Nɔ́ɔ́ 23 - Ɓǎsɔ́ɔ̀ Báɓòɔ̀

-6-

¹ Ɔ jǔ ké nyɔ-wuɖuí-kɔ̃̀-nyɔ̀ ɖò dyi m̀ ɖii-ɖɛ̀ jè ɖá ní, m̀ mɛ màìn ɖii-ɖɛ̀ ɓɛ́ wa mu ɓó m̀ dyúa dyi dèìn nyɛɛ jè mú.

² M̀ dyi ɖii-ɖɛ̀-jè-kàmà-nyɔ̀ jǔ ní, kpɔ̃ m̀ mìɔùn dyí.

³ Ɔ ɖii-ɖɛ̀ ɖéé-ɖééɔ̀ ɖi jè mɛ ɓɔ́ m̀ hwòɖǒ kpɔ̃ɔ mìɔ. Ti ɖíɛ́ ɓě ní, ɖii-ɖɛ̀ɔ̀ mɔ̀ xwáɖá, ké ɔ gbǎa ɓó m̀ bìì. -7-

-7-

⁴ Mɔ̀ǔn ɖá ɓɛ́ m̀ ké m̀ mìɔùn saà ɓó nì ké bã jè. M̀ mɛ fɔ̀nɔ̀ hwòɖǒ ɖé ɖɛ nìà kɛ mú.

⁵ Ti ɓɛ́ m̀ wáɖá kɔ́mɔ́ dyéɖé dya nyɛ̀nɛ̀ɛ̀ kɛɛ ní, nìí, ɔ mu cá. Ɔ hwɔìn kà pìɔ̌-kpà mɛɔ́ kà ɔ gbɔ, ké ɔ wã, ké ɔ mu ɖé dyɔɔ̀ kpá kɔ̃ kà ke nyuà kɛ. -8-

-8-

⁶ Mɔ̀ǔn ɖá ɓɛ́ m̀ ké hwòɖǒ-nyìnììn-nyɔ̀ ɖɛ ɖi. Ɔ ɖii-ɖɛ̀ ɖéé-ɖééɔ̀ ɖi jè mɛ ɓɔ́ m̀ hwòɖǒ kpɔ̃ɔ mìɔ.

⁷ Ɔ mɔ̀ nyɔ ɓɛ́ ɔ nì ɖii-ɖɛ̀ɔ̀ jè hwìɖǐi poɛ̌n kóɖó-kóɖó ɖé ɔ xwíníín nyɛ. Ɔ cɛ̃ɛ m̀ gbo, ké ɔ ɖá, “Ɖi ɖɛ ɓɛ́ m̀ ké ná,” kɛɛ ɔ hwòɖǒ se m̀ gbo nì fɔɔ cá.

⁸ Nì mu ɔ ɖii-ɖɛ̀ɔ̀ kpo wè ɓɛ́ m̀ ɖià kɛɛ zàùn ɖe, ké nì zùo-po-wùɖùɔ̀ mu mú gbɔɔ̀ùn. -9-

-9-

⁹ Mɔ̀ǔn ɖá ɓɛ́ m̀ ké zuɖuu-nyɔ̀ náún po ɖé fɔ̀nɔ̀-hwòɖǒ mú, sepóɛɖé ɔ mu nì fɔ̀nɔ̀-hwòɖǒ-wùɖùɔ̀ dyií dyi poùn. -10-

-10-

¹⁰ Mɔ̀ǔn ɖá ɓɛ́ m̀ ké ɓóɖó-bã̀à sùà daí zàìn, mɔɔ ké mɔ̀ǔn ɖá ɓɛ́ m̀ ké xwíè-dyù pá xwa zà,

¹¹ sepóɛɖé waà gbǎà-nyɔ̀ɔ̀ ɓéɖé gana. Ɔ mɔ̀ nyɔ kè mɔ̀ mu waà zaaɔ̀ ziìn, ɓɛ́ ɔ ké m̀ dúún wáɖá. -11-

-11-

¹² Tò ɖùǔ, ɓɛ́ m̀ ké nyɔ-náún-po-wùɖù cɛ̃́, ɓɛ́ m̀ ké ɖɛ-dyuò-dyuò hwìɖǐi pɛ̃́ìn. -12-

-12-

¹³ Mɔ̀ǔn ɖá ɓɛ́ m̀ ké sɔ̃ dɔ̀ ɓó nì dyúɔ̀ kpeɖe zà jè. Dyú kpeɖe-zàìn-ɓà-cùɔ̀ se ɔ ɖáɓáa mu.

¹⁴ M̀ dyi ɔ ɓà-cùɔ̀ ɓàɖàìn ní, nì mu ɔ gĩɔ xwaún póìn. -13-

-13-

¹⁵ Ní dyú, ɔ jǔ ké m̀ dyi hwòɖǒ fɔ̀nɔ̀ ní, ní hwòɖǒ mu dyi dèìn mìɔ.

¹⁶ Jǎà-wùɖù dyi ɖé m̀ wĩín wóɖó ní, ní mu múàǔn kpáùn mìɔ cá. -14-

-14-

¹⁷ Mɔ̀ǔn ɖá ɓɛ́ m̀ ké nàmàǔn-nyɔ̀ hwɛ̀nɛ̌ dyéìn, kɛɛ nì hwòɖǒ-dyùàɔ̀ mɛ fɛ̃̀ìn Bounɓoɔ̀ dyi kánáá pū.

¹⁸ Jǎà jɛ́ɛ́, ɖɛín-ɖɛ̀ ɖò pɛ̃́ ɖé dyúa dyi ɓó m̀ bìì, ké nì hwòɖǒ-kɔ̃-dè-ɖɛ̀ɔ̀ se dyí cɛ̃̀ǐn mu. -15-

-15-

¹⁹ Ní dyú, wɔ̃́ wuɖuún dyi, ɓɛ́ m̀ ké hwòɖǒ fɔ̀nɔ̀. Nì hwìɖǐi-poìn-ɖɛ̀ mɛ nì hwìè sɛ́ɖɛ́ìn dyíɔ̀ xwíníín.

²⁰ Mɔ̀ǔn ɖá ɓɛ́ m̀ ké kàmàà-ɖɛ̀ kúɖúú ná-nyɔ̀ mɔɔ ɖii-ɖɛ̀ ɓáún-ɓáún ɖi-nyɔ̀ jǔ,

²¹ sepóɛɖé nɔmɔɔ-ná-nyɔ̀ kè ɖii-ɖɛ̀-jè-kàmà-nyɔ̀ zɛ̃̀ìn gǎ-dyé-nyɔ̀ mú. Wa mɔ́ nyíɔ tee jèɛɛ, wa zɔ̃̌ bũ̌in. -16-

-16-

²² Wɔ̃́ nì xwíníín-zà-ɓǎɔ̀ wuɖuún dyi, ké mɔ̀ǔn ɖá ɓɛ́ m̀ ké m̀ ɖe dyi po ɖé ɔ nyɔ-sùà-tìɔ̀ mú.

²³ Dɔ̃ jǎà kè fɔ̀nɔ̀-hwòɖǒ kè ná-wùɖù sɛ́ɖɛ́ìn dyí ɔ kè ɖɛ-múin-wɔ̃́-wɔ̃́. Kpɔ̃ ɓó wa gboi kóɖó-kóɖó.

²⁴ Dyí-sɛ́ɖɛ́ìn-nyɔ̀ɛ̀ xwíníín-zà-ɓǎà hwòɖǒ kpá múàǔn mìɔ. Nyɔ mɔ̀ nyɔ ɓɛ́ ɔ wóɖóìn hwòɖǒ-fɔ̀nɔ̀-dyùɛɛ ɓúá ɔ jè kɔ̃ún dyi mìɔ.

²⁵ Nyuɛ ɓɛ́ m̀ ɖe kè m̀ ɓǎ ké kɔ̃ún dyi ɓúá ɓó nì jè. Nyuɛ ɓɛ́ nì xwíníín-zà-ɖè ké múàǔn kpá. -17-

-17-

²⁶ Ní dyú, tò ní wuɖuɔ̀ ɖùǔ gbo nɔ̀mɔ̀ dyíin, ɓɛ́ m̀ ké ní cĩ́-cĩ́ɔ̀ dyéìn.

²⁷ Gàa ɖòɛ̀ màa ɓɛ́ ɔ mɔ̀ gbàɖàùn-màà kɛɛ nì kà ní-ɓì zũu ɓíè múin nìà kɛ.

²⁸ Ɔ fò nì hwìè kà sṹún-gɔ̀-nyɔ̀ nyuà kɛ, ké ɔ nyuɛ ké gàa zòkpɛ̀ cĩ́-cĩ́ sɔ̀ìn hwìǐ. -18-

-18-

²⁹ Nyɛ́ dyé zaa teeɛɛ́? Nyɛ́ nì wìì múɛ́? Nyɛ́ ɓéɖé zà-ɖɛín nyɛ́? Nyɛ́ ɓéɖé ka-ka kɛ́? Nyɛ́ ɓéɖé bũ̌in-puà-puà ɓɛ́ ɔ se xwíníín ɖò kɔ̃̀ɛɛ kɛ́? Nyɛ́ kɔ̃̀ dyéɖé boɛ́?

³⁰ Ɔ mɔ̀ nyɔ ɓɛ́ náá-ɖɛ̀ ní hwɛ̀ wĩín dyiɛ. Ɔ mɔ̀ nyɔ ɓɛ́ ɔ mɔ̀à náá-ɖɛ̀ kàmà-kàmà caìn-nyɔ̀ kɛ.

³¹ Mɔ̀ǔn ɖá ɓɛ́ nì dyéɖé ké wã́ìn dya nì, ti ɓɛ́ ɔ nì zĩ-zã ɖé kópòɔ̀ mú, ké ɔ nì fãuń wɛ̃, mɔɔ ti ɓɛ́ ɔ ziɛ ná-nyɔ̀ɔ̀ bùnù-zɔ̃̌ kɛ.

³² Kɛɛ ɖéɛ sèìn-naín ní, ɔ numu nyɔ kà sɛ nìà kɛ, ké ɔ po nyɔ cɛ̃́ín kà cɛ̃́-sɛ̀ nyuà kɛ.

³³ Ɔ ɖǎ ná nìǐn, ɖɛ kã̀ìn-kã̀ìn ɓě muá ɔ dyéɖé kɔ̃ ziìn, ké ɖɛ cá-cá ɓě muá ɖé ɔ wĩín wóɖóùn.

³⁴ Ké ɔ mu nììn kà nyɔ nìà dyóó-kpɛ̀ kɔ̃ún wɛ̃, mɔɔ kà nyɔ nìà ɖé méè ɖò dú-hwìɛ̀ ké ɔ nìà nyɔ dyi vũàǔn wɛ̃.

³⁵ Ɔ muɛ cɛ̃ìn, ɓɛ́ ɔ ké níiń, “Wa nàmàìn ḿ ɖɛ, kɛɛ ɔ se ḿ puà. Wa ɓaɖa ḿ ní, kɛɛ ɔ se ḿ tó. Tiɔ̀ nyɛ́ ní mu dyí sɔ̀ùn wɛ̃́? Ní mu náá-ɖɛ̀ɔ̀ ɖò náùn ɖe.”