Nɔ́ɔ́ 11 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓěɔ̀ ɖíɛ́ ɓě

¹ Pṹá ɓɛ́ ɔ se wɔ̃ ɓɛ́ìn nyɛɛ mɔ̀ Bounɓoɔ̀ dyi-nyàìn-ɖɛ̀, kɛɛ ɔ hwòɖǒ dèìn pṹá ɓɛ́ ɔ ɓɛ́ìn wɔ̃ɛɛ múin.

² Nyɔ-mìɔùn-dyí-ɓúáìn-ɓúáìn dyà dɛ̃, kɛɛ nyɔ-mìɔùn-ɓíɖíi-dyà-dyà nyuɛ ké nyɔ cɛ̃́ fɔ̀nɔ̀-hwòɖǒ.

³ Mú-hwɛ̀-fɛ̀ɛ̀ cĩ́-cĩ́ nàìn dyí-sɛ́ɖɛ́ìn-nyɔ̀, kɛɛ se-jǎà-ɖɛ̀-nyu-nyɔ̀ɛ̀ nyuu-ɖɛ̀ kíɖíìn múin gbɔɔ̀ ɔ mú.

⁴ Kɔ́mɔ́-ɖɛ̀ ɖò se nyɔ póɛ̀n ɓɛ́ìn ɓó zaa-wɔ̃-po-wèɔ̀ ɓaɖa, kɛɛ dyí-sɛ́ɖɛ́ìn-sɛ́ɖɛ́ìn póìn nyɔ sɔ̀ìn ɖé gĩɔ xwaún.

⁵ Dyí-sɛ́ɖɛ́ìn-nyɔ̀ɛ̀ cĩ́-cĩ́ se kɛɛ ɖò ɓéɖéɔ̀ nyuɛ ké ɔ ɓéɖé dyií-ɖú-ɖú, kɛɛ hwòɖǒ-kɔ̃in-nyìnììn-nyɔ̀ mìɔùn nììn hwòɖǒ-kɔ̃in-nyìnììn-nyìnììnɔ̀ po ɔ ɓíɖíi dyi.

⁶ Dyí-sɛ́ɖɛ́ìn-sɛ́ɖɛ́ìn póìn dyí-sɛ́ɖɛ́ìn-nyɔ̀, kɛɛ se-jǎà-ɖɛ̀-nyu-nyɔ̀ mìɔùn nììn hwòɖǒɛ̀-mɔ́ɔ́-ɖɛ̀ mɔ̀ kpàǎ, ké ɔ kpɔ̃ ɔ.

⁷ Hwòɖǒ-kɔ̃in-nyìnììn-nyɔ̀ dyi mɛ́ ní, ɔ kè ɔ hwòɖǒ-kɔ̃-dè-ɖɛ̀ ɓěɔ̀ mɛ́. Ɔ kɔ́mɔ́-ɖɛ̀ ɓě ɓɛ́ ɔ dè hwòɖǒ kɔ̃ɛɛ ɖò se ɖɛ ɖò gbo wóɖó.

⁸ Dyí-sɛ́ɖɛ́ìn-nyɔ̀ pó fũ̀à-fṹá-ɖɛ̀ xwaún, kɛɛ hwòɖǒ-kɔ̃in-nyìnììn-nyɔ̀ kpáa mú.

⁹ Nyɔ ɓɛ́ ɔ nyɛ́ Gèɖèpɔ́ɔ̀ múɛɛ wɔ̃ gbɔɔ̀ ɔ mǔè ɖò mú, kɛɛ ɖɛ-dyuò-dyuò póìn dyí-sɛ́ɖɛ́ìn-nyɔ̀.

¹⁰ Ti ɓɛ́ dyí-sɛ́ɖɛ́ìn-nyɔ̀ mu mana dyéìn nyɛɛ, nìí, hwɔɖɔ gànáɔ̀ kpá múàǔn, ké ti ɓɛ́ hwòɖǒ-kɔ̃in-nyìnììn-nyɔ̀ mu mú gbɔɔ̀ùn wɛ̃ɛ, hwɔɖɔ gànáɔ̀ kpá múàǔn, ké wa ɖú kèɖèìn po kpàǐ.

¹¹ Hwɔɖɔ gànáɔ̀ kpɔ̃ dyììn ɖé dyí-sɛ́ɖɛ́ìn-nyɔ̀ cĩ́ ɖéɛ múɛɛ mana mú, kɛɛ hwòɖǒ-kɔ̃in-nyìnììn-nyɔ̀ɛ̀ wɔ̃ wáɖá hwɔɖɔ.

¹² Zuɖuu-nyɔ̀ zàìn ɔ mǔè ɖò zùǔn, kɛɛ hwòɖǒ-fɔ̀nɔ̀-nyɔ̀ kã ɔ wɔ̃.

¹³ Nyɔ ɓɛ́ té-wĩín-dyi kpɔ̃ɛɛ se sáná-ɖɛ̀ ɖò vǐèɛ̀ ɓɛ́ìn, kɛɛ nyɔ ɓɛ́ nyɔ ɖò ɓɛ́ìn hwòɖǒ kɔ̃ dèɛ̀ kɛɛ vǐè sáná-ɖɛ̀.

¹⁴ Dɛ̀ ɓɛ́ nyɔ-náún-po-po nɔ̀mɔ̀ dyíin se nìɛɛ, nìí, ɓóɖóɔ̀ wáɖá ní, kɛɛ dɛ̀ ɓɛ́ nyɔ-náún-po-nyɔ̀ nɔ̀mɔ̀ dyíin kúɖúú nìɛɛ, ɓóɛ̀ to-ɖu-ɖu nì.

¹⁵ Nyɔ ɓɛ́ ɔ dè ɔ mìɔùn tɔ̀ɔ̀-má mú ɓó ɖéè ɓɛ́ ɔ se dyí dyuòɛ jèɛɛ muɛ gǎ dyí dyéìn. Ɔ jèɛɛ, ɔ kpa ɖɛ ɓɛ́ m̀ ké se ɖé sɔ̃ po.

¹⁶ Kpeɖeɛ̀-dyíin-nɔ̀mɔ̀-màà ɓéɖé dya-dè-dè, kɛɛ ɖɛ ɓɛ́ nyɔ-ɖɛ-gana-xwa-zàìn-gàà dyéɛ mɔ̀ kɔ́mɔ́ ɖòùn pū.

¹⁷ Hwòɖǒ-kɔ̃in-nɔ̀mɔ̀-nyɔ̀ nyu ɔ mìɔùn kpáná dyí, kɛɛ hwòɖǒ-kɔ̃in-nyìnììn-nyɔ̀ puà ɔ mìɔùn bũ̌in.

¹⁸ Pɛ́ɛ̀-ɖɛ̀ ɓɛ́ hwòɖǒ-kɔ̃in-nyìnììn-nyɔ̀ dyé ɓó kũ̀à ɓɛ́ ɔ nyuɛ jèɛɛ se ɔ kpáná ɖò dyí nyuɛ ɓɛ́ìn, kɛɛ nyɔ ɓɛ́ ɔ nyu dyí-sɛ́ɖɛ́ìn-ɖɛ̀ kɛɛ dyé pɛ́ɛ̀-ɖɛ̀ nɔ̀mɔ̀ dyíin.

¹⁹ Nyɔ ɓɛ́ ɔ kpɔ̃ ɓó dyí-sɛ́ɖɛ́ìn-ɖɛ̀ nyu-nyu gboi kóɖó-kóɖóɛɛ kpɔ̃ ɓó fɛ̀ɛ̀ gboi, kɛɛ nyɔ ɓɛ́ ɔ kpá hwòɖǒ-kɔ̃in-nyìnììn-ɖɛ̀ kíɖííɛɛ kpá gĩɔ kíɖíí.

²⁰ Nyɔ kɔ̃̀ nyuu-ɖɛ̀ sɔ̀ìn hwìǐɛɛ jè nyàìn Bounɓoɔ̀ dyi, kɛɛ ɔ hwòɖǒ dèìn nyɔ kɔ̃̀ cĩ́-cĩ́ se kɛɛ ɖò ɓéɖéɛɛ múin.

²¹ M̀ mɛ dyuò ɖɛ nìà kɛ dyí jɛ́ɛ́ kà ɓɛ́ ɖɛ-gbà-nyu-nyɔ̀ ɓéɖé ɓɛ́ ɔ kéɛ gǎ dyí dyé wɛ̃́ɛ́ kɛ, ké m̀ mɛ dyuòɛ̀ dyí jɛ́ɛ́ kà ɓɛ́ Bounɓoɔ̀ mu dyí-sɛ́ɖɛ́ìn-nyɔ̀ póìn nyɛ.

²² Dyíin-nɔ̀mɔ̀-màà ɓɛ́ ɔ se hwòɖǒ fɔ̀nɔ̀ɛ kè gbe ɓɛ́ wa bɛ̃̀ìn góò-bɛ̃̀ìn-ɖɛ̀ kɛɛ hwɔìn ní.

²³ Ɖɛ ɓɛ́ hwòɖǒ-kɔ̃in-nɔ̀mɔ̀-nyɔ̀ mɔ́ɛɛ, ɔ dyéɛ ní, kɛɛ dɛ̀ ɓɛ́ hwòɖǒ-kɔ̃in-nyìnììn-nyɔ̀ nììn hwòɖǒɛ̀-mɔ́ɔ́-ɖɛ̀ jè jɛ̀ɖɛ̀ìn dúíɛɛ mɔ̀ ɖé Gèɖèpɔ́ɔ̀ dyoɖo-hwòɖòɔ̀ mú.

²⁴ Nyɔ ɖíɛ́ ɓě zà ɖɛ sɔ̃ún. Wa se sɔ̃ ɖeín dyi ku ɓó nyɔ ɖɛ nyí jè, kɛɛ waà kɔ́mɔ́ kpá kɔ̃ kánáá pū. Ké nyɔ ɖíɛ́ ɓě nɛ́ìn ɖɛ wa ɓéɖéɛɛ sɔ̃ kɔ̃. Waà sɔ̃ ɖeín ku xwa ɓó nyɔ ɖɛ nyí jè, kɛɛ ɖé dyúa kɛɛ wa zɛ̃̀ìn gǎ-dyé-nyɔ̀ mú.

²⁵ Kpeɖeín-nɔ̀mɔ̀-nyɔ̀ɛ̀ nyuu-ɖɛ̀ mu mú wóɖóùn kánáá pū, nyɔ ɓɛ́ ɔ kpá nyɔ ɖò mɔ̀ùn gboɛɛ, nyɔ ɖò mu ɔ mɔ̀ùn gbo kpáùn ɖekè.

²⁶ Nyɔ ɓɛ́ ɔ nɛ́ìn ɖii-ɖɛ̀ sɔ̃ kɔ̃, ké ɔ seɛ peɖeɛ mɔ́, sepóɛɖé ɔ mɔ́ wíɖí vɛ̀nɛ̀ dyéɛ dyi ɖé dyúa jèɛɛ, nyɔ ɓě gboò ɔ ní, kɛɛ mana nì nyɔ ɓɛ́ ɔ peɖeɛ kɛɛ kɔ̃.

²⁷ Nyɔ ɓɛ́ ɖɛ nɔ̀mɔ̀ dyíin nyɛɛ nyu jè kpɔ̃ hwòɖǒɛɛ, nyɔǔn-dyùɛ̀ hwòɖǒ dèìn ɔ múin, kɛɛ nyɔ ɓɛ́ ɔ mɔ́ ɖɛ gbà dyiɛɛ, ɖɛ gbà dyɛ̀ìn ɔ ní.

²⁸ Nyɔ ɓɛ́ ɔ taɓa ɔ kɔ́mɔ́-ɖɛ̀ ɓě hwìɖǐǐɛɛ mu dyi kpáùn kà fĩìn-mì sùà kpáà dyiɛ, kɛɛ dyí-sɛ́ɖɛ́ìn-nyɔ̀ mu nììn kà fĩìn-mì ɓɛ̀ɖɛ̀ɛ̀-ɓɛ̀ɖɛ̀ɛ̀ nìà cu dyaa.

²⁹ Nyɔ mɔ̀ nyɔ ɓɛ́ ɔ dyà ɔ gbǒ-xwíníínɔ̀ fũ̀à-fṹá-ɖɛ̀ kɔ̃ɛɛ, ɖɛ ɖò se ɔ xwa sèɛ̌ mu. Zuɖuu-nyɔ̀ mu hwòɖǒ-fɔ̀nɔ̀-nyɔ̀ɛ̀ gǐì jǔùn.

³⁰ Dyí-sɛ́ɖɛ́ìn-nyɔ̀ nììn cĩ́-cĩ́ɔ̀ nì kà fɛ̀ɛ̀-cù nìà kɛ, ké nyɔ ɓɛ́ ɔ póìn ɔ mǔè ɖòɛɛ mɔ̀ hwòɖǒ-fɔ̀nɔ̀-nyɔ̀.

³¹ Ɔ jǔ ké dyí-sɛ́ɖɛ́ìn-nyɔ̀ dyi ɔ nììn pɛ́ɛ̀-ɖɛ̀ dyéɛ mu dà toɖo-kpàà kɔ̃ ní, nìí, xwɛ̌ ɔ mu nììn ɓá hwòɖǒ-kɔ̃in-nyìnììn-nyɔ̀ kè nàmàǔn-nyɔ̀ jè dyíɛ́?