Nɔ́ɔ́ 20 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Nɔmɔɔ mɔ̀ nyɔ-dyɔ́-ɓaɖa-ɖɛ̀, ké náá-ɖɛ̀ kàmà-kàmà po hwɔ̀ɖɔ̀-gbàà dyi. Ɔ jèɛɛ, nyɔ ɓɛ́ ɔ ná nɔmɔɔ kɛɛ se hwòɖǒ fɔ̀nɔ̀.

² Kã́á dyi dyoɖoún kpá ní, ɔ hwɔìn ganìǎ ké dyoɖo poɛń nì kɛ. Nyɔ mɔ̀ nyɔ ɓɛ́ ɔ po ɔ dyoɖoún wɛ̃ɛ, ɔ fɛ̀ɛ̀ɔ̀ mu ɔ xwa sɔ̀ùn.

³ Nyɔ ɓɛ́ ɔ fɛ̃̀ìn zà-ɖɛín dyiɛɛ, nyɔǔn dyé ɔ kpéín, kɛɛ zuɖuu-nyɔ̀ ɓaɖa ɖɛ wɔ̃ hwìɛ̀ dyi kánáá pū.

⁴ Fóó-nyɔ̀ fó ɖɛ ɓáuń ɓó ɖɛ-ɓá-tìɔ̀ mú. Ɔ jèɛɛ, ti ɓɛ́ geɖe-kɔ́-tì mu ɓó nyiniìn nyɛɛ, ɔ se ɖɛ ɖò dyéɛ mu.

⁵ Nyɔǔn-dyùɛ̀ hwòɖǒɛ̀-gbɔ-po-ɖɛ̀ pɛ̃́ ɖéé ɖé ɔ hwòɖǒ-dyùàɔ̀ gbɔún dyi kà ɖɛ ɖò pɛ̃́à ɖé ní-nɔ̀ɔ̀ ɖò hwuɖu dyiɛ, kɛɛ nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ mɔ̀ nyɔ ɓɛ́ìn ɖéɛ jiɖiɛ.

⁶ Nyɔ ɓáún-ɓáún ɓɛ́ìn cɛ̃ɛ ɓá wa mìɔùn jè dyí kà nyɔǔn ɓɛ́ìn wa hwòɖǒ kɔ̃ dèɛ̀ kɛ, kɛɛ nyɛ́ ɓɛ́ìn nyɔ ɖò ɔ ɓɛ́ìn hwòɖǒ kɔ̃ dèɛ̀ jɛ́ɛ́ cá kɛɛ dyéɛ kɛ́?

⁷ Dyí-sɛ́ɖɛ́ìn-nyɔ̀ɛ̀ cĩ́-cĩ́ se kɛɛ ɖò ɓéɖé, ké mana nì ɔ dyú ɓě kɔ ɓó ɔ ɖeín dyíɛɛ kɔ̃.

⁸ Kã́á ɓɛ́ ɔ kò ɓó ɔ zèèɔ̀ kɔ̃, ɓɛ́ ɔ ké zaa wɔ̃ poɛɛ, ɔ dyéɖé ɖe zɔ̃́ínɔ̀ múin, ké ɔ dyé ɖɛ gbà séín nì ɖéɛ múɛ.

⁹ Nyɛ́ ɓɛ́ìn cɛ̃ɛ, ɓɛ́ ɔ ké níiń, “Ḿ ɖǎ ní hwòɖǒ-dyùàɔ̀ mú hwɔ, ké ḿ se nàmàǔn ɖò ɓéɖéo” kɛ́?

¹⁰ Pṹá se wɔ̃ ɓɛ́ìn kè ɖɛ-mú-ɖàɓàìn-ɖɛ̀ se wɔ̃ ɓɛ́ìn nyɛɛ jè nyàìn Bounɓoɔ̀ dyi.

¹¹ Dyú-gbɔ́ɔ́ɛ̀ xwai-nyu-ɖɛ̀ zà ɔ kpeɖe da. Kɛbì ɔ mɔ̀ jǎà-nyɔ̀ kè dyí-sɛ́ɖɛ́ìn-nyɔ̀ ní, ɓóɛ̀ m̀ ɓɛ́ìn dyuòɛ̀.

¹² Bounɓoɔ̀ nyu ɖùǔ ɓó dyi wɔ̃́ jè, ké ɔ nyu dyéɖé ɓó dyi dyé jè.

¹³ Ɓɔ́ nyíɔ gbo vòɛ̀n, gǎ ní kɔ̃̀ ɖà m̀ kɔ̃ dyá. Ɓáà nì dyéɖéɔ̀ wáɖáá, ɓɛ́ m̀ ké kũ̀à nyu gana-kà, nìí, nì mu ɖii-ɖɛ̀ pàɖǎ ɓéɖéìn.

¹⁴ Ɖɛ-dɔ̃-nyɔ̀ cɛ̃ɛ, ké ɔ ɖá, “Ɔ se dyíin nɔ̀mɔ̀! Ɔ se dyíin nɔ̀mɔ̀!” Kɛɛ ti ɔ ɖǎ ɖɛɔ̀ dɔ̃, ké ɔ ɖǎ kɔ̃ poɛɛ, nìí, ɔ ɖú ɓɔ́ɖɔ́ kpàǐ.

¹⁵ Góò nì, ké sɔ́ɔ́ kpa ɖɛ kúɖúú nì, kɛɛ hwòɖǒ-fɔ̀nɔ̀-mìɔ̀ mɔ̀ bɛ̃̀ìn-ɖɛ̀ kpa ɖɛ ɓɛ́ ɔ zi bɛ̃̀ìn-ɖɛ̀ séín dyíɛ.

¹⁶ Nyɔ mɔ̀ nyɔ ɓɛ́ ɔ ɖú ɖéè ɖòɛ̀ bɔ̃́ùn dyíɛɛ, wa mɛ kpa ɔ mú-po-ɖɔ̀, ɓɛ́ ɔ ké tɔ̀ɔ̀-má jǔ, ɓɛ́ ɔ ké kpaɔ̀ pɛ́ɛ̀ hwɛ̀.

¹⁷ Ɖii-ɖɛ̀ ɓɛ́ nyɔ ɖò dyé dyììn ɖé kpáná se dyí sɛ́ɖɛ́ìn po-po múɛɛ ɖéè ɔ wĩin dyɛo, kɛɛ ɖé mánáín ní, sɔ́ɔ́-kɛ́nɛ́ɛ́ mu ɔ wɔ̃ún dyíìn.

¹⁸ Náún-po-wùɖù sɛ́ɖɛ́ìn dyí mɔ̀ ɖɛ nyuɛ ké nyɔǔn-dyùɛ̀ dyí-sɔ́-ɖɛ̀ ɓě kpá súɖúú dyí. Hwɛ̀ nyɔ ɖò ké to poɛɛ, ɔ mɔ́ náún-po-nyɔ̀ sɛ́ɖɛ́ìn dyí dyi.

¹⁹ Nyɔ-nyɛ́nɛ́-zeɖe-nyɔ̀ mɔ̀ sáná-ɖɛ̀ pìǐn-zà-nyɔ̀. Ɔ jèɛɛ, mɔ̀ǔn ɖá ɓɛ́ m̀ ké nyɔ ɓɛ́ ɔ wùɖù mìɔ kɛɛ dyí nɛ́.

²⁰ Nyɔ mɔ̀ nyɔ ɓɛ́ ɔ vàɖǎ ɔ ɖe mɔɔ ɔ ɓǎ kɛɛ, Gèɖèpɔ́ɔ̀ mu ɔ fɛ̀ɛ̀ɔ̀ dyí cɛ̃̀ìn kà nyɔ mɔ́ìn kà ɖáùnpò ɖòɛ.

²¹ Kɔ́mɔ́ ɓɛ́ nyɔ ɖò dyé wàɖà kɛɛ, ɖéɛ dúí-jɛ̀ɖɛ̀ìn-naín ní, mana ní nìɛ̀ kɔ̃.

²² Ɓɔ́ɔ cɛ̃ɛ, ɓɛ́ m̀ ké níiń, “Ní mu ɖɛ gbàɔ̀ kpa zàùn.” Gmɔ̀ Bounɓoɔ̀ nììn ti dya, nìí, ɔ mu m̀ gbo kpáùn.

²³ Pṹá se wɔ̃ ɓɛ́ìn nyɛɛ jè nyàìn Bounɓoɔ̀ dyi, ké ɖɛ-mú-ɖàɓàìn-ɖɛ̀ ɓɛ́ ɔ se wɔ̃ ɓɛ́ìn nyɛɛ jè se ɔ hwòɖǒ dyi dè.

²⁴ Bounɓoɔ̀ mɔ̀ hwìè à ké kpaa à da-zàìn-nyɔ̀. Kà ɔ nìà náa, nìí, xwɛ̌ nyɔ ɖò ɓɛ́ìn kà ɔ mìɔùn nììn fɛ̀ɛ̀ɔ̀ mu nìɛ̀ nyuùn wɛ̃ɛ dyuòɛ̀ kɛ́?

²⁵ Ɖɛ nìà kɛ hwɔìn xwáɖá-gbǎ-mú ɓó nyɔ ɖò bìì. Ɖɛɔ̀ mɔ̀, ɓɛ́ nyɔɔ̀ ké se hwìɖǐi poìn, ɓɛ́ ɔ ké ɖɛ ɖò Gèɖèpɔ́ɔ̀ nyɛ́nɛ́ín ɖáìn, hwɛ̀ ɓɛ́ ɔ ké kpá hwòɖǒ taɓaa dyí ɖú.

²⁶ Hwòɖǒ-fɔ̀nɔ̀-kã̀ǎ cɛ̃́ hwòɖǒ-kɔ̃in-nyìnììn-nyɔ̀ ɓě nyɔ ɓěɔ̀ hwìɛ̀ dyi, ké ɔ tò wa gǎ kɔ̃.

²⁷ Bounɓoɔ̀ toìn ɔ ceɔ̀ ɖé nyɔǔn-dyùɛ̀ hwòɖǒ-xwíníín-hwòɖò-dyùà múin, ɓɛ́ ɔ ké nyɔǔn hwòɖǒɛ̀-gbɔ-po-ɖɛ̀ dyí dyuò.

²⁸ Ɖɛ̀ɓɛ̀ǐn-ɖɛ̀ɓɛ̀ǐn kè jǎà-nyu-nyu mɔ̀ kã́á ɖòɛ̀ wuɖuí-kɔ̃̀-kpè dúi-kùìn-nyɔ̀. Ɖɛ̀ɓɛ̀ǐn-ɖɛ̀ɓɛ̀ǐn mɔ̀ ɖɛ kpɔ̃ ɔ zèèɔ̀ dyií dyi.

²⁹ Kpé nì nyɔ gmɔ̀ ɓě múɛɛ nyuɛ ké wa nì díɖí, ké dyùì mɔ̀ nyɔ sùà ɓě dyíin-nɔ̀mɔ̀ìn-nyɔ̀.

³⁰ Ɓaɖa-ɓaɖa kè bũ̌in-puà-puà zà nyɔ ɖɛ gbà xwíníín dyi.