Nɔ́ɔ́ 18 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Nyɔ ɓɛ́ ɔ se mɔ́ ɓɛ́ ɔ kè nyɔ tɔ̀ɔ̀ ɓě ké hwòɖǒ dyúáɖò ɓéɖéɛɛ nyu ɔ mìɔùn nììn hwòɖǒɛ̀-mɔ́ɔ́-ɖɛ̀, ké ɔ po náún-po-wùɖù sɛ́ɖɛ́ìn dyí séín dyií dyi.

² Zuɖuu-nyɔ̀ se ɖɛ múin wɔ̃́ɔ mɔ́. Ɖɛ ɔ mɔ́ nyɛ̀nɛ̀ɛ̀ kɛɛ mɔ̀ ɔ nììn wuɖu ké ɖɛ kɔ̃in sè.

³ Ɖɛ-gbà-nyu-nyu dyà dɛ̃, ké dɛ̃ dyà zùǔn-sɔ̀ìn-sɔ̀ìn.

⁴ Wuɖu ɓɛ́ ɔ sɔ̀ hwòɖǒ-fɔ̀nɔ̀-nyɔ̀ wĩín nyɛɛ nì kà ní-nɔ̀ɔ̀ nìà kɛ. Fɔ̀nɔ̀-hwòɖǒ sɔ̀ ɖé, ké ɔ nì síɛń kà ní-dyèɖè síà kɛ.

⁵ Ɔ se dyíin nɔ̀mɔ̀ ɓɛ́ nyɔ ké hwòɖǒ-kɔ̃in-nyìnììn-nyɔ̀ gbo zi, ɓɛ́ nyɔ ké nyɔ kɔ̃̀ ɓíɖí ɓɛ̀ɖɛ̀ìn dyíɛɛ gɔ̃̌ xwa zà.

⁶ Zuɖuu-nyɔ̀ɛ̀ miɔ dyà zà-ɖɛín, ké ɔ wɔ̃ zɔ̀ ɓàɖàìn-ɓà-cù ɓó ɔ mìɔùn bìì.

⁷ Zuɖuu-nyɔ̀ɛ̀ wɔ̃ mɔ̀ ɔ mìɔùn mú-gbɔɔ̀-nyɔ̀, ké ɔ miɔ mɔ̀ xwáɖá-gbǎ-mú ɓó ɔ fɛ̀ɛ̀ɔ̀ bìì.

⁸ Nyɔ-nyɛ́nɛ́-zeɖe-nyɔ̀ɛ̀ wĩín-wùɖù nì kà ɖii-ɖɛ̀ ɖéé-ɖéé ɖò nìà kɛ. M̀ dyiɛ mana ní, ɔ mu ɖé m̀ xwíníín vɛ̃in cá.

⁹ Fóó-nyɔ̀ kè ɖɛ-mú-gbɔɔ̀-nyɔ̀ mɔ̀ wóɖó-wóɖó.

¹⁰ Bounɓoɔ̀ nyɛ́nɛ́ɔ̀ hwɔìn hwɔɖɔ-dyí-gmɔ̀ìn-gbò kui-kui ɖò kɔ̃̀ mú ɓɛ́ dyí-sɛ́ɖɛ́ìn-nyɔ̀ dyi pèɖèìn ní ɔ dyi póɛ.

¹¹ Bã-nyɔ̀ɛ̀ hwòɖǒ ɖá ɔ kɔ́mɔ́-ɖɛ̀ ɓě po ɔ gba-gba mú kà dyúáɖò kà gmɔ tɔ̀mɔ̀ dya kui-kui ɖò ɓɛ́ wa cɛ̃̀ìn hwɔɖɔ ɖo ɖei ké ɔ mɔ̀à hwɔɖɔɔ̀ dyí-gmɔ̀ìn-ɖɛ̀ɛ nìà kɛ.

¹² Hwɛ̀ ɓɛ́ nyɔ ɖò ké mú gbɔɔ̀ kɛɛ, ɔ mìɔùn nììn hwòɖǒ-dyùà ɖú ɔ dyií wɛ̃́ɛ́ hwɛ̀, kɛɛ nyɔ ɖò dyà ɔ mìɔùn ɓíɖíi, hwɛ̀ ké ɔ ɓéɖé dya-dè-dè.

¹³ Nyɔ ɓɛ́ ɔ seà ɖùǔ tò, ɓɛ́ ɔ kéà ɖɛ ɖò múin wɔ̃́, hwɛ̀ ɓɛ́ ɔ kéà gɔ̃̌ jǔɛɛ, nyɔɔ̀ nyu zuɖuu-ɖɛ̀ kè dɛ̃-ɖɛ̀.

¹⁴ Nyɔ ɖòɛ̀ hwòɖǒ-ku-ku ɓɛ́ìn ɔ kpóɖó-dyùà wɛ́-wɛ́ɔ̀ dyií dyi kpɔ̃ɔ, kɛɛ hwòɖǒ-ku-hwòɖò-dyùàɔ̀ dyi ɖé sɔ̀ ní, ɖɛ́ ɓɛ́ìn ɔ dyií dyi kpɔ̃ɔ ɖe kɛ́?

¹⁵ Ɖɛ-múin-ɖe-hwòɖò-dyùà dyé fɔ̀nɔ̀-hwòɖǒ da. Ɔ toìn ɖùǔ dyi kánáá pū ɓó fɔ̀nɔ̀-hwòɖǒ ɖìè jè.

¹⁶ Nyíí-ɖɛ̀ kaà hwìè ɓó nyɔ ɖò bìì, ké ɔ kpa ɔ ɓó nyɔ vɛ̀nɛ̀ ɓě dyúa.

¹⁷ Nyɔ mɔ̀ nyɔ dè gɔ̌mànà zaa kĩ́ín nyɛɛ, ɔ nì pū kà ɔ ɓíɖí ɓɛ̀ɖɛ̀ìnɔ̌ kà dyíɛ, ɔ sèìn ké nyɔ tɔ̀ɔ̀ mɔ̀ùn dyi, ké ɔ zaìn ɔ nììn wákáɔ̀ kɔ̃in hwɛ̀.

¹⁸ Gbo-ɖàɓàìn-ɖɛ̀ nyu-nyu ɓɛ́ìn zà-ɖɛín kpó cɛ̃ɛ, ɓɛ́ ɔ ké ɖɛ nì ɓó kpé-ɓéɖé-nyɔ̀ sɔ̃́ pṹa kɛɛ dyi zĩ̀ìn.

¹⁹ Ɖíí-gàà kɔ̃̀ hwòɖǒ ɓɛ́ m̀ ɖǎ ɖé ɖei poɛɛ hwòɖǒ kàmà dyi dèɛ̌n, ké ɔ zi ɓɛ́ nyɔ ɖò ké hwɔɖɔ ɓɛ́ wa cɛ̃̀ìn gmɔ kui-kui ɖeiɛɛ toún ɖuɛɛ dyí. Zà-ɖɛín po nyɔ bã̀à pṹa.

²⁰ Wuɖu sɔ̀ nyɔ ɖò wĩín nyɛɛ gbo-wóɖó-ɖɛ̀ ɖoɓo ɔ mìɔùn dyí.

²¹ Miɔ ɓéɖé kpé ɓɛ́ ɔ ké fɛ̀ɛ̀ dyí gmɔ̀, mɔɔ ɓɛ́ ɔ ké gĩɔ dyà. Ɔ jèɛɛ, nyɔ ɓɛ́ ɔ ɖɛ̀ɓɛ̀ɛ̀ múɛɛ dyéɛ gbo-wóɖó-ɖɛ̀.

²² Nyɔ ɓɛ́ ɔ dyé nyɔ́nɔ́ɛɛ, ɔ dyé ɖɛ nɔ̀mɔ̀ dyíin, ké Bounɓoɔ̀ hwòɖǒ dèìn ɔ múin.

²³ Gǎ-dyé-nyɔ̀ dyi nyɔ gbo wùɖùǐn, ɔ ɓiè nyɔ, kɛɛ bã-nyɔ̀ dyi nyɔ gbo wùɖùǐn, ɔ ɖaɓaìn nyɔ wuɖui.

²⁴ Ɓǎto ɖíɛ́ ɓě nì ɓó, ké wa ní mɔ̀ ɓǎto kánáá pū, kɛɛ ɓǎto ɖò nì ɓó, ké ɔ nɛ́ nyɔ dyí, ké ɔ zi nyɔ mìɔùn nììn ɖíí-gàà dyí.