì dyí-sɛ́ɖɛ́ìn-nyɔ̀ mɛ kpáìn dyi kpa mɛ̀nɛ̌ìn-sɔ̃́ɛɛ, ɔ sɔ̀ dyí ɖe. Kɛɛ ɖɛ gbà gbɔɔ̀ hwòɖǒ-kɔ̃in-nyìnììn-nyɔ̀ mú. -28-

-28-

¹⁷ Nì mú-nyɛ́-nyɔ̀ dyi gbǒ ní, nì hwòɖǒ mɛ ɓɔ́ múàǔn kpáa. Ɔ dyi ɓuɖu ní, ɔ mɛ ɓɔ́ nì múà-ɖɛ̀ jǔɛ.

¹⁸ Bounɓoɔ̀ dyiɛ dyé ní, ɔ se ɔ hwòɖǒ dyi dèɛ̌ mu. Nìí, ɔ mu ɔ dyoɖo-hwòɖòɔ̀ ɓɔ́í poùn, ké ɔ se nì mú-nyɛ́-nyɔ̀ɔ̀ gǎ kɔ̃ tòɛ̌ mu ɖe. -29-

-29-

¹⁹ Mɔ̀ǔn ɖá ɓɛ́ nì hwòɖǒ ké dyií gbǎìn ɓó hwòɖǒ-kɔ̃in-nyìnììn-nyɔ̀ jè, mɔɔ ɓɛ́ m̀ ké ɔ hwɛ̀nɛ̌ dyéìn,

²⁰ sepóɛɖé ɖɛín-ɖɛ̀ ɖò se ɖé dyúa dyi pɛ̃́ ɓó hwòɖǒ-kɔ̃in-nyìnììn-nyɔ̀ɔ̀ bìì. Gèɖèpɔ́ɔ̀ mu ɔ ceɔ̀ mɔ́ìn. -30-

-30-

²¹ Ní dyú, nì hwòɖǒ mɛ fɛ̃̀ìn Bounɓoɔ̀ dyi, ɓɛ́ m̀ ké kã́áɔ̀ dya dè. Ké mɔ̀ǔn ɖá ɓɛ́ m̀ ké wa gbo vɔ̃,

²² sepóɛɖé nyɔ sɔ̃́ ɓěa ɓɛ́ìn nyɔ-mú-gbɔɔ̀-gbɔɔ̀ kɔ̃ tòɛ̀ wàɖà. Ké nyɔ ɖò se dyuò kà waà nyɔ-mú-gbɔɔ̀-gbɔɔ̀ ké dyai ɓɛ́ɛ nyuɛ.

Fɔ̀nɔ̀-hwòɖǒ-nɔ̀ɔ̌ ɖíɛ́ ɓě ɖe

²³ Fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě kɛà kɛ̀. Ɔ se dyíin nɔ̀mɔ̀ ɓɛ́ zaa-wɔ̃-po-nyɔ̀ ké nyɔ ɖò hwòɖǒǔn gbo zĩ̀ìn ɖé zɔ̃́ín-wɔ̃-po-po mú.

²⁴ Zaa-wɔ̃-po-nyɔ̀ ɓɛ́ ɔ muɛ hwòɖǒ-kɔ̃in-nyìnììn-nyɔ̀ gbo cɛ̃ìn, ɓɛ́ ɔ ké níiń, “Ɖé m̀ ɓíɖí ɓɛ̀ɖɛ̀ìn dyí, m̀ se ɖɛ gbà ɖò nyuo” wɛɛ, nyɔǔn-dyù mu ɔ mú nyɛ́ìn, ɓɛ́ wa ké ɔ gboò.

²⁵ Kɛɛ zaa-wɔ̃-po-nyɔ̀ ɓɛ́ ɔ mu hwòɖǒ-kɔ̃in-nyìnììn-nyɔ̀ zaa dúún wáɖáùn wɛ̃ɛ, nyɔǔn-dyùɛ̀ hwòɖǒ mu ɔ múin dèìn, ké mana mu ɔ kɔ̃ nììn.

²⁶ Nyɔ mɔ̀ nyɔ ɓɛ́ ɔ tò gɔ̃̌-jǔ-wùɖù sɛ́ɖɛ́ìn dyíɛɛ, nyɔ séín hwòɖǒ dèìn ɔ múin.

²⁷ Nyu nì kũ̀à ɓě nì ɖé píéɛɛ kĩ́ín. Nyu nì geɖe-kũ̀à ɓěɔ̀, hwɛ̀ ɓɛ́ m̀ ké nì gbǒɔ̀ po.

²⁸ Mɔ̀ǔn ɖá ɓɛ́ m̀ ké seɛ̀-zàse nyu ɓá m̀ mǔè ɖò dyí. Mɔ̀ǔn ɖá ɓɛ́ m̀ ké ɔ se wĩin tɔ́mɔ́ìn.

²⁹ Ɓɔ́ɔ cɛ̃ɛ, ɓɛ́ m̀ ké níiń, “Ní mu ɖɛ ɔ nyuà mɔ́ún bũ̌ɛɛ ɖò ɔ mɔ̀ùn bũ̌ nyuùn ɖekè. Ní mu ɖɛ ɔ nyuà kɛɛ kpa zàùn.”

³⁰ Ḿ zĩ̀ìn ma fóó-nyɔ̀ ɓɛ́ ɔ mɔ̀ zuɖuu-nyɔ̀ kɛɛ geɖe kè ɔ géɖéè-gbǎ wĩín.

³¹ Ké ḿ dyéɛ ké wí-gbǎ kè pìǐ-kpò ɖǎ wa dyí ɖú, ké sɔ́ɔ́-gmɔ̀ ɓɛ́ ɔ cɛ̃̀ìn ma kà wa ɖeiɛɛ ɖǎ wáɖá.

³² Púɛɛ, ḿ gmɔ̀ ma ɓó gãa, ké ḿ poɛ̌n jè hwìɖǐi, ké ḿ cɛ̃́ ɓó fɔ̀nɔ̀-hwòɖǒ.

³³ Mɔ́ nyíɔ tííwè. Ɖeè dyí ɖɛ wè. Wáɖá sɔ̃ pĩ́ín ɖɛ tííwè, ɓɛ́ m̀ ké fɔ̀.

³⁴ Ké gǎ mu m̀ kɔ̃ún gèìn kà sṹún-gɔ̀-nyɔ̀ ɓéɖé vɔ̃̀ìn-ɖɛ̀ ké ɔ dyià nyɔ kɔ̃ɛ, ké ɖɛ séín mu m̀ xwai hwɛ̀ìn.