Nɔ́ɔ́ 10 - Ɓǎsɔ́ɔ̀ Báɓòɔ̀

Sã́ɖómàà fɔ̀nɔ̀-hwòɖǒ-nɔ̀ɔ̌ ɓě

¹ Fɔ̀nɔ̀-hwòɖǒ-nɔ̀ɔ̌ ɓě ɓɛ́ Sã́ɖómà po maa kɛà kɛ̀. Hwòɖǒ-fɔ̀nɔ̀-dyù dyà ɔ ɓǎ múà, kɛɛ zuɖuu-dyù dyà ɔ ɖe wìì kɔ̃.

² Kɔ́mɔ́ ɓɛ́ nyɔ ɖò dyé dyììn ɖé hwòɖǒ-kɔ̃in-nyìnììn-nyìnììn múɛɛ se ɔ kpáná ɖò dyí nyuɛ ɓɛ́ìn, kɛɛ dyí-sɛ́ɖɛ́ìn-ɖɛ̀ nyu-nyu póìn nyɔ gĩɔ xwaún.

³ Bounɓoɔ̀ se dyí-sɛ́ɖɛ́ìn-nyɔ̀ dyi táǎ mu, ɓɛ́ ɖii-ɖɛ̀ ké se ɖé ɔ ɓíɖí-taún nì, ké ɔ se hwòɖǒ-kɔ̃in-nyìnììn-nyɔ̀ dyi táǎ mu, ɓɛ́ ɔ ké ɔ hwòɖǒɛ̀-mɔ́ɔ́-ɖɛ̀ ɓě dyé.

⁴ Nyɔ kɔ̃̀ sɔ̃ ku xwa ɓó kũ̀à nyu jèɛɛ mu gǎ dyéìn, kɛɛ gana-kũ̀à nyu-nyu dyà kɔ́mɔ́.

⁵ Dyú ɓɛ́ ɔ nyu gana-kũ̀à ɓó geɖeɔ̀ kɔ́-tìǐn nyɛɛ mɔ̀ hwòɖǒ-fɔ̀nɔ̀-nyɔ̀, kɛɛ dyú ɓɛ́ ɔ ɖɛ̀ɓɛ̀ nyíɔ-mɔ́-mɔ́ mú ɓó geɖeɔ̀ kɔ́-tìǐn nyɛɛ dyà ɔ nyɔ ɓě dɛ̃ kɔ̃.

⁶ Mana ɓáìn dyí-sɛ́ɖɛ́ìn-nyɔ̀ kɔ̃in, kɛɛ hwòɖǒ-kɔ̃in-nyìnììn-nyɔ̀ɛ̀ wĩín-wùɖù vǐè ɔ nyɔ-ɖɛ-gana-xwa-zàìn-kpèɖè.

⁷ Nyɛ́nɛ́ín-nyɛ̀nɛ̀ ɓɛ́ dyí-sɛ́ɖɛ́ìn-nyɔ̀ sè toɖo-kpàà kɔ̃ɛɛ dyà mana-kɔ̃-po-po ɓó nyɔ séín gbo, kɛɛ ɔ ní hwèɖèìn ké hwòɖǒ-kɔ̃in-nyìnììn-nyɔ̀ jè sɔ̀ nyɔǔn-dyù hwìɖǐi.

⁸ Hwòɖǒ-fɔ̀nɔ̀-nyɔ̀ kpɔ̃ gma dyi, kɛɛ nyɔ ɓɛ́ ɔ wùɖù zuɖuu-kà kɛɛ mu mú gbɔɔ̀ùn.

⁹ Nyɔ ɓɛ́ ɔ se kɛɛ ɖò ɓéɖéɛɛ nà-ɓò sɛ́ɖɛ́ìn dyí, ké ɖɛ gbà ɖò se ɔ ɖei nì, kɛɛ nyɔ ɓɛ́ ɔ ɖú hwìè kíɖíìn múinɔ̀ dyíɛɛ, wa mu ɔ dyéɖéi hwɔ̀ìn.

¹⁰ Dyéɖé-pì-dya-po-nyɔ̀ dyà fũ̀à-fṹá, kɛɛ nyɔ ɓɛ́ ɔ zàìn ɔ mǔè ɖòɛ̀ ɖɛ gbà ɔ da wáɖáá kɛɛ nyuɛ náa ɓɛ́ gìɖìǐ ké nì jè.

¹¹ Dyí-sɛ́ɖɛ́ìn-nyɔ̀ɛ̀ wĩín-wùɖù hwɔìn ní-dù kɔ̃̀ mú ɓɛ́ fɛ̀ɛ̀-nì sɔ̀ kɛ, kɛɛ hwòɖǒ-kɔ̃in-nyìnììn-nyɔ̀ɛ̀ wĩín-wùɖù vǐè ɔ nyɔ-ɖɛ-gana-xwa-zàìn-kpèɖè.

¹² Nyɛ́ín-nyɛ́ín po zà-ɖɛín dyi, kɛɛ ɖɛ̀ɓɛ̀ǐn-ɖɛ̀ɓɛ̀ǐn dyéɖé wã̀ìn ɖɛ gbà séín kɔ̃in.

¹³ Fɔ̀nɔ̀-hwòɖǒ-wùɖù mɔ̀ ɖɛ nì nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ wĩín, kɛɛ ɓà-cù nì zuɖuu-nyɔ̀ kɔ̃ún kánáá pū.

¹⁴ Hwòɖǒ-fɔ̀nɔ̀-nyɔ̀ dè fɔ̀nɔ̀-hwòɖǒ dyi, kɛɛ zuɖuu-nyɔ̀ɛ̀ zuɖuu-kà-wùɖù-wùɖù dyà ɔ mú-gbɔɔ̀-gbɔɔ̀.

¹⁵ Bã-nyɔ̀ɛ̀ dyí-gmɔ̀ìn-ɖɛ̀ mɔ̀ ɔ kɔ́mɔ́ɔ̀, kɛɛ gǎ mɔ̀ gǎ-dyé-nyɔ̀ɛ̀ mú-gbɔɔ̀-ɖɛ̀.

¹⁶ Dyí-sɛ́ɖɛ́ìn-nyɔ̀ɛ̀ pɛ́ɛ̀-ɖɛ̀ mɔ̀ fɛ̀ɛ̀, kɛɛ hwòɖǒ-kɔ̃in-nyìnììn-nyɔ̀ɛ̀ pɛ́ɛ̀-ɖɛ̀ mɔ̀ ɔ gǎ-kɔ̃-tò-tò.

¹⁷ Nyɔ mɔ̀ nyɔ ɓɛ́ ɔ kpɔ̃ ná-wùɖù dyiɛɛ nì fɛ̀ɛ̀-hwìèɔ̀ xwíníín, kɛɛ nyɔ ɓɛ́ ɔ nɔ́ɔ̀ ná-wùɖù gboɛɛ sɔ̀ìn hwìèɔ̀ dyí.

¹⁸ Nyɔ ɓɛ́ ɔ ɓéɖé nyɛ́ín-nyɛ́ín ɖé ɔ hwòɖǒ bũ̌ɛɛ mɔ̀ se-tɔ́mɔ́-nyɔ̀, ké nyɔ-nyɛ́nɛ́-zeɖe-nyɔ̀ mɔ̀ zuɖuu-nyɔ̀.

¹⁹ Nì wĩín-wùɖù dyi dyí vòɛ̌n zi ní, nàmàǔn mu ɖé nììn wɛ̃́ɛ́ pū, kɛɛ nyɔ ɓɛ́ ɔ kpɔ̃ ɔ wɔ̃ɔ̀ dyíɛɛ mɔ̀ hwòɖǒ-fɔ̀nɔ̀-nyɔ̀.

²⁰ Dyí-sɛ́ɖɛ́ìn-nyɔ̀ɛ̀ wĩín-wùɖù nì kà séɓàɖà hwɛ̀ zɛ̀nɛ̌ǐn nìà kɛ, kɛɛ fɔ̀nɔ̀-hwòɖǒ ɓɛ́ hwòɖǒ-kɔ̃in-nyìnììn-nyɔ̀ tòɛɛ se ɖɛ kpa ɖé nyɔ ɖò gbo.

²¹ Nyɔ-náún-po-po ɓɛ́ dyí-sɛ́ɖɛ́ìn-nyɔ̀ nyuɛɛ nyuɛ ké nyɔ ɓáún-ɓáún dyé kpáná, kɛɛ zuɖuu-nyɔ̀ mɛ́ zuɖuɛ dyí.

²² Bounɓoɔ̀ nyɔ-mana-kɔ̃-po-poɔ̀ nyuɛ ké nyɔ bã, ké ɔ ní dèɛ̀ fũ̀à-fṹá-ɖɛ̀ ɖò kɔ̃.

²³ Zuɖuu-nyɔ̀ hwòɖǒ dèìn kpeɖe-gbà-nyu-nyu múin, kɛɛ nyɔ ɓɛ́ ɔ ɓéɖé ɖɛ-múin-wɔ̃́-wɔ̃́ɛɛ hwòɖǒ dèìn fɔ̀nɔ̀-hwòɖǒ-ɖɛ̀ nyu-nyu múin.

²⁴ Ɖɛ mɔ̀ ɖɛ ɓɛ́ hwòɖǒ-kɔ̃in-nyìnììn-nyɔ̀ peɖe dyiɛɛ, ɔ mɔ̀ ɖɛ mu ɔ kɔ̃ dyiìn, kɛɛ dyí-sɛ́ɖɛ́ìn-nyɔ̀ mu ɖɛ ɔ hwòɖǒ mɔ́ɛɛ dyéìn.

²⁵ Dììɔ̀ dyi dyi, ké ɔ dyi dyi zi ní, m̀ se hwòɖǒ-kɔ̃in-nyìnììn-nyɔ̀ dyé ɖe, kɛɛ dyí-sɛ́ɖɛ́ìn-nyɔ̀ nyànà dyi gãun-gãun kánáá pū.

²⁶ Kà ɓɛ́ nyɔ nyɛ́nɛ́-nyàìn-ɖɛ̀ nyuà nyɔ nyɛ́nɛ́ nyàìn nyɛ, mɔɔ kà nyànà-sò nyuà nyɔ dyéɖéín síɛ kɛɛ, kǎà fóó-nyɔ̀ jè nyu nìɛ̀ ɓó nyɔ ɖoɓoà ɔ da kɛɛ gbo.

²⁷ Bounɓoɔ̀ dyi-fɛ̃̀ìn-fɛ̃̀ìn po nyɔ fɛ̀ɛ̀-wè kɔ̃, kɛɛ hwòɖǒ-kɔ̃in-nyìnììn-nyɔ̀ɛ̀ fɛ̀ɛ̀ mu kpó cɛ̃̀ìn.

²⁸ Dyí-sɛ́ɖɛ́ìn-nyɔ̀ɛ̀ hwòɖǒ-kɔ̃-dè-ɖɛ̀ɔ̀ jɛ̀ɖɛ̀ìn múà dúí, kɛɛ hwòɖǒ-kɔ̃in-nyìnììn-nyɔ̀ɛ̀ hwòɖǒ-kɔ̃-dè-ɖɛ̀ɔ̀ se ɖɛín-ɖɛ̀ ɖò gbo wóɖóɛ mu.

²⁹ Bounɓoɔ̀ gbo mɔ̀ vǐè-naín ɓó dyí-sɛ́ɖɛ́ìn-nyɔ̀ bìì, kɛɛ ɖé mɔ̀ mú-gbɔɔ̀-naín ɓó ɖɛ-gbà-nyu-nyɔ̀ bìì.

³⁰ Dyí-sɛ́ɖɛ́ìn-nyɔ̀ se daí sɔ̀ǐn mu sɔ̃̀ùn, kɛɛ hwòɖǒ-kɔ̃in-nyìnììn-nyɔ̀ se ɖé ɓóɖóɔ̀ kɔ̃ sèɛ̌ mu.

³¹ Dyí-sɛ́ɖɛ́ìn-nyɔ̀ɛ̀ wɔ̃ wùɖù fɔ̀nɔ̀-hwòɖǒ-ɖɛ̀, kɛɛ ɖɛ-gbà-cɛ̃-wɔ̃̀ mu ɓɔ́í kpáùn.

³² Dyí-sɛ́ɖɛ́ìn-nyɔ̀ dyuò ɖɛín-ɖɛ̀ wa ké cɛ̃ kɛɛ dyí, kɛɛ hwòɖǒ-kɔ̃in-nyìnììn-nyɔ̀ɛ̀ cɛ̃ɛ-ɖɛ̀ mɔ̀ ɖɛ gbà saá-saá.