Nɔ́ɔ́ 16 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Nyɔǔn-dyùɛ̀ hwòɖǒ-dyùà ɓɛ́ìn ɖɛ dyí sɔ́ɔ, kɛɛ wuɖu-wĩín-zà-kpèɔ̀ sɔ̀ìn ɖé Bounɓoɔ̀ gbo.

² Nyɔǔn-dyùɛ̀ nyuu-ɖɛ̀ séín sɛ́ɖɛ́ìn dyí ɖé ɔ mìɔùn dyéɖéín, kɛɛ Bounɓoɔ̀ mɔ̀ nyɔ ɖe hwòɖǒ-dyùà nì ɖɛɔ̀ ɖeín nyɛɛ múin.

³ Po ɖɛ séín nì hwòɖǒ po gbɔ ɓɛ́ m̀ ké nyuɛɛ Bounɓoɔ̀ xwaún dyi, nìí, ɔ muɛ nyuùn ɓɛ́ nì dyí-sɔ́-ɖɛ̀ ɓěɔ̀ ké mú wóɖó.

⁴ Bounɓoɔ̀ nyu ɖɛ séín ɓó xwíníín ɖò jè, hwɛ̀ ḿ po níiń, hwòɖǒ-kɔ̃in-nyìnììn-nyɔ̀ ɓó ɔ mú-gbɔɔ̀-wè jè.

⁵ Nyɔ séín ɓě ɓɛ́ wa ɓúáìn wa mìɔùn dyíɛɛ jè nyàìn Bounɓoɔ̀ dyi. M̀ mɛ dyuò ɖɛ nìà kɛ dyí jɛ́ɛ́ kà ɓɛ́ Bounɓoɔ̀ mu wa gǎ kɔ̃ tòùn wɛ̃́ɛ́ kɛ.

⁶ Dyììn ɖé ɖɛ̀ɓɛ̀ǐn-ɖɛ̀ɓɛ̀ǐn kè jǎà múɛɛ, nàmàǔn ɓéɖé kɔ̃in-zĩ̀ìn-zĩ̀ìn, ké dyììn ɖé Bounɓoɔ̀ dyi-fɛ̃̀ìn-fɛ̃̀ìn múɛɛ, nyɔǔn-dyù ɓàɖàìn ɖɛ gbà dyi.

⁷ Nyɔ ɖòɛ̀ cĩ́-cĩ́ dyi Bounɓoɔ̀ hwòɖǒ dyi dè ní, Bounɓoɔ̀ nyuɛ ké nyɔɔ̀ kè ɔ mú-nyɛ́-nyɔ̀ cĩ́ dà dyúáɖò ɖé gìɖìǐ mú.

⁸ Ɔ kpa ɖɛ ɓɛ́ m̀ ké ɖɛ tííwè ɓɛ́ m̀ dyé dyí-sɛ́ɖɛ́ìn-kà kɛɛ ɓéɖé, ké ɔ zi ɓɛ́ m̀ ké kɔ́mɔ́-ɖɛ̀ kúɖúú ɓɛ́ m̀ se dyé dyí-sɛ́ɖɛ́ìn-kà kɛɛ dyí.

⁹ Nyɔǔn-dyù sɔ́ ɖɛ ɓě dyí ɖé wa hwòɖǒ bũ̌, kɛɛ Bounɓoɔ̀ mɔ̀ nyɔ nyuɛ hwɛ̀ ké ɖɛɔ̀ kpá súɖúú dyí.

¹⁰ Bounɓoɔ̀ nyuɛ ké dyí-sɛ́ɖɛ́ìn-ɖɛ̀ wɔ̃-po-po nì ɖé kã́á wĩín. Ɔ ní zàìn dyí-sɛ́ɖɛ́ìn-ɖɛ̀ wɔ̃-po-po hwìǐ sɔ̃̀ùn.

¹¹ Bounɓoɔ̀ mɔ́ ɓɛ́ pṹá-dù séín ké dyí sɛ́ɖɛ́ìn, ɓɛ́ ɖɛ-mú-ɖàɓàìn-ɖɛ̀ séín ké wɔ̃ ɓɛ́ìn.

¹² Ɖɛ-gbà-nyu-nyu nyàìn kã́á dyi, sepóɛɖé dyí-sɛ́ɖɛ́ìn-ɖɛ̀ nyu-nyu mɔ̀ nyɔ nyuɛ ké gɔ̌mànà ku dúi.

¹³ Kã́á ɖɛ̀ɓɛ̀ dyí-sɛ́ɖɛ́ìn-ɖɛ̀ cɛ̃-cɛ̃ mú, ké ɔ hwòɖǒ dèìn jǎà-cɛ̃-cɛ̃ múin.

¹⁴ Kã́áɛ̀ dyoɖo-hwòɖò nì kà gĩɔ nììn kíá nìà kɛ, kɛɛ hwòɖǒ-fɔ̀nɔ̀-nyɔ̀ mɔ̀ ɔ dyoɖo-hwòɖòɔ̀ dyí-zĩ̀ìn-nyɔ̀.

¹⁵ Fɛ̀ɛ̀ nì ɖé kã́áɛ̀ dyúa dyí-pɛ́ɛ̀-pɛ́ɛ̀ mú. Ɔ nyɔ-hwòɖǒ-múin-dèìn-dèìnɔ̀ nì kà ní-kpò ɓɛ́ ɔ nyuɛ ɓɛ́ ní dyià ɖaɓa ɓó ɓáá-ɖɛ̀ ɓá-tìǐn nyɛɛ nìà kɛ.

¹⁶ Ɔ kpa ɖɛ ɓɛ́ nyɔ ké fɔ̀nɔ̀-hwòɖǒ dyi mɔ́, ké ɔ zi góò dyí. Ɔ kpa ɖɛ ɓɛ́ nyɔ ké ɖɛ-múin-wɔ̃́-wɔ̃́ gã, ké ɔ zi séɓàɖà dyí.

¹⁷ Dyí-sɛ́ɖɛ́ìn-nyɔ̀ nììn kpaa-hwìè ɓàɖàìn ɖɛ gbà dyi. Nyɔ mɔ̀ nyɔ ɓɛ́ ɔ ma mú ɓá hwìè ɔ ké kpaa jè dyíɛɛ gmɔ̀ ɔ fɛ̀ɛ̀ɔ̀ dyí.

¹⁸ Nyɔ-mìɔùn-dyí-ɓúáìn-ɓúáìn dyà mú-gbɔɔ̀-gbɔɔ̀, ké ɔ dyà nyɔ-ɓíɖíi-dyi-kpá-kpá ɖekè.

¹⁹ Ɔ kpa ɖɛ ɓɛ́ m̀ ké gǎ-dyé-nyɔ̀ ɓěɔ̀ ɖò jǔ, ɓɛ́ m̀ ké m̀ mìɔùn ɓíɖíi dyà, ké ɔ zi ɓɛ́ m̀ kè nyɔ ɓě ɓɛ́ wa ɓúáìn wa mìɔùn dyíɛɛ ké to-gbo-zà-ɖɛ̀ geìn nyɛɛ dyí.

²⁰ Nyɔ mɔ̀ nyɔ ɓɛ́ ɔ kpɔ̃ ná-wùɖù dyiɛɛ nyuu-ɖɛ̀ mu mú wóɖóùn, ké mana nì nyɔ ɓɛ́ ɔ taɓa Bounɓoɔ̀ hwìɖǐǐɛɛ kɔ̃.

²¹ Nyɔ ɓɛ́ ɔ mɔ̀ hwòɖǒ-fɔ̀nɔ̀-nyɔ̀ɛɛ mɔ̀ ɖɛ-múin-ɖe-nyɔ̀, ké wĩín-dyi-ɖéè-nyɔ̀ mɔ̀ nyɔ-hwòɖǒ-dyùà-kpɔ̃-nyɔ̀.

²² Fɔ̀nɔ̀-hwòɖǒ hwɔìn ní-dù kɔ̃̀ mú ɓɛ́ fɛ̀ɛ̀-nì sɔ̀ kɛɛ ɓó nyɔ ɓɛ́ ɔ ɓéɖéɛ kɛɛ bìì, kɛɛ zuɖu-zuɖu mɔ̀ zuɖuu-nyɔ̀ gǎ-kɔ̃-dyà-nyɔ̀.

²³ Hwòɖǒ-fɔ̀nɔ̀-nyɔ̀ poìn hwìɖǐi hwɛ̀ ké ɔ wùɖù. Ɔ ɖǎ ná nìǐn, nìí, ɖɛ ɔ cɛ̃ kɛɛ, nyɔǔn-dyù kpɔ̃ɔ dyi cá.

²⁴ Wuɖu ɖéé-ɖéé nì kà ɖo-nì nìà kɛ. Ɔ dè nyɔ hwòɖǒ dyi, ké ɔ dyà nyɔ kpóɖó-dyùàɔ̀ dyi-káná-káná.

²⁵ Hwìè ɖò nì ɓó ké ɔ sɛ́ɖɛ́ìn dyí ɖé nyɔǔn-dyù dyéɖéín, kɛɛ ɔ sèìn-naín mɔ̀ gĩɔ.

²⁶ Kũ̀à-nyu-nyɔ̀ɛ̀ mɔ́-hwòɖò nyuɛ ké ɔ nyu kũ̀à gana-kà, nìí ɓɛ́ ɔ mɔ́-hwòɖòɔ̀ ké dyi dè.

²⁷ Hwòɖǒ-kɔ̃in-nyìnììn-nyɔ̀ sɔ́ ɖɛ gbà dyí, ké ɔ wĩín-wùɖù fɔ̃ nyɔ kà nyɛ-ɓɔ́ɔ́ ɖòɛ̀ zùzù nìà kɛ.

²⁸ Hwòɖǒ-kɔ̃in-nyìnììn-nyɔ̀ mɔ̀ zà-ɖɛín-dyi-po-nyɔ̀. Ɔ zeɖe nyɔ nyɛ́nɛ́, ké ɔ po nyɛ́ín-nyɛ́ín ɓó ɓǎto sɔ̃́ pṹa.

²⁹ Nyɔ-ɖɛ-gana-xwa-zàìn-nyɔ̀ po ɔ mǔè ɖò pɛ́í, ké ɔ kpàìn ɔ hwìè se dyí sɛ́ɖɛ́ìn nyɛɛ xwíníín.

³⁰ Nyɔ-dyéɖé-pì-dya-pòìn-nyɔ̀ mɔ̀ ɖɛ-gbà-dyí-sɔ́-nyɔ̀, ké wɔ̃-kpũ̀à-numu-nyɔ̀ mɔ̀ ɖɛ-gbà-nyu-nyɔ̀.

³¹ Dyùì-dù hwɔìn dú-dèìn-ɖɛ̀ ɓɛ́ ɔ nyí nyɔ dya-dè-dèɛ. Nyɔ ɓɛ́ ɔ cĩ́ fɛ̀ɛ̀ sɛ́ɖɛ́ìn dyíɛɛ mɔ̀ɔ̀ dyé-nyɔ̀.

³² Nyɔ mɔ̀ nyɔ kɔ̃̀ dyoɖo-hwòɖò mɛɛ̀ kɛɛ, ɔ kpa ɖɛ ké ɔ zi gana-ɓéɖé-nyɔ̀ dyí, ké nyɔ ɓɛ́ìn ɔ mìɔùn dyí kpɔ̃ɔ kɛɛ, ɔ kpa ɖɛ ké ɔ zi nyɔ ɓɛ́ ɔ zà hwɔɖɔ gàná kɛɛ dyí.

³³ Nyɔǔn-dyù nyu gbo-ɖàɓàìn-ɖɛ̀, ɓɛ́ wa ké ɖɛ mɔ̀ Bounɓoɔ̀ mɔ́ɔ́-ɖɛ̀ kɛɛ dyí dyuò, kɛɛ Bounɓoɔ̀ mìɔùn mɔ̀ gɔ̃̌-jǔ-wùɖù jɛ́ɛ́ɔ̀ tò-nyɔ̀.