Nɔ́ɔ́ 22 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Ɔ kpa ɖɛ ɓɛ́ nì nyɛ́nɛ́ín-nyɛ̀nɛ̀ ké nyɔǔn-dyù wĩín nì, ké ɔ zi bã-bã vɛ̀nɛ̀ dyí. Ɔ kpa ɖɛ ɓɛ́ nyɔǔn-dyù ké m̀ dya dè, ké ɔ zi ɓɛ́ m̀ ké séɓàɖà mɔɔ góò ɓéɖéɛɛ dyí.

² Bã-nyɔ̀ kè gǎ-dyé-nyɔ̀ peɖeìn ɖɛ ɖò mú. Ɖɛɔ̀ mɔ̀, Bounɓoɔ̀ mɔ̀ nyɔ mɛ wa nyɔ sɔ̃́ɔ̀.

³ Hwòɖǒ-fɔ̀nɔ̀-nyɔ̀ dyé nàdǐ dyiɛ ɖéé ɖé dyúa, ké ɔ vǐè. Kɛɛ nyɔ ɓɛ́ ɔ se hwòɖǒ kɔ̃in cɛ̃̀ɛ muɛ wɔ̃, ké ɔ wáɖáìn mú, ké ɔ dyéɛ gǎ dyí.

⁴ Nyɔ-mìɔùn-ɓíɖíi-dyà-dyà kè Bounɓoɔ̀ dyi-fɛ̃̀ìn-fɛ̃̀ìn dyà kɔ́mɔ́ kè dya-dè-dè ɔ kè fɛ̀ɛ̀.

⁵ Wí kè xwáɖá-gbǎ-mú nì ɓó hwòɖǒ-kɔ̃in-nyìnììn-nyɔ̀ɛ̀ hwìè dyí, kɛɛ nyɔ ɓɛ́ ɔ dè ɔ mìɔùn dyéɖé gboɛɛ ɓàɖàìn wa dyi.

⁶ Zàìn dyú-gbɔ́ɔ́ hwìè sɛ́ɖɛ́ìn dyí ɔ ɓéɖé ɔ ké kpa kɛɛ da, nìí, ti ɔ mu nyɔ vɛ̀nɛ̀ǐn muùn wɛ̃ɛ, ɔ se hwìèɔ̀ xwíníín sɔ̀ɔ̌ mu.

⁷ Bã-nyɔ̀ kɔ̃̀ gǎ-dyé-nyɔ̀ wuɖuí, ké kpa-kpɔ̃-nyɔ̀ mɔ̀ kpa-po-nyɔ̀ɛ̀ gǐì.

⁸ Nyɔ ɓɛ́ ɔ ɓá se-dyí-sɛ́ɖɛ́ìn-ɖɛ̀ kà nyɔ ɓáà ɓáá-ɖɛ̀ɛ, ɖɛ ɔ muɛ kɔ̃ún dyéìn nyɛɛ mɔ̀ fũ̀à-fṹá-ɖɛ̀, ké ɔ nyɔ-dyi-pĩ́à-pĩ́à mu ɓɔ́í kpáùn.

⁹ Mana nì kpeɖeɛ̀-dyíin-nɔ̀mɔ̀-nyɔ̀ kɔ̃, sepóɛɖé ɔ nyí ɔ ɖii-ɖɛ̀ɔ̀ ɖò gǎ-dyé-nyɔ̀ jè.

¹⁰ Kúmú ɖɛ-dyɔ́-ɓaɖa-nyɔ̀, nìí, zà-ɖɛín kè wuɖui-ɖaɓaìn-ɖaɓaìn séín mu ɓɔ́í kpáùn.

¹¹ Nyɔ mɔ̀ nyɔ ɓɛ́ ɔ ɖɛ̀ɓɛ̀ hwòɖǒ wáɖáá mú, ké ɔ dyuò nyɔǔn gbo wùɖùɛ̀ kɛɛ, kã́á mɔ̀ ɔ ɓǎto.

¹² Bounɓoɔ̀ gmɔ̀ fɔ̀nɔ̀-hwòɖǒ dyí kóɖó-kóɖó, kɛɛ ɔ nyuɛ ké se-jǎà-nyu-nyɔ̀ɛ̀ wuɖu se ɖɛ ɖò kpa.

¹³ Fóó-nyɔ̀ ɖá, “Ganìǎ ɖò nì ɖé píé. Ḿ dyi ɖé sí ní, ɔ mu ḿ kpɔ̃ùn.”

¹⁴ Gbàɖàùn-màà wɔ̃ nì kà xwáɖá-gbǎ-mú nìà kɛ. Nyɔ ɓɛ́ Bounɓoɔ̀ dyoɖo nì kɔ̃ɛɛ, xwáɖáɔ̀ kpɔ̃ ɔ ní.

¹⁵ Zuɖuu-ɖɛ̀ xwai-nyu-nyu dyíìn ɖé dyú-gbɔ́ɔ́ hwòɖǒ bũ̌ dyi, kɛɛ dyú kpeɖe-zàìn-ɓà-cù mɔ̀ ɖɛ muɛ ɖéɛ dyi zàùn.

¹⁶ Nyɔ mɔ̀ nyɔ ɓɛ́ ɔ pĩ́à gǎ-dyé-nyɔ̀ dyi, nìí ɓɛ́ ɔ kɔ́mɔ́ ké kɔ̃ kpá jèɛ kè nyɔ ɓɛ́ ɔ mɔ̀ bã-nyɔ̀ nyíí-ɖɛ̀ nyí-nyɔ̀ɛɛ, wa sɔ̃́ɔ̀ zɛ̃̀ìn gǎ-dyé-nyɔ̀ mú.

Fɔ̀nɔ̀-hwòɖǒ-nɔ̀ɔ̌ kpáɖá-nyɔ ɓaɖa-bùè ɓě

¹⁷ Tò ɖùǔ, ɓɛ́ m̀ ké hwòɖǒ-fɔ̀nɔ̀-nyɔ̀ ɓěɔ̀ wuɖu wɔ̃́, ɓɛ́ m̀ ké ɖɛ wa cɛ̃ kɛɛ hwòɖǒ bũ̌ dyi pɛ̃́ìn.

¹⁸ Ɔ mu dyíin nɔ̀mɔ̀ùn ɓɛ́ m̀ ké wa hwòɖǒ bũ̌ dyi pɛ̃́ìn, ɓɛ́ wa ké m̀ miɔ mánáín nì.

¹⁹ Ní mɔ́ ɓɛ́ m̀ ké Bounɓoɔ̀ hwìɖǐǐ taɓa. Ɔ jèɛɛ, ḿ nìà wa jè m̀ gbo cɛ̃iń nyɛ̀.

²⁰ Má, ḿ nì m̀ bìì fɔ̀nɔ̀-hwòɖǒ-nɔ̀ɔ̌ kpáɖá-nyɔ ɓaɖa-bùè ɓěɛ̀ céèɛ̌n, ɓɛ́ wa ké m̀ náún poe?

²¹ Má, ɔ nì ná, ɓɛ́ m̀ ké nyɔ ɓě ɓɛ́ wa ɖoɓoà m̀ wɛ̃ɛ gɔ̃̌ jǔ dyí-sɛ́ɖɛ́ìn-kà dyììn ɖé jǎà-wùɖù sɛ́ɖɛ́ìn dyí ɓɛ́ ní muà m̀ tɛ̀mɛ̀ìn nyɛɛ múe? -1-

-1-

²² Mɔ̀ǔn ɖá ɓɛ́ m̀ ké gǎ-dyé-nyɔ̀ dyi pĩ́à ɓó ɔ gǎ-dyé-nyɔ̀ jǔ jè. Mɔ̀ǔn ɖá ɓɛ́ m̀ ké nyɔ ɓɛ́ ɔ se bìì vɔ̃-nyɔ̀ ɖò ɓéɖé ɖé zɔ̃́ín-wɔ̃-pòìn-naín nyɛɛ dyi pĩ́à, ɓɛ́ m̀ ké ɔ gɔ̃̌ xwa zà.

²³ Sepóɛɖé Bounɓoɔ̀ mɔ̀ nyɔ mu ɔ zaa ziìn, ɓɛ́ ɔ ké nyɔ ɓě hwuà ɔ kɛɛ nììn fɛ̀ɛ̀ hwu ɖekè. -2-

-2-

²⁴ Mɔ̀ǔn ɖá ɓɛ́ m̀ ké nyɔ ɓɛ́ ɔ kàmà dyoɖo jèɛɛ ɓǎto mú kpɔ̃, mɔɔ ɓɛ́ m̀ ké ɔ dyí kpá.

²⁵ M̀ dyiɛ náa nyu ní, nì mu ɔ nììn kpeɖeɔ̀ dyí ɖúùn, ké ɔ mu m̀ sãùn. -3-

-3-

²⁶ Mɔ̀ǔn ɖá ɓɛ́ m̀ ké nyɔ ɖòɛ̀ bɔ̃́ùn dyí ɖú.

²⁷ Ɔ jǔ ké m̀ ɖǎ wuɖu ɖi hwɛ̀ ké m̀ se kpaɔ̀ pɛ́ɛ̀ ɓɛ́ìn ní, wa mu nì kɔ̃-pɛ̃́-ɖɛ̀ɔ̀ m̀ xwíɖíi zàùn. -4-

-4-

²⁸ Mɔ̀ǔn ɖá ɓɛ́ m̀ ké ɓóɖó-bã̀à ɓɛ́ m̀ ɓǎ ɓě ɖǎǒ zɔ̃̌ɔ̀ dyi dèɛɛ daí zàìn. -5-

-5-

²⁹ Nyɔ ɓɛ́ ɔ mɔ̀ sɛ́ɖɛ́-dyuò-nyɔ̀ ké ɔ nyu ɔ kũ̀à nɛ̀ɛ̀-nɛ́ɛ́-kà kɛɛ, ɔ nyu kã́á ɓě bìì kũ̀à. Ɔ ní nyu nyɔ se ɖɛ kpa ɓě bìì kũ̀à.