Nɔ́ɔ́ 17 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Ɔ kpa ɖɛ ɓɛ́ m̀ ké ɖii-ɖɛ̀-kpã̀ ɖi ɖé gìɖìǐ mú, ké ɔ zi ɓɛ́ m̀ ké ɖii-ɖɛ̀-hwɔ̀ paá mu ɖé gbǒ kɔ̃̀ mú ɓɛ́ zà-ɖɛín dyíɛɛ dyí.

² Gǐì ɓɛ́ ɔ fɔ̀nɔ̀ hwòɖǒɛɛ mu ɔ gbo-nì-ɓǎɔ̀ dyú-gàà ɓɛ́ ɔ mɔ̀ fùɖù-fùɖù-nyɔ̀ɛɛ wuɖuí kɔ̃̀ùn, ɓɛ́ ɔ ké dúí-sè-ɖɛ̀ɔ̀ ɖò dyé kà ɖíí-gàà ɓěɔ̀ nìà kɛ.

³ Nyɛ mɔ̀ séɓàɖà kè góò ɖe-nyɔ̀, kɛɛ Gèɖèpɔ́ɔ̀ mɔ̀ nyɔǔn-dyùɛ̀ hwòɖǒ-dyùà-múin-ɖe-nyɔ̀.

⁴ Ɖɛ-gbà-nyu-nyɔ̀ tò hwòɖǒ-kɔ̃in-nyìnììn-nyɔ̀ɛ̀ wuɖu ɖùǔ gbo, ké se-tɔ́mɔ́-nyɔ̀ tò ɖɛ-gbà-cɛ̃-nyɔ̀ɛ̀ wuɖu ɖùǔ gbo.

⁵ Nyɔ mɔ̀ nyɔ ɓɛ́ ɔ ɓaɖa gǎ-dyé-nyɔ̀ dyɔ́ɛɛ ɖaɓa Gèɖèpɔ́ɔ̀ mɔ̀ nyɔ ɓɛ́ ɔ mɛà ɔ kɛɛ wuɖuún, ké nyɔ ɓɛ́ ɔ kpá múàǔn ɓó ɔ mǔè ɖò nììn gǎ dyé jèɛɛ, Gèɖèpɔ́ɔ̀ tò ɔ mɔ̀ùn gǎ kɔ̃ wɛ̃́ɛ́.

⁶ Nyúà-dyú ɓě hwɔìn góò-gbàǎ, ké wa nì waà ɓǎ sùà ɓě dú, ké dyú ɓěɛ̀ dĩ́ín-dĩ̀ìn mɔ̀ waà ɓǎ ɓě.

⁷ Wuɖu sɛ́ɖɛ́ìn dyí se zuɖuu-nyɔ̀ wĩín dyi wɛ̃̀ìn, hwɛ̀ ḿ po níiń, ɓɛ́ se-tɔ́mɔ́-tɔ́mɔ́ ké nyɔ-wuɖuí-kɔ̃̀-nyɔ̀ wĩín dyi wɛ̃̀ìn nyɛ.

⁸ Nyɔ-gbo-pa-wìɖì hwɔìn zɛ̃̀ìn-ɖɛ̀-nyùìn-ɖɛ̀ ɖé nyɔ tòà kɛɛ dyéɖéín. Ɔ hwòɖǒ ɖá ɔ ɓɛ́ìn ɖɛ séín nyuɛ.

⁹ Nyɔ ɓɛ́ ɔ zĩ̀ìn ɔ mǔè ɖò ɖɛ gbà ɓɛ́ ɔ nyu ɔ bũ̌ɛɛ kɔ̃in nyɛɛ mɔ́ ɓɛ́ nyɔǔn-dyù ké ɔ mú ɖɛ̀ɓɛ̀, kɛɛ nyɔ ɓɛ́ ɔ ɓúɖúà ɖɛ gbà teeɛɛ, nyɔǔn-dyù nyɛ́ ɔ mú.

¹⁰ Hwòɖǒ-fɔ̀nɔ̀-nyɔ̀ cɛ̃́ ɖɛ sɔ̀ìn ɖé náún-po-wùɖù dyúáɖò mú, kɛɛ zuɖuu-nyɔ̀ se fɔ̀nɔ̀-hwòɖǒ ɖò cɛ̃́ɛ mu, kɛbì wa mɛ zà ɔ ɓà-cù-wùɖù hɔ̃dɛ̀ɖɛ̀ ɖò kɔ̃ún wɛ̃.

¹¹ Hwòɖǒ-kɔ̃in-nyìnììn-nyɔ̀ po gɔ̌mànà kɛ́ɛ́ dyí kánáá pū. Ɔ jèɛɛ, hwòɖǒ-kɔ̃in-nyìnììn-kìǎ mɔ̀ nyɔ wa ɖoɓo ɔ gbo.

¹² Ɔ jǔ ké nyɔ ɖò kè kìɖìǒ nyɔ́nɔ́ ɓɛ́ wa zà dyú gboɛɛ dyiɔ́ má gmɔ̌ìn ní, kìɖìǒɔ̀ nyuu-ɖɛ̀ zà póɖó ɓó zuɖuu-nyɔ̀ ɓɛ́ ɔ nì zuɖuu-ɖɛ̀ xwai nyuɛń nyɛɛ gbo.

¹³ Nyɔ mɔ̀ nyɔ ɓɛ́ ɔ pɛ́ɛ̀ìn ɖɛín-ɖɛ̀ ɓɛ́ nyɔ ɖò nyuɛɛ ɖɛ gbà ɖeɛɛ, ɖɛ gbà se náá ɖé ɔ gbǒ-xwíníínɔ̀ mú sɔ̀ɔ̌ mu sɔ̃̀ùn.

¹⁴ Zà-ɖɛín gbɔ-dèìn-naín kè ní-gbò ɓɛ́ ɔ gè wɔ̃ dà ɖò ké ní-dyèɖèɔ̀ dè síɛ gbɔɛɛ hwɔìn ní. Ɔ ná nì jèɛɛ, sèìn ɓó, ɓɛ́ zà-ɖɛín ní kɔ̃̀ ɖà wĩín cɛ̃̀.

¹⁵ Dyí-sɛ́ɖɛ́ìn-nyɔ̀ zɔ̃́ín-dúún-wáɖá-wáɖá kè ɖɛ-gbà-nyu-nyɔ̀ gɔ̃̌-nyí-nyí nyàìn Bounɓoɔ̀ dyi.

¹⁶ Kɛbì zuɖuu-nyɔ̀ mɛ pɛ́ɛ̀ wíɖí ɓó ɔ ɖɛ cɛ̃́ jèɛɛ, ɔ se ɔ kpáná ɖò dyí nyuɛ ɓɛ́ìn, sepóɛɖé ɔ se fɔ̀nɔ̀-hwòɖǒ ɖò ɓéɖé.

¹⁷ Jǎà-ɓǎto ɓéɖé ɖɛ̀ɓɛ̀ǐn-ɖɛ̀ɓɛ̀ǐn kánáá pū, ké ɖíí-gàà wóɖó, ɓɛ́ ɔ ké m̀ gbo kpá ɖé nì fũ̀à-fṹá-tìɔ̀ mú.

¹⁸ Nyɔ ɓɛ́ ɔ se fɔ̀nɔ̀-hwòɖǒ ɖò ɓéɖéɛɛ mɔ̀ wuɖu-ɖi-nyɔ̀ kà ɓɛ́ ɔ mu ɔ mǔè ɖòɛ̀ bɔ̃́ùn dyí ɖúùn wɛ̃.

¹⁹ Nyɔ ɓɛ́ ɔ ɖɛ̀ɓɛ̀ zàǔn-zàǔn múɛɛ ɖɛ̀ɓɛ̀ nàmàǔn mú, ké nyɔ ɓɛ́ ɔ ɓɔ́ɖɔ́ìn ɔ mìɔùn dyí teeɛɛ nì mú-gbɔɔ̀-gbɔɔ̀ dyi mɔ́uń.

²⁰ Nyɔ mɔ̀ nyɔ ɓéɖé hwòɖǒ gbà kɛɛ nyuu-ɖɛ̀ ní wóɖó mú, ké nyɔ mɔ̀ nyɔ ɓéɖé ɖɛ-gbà-cɛ̃-wɔ̃̀ kɛɛ dyé fũ̀à-fṹá-ɖɛ̀ dyí tee.

²¹ Zuɖuu-dyù jè nyuɛ ké wìì dyíìn ɔ ɓǎ hwòɖǒ bũ̌ dyi. Zuɖuu-dyùɛ̀ ɓǎ se múà ɖò ɓéɖé fɔɔ cá ɓó ɔ jè.

²² Hwòɖǒ-dyùà ɓɛ́ múà dyíìn múin nyɛɛ nì kà kũùn nìà kɛɛ ɓó nyɔ bìì, kɛɛ hwòɖǒ ɓɛ́ ɔ kpá ɖé ɖeiɛɛ nyuɛ ké nyɔ sɔɔ̀.

²³ Hwòɖǒ-kɔ̃in-nyìnììn-nyɔ̀ kpɔ̃ nyɔ-gbo-pa-wìɖì dyi sáná-kà, nìí ɓɛ́ ɔ ké dyí-sɛ́ɖɛ́ìn-ɖɛ̀ wɔ̃-po-po hwìǐ zàìn.

²⁴ Hwòɖǒ-fɔ̀nɔ̀-nyɔ̀ɛ̀ dyéɖé nì fɔ̀nɔ̀-hwòɖǒ dya, kɛɛ zuɖuu-nyɔ̀ɛ̀ dyéɖé nì ɖé ɓóɖó-kpàà sèìn-naín.

²⁵ Zuɖuu-dyù jè nyuɛ ké wìì dyíìn ɔ ɓǎ hwòɖǒ bũ̌ dyi. Ɔ jè mɔ̀ hwòɖǒ-dyi-wàìn-ɖɛ̀ ɓó ɔ ɖe bìì.

²⁶ Ɔ se dyíin nɔ̀mɔ̀ ɓɛ́ wa ké nyɔ ɖò gǎ kɔ̃ tò ɓó dyí-sɛ́ɖɛ́ìn-ɖɛ̀ nyu jè, mɔɔ ɓɛ́ wa ké gɔ̌mànà-nyɔ̀ vɛ̀nɛ̀ ɓaɖa ɓó dyí-sɛ́ɖɛ́ìn-ɖɛ̀ nyu jè.

²⁷ Hwòɖǒ-fɔ̀nɔ̀-nyɔ̀ ma mú ké ɔ wùɖù, ké gìɖìǐ-nyɔ̀ ɓéɖé ɖɛ-múin-wɔ̃́-wɔ̃́,

²⁸ hwɛ̀ ḿ po níiń, zuɖuu-nyɔ̀ dyi ɔ wɔ̃ɔ̀ kã ní, wa ɖáìn ɔ hwòɖǒ-fɔ̀nɔ̀-nyɔ̀. Ɔ dyi gìɖìǐ nì ní, wa ɖáìn ɔ ɖɛ-múin-wɔ̃́-nyɔ̀ vɛ̀nɛ̀.