Nɔ́ɔ́ 19 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Ɔ kpa ɖɛ ɓɛ́ m̀ ké gǎ-dyé-nyɔ̀ jǔ, ɓɛ́ nì cĩ́-cĩ́ ké se kɛɛ ɖò ɓéɖé, ké ɔ zi ɓɛ́ m̀ ké wĩín-dyi-nyìnììn-nyɔ̀ ɓɛ́ ɔ mɔ̀ zuɖuu-nyɔ̀ kɛ jǔɛɛ dyí.

² Ɔ se wɛ̃̀ìn ɓɛ́ nyɔ ɖò ké ɖɛ ɖòɛ̀ dyɔɔ̀ cà-cà nyu, ɓɛ́ ɔ ké se ɖɛɔ̀ fɔ̀nɔ̀-hwòɖǒ ɓéɖé. Nyɔ ɓɛ́ ɔ seà hwòɖǒ kuɛ ɓɛ́ìn nyɛɛ, ɔ zaa dyéɛ ní wáɖá wé.

³ Nyɔ ɖíɛ́ ɓěɛ̀ zuɖuu-ɖɛ̀ xwai-nyu-nyu dyà waà ɓíɖíi-dyi-kpá-kpá. Ɔ ɖǎ ná nìǐn, nìí, wa wã̀ɛ̀n Bounɓoɔ̀ ɓoi.

⁴ Bã-nyɔ̀ɛ̀ ɓǎto ɓě nì kɔ̃ kpáuń kánáá pū, kɛɛ ɓǎto xwéɖé wè ɓɛ́ gǎ-dyé-nyɔ̀ ɓéɖéɛɛ, wa ɖǎ ɔ ɖei hwɛ̀.

⁵ Wa mu seɛ̀-zàse-nyu-nyɔ̀ gǎ kɔ̃ tòùn wɛ̃́ɛ́ pū, ké wa se se-tɔ́mɔ́-nyɔ̀ dyéɖé kɔ̃in wã̀ǐn mu.

⁶ Nyɔ ɓáún-ɓáún zɔ̀ìn wuɖuí-kɔ̃̀-nyɔ̀ ɖɛ, ké nyɔ séín mɔ̀ hwòɖǒ-nɔ̀mɔ̀-nyɔ̀ɛ̀ ɓǎto.

⁷ Gǎ-dyé-nyɔ̀ɛ̀ ɖíí séín ɓě nyɛ́ ɔ mú, hwɛ̀ ḿ po níiń, ɔ ɓǎto ɓěɔ̀ ɖò ké ɔ bũ̌in xwɛ̃́ìn mɔ́ dyɛ mɔ̀ùn. Ɔ sí wa kíɖíí, ké ɔ nì wa wuɖu kɔ̃in poɛń, kɛɛ ɔ se wa dyéɛ ɓɛ́ìn.

⁸ Nyɔ mɔ̀ nyɔ ɓɛ́ ɔ kpɔ̃ fɔ̀nɔ̀-hwòɖǒɛɛ ɖɛ̀ɓɛ̀ ɔ mìɔùn nììn fɛ̀ɛ̀ɔ̀ mú, ké nyɔ ɓɛ́ ɔ kpɔ̃ ɓó ɖɛ-múin-wɔ̃́-wɔ̃́ gbo dyi kóɖó-kóɖóɛɛ, ɔ nyuu-ɖɛ̀ wóɖó mú.

⁹ Wa mu seɛ̀-zàse-nyu-nyɔ̀ gǎ kɔ̃ tòùn wɛ̃́ɛ́ pū, ké se-tɔ́mɔ́-nyɔ̀ mu mú gbɔɔ̀ùn.

¹⁰ Ɔ se wɛ̃̀ìn ɓɛ́ zuɖuu-nyɔ̀ ké kɔ́mɔ́ kɔ̃ nì, hwɛ̀ ḿ po níiń, ɓɛ́ gǐì ké kã́á ɓě wuɖuí kɔ̃̀.

¹¹ Hwòɖǒ-fɔ̀nɔ̀-nyɔ̀ɛ̀ dyoɖo-hwòɖò mɛɛ̀ ní, ké ɖɛ nyí ɔ dya-dè-dèɛɛ mɔ̀, nyɔ ɖò dyi ɔ jeín dyi mɔ́ ní, ɔ wã̀ɛ̀n dyéɖé kɔ̃in.

¹² Kã́á dyi dyoɖoún kpá ní, ɔ hwɔìn ganìǎ ké dyoɖo poɛń nì kɛ, kɛɛ ɔ hwòɖǒ dyi nyɔ ɖò múin dèìn ní, ɔ hwɔìn dunu ɓɛ́ ɔ tèìn pìǐ kɛ.

¹³ Zuɖuu-dyù dyà ɔ ɓǎà mú-gbɔɔ̀-gbɔɔ̀, ké zàǔn-zàǔn-màà ɔ kè ní-ɓò ɓɛ́ ɔ té ɓó dà ɖò kà-kà kánáá pūɛɛ hwɔìn ní. Ɔ ní kã́ wĩín.

¹⁴ Gbǒ ɓě kè kɔ́mɔ́-ɖɛ̀ tɔ̀ɔ̀ ɓě mɔ̀ dúí-sè-ɖɛ̀, ké ɓǎ ɓě ɓɛ́ìn waà dyú ɓě gbo sèɛ̀, kɛɛ hwòɖǒ-fɔ̀nɔ̀-nyɔ̀nɔ̀ mɔ̀ nyíí-ɖɛ̀ ɓɛ́ ɔ sɔ̀ìn ɖé Bounɓoɔ̀ gboɛ.

¹⁵ Fó-fó dyà nyíɔ-mɔ́-mɔ́, ké mɔ́ ní sɔ̀ fóó-nyɔ̀ kɔ̃.

¹⁶ Nyɔ ɓɛ́ ɔ kpɔ̃ Gèɖèpɔ́ɔ̀ nììn gma ɓěɔ̀ dyiɛɛ, ɔ fɛ̀ɛ̀ɔ̀ mu ɔ xwa hwèɖèìn, kɛɛ nyɔ ɓɛ́ ɔ poɛ dyií dyiɛɛ mu mɛ́ìn.

¹⁷ Nyɔ mɔ̀ nyɔ ɓɛ́ ɔ nyu gǎ-dyé-nyɔ̀ jĩ́á-jè dyíɛɛ po Bounɓoɔ̀ kpa mú, ké Bounɓoɔ̀ mu ɔ pɛ́ɛ̀ìn ɖe ɓó ɖɛ ɔ nyuà kɛɛ jè.

¹⁸ Zà nì dyúɔ̀ kpeɖe nɔ̀ɔ̀ kà ɓɛ́ m̀ ɓɛ́ìn nyuɛ keɛ. Ɔ jǔ ké m̀ seɛ náa nyu ní, m̀ nì ɔ gbo kpáuń, ɓɛ́ ɔ ké ɔ mìɔùn mú gbɔɔ̀.

¹⁹ Dyoɖo-jè-kàmà-nyɔ̀ mɛ ɖú ɔ dyoɖo vɛ̀nɛ̀ɔ̀ gbo-wóɖó-ɖɛ̀ɛ̀ kpa dyí, sepóɛɖé m̀ dyi vɔ̃ ɓɛ́ m̀ ké ɔ póìn kpa dyúáɖò ní, m̀ ɓéɖé ɓɛ́ m̀ kéɛ nyu ɖe.

²⁰ Wɔ̃́ náún-po-wùɖù múin, ɓɛ́ m̀ ké nyɔ-dyí-ɓàɖàìn-wùɖù dyi kpɔ̃, sepóɛɖé ɖé mánáín ní, nì mu hwòɖǒ fɔ̀nɔ̀ùn.

²¹ Nyɔǔn-dyù ɓɛ́ìn ɖɛ kã̀ìn séín dyí sɔ́ɔ, kɛɛ Bounɓoɔ̀ nììn mɔ́ɔ́-ɖɛ̀ mɔ̀ ɓó-sè-nyɔ̀.

²² Ɖɛ ɓɛ́ nyɔ ɖò mɔ́ ɖé ɔ mǔè ɖò mú dyéɛ dyi jɛ́ɛ́ kɛɛ mɔ̀ ɖɛ̀ɓɛ̀ǐn-ɖɛ̀ɓɛ̀ǐn hwɛ̀ gbɔ. Ɔ kpa ɖɛ ɓɛ́ m̀ ké gǎ-dyé-nyɔ̀ jǔ, ké ɔ zi ɓɛ́ m̀ ké se-tɔ́mɔ́-nyɔ̀ jǔɛɛ dyí.

²³ Bounɓoɔ̀ dyi-fɛ̃̀ìn-fɛ̃̀ìn dyà fɛ̀ɛ̀, ké nyɔ ɓɛ́ ɔ fɛ̃̀ìn Bounɓoɔ̀ dyiɛɛ ɓéɖé gìɖìǐ, ké ɖɛ gbà ɖò se ɔ gbo kpáa mu.

²⁴ Fóó-nyɔ̀ gbèɖèìn sɔ̃ hwòɖǒ, ké ɔ se sɔ̃ pɛ́ɛ̀ ɓɛ́ìn, ɓɛ́ ɔ ké ɔ mìɔùn nììn ɖii-ɖɛ̀ wɔ̃ún po dyɛ mɔ̀ùn.

²⁵ M̀ dyi ɖɛ-dyɔ́-ɓaɖa-nyɔ̀ ɓaɖa ní, nyɔ ɓɛ́ ɔ se hwòɖǒ kɔ̃in cɛ̃̀ɛ cɛ̃́ ɓó fɔ̀nɔ̀-hwòɖǒ. M̀ dyi nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ dyí ɓàɖàìn ní, ɔ fɔ̀nɔ̀-hwòɖǒ mu kɔ̃ kpáùn.

²⁶ Nyɔ ɓɛ́ ɔ kpɔ̃ ɔ xwíníín-zà-ɓǎ gbà-kà, ké ɔ po ɔ xwíníín-zà-ɖè píéɛɛ, ɔ dyà wa dɛ̃ kɔ̃, ké ɔ zàìn wa zùǔn.

²⁷ Ní dyú, m̀ dyi ná-wùɖù ɖùǔ gbo tòɛ̀ ɓɔ́ ní, nì mu fɔ̀nɔ̀-hwòɖǒ-hwìèɔ̀ dyí sɔ̀ùn.

²⁸ Seɛ̀-zàse-nyu-nyɔ̀ se dyí-sɛ́ɖɛ́ìn-ɖɛ̀ ɖɛ ɖá, ké ɖɛ-gbà-nyu-nyu ɖéè hwòɖǒ-kɔ̃in-nyìnììn-nyɔ̀ wĩin.

²⁹ Gǎ ɖǎ ti dyé ɓó ɖɛ-dyɔ́-ɓaɖa-nyɔ̀ bìì, ké nyɔ-ɓàɖàìn-ɓà-cùɔ̀ ɖǎ ti dyé ɓó zuɖuu-nyɔ̀ɛ̀ kɔ̃ɔ̀ mú jè.