Nɔ́ɔ́ 14 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Hwòɖǒ-fɔ̀nɔ̀-màà nɔ̀mɔ̀ìn ɔ gbǒ xwa, kɛɛ zuɖuu-màà mìɔùn nììn sɔ̃ wáɖá ɔ nììn gbǒɔ̀.

² Nyɔ ɓɛ́ ɔ cĩ́ dyí-sɛ́ɖɛ́ìn-kàa mɔ̀ nyɔ ɓɛ́ ɔ fɛ̃̀ìn Bounɓoɔ̀ dyiɛ, kɛɛ nyɔ ɓɛ́ ɔ mɔ̀ nyɔ-cá-nyɔ̀ɛɛ zàìn Bounɓoɔ̀ zùǔn.

³ Zuɖuu-nyɔ̀ mìɔùn nììn wĩín-wùɖù dyà ɔ ɓà-cù kɔ̃ún, kɛɛ hwòɖǒ-fɔ̀nɔ̀-nyɔ̀ɛ̀ wɔ̃ mɔ̀ ɔ dyí-gmɔ̀-nyɔ̀.

⁴ Dɛ̀ ɓɛ́ ɓìɖǐ ɖò seà nìɛɛ, ɖii-ɖɛ̀ ɖò se ɖé sáɖáún nì, kɛɛ ɓìɖǐɛ̀ gana-kũ̀à nyu-nyu dyà ɖii-ɖɛ̀ bã̀ìn-bã̀ìn.

⁵ Zàse ɓɛ́ ɔ sɛ́ɖɛ́ìn dyíɛɛ ní tɔ́mɔ́ se, kɛɛ seɛ̀-zàse-nyu-nyɔ̀ mɔ̀ se-tɔ́mɔ́-nyɔ̀.

⁶ Ɖɛ-dyɔ́-ɓaɖa-nyɔ̀ mɔ́ fɔ̀nɔ̀-hwòɖǒ dyi, ké ɔ seɛ dyéɛ ɓɛ́ìn, kɛɛ nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ ɓɛ́ìn fɔ̀nɔ̀-hwòɖǒ da dyéɛ wàɖà.

⁷ Sɔ̀ ɓó zuɖuu-nyɔ̀ gbo, sepóɛɖé m̀ se ɔ fɔ̀nɔ̀-hwòɖǒ-wùɖù ɖò wĩín wɔ̃́ɔ ɓɛ́ìn.

⁸ Hwòɖǒ-fɔ̀nɔ̀-nyɔ̀ nììn fɔ̀nɔ̀-hwòɖǒ ɓɛ́ ɔ ɓéɖéɛɛ mɔ̀, ɔ ɖe ɖɛ séín ɔ nyuɛɛ múin nɔ̀mɔ̀ dyíin, kɛɛ zuɖuu-nyɔ̀ nììn zuɖu-zuɖu ɓɛ́ ɔ ɓéɖéɛɛ mɔ̀ ɔ mìɔùn cá-cá.

⁹ Zuɖuu-nyɔ̀ ɖáìn nàmàǔn dyɔ́-ɖɛ̀, kɛɛ Gèɖèpɔ́ɔ̀ hwòɖǒ dèìn dyí-sɛ́ɖɛ́ìn-nyɔ̀ múin.

¹⁰ Nyɔ dyuò ɔ mìɔùn nììn hwòɖǒɛ̀-nɛɛ̀-ɖɛ̀ mɔɔ hwòɖǒɛ̀-múàǔn-po-ɖɛ̀ dyí, ké ɔ kè nyɔ kà kò ɖò seɛ mú peɖeɛ̀n ɓɛ́ìn.

¹¹ Hwòɖǒ-kɔ̃in-nyìnììn-nyɔ̀ɛ̀ gbǒ-xwíníín wáɖá ní, kɛɛ dyí-sɛ́ɖɛ́ìn-nyɔ̀ɛ̀ gbǒ-xwíníín zaìn dúún.

¹² Hwìè ɖò nì ɓó ké ɔ sɛ́ɖɛ́ìn dyí ɖé nyɔǔn-dyù dyéɖéín, kɛɛ ɔ sèìn-naín mɔ̀ gĩɔ.

¹³ Dyɔ́-kéɛ̀-kéɛ̀ ɓɛ́ìn wìì nì ɖé nyɔ hwòɖǒ bũ̌ɛɛ ɖɛ kɔ̃in ɓáìn ɓó ti wè mú. Kɛɛ dyɔ́ɔ̀ dyi ɓó sɔ̀ nyɛ̀nɛ̀ɛ̀ ní, wììɔ̀ wóɖó píé ɖe.

¹⁴ Hwòɖǒ-kɔ̃in-nyìnììn-nyɔ̀ dyé ɖɛ ɔ kɔ̃̀ ɓɛ́ ɔ ké dyé ɓó ɔ kpeɖe gbà jèɛ, kɛɛ hwòɖǒ-kɔ̃in-nɔ̀mɔ̀-nyɔ̀ dyé pɛ́ɛ̀-ɖɛ̀ nɔ̀mɔ̀ dyíin.

¹⁵ Nyɔ ɓɛ́ ɔ se hwòɖǒ kɔ̃in cɛ̃̀ɛ po ɖɛ séín ɔ wɔ̃́ɛɛ jǎà, kɛɛ hwòɖǒ-fɔ̀nɔ̀-nyɔ̀ gmɔ̀ ɔ nà-ɓò dyí.

¹⁶ Hwòɖǒ-fɔ̀nɔ̀-nyɔ̀ ma mú, ké ɔ ɓàɖàìn ɖɛ gbà dyi, kɛɛ zuɖuu-nyɔ̀ se ɖé kɔ̃̀. Ɔ ní poìn hwìɖǐi ké ɔ nyu ɖɛ.

¹⁷ Nyɔ kɔ̃̀ dyoɖo-hwòɖò xwɛ̃́ìn dyiɛɛ nyu zuɖuu-ɖɛ̀ xwai, kɛɛ hwòɖǒ-fɔ̀nɔ̀-nyɔ̀ ku hwòɖǒ.

¹⁸ Zuɖu-zuɖu mɔ̀ nyɔ ɓɛ́ ɔ se hwòɖǒ kɔ̃in cɛ̃̀ɛ dúí-sè-ɖɛ̀, kɛɛ ɖɛ-dyuò-dyuò mɔ̀ góò-gbàǎ ké hwòɖǒ-fɔ̀nɔ̀-nyɔ̀ dèɛ̀n dú.

¹⁹ Hwòɖǒ-kɔ̃in-nyìnììn-nyɔ̀ taɓa dú hwuɖu ɓó hwòɖǒ-kɔ̃in-nɔ̀mɔ̀-nyɔ̀ dyúa. Ɖɛ-gbà-nyu-nyɔ̀ taɓa dú hwuɖu ɓó dyí-sɛ́ɖɛ́ìn-nyɔ̀ dyúa, ɓó gmɔ-wɔ̃̀ ɓě gbo.

²⁰ Nyɔ ɓáún-ɓáún se gǎ-dyé-nyɔ̀ mú ɖɛ̀ɓɛ̀, hwɛ̀ ḿ po níiń, nyɔ ɓě ɓɛ́ ɔ kè waà taà deìn bũ̌ɛ. Kɛɛ bã-nyɔ̀ ɓéɖé ɓǎto kúɖúú.

²¹ Nyɔ mɔ̀ nyɔ ɓɛ́ ɔ zàìn ɔ mǔè ɖò zùǔn wɛ̃ɛ nyu nàmàǔn, kɛɛ mana nì nyɔ ɓɛ́ ɔ dyé gǎ-dyé-nyɔ̀ wìǐn nyɛɛ kɔ̃.

²² Nyɔ ɓɛ́ ɔ sɔ́ ɖɛ gbà dyíɛɛ, ɔ sɔ̀ìn hwìǐ, kɛɛ nyɔ ɓɛ́ ɔ sɔ́ ɖɛín-ɖɛ̀ dyíɛɛ, nyɔǔn-dyù ɖɛ̀ɓɛ̀ ɔ mú, ké wa nyu ɔ jǎà gbo kánáá pū.

²³ Gana-kũ̀à nyu-nyu séín po nyɔ kpáná xwaún, kɛɛ sɔ̃-pĩ́ín-wáɖá-wáɖá kè wùɖù-wùɖù dyà nyɔ gǎ.

²⁴ Kɔ́mɔ́ mɔ̀ góò-gbàǎ ké hwòɖǒ-fɔ̀nɔ̀-nyɔ̀ dèɛ̀n dú, kɛɛ zuɖuu-nyɔ̀ pɛ́ɛ̀-ɖɛ̀ mɔ̀ zuɖu-zuɖuɔ̀ ɖò ɖe.

²⁵ Zàse ɓɛ́ ɔ sɛ́ɖɛ́ìn dyíɛɛ póìn fɛ̀ɛ̀, kɛɛ seɛ̀-zàse-nyu-nyɔ̀ pèɖèìn ɔ mǔè ɔ mú-nyɛ́-nyɔ̀ gbo.

²⁶ Nyɔ mɔ̀ nyɔ ɓɛ́ ɔ fɛ̃̀ìn Bounɓoɔ̀ dyiɛɛ ɓéɖé hwòɖǒ-kɔ̃-dè-ɖɛ̀ kui-kui, ké ɔ dyú ɓě ɓéɖé vǐè-naín.

²⁷ Bounɓoɔ̀ dyi-fɛ̃̀ìn-fɛ̃̀ìnɔ̀ hwɔìn ní-dù kɔ̃̀ mú ɓɛ́ fɛ̀ɛ̀-nì sɔ̀ kɛ. Dyììn ɖéɛ múɛɛ, nyɔ ɓɛ́ìn gĩɔ nììn xwáɖá-gbǎ-múɔ̀ dyi ɓàɖàìn.

²⁸ Kà nyɔ ɓě ɓɛ́ kã́á kɔ̃̀ wuɖuíɛɛ nyu jĩ̀ɛ̀ kɛɛ, kǎà ɔ dya-dè-dè nyu ɓɛ́ɛ, kɛɛ kã́á nyɔ ɓě kɔ̃-sɔ̀-sɔ̀ dyà ɔ mú-gbɔɔ̀-gbɔɔ̀.

²⁹ Nyɔ kɔ̃̀ dyoɖo-hwòɖò mɛɛ̀ kɛɛ fɔ̀nɔ̀ hwòɖǒ mìɔ, kɛɛ nyɔ kɔ̃̀ dyoɖo-hwòɖò xwɛ̃́ìn dyiɛɛ mɔ̀ zuɖuu-nyɔ̀.

³⁰ Gìɖìǐ dyà dyi-káná-káná ɖé nyɔ kpóɖó-dyùàɔ̀ mú, kɛɛ hwɛ̀nɛ̌ mɔ̀ ji-kpà-wɛ̀, ké ɔ nì nyɔ mú.

³¹ Nyɔ ɓɛ́ ɔ pĩ́à gǎ-dyé-nyɔ̀ ɓě dyiɛɛ ɖaɓa Gèɖèpɔ́ɔ̀ mɔ̀ nyɔ ɓɛ́ ɔ mɛà wa kɛɛ wuɖuún, kɛɛ nyɔ ɓɛ́ ɔ nyu wa nɔ̀mɔ̀ dyíin dyíɛɛ dè Gèɖèpɔ́ɔ̀ dya.

³² Hwòɖǒ-kɔ̃in-nyìnììn-nyɔ̀ mìɔùn nììn ɖɛ gbà po ɔ ɓíɖíi dyi, kɛɛ dyí-sɛ́ɖɛ́ìn-nyɔ̀ ɓéɖé pèɖèìn-naín, hwɛ̀ ḿ po níiń, ɔ mɛ́-tìǐn.

³³ Fɔ̀nɔ̀-hwòɖǒ nì ɖé nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ hwòɖǒ bũ̌, kɛɛ ɔ se ɖé zuɖuu-nyɔ̀ hwòɖǒ bũ̌ nì fɔɔ cá.

³⁴ Dyí-sɛ́ɖɛ́ìn-sɛ́ɖɛ́ìn dyà ɓóɖó-dùɛ̀ dya-dè-dè, kɛɛ nàmàǔn mɔ̀ ɓóɖó-dù zùǔn-zàìn-nyɔ̀.

³⁵ Kã́á hwòɖǒ dèìn gbo-nì-nyɔ̀ ɓɛ́ ɔ fɔ̀nɔ̀ hwòɖǒɛɛ múin, kɛɛ ɔ kpáìn gbo-nì-nyɔ̀ ɓɛ́ ɔ nyu dɛ̃-ɖɛ̀ xwaiɛɛ dyoɖoún.