Nɔ́ɔ́ 2 - Ɓǎsɔ́ɔ̀ Báɓòɔ̀

Ɖɛ ɓɛ́ fɔ̀nɔ̀-hwòɖǒ pɛ́ɛ̀ nyɔ kɛ

¹ Ní dyú, m̀ dyi ɖɛ ɓě ɓɛ́ ḿ ɖǎà m̀ tɛ̀mɛ̀ìn nyɛɛ dyi kpɔ̃, ké ní gma ɓěɔ̀ se m̀ hwìɖǐi sɔ̀ ní,

² ké m̀ dyi fɔ̀nɔ̀-hwòɖǒ ɖùǔ gbo tò, ké m̀ dyi nì hwòɖǒ-dyùàɔ̀ tò, ɓɛ́ m̀ ké ɖɛ múin wɔ̃́ ní,

³ ké m̀ dyi ɖɛ-dyí-dyuò-dyuò ɖá, ké m̀ dyi ɖɛ-múin-wɔ̃́-wɔ̃́ kpé gbo pòìn ní,

⁴ ké m̀ dyi ɔ dyi mɔ́ kà nyɔ kéɔ́ kà séɓàɖà dyi mɔ́ɛ, mɔɔ kà nyɔ kéɔ́ kà kɔ́mɔ́-ɖɛ̀ vǐè-vǐè ɖò dyi mɔ́ɛɛ ní,

⁵ nìí, nì muɛ múin wɔ̃́ùn kà nyɔ ké Bounɓoɔ̀ dyi fɛ̃̀ìn nyuɛ, ké nì mu Gèɖèpɔ́ɔ̀ dyí dyuòùn.

⁶ Bounɓoɔ̀ mɔ̀ fɔ̀nɔ̀-hwòɖǒ-tò-nyɔ̀, ké ɖɛ-dyí-dyuò-dyuò kè ɖɛ-múin-wɔ̃́-wɔ̃́ sɔ̀ìn ɖé ɔ wĩín.

⁷ Ɔ ɓéɖé fɔ̀nɔ̀-hwòɖǒ sɛ́ɖɛ́ìn dyí ɓó dyí-sɛ́ɖɛ́ìn-nyɔ̀ ɓě bìì, ké ɔ mɔ̀ dyí-zĩ̀ìn-ɖɛ̀ ɓó nyɔ ɓě kɔ̃̀ cĩ́-cĩ́ se kɛɛ ɖò ɓéɖéɛɛ bìì.

⁸ Ɔ gmɔ̀ dyí-sɛ́ɖɛ́ìn-nyɔ̀ ɓě dyí, ké ɔ nàìn jǎà-nyɔ̀ ɓě.

⁹ M̀ dyi ní wuɖuɔ̀ nyu ní, nì mu ɖɛ mɔ̀ ɖɛ sɛ́ɖɛ́ìn dyíɛ kè ɖɛ ɓɛ̀ɖɛ̀ìn dyíɛ ɔ kè ɖɛ mɔ̀ jǎà-ɖɛ̀ kɛɛ dyuòùn, ké nì mu ɖɛ m̀ ké nyuɛɛ dyí dyuòùn.

¹⁰ Nì mu hwòɖǒ fɔ̀nɔ̀ùn, ké nì ɖɛ-dyuò-dyuòɔ̀ muɛ nyuùn ɓɛ́ nì hwòɖǒ ké múàǔn kpá.

¹¹ Nì ɖɛ-múin-ɖe-ɖeɔ̀ kè nì ɖɛ-múin-wɔ̃́-wɔ̃́ɔ̀ mu nì dyí-gmɔ̀ìn-ɖɛ̀ jǔùn.

¹² Fɔ̀nɔ̀-hwòɖǒ mu m̀ dyí gmɔ̀ùn, ɓɛ́ m̀ ké se ɖɛ gbà ɖò nyu. Ɔ muɛ nyuùn ɓɛ́ m̀ ké se nyɔ ɓě nyìnììn wĩín dyiɛɛ dyí kpá.

¹³ Wa mɔ̀ nyɔ ɓě ɓɛ́ wa táà hwìè sɛ́ɖɛ́ìn dyíɔ̀ dyi, ɓɛ́ wa dyi tíe-kpò-hwìèɔ̀ xwíníín kpá kɛ.

¹⁴ Nyɔ nì ná ɓěa hwòɖǒ dèìn ɖɛ-gbà-nyu-nyu múin. Wa ɖɛ̀ɓɛ̀ ɖɛ kíɖíìn múin nyu-nyu mú.

¹⁵ Nyɔ nì ná ɓěa nyuu-ɖɛ̀ kíɖíìn múin. Waà kpeɖe ɖò se dyí sɛ́ɖɛ́ìn.

¹⁶ Fɔ̀nɔ̀-hwòɖǒ muɛ nyuùn ɓɛ́ m̀ ké gàa ɖòɛ̀ gmàà ɓɛ́ ɔ mɔ̀ gbàɖàùn-màà kɛɛ xwaún pó. Ɔ mɔ̀ màa ɓɛ́ ɔ po nyɔ pɛ́í ɖé ɔ wuɖu ɖéé-ɖééɔ̀ múɛ.

¹⁷ Ɔ mɔ̀ màa ɓɛ́ ɔ wã ɔ dyú-ɓǎ ɓɛ́ ɔ kèɔ̀ kè wóɖó ɓíɖíiɛɛ kɔ̃, ké wuɖu ɓɛ́ ɔ ɖi ma ɓó Gèɖèpɔ́ɔ̀ dyúa kɛɛ jè sɔ̀ ɔ hwìɖǐiɛ.

¹⁸ Hwìè mu ɖé ɔ ɓíɖí-taún wɛ̃ɛ mɔ̀ hwìè mu ɖé gĩɔ kɛ. M̀ dyi ɔ ɓíɖí-taún-hwìè xwíníín kpá ní, m̀ kpá gĩɔ-hwìè xwíníín.

¹⁹ Nyɔ ní mu ɖé ɔ gbo hwɛ̀ ké nyɔ ní dyi ɖe, mɔɔ ké nyɔ ní dyé hwìè mu ɖé fɛ̀ɛ̀ múɛɛ da ɖe.

²⁰ Ɔ jèɛɛ, m̀ mɛ kpá dyí-sɛ́ɖɛ́ìn-nyɔ̀ ɓěɔ̀ nììn hwìèɔ̀ xwíníín, ɓɛ́ m̀ ké fɛ̀ɛ̀ sɛ́ɖɛ́ìn dyíɛɛ cĩ́.

²¹ Dyí-sɛ́ɖɛ́ìn-nyɔ̀ ɓěɔ̀ mu ɖé ɓóɖóɔ̀ kɔ̃ cĩ́ìn. Nyɔ ɓě kɔ̃̀ cĩ́-cĩ́ se kɛɛ ɖò ɓéɖéɛɛ mu ɓóɖóɔ̀ kɔ̃̀ùn.

²² Kɛɛ Gèɖèpɔ́ɔ̀ mu hwòɖǒ-kɔ̃in-nyìnììn-nyɔ̀ ɓěɔ̀ ɓóɖóɔ̀ kɔ̃ zàùn. Ɔ mu se-jǎà-ɖɛ̀-nyu-nyɔ̀ ɓěɔ̀ ɖé ɓóɖóɔ̀ mú zàùn kà nyɔ zàà ɓáá-ɖɛ̀ ɖò hwuɖuɛ.