Nɔ́ɔ́ 12 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě ɖe

¹ Nyɔ mɔ̀ nyɔ ɓɛ́ ɔ ɖɛ̀ɓɛ̀ ná-wùɖù múɛɛ ɖɛ̀ɓɛ̀ hwòɖǒ-fɔ̀nɔ̀-fɔ̀nɔ̀ mú, kɛɛ nyɔ mɔ̀ nyɔ ɓɛ́ ɔ nyɛ́ dyí-ɓàɖàìn-wùɖù múɛɛ mɔ̀ zuɖuu-nyɔ̀.

² Bounɓoɔ̀ hwòɖǒ dèìn hwòɖǒ-kɔ̃in-nɔ̀mɔ̀-nyɔ̀ múin, kɛɛ ɔ wáɖá ɖɛ-gbà-dyí-sɔ́-nyɔ̀ zɔ̃́ín dúún.

³ Nyɔ ɖò se dúi kuɛ ɓɛ́ìn dyììn ɖé hwòɖǒ-kɔ̃in-nyìnììn-nyìnììn mú, ké nyɔ ɖò se dyí-sɛ́ɖɛ́ìn-nyɔ̀ hwuɖu zàà ɓɛ́ìn fɔɔ.

⁴ Kpeɖeɛ̀-dyíin-nɔ̀mɔ̀-màà hwɔìn góò-gbàǎ ké ɔ nì ɔ dyú-ɓǎ dú, kɛɛ màa ɓɛ́ ɔ dyà ɔ dyú-ɓǎ dɛ̃ kɔ̃ɛɛ hwɔìn ji-kpà-wɛ̀, ké ɔ nì ɔ mú.

⁵ Dyí-sɛ́ɖɛ́ìn-nyɔ̀ɛ̀ hwòɖǒɛ̀-gbɔ-po-ɖɛ̀ mɔ̀ ɖɛ ké nyɔ ɖò gbo kpáa, kɛɛ hwòɖǒ-kɔ̃in-nyìnììn-nyɔ̀ nììn nyɔ-náún-po-wùɖù mɔ̀ nyɔ-cá-cá saá-saá.

⁶ Hwòɖǒ-kɔ̃in-nyìnììn-nyɔ̀ɛ̀ wĩín-wùɖù mɔ̀ kú-ɖáɓá-wùɖù, kɛɛ dyí-sɛ́ɖɛ́ìn-nyɔ̀ɛ̀ wĩín-wùɖù mɔ̀ nyɔ-póìn-wùɖù.

⁷ Hwòɖǒ-kɔ̃in-nyìnììn-nyɔ̀ɛ̀ gbǒ-xwíníín wáɖá, ké ɔ jè zi dyi, kɛɛ dyí-sɛ́ɖɛ́ìn-nyɔ̀ɛ̀ gbǒ-xwíníín ku dúi kánáá pū.

⁸ Nyɔ ɓɛ́ ɔ fɔ̀nɔ̀ hwòɖǒɛɛ, wa ɓàìn ɔ ní ɓó ɔ hwòɖǒ fɔ̀nɔ̀ jè, kɛɛ wa zàìn zuɖuu-nyɔ̀ zùǔn.

⁹ Ɔ kpa ɖɛ ɓɛ́ m̀ ké nyɔ se ɖɛ kpaa jǔ, ɓɛ́ m̀ ké gbo-nì-nyɔ̀ ɓéɖé, ké ɔ zi ɓɛ́ m̀ ké m̀ mìɔùn nyɔ kpa ɖɛ ɖáìn, ɓɛ́ m̀ ké se ɖii-ɖɛ̀ dyɛ mɔ̀ùn dyéɛ ɓɛ́ìn nyɛɛ dyí.

¹⁰ Hwòɖǒ-kɔ̃in-nɔ̀mɔ̀-nyɔ̀ kɔ̃̀ ɖé ɔ nyúà-ɖɛ̀ ɓěɔ̀ jè gbo, kɛɛ hwòɖǒ-kɔ̃in-nyìnììn-nyɔ̀ nììn hwòɖǒ-kɔ̃in-nɔ̀mɔ̀-nɔ̀mɔ̀ɔ̀ mɔ̀ hwòɖǒ-kɔ̃in-nyìnììn-nyìnììn ɖekè.

¹¹ Nyɔ mɔ̀ nyɔ ɓɛ́ ɔ ɓá ɖii-ɖɛ̀ kɛɛ mu ɖii-ɖɛ̀ ɓáún-ɓáún ɓéɖéìn, kɛɛ nyɔ ɓɛ́ ɔ sí fùɖù-fùɖù-ɖɛ̀ kíɖííɛɛ mɔ̀ zuɖuu-nyɔ̀.

¹² Hwòɖǒ-kɔ̃in-nyìnììn-nyɔ̀ mɔ́ ɖɛ ɔ mǔè hwòɖǒ-kɔ̃in-nyìnììn-nyɔ̀ ɖò mɔ̀ùn ɓéɖéɛ, kɛɛ dyí-sɛ́ɖɛ́ìn-nyɔ̀ kpa gmɛ̀nɛ̀ɛ̀, ké ɔ nyànà dyi gãun-gãun.

¹³ Hwòɖǒ-kɔ̃in-nyìnììn-nyɔ̀ɛ̀ wĩín-wùɖù mɔ̀ kpàǎ ké ɔ kpɔ̃ ɔ mìɔùn, kɛɛ dyí-sɛ́ɖɛ́ìn-nyɔ̀ pó fũ̀à-fṹá-ɖɛ̀ xwaún.

¹⁴ Ɖɛ nyɔ ɓáa kɔ̃̀ ɓo nyɔ ɖi.

¹⁵ Ɖɛ séín ɓɛ́ zuɖuu-nyɔ̀ nyuɛɛ sɛ́ɖɛ́ìn dyí ɖé ɔ mìɔùn dyéɖéín, kɛɛ hwòɖǒ-fɔ̀nɔ̀-nyɔ̀ tò ná-wùɖù gbo ɖùǔ.

¹⁶ Ɖɛ ɖò dyi zuɖuu-nyɔ̀ dyoɖoún po ní, ɔ nyuɛ ɓɛ́ nyɔ séín kéɛ dyuò wàɖà, kɛɛ hwòɖǒ-fɔ̀nɔ̀-nyɔ̀ wã̀ìn ɔ zùǔn-zàìn-ɖɛ̀ ɓě dyéɖé kɔ̃in.

¹⁷ Zàse ɓɛ́ ɔ sɛ́ɖɛ́ìn dyíɛɛ cɛ̃ jǎà-ɖɛ̀, kɛɛ seɛ̀-zàse-nyu-nyɔ̀ mɔ̀ nyɔ-cá-wùɖù-po-nyɔ̀.

¹⁸ Wuɖu ɓɛ́ nyɔǔn-dyù se hwìɖǐi poìn ké wa cɛ̃ kɛɛ puà nyɔ kà gàsíà nyuà kɛ, kɛɛ hwòɖǒ-fɔ̀nɔ̀-nyɔ̀ɛ̀ wuɖu dyà dyi-káná-káná.

¹⁹ Jǎà-cɛ̃-mìɔ̀ɔ̀ mu nììn kánáá pū, kɛɛ se-tɔ́mɔ́-mìɔ̀ɔ̀ se hwèɖèɛ̌n mu.

²⁰ Nyɔ-cá-cá mɔ̀ ɖɛ dyíìn ɖé ɖɛ-gbà-dyí-sɔ́-nyɔ̀ hwòɖǒ bũ̌ dyi, kɛɛ múà dyíìn ɖé ɖɛín-ɖɛ̀-dyí-sɔ́-nyɔ̀ hwòɖǒ bũ̌ dyi.

²¹ Ɖɛ gbà ɖò ní kpá dyí-sɛ́ɖɛ́ìn-nyɔ̀ gbo, kɛɛ ɖɛ gbà kpá hwòɖǒ-kɔ̃in-nyìnììn-nyɔ̀ gbo kánáá pū.

²² Se-tɔ́mɔ́-mìɔ̀ jè nyàìn Bounɓoɔ̀ dyi, kɛɛ ɔ hwòɖǒ dèìn jǎà-cɛ̃-nyɔ̀ múin.

²³ Hwòɖǒ-fɔ̀nɔ̀-nyɔ̀ kã ɔ wɔ̃ ɓá ɖɛ ɓɛ́ ɔ dyuòɛɛ jè dyí, kɛɛ zuɖuu-nyɔ̀ po zio ɓá ɔ se ɖɛ dyuòɔ̀ jè dyí.

²⁴ Dúún-ku-nyɔ̀ mu nyɔ-wuɖuí-kɔ̃̀-nyɔ̀ jǔùn, kɛɛ fóó-nyɔ̀ mu gǐì-kũ̀à nyuùn.

²⁵ Hwòɖǒ-dyií-gbǎìn-gbǎìn dyà hwòɖǒɛ̀-xwa-ku-ku, kɛɛ wuɖuún-wùɖù dè hwòɖǒ dyi.

²⁶ Hwòɖǒ-fɔ̀nɔ̀-nyɔ̀ nyɛ́ ɖɛ gbà mú, kɛɛ hwòɖǒ-kɔ̃in-nyìnììn-nyɔ̀ nyuu-kpèɖè nyuɛ ké ɔ sɔ̀ìn hwìǐ.

²⁷ Fóó-nyɔ̀ se suaɖɛ̀ ɓɛ́ ɔ ɖáɓá kɛɛ pĩɛ ɓɛ́ìn fóɖóún, kɛɛ dúún-ku-nyɔ̀ dyé ɔ kɔ̃̀ɔ̀-ɖɛ̀ séín kpéín.

²⁸ Dyí-sɛ́ɖɛ́ìn-sɛ́ɖɛ́ìn mɔ̀ hwìè mu ɖé fɛ̀ɛ̀ ɓíɖíɛ, kɛɛ hwòɖǒ-kɔ̃in-nyìnììn-nyìnììn mɔ̀ hwìè mu ɖé gĩɔ ɓíɖíɛ.