Nɔ́ɔ́ 21 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Kã́áɛ̀ hwòɖǒ-dyùà nì ɖé Bounɓoɔ̀ xwaún kà ní-dyèɖè nìà kɛ. Ɔ kpàìn dɛ̀ séín ɔ hwòɖǒ mɔ́ɔ kpàìn dyiɛ.

² Nyɔǔn-dyùɛ̀ nyuu-ɖɛ̀ séín sɛ́ɖɛ́ìn dyí ɖé ɔ mìɔùn dyéɖéín, kɛɛ Bounɓoɔ̀ ɖe hwòɖǒ-dyùà nìɛ̀ ɖeín nyɛɛ múin.

³ Dyí-sɛ́ɖɛ́ìn-ɖɛ̀ kè dyí-ɓɛ̀ɖɛ̀ìn-ɖɛ̀ nyu-nyu dè Bounɓoɔ̀ hwìɖǐi mìɔ, ké ɔ zi sáa-zàìn-ɖɛ̀ dyí.

⁴ Nyɔ-mìɔùn-dyí-ɓúáìn-dyèɖè kè nyɔ-mìɔùn-dyí-ɓúáìn-hwòɖò mɔ̀à hwòɖǒ-kɔ̃in-nyìnììn-nyɔ̀ɛ̀ nyuu-kpèɖèɛɛ mɔ̀ nàmàǔn.

⁵ Mà-kpɛ́ɛ́-nyɔ̀ɛ̀ dyí-sɔ́-ɖɛ̀ wóɖó gbɔ̀ɖɔ̀ kánáá pū, kɛɛ hwòɖǒɛ̀-fṹà-nyɔ̀ jàɖàɛ̀n gǎ dúí.

⁶ Kɔ́mɔ́ ɓɛ́ nyɔ ɖò dyé dyììn ɖé gbá-gbá múɛɛ ní hwèɖèìn ɓó, ké ɔ pa nyɔɔ̀ xwai. Kɛɛ hwɛ̀ ɓɛ́ ɔ ké ná nìɛɛ, nìí, ɔ kpa nyɔɔ̀ ɖé gĩɔ gɔ̀ɔ̀-gbàɔ̀ mú hwɛ̀.

⁷ Hwòɖǒ-kɔ̃in-nyìnììn-nyɔ̀ɛ̀ nyɔ-ɖɛ-gana-xwa-zàìn-zàìnɔ̀ sámá ɓó ɔ dyi, sepóɛɖé ɔ nɔ́ɔ̀ ɓó ɖɛ sɛ́ɖɛ́ìn dyíɛɛ nyu jè.

⁸ Ɖɛ-gbà-nyu-nyɔ̀ɛ̀ cĩ́-cĩ́ kíɖíìn múin, kɛɛ dyí-sɛ́ɖɛ́ìn-nyɔ̀ɛ̀ cĩ́-cĩ́ sɛ́ɖɛ́ìn dyí.

⁹ Ɔ kpa ɖɛ ɓɛ́ m̀ ɖòùn ké ɓí-dyù ɖò mú cĩ́ ɖé gbǒ ɖò dya, ké ɔ zi ɓɛ́ m̀ kè zàǔn-zàǔn-màà ɖò ké gbǒ vɛ̀nɛ̀ ɖò mú cĩ́ɛɛ dyí.

¹⁰ Hwòɖǒ-kɔ̃in-nyìnììn-ɖɛ̀ nyu-tò nyu hwòɖǒ-kɔ̃in-nyìnììn-nyɔ̀ kánáá pū. Ɔ ní dyé nyɔ ɖò wìǐn fɔɔ cá.

¹¹ Wa dyi ɖɛ-dyɔ́-ɓaɖa-nyɔ̀ gǎ-dyé-dyé kɔ̃ po ní, nyɔ ɓɛ́ ɔ se hwòɖǒ kɔ̃in cɛ̃̀ɛ cɛ̃́ ɓó fɔ̀nɔ̀-hwòɖǒ, ké wa dyi hwòɖǒ-fɔ̀nɔ̀-nyɔ̀ náún po ní, ɔ fɔ̀nɔ̀-hwòɖǒɔ̀ kpá kɔ̃.

¹² Gèɖèpɔ́ɔ̀ mɔ̀à dyí-sɛ́ɖɛ́ìn-nyɔ̀ɔ̀ kɛɛ dyuò ɖɛ séín mu dyúa ɖé hwòɖǒ-kɔ̃in-nyìnììn-nyɔ̀ ɓíɖí-taún wɛ̃, ké ɔ mɔ̀ nyɔ mu hwòɖǒ-kɔ̃in-nyìnììn-nyɔ̀ɔ̀ mú gbɔɔ̀ùn.

¹³ Nyɔ mɔ̀ nyɔ kã ɔ ɖùǔ ɓó gǎ-dyé-nyɔ̀ɛ̀ kpé-po-wùɖù gboɛɛ, ti ɔ mɔ̀ùn mu kpé poùn wɛ̃ɛ, nyɔ ɖò se ɔ ɖùǔ gbo tòɛ̌ mu.

¹⁴ Ɔ jǔ ké nyɔ ɖò dyi dyoɖoún kpá ní, nyíí-ɖɛ̀ ɓɛ́ wa nyí ɔ sáná-kà kɛ mɔɔ nyɔ-gbo-pa-wìɖì nyuɛ ké ɔ dyoɖo-hwòɖòɔ̀ wáɖá.

¹⁵ Dyí-sɛ́ɖɛ́ìn-nyɔ̀ dyi nyɔ ɖò dyí-sɛ́ɖɛ́ìn-ɖɛ̀ nyuɛ dyéín, ɔ hwòɖǒ kpá múàǔn. Kɛɛ ɖɛ nìà kɛ po ɖɛ-gbà-nyu-nyɔ̀ɛ̀ hwòɖǒ ɖé ɖei.

¹⁶ Nyɔ mɔ̀ nyɔ ɓɛ́ ɔ sɔ̀ ɖɛ-múin-wɔ̃́-hwìèɔ̀ xwíníín nyɛɛ, dɛ̀ ɔ muɛ dúí jàɖàìn nyɛɛ mɔ̀ ɖé dɛ̀ nyɔ ɓě ɖǎà mɛ́ɛ muà kɛ.

¹⁷ Nyɔ ɖɛ̀ɓɛ̀ hwɔ-pa-pa múɛɛ zɛ̃̀ìn gǎ-dyé-nyɔ̀ mú, ké nyɔ ɖɛ̀ɓɛ̀ wã́ìn ná-ná kè ɖɛín-ɖɛ̀ ɖi-ɖi múɛɛ ní bã.

¹⁸ Hwòɖǒ-kɔ̃in-nyìnììn-nyɔ̀ kè se-jǎà-nyu-nyɔ̀ ɖú ɖɛ gbà ɓɛ́ wa mɔ́à dyí-sɛ́ɖɛ́ìn-nyɔ̀ kɔ̃ dyàà dyiɛɛ kpa dyí. Ɖɛ gbàɔ̀ dyi wa mìɔùn kɔ̃.

¹⁹ Ɔ kpa ɖɛ ɓɛ́ m̀ ké ɖé gbǎùn-fúɖúá kɔ̃ cĩ́, ké ɔ zi ɓɛ́ m̀ kè zàǔn-zàǔn-màà ɓɛ́ ɔ mɔ̀ ka-nyɔ̀ teeɛɛ ké xwa cĩ́ìn nyɛɛ dyí.

²⁰ Dyi-dè-ɖɛ̀ kpa ɖɛ ɓě nì ɖé hwòɖǒ-fɔ̀nɔ̀-nyɔ̀ ɓíɖí-gbǒǔn, kɛɛ ɖɛ kpá zuɖuu-nyɔ̀ xwaún wɛ̃ɛ, ɔ ɖiɛ nyɛ̀nɛ̀ɛ̀. Ɔ ní dè ɖò dyi fɔɔ.

²¹ Nyɔ ɓɛ́ ɔ kpɔ̃ ɓó dyí-sɛ́ɖɛ́ìn-sɛ́ɖɛ́ìn kè ɖɛ̀ɓɛ̀ǐn-ɖɛ̀ɓɛ̀ǐn gboi kóɖó-kóɖóɛɛ, ɔ dyé fɛ̀ɛ̀ kè kɔ́mɔ́ ɔ kè dya-dè-dè.

²² Hwòɖǒ-fɔ̀nɔ̀-nyɔ̀ ɓɛ́ìn hwɔɖɔ ɓɛ́ gàa-zà-nyɔ̀ ɓě nì dyí gmɔ̀ǔn wɛ̃ɛ toún ɖuɛ, ɓɛ́ ɔ ké gmɔ ɓě ɓɛ́ wa taɓaà hwìɖǐǐɛɛ wáɖá.

²³ Nyɔ ɓɛ́ ɔ gmɔ̀ ɔ wɔ̃ kè ɔ miɔ dyíɛɛ ní dyé zaa.

²⁴ Nyɔ ɓɛ́ wa ɖáìn ɖɛ-dyɔ́-ɓaɖa-nyɔ̀ɛɛ mɔ̀ nyɔ ɓɛ́ ɔ ɓúáìn ɔ mìɔùn dyí mìɔ ɖé ɔ nyuu-ɖɛ̀ séín múɛ.

²⁵ Fóó-nyɔ̀ɛ̀ hwòɖǒ-kpɔ̃-ɖɛ̀ jè mu ɔ ɖáɓáùn, sepóɛɖé ɔ wáɖá sɔ̃ pĩ́ín, ké ɔ se kũ̀à ɖò nyuɛ mɔ́.

²⁶ Ɔ gã̀ ɖɛ mɔ́uń dyi tee ké dyóɖó zi. Kɛɛ dyí-sɛ́ɖɛ́ìn-nyɔ̀ gã̀ nyɔ ɖɛ nyíɛń dyi tee, ké ɔ ní dɔ̀ sɔ̃.

²⁷ Bounɓoɔ̀ nyɛ́ hwòɖǒ-kɔ̃in-nyìnììn-nyɔ̀ɛ̀ sáa-zàìn-ɖɛ̀ mú mìɔ, hwɛ̀ ḿ po níiń, ɔ dyiɛ hwòɖǒ gbà ɖeín ɓéɖé ní.

²⁸ Seɛ̀-zàse-nyu-nyɔ̀ mu mú gbɔɔ̀ùn, kɛɛ nyɔ ɓɛ́ ɔ ɖe ɖɛ múin, hwɛ̀ ɓɛ́ ɔ dyi ɖé wuɖu zàa, ɔ wuɖuɔ̀ mu nììn kánáá pū.

²⁹ Hwòɖǒ-kɔ̃in-nyìnììn-nyɔ̀ ku dyúa dyi, kɛɛ dyí-sɛ́ɖɛ́ìn-nyɔ̀ dyuò ɖɛ ɔ nì nyuɛń nyɛɛ dyí wáɖáá.

³⁰ Fɔ̀nɔ̀-hwòɖǒ ɖò mɔɔ ɖɛ-múin-wɔ̃́-wɔ̃́ ɖò mɔɔ náún-po-wùɖù ɖò ɓɛ́ ɔ mɔ̀ Bounɓoɔ̀ gbo-vɔ̃-ɖɛ̀ ɖòɛɛ se kpáná ɖò gbo wóɖóɛ ɓɛ́ìn.

³¹ Nyɔǔn-dyù ɓɛ́ìn waà sǒ ɓě naɓaà ɓó to gbo mu jè, kɛɛ Bounɓoɔ̀ ɖòùn mɔ̀ nyɔ to-ɖu-ɖu nyí-nyɔ̀.