Nɔ̀ɓà 9 - Ɓǎsɔ́ɔ̀ Báɓòɔ̀

Zĩ̀ìn-Kɔ̃in-hwɔ̀ɔ̀ sɔ̃́ nììnɔ̀

¹ Ti ɓɛ́ Éézùɖùɛ̀-nyɔ̀ ɓěɔ̀ ɖǎ ma Íjè-ɓòɖòɔ̀ kɔ̃ sɔ̀ɛɛ, ɔ zɔ̃ sɔ̃́ nììnɔ̀ dɛ̀nɛ̀ kĩ́ín-kĩ́ínɔ̀ xwíníín nyɛɛ, Bounɓoɔ̀ wùɖù ma Mózè gbo ɖé Sányà Gbǎùn-fúɖúáɔ̀ kɔ̃, ké ɔ ɖá,

² “Éézùɖùɛ̀-dyù ɓěɔ̀ mɛ pa Zĩ̀ìn-Kɔ̃in-hwɔ̀ɔ̀ ɓó ti ḿ dè ma kà dyi ɓóɛ jèɛɛ xwíníín.

³ Tiɔ̀ mɔ̀ dɛ̀nɛ̀ nìà kɛ wé ɓaɖa-bùè sè hĩinyɛ nììnɔ̀ ɓaɖa ɓó hwìo. Ɓě mɛ pa hwɔɔ̀ dyììn ɖé gma séín ɓě ɓɛ́ ḿ ɖǎ ma kà po ɓáa dyíɛɛ mú.”

⁴ Ɔ jèɛɛ, Mózè cɛ̃ɛ ma Éézùɖùɛ̀-nyɔ̀ ɓěɔ̀ gbo, ɓɛ́ wa ké Zĩ̀ìn-Kɔ̃in-hwɔ̀ɔ̀ pa.

⁵ Ké wa pa ma Zĩ̀ìn-Kɔ̃in-hwɔ̀ɔ̀ ɓó dɛ̀nɛ̀ kĩ́ín-kĩ́ínɔ̀ wé ɓaɖa-bùè sè hĩinyɛ nììnɔ̀ ɓaɖa ɓó hwìo, ɖé Sányà Gbǎùn-fúɖúáɔ̀ kɔ̃. Kà Bounɓoɔ̀ nyu ma Mózè ɖɛ séín ɓěɔ̀ gbo cɛ̃ɛ ɓáa jè dyíɛɛ, kǎà Éézùɖùɛ̀-nyɔ̀ ɓěɔ̀ nyuɛ ma nyɛ̀nɛ̀ɛ̀.

⁶ Kɛɛ gàa ɖíɛ́ ɓě nì ma ɓó, ké wa se mú hwɛ̀ ɓó gàa ɖòɛ̀ xwɛ́ ɓɛ́ wa tìnììn ma dyiɛɛ jè. Ɔ jèɛɛ, wa mɔ̀ùn se ma hwɔɔ̀ paa ɓɛ́ìn ɓó wéa ɓaɖa. Ké wa dyi ma Mózè kè Eɖóún gbo ɓó wéa ɓaɖa.

⁷ Ké wa cɛ̃ɛ ma Mózè gbo, ké wa ɖá, “À se mú hwɛ̀, sepóɛɖé à tìnììn gàa ɖòɛ̀ xwɛ́ dyi. Kɛɛ ɖɛ́ kɔ̃̀ jè à seà Bounɓoɔ̀ sáa-zàìn-ɖɛ̀ɔ̀ nyu ɓó ti ɓɛ̀ɖɛ̀ìn dyíɔ̀ mú ɖé Éézùɖùɛ̀-nyɔ̀ ɓěɔ̀ hwìɛ̀ kɛ́?”

⁸ Ké Mózè cɛ̃ɛ ma wa gbo, ké ɔ ɖá, “Ɓě ku hwòɖǒ, ɓɛ́ ḿ ké Bounɓoɔ̀ dyi diè, ɓɛ́ ḿ ké ɖɛ ɔ mu cɛ̃ìn ɓá ɓě jè dyíɛɛ wɔ̃́.”

⁹ Ké Bounɓoɔ̀ cɛ̃ɛ ma Mózè gbo, ké ɔ ɖá,

¹⁰ “Cɛ̃ɛ Éézùɖùɛ̀-dyù ɓěɔ̀ gbo, ɓɛ́ m̀ ké níiń, ‘Ɔ jǔ ké ɓě ɖò mɔɔ ɓěɛ̀ xwíníín-dyù ɖò se mú hwɛ̀ dyììn ɖé xwɛ́ ɖò dyi tìnììn-tìnììn mú ní, mɔɔ ké ɔ dyi hwìè-kpà ɖò kɔ̃ nì ɖé dà vɛ̃in ɖò ní, nìí, ɔ mɛ pa Bounɓoɔ̀ Zĩ̀ìn-Kɔ̃in-hwɔ̀ɔ̀.

¹¹ Kɛɛ ɔ mɛ pa hwɔɔ̀ ɓó zɔ̃ɔ̀ dɛ̀nɛ̀ sɔ̃́ nììnɔ̀ wé ɓaɖa-bùè sè hĩinyɛ nììnɔ̀ hwìo-kà. Ɔ mɛ ɖììn ɓáɖáá-dyùɔ̀ suaɖɛ̀ɔ̀ bɛɖɛɛ̀ se dyáìn-ɖɛ̀ gbo nìɛ kè vàǎ nɛɛ̀-nɛɛ̀ dyí.

¹² Ɔ mɛ ɓɔ́ suaɖɛ̀ɔ̀ ɖò goòɛ̀, ɓɛ́ zɔ̃ kéɛ dyi zɔ̃̀ìn, mɔɔ ké ɔ ní ɖá ɔ ké suaɖɛ̀ɔ̀ kpá ɖò wa. Ɔ mɛ kpɔ̃ gma séín ɓɛ́ Bounɓoɔ̀ ɖǎà po ɓá Zĩ̀ìn-Kɔ̃in-hwɔ̀ɔ̀ jè dyíɛɛ dyi kóɖó-kóɖó.

¹³ Kɛɛ nyɔ mɔ̀ nyɔ ɓɛ́ ɔ hwɛ̀ mú, ké ɔ se hwìè-kpà ɖò kɔ̃ nì, kɛɛ ɔ nɔ́ɔ̀ ɓó Zĩ̀ìn-Kɔ̃in-hwɔ̀ɔ̀ pa jèɛɛ, nyɔ nì náa, ɓě ɓéɖé ɓě ké ɔ woɖo gbo cɛ̃ sɔ̀ìn ɖé ɔ nyɔ ɓěɔ̀ hwìɛ̀, sepóɛɖé ɔ se Bounɓoɔ̀ sáa-zàìn-ɖɛ̀ɔ̀ nyu ɓó ti ɓɛ̀ɖɛ̀ìn dyíɔ̀ ɓaɖa. Nyɔ nì náa mu ɔ mìɔùn nììn nàmàǔnɔ̀ kpa dyí ɖúùn.

¹⁴ “ ‘Ɔ jǔ ké ɖíà ɖò dyi ɖé ɓě hwìɛ̀ nì, ké ɔ dyi Bounɓoɔ̀ Zĩ̀ìn-Kɔ̃in-hwɔ̀ɔ̀ ɖò paa mɔ́ ní, nìí, ɔ mɛ nyuɛ náa dyììn ɖé gma séín ɓě ɓɛ́ Bounɓoɔ̀ ɖǎà po ɓáa jè dyíɛɛ dyi-kpɔ̃-kpɔ̃ mú. Gma dyúáɖòɔ̀ mɛ nì ɓó ɖíà kè ɓóɖó-dyù ɓě bìì.’ ”

Ní-kpò ɓɛ́ ɔ zɛ̃̀ìn nyɛ-mìɔ̀ múɛ

¹⁵ Ti ɓɛ́ wa ɖǎ ma Bounɓoɔ̀ jàɖàìn-gbòɔ̀ dyi nyànàìn nyɛɛ, ní-kpò ɖò dyi ma, ké ɔ ɓáìn ma jàɖàìn-gbòɔ̀ kɔ̃in. Ɔ mɔ̀ jàɖàìn-gbò kɔ̃̀ mú ɓɛ́ gma-gbɔ̀ɖɔ̀ɔ̀ nì ma kà kɛ. Hwìo dyi jǔ ní, ní-kpòɔ̀ zɛ̃̀ìn ma nyɛ-mìɔ̀ mú, ké kǎà ɔ nì ma tee ké ɔ dyɛ̀ìn gànà-kṹún.

¹⁶ Ké kǎà ɔ nyu ma nìɛ̀ tee. Ní-kpòɔ̀ ɓáìn ma jàɖàìn-gbòɔ̀ kɔ̃in ɓó zɔ̃-zɔ̃-ɓàɖà, ké ɓó máaún ní, ɔ zɛ̃̀ìn nyɛ-mìɔ̀ mú.

¹⁷ Ti séín ɓɛ́ ní-kpòɔ̀ mu dyií muùn sɔ̀ìn ɓó jàɖàìn-gbòɔ̀ kɔ̃ɛɛ, nìí, ɔ mɔ̀ ti ké Éézùɖùɛ̀-nyɔ̀ ɓěɔ̀ kpá ma hwìè xwíníín ɖe. Ké dɛ̀ ɓɛ́ ní-kpòɔ̀ mu dyi dèìn nyɛɛ, ɓóɛ̀ Éézùɖùɛ̀-nyɔ̀ ɓěɔ̀ nyànàìn waà jàɖàìn-gbò ɓěɔ̀ dyi.

¹⁸ Bounɓoɔ̀ zà Éézùɖùɛ̀-nyɔ̀ ɓěɔ̀ wuɖu kɔ̃, hwɛ̀ ké wa sɔ̀ìn daí. Ké ɔ cɛ̃ɛ wa gbo, hwɛ̀ ké wa dɔ̀ ɓo ké wa nyànàìn waà jàɖàìn-gbò ɓěɔ̀ dyi. Kà ɓɛ́ ní-kpòɔ̀ nì ɓó jàɖàìn-gbòɔ̀ kɔ̃in keɛɛ, kà dyúáɖòɔ̀ kà wa nì waà jàɖàìn-hwɔ̀ɖɔ̀ɔ̀ mú ke.

¹⁹ Kɛbì ní-kpòɔ̀ mɛ hwèɖèìn ɓó jàɖàìn-gbòɔ̀ kɔ̃in nyɛɛ, Éézùɖùɛ̀-nyɔ̀ ɓěɔ̀ kpɔ̃ Bounɓoɔ̀ wuɖuɔ̀ kɔ̃in kóɖó-kóɖó, ké wa se daí sɔ̀ìn.

²⁰ Ti ɖíɛ́ ɓěǐn, ní-kpòɔ̀ nyu ɓó jàɖàìn-gbòɔ̀ kɔ̃in wé gbɛ̀ǐ-gbɛ̀ǐ nyɛ̀nɛ̀ɛ̀ pū. Ti jĩ̀ kà Bounɓoɔ̀ mɔ́ wa ké jàɖàìn-hwɔ̀ɖɔ̀ɔ̀ mú nyuɛɛ, ɔ mɔ̀ ti wa nyu ɓó. Ké ti Bounɓoɔ̀ cɛ̃ɛ wa gbo, ɓɛ́ wa ké daí sɔ̀ìn nyɛɛ, ɔ mɔ̀ ti wa sɔ̀ìn daí.

²¹ Ti ɖíɛ́ ɓěǐn, ní-kpòɔ̀ sèìn ɓó dà ɖò ɓó hwìo, nìí, gànà-kṹún ní, ɔ sɔ̀ìn daí ɖe, ké Éézùɖùɛ̀-nyɔ̀ ɓěɔ̀ kpá hwìè xwíníín ɖe. Ti ɖíɛ́ ɓěǐn, ní-kpòɔ̀ nyu ɓó dà ɖò wé ɖò kè máaún-hwùɖù ɖò. Kɛɛ ti ní-kpòɔ̀ sɔ̀ìn daíɛɛ, nìí, wa kpá hwìè xwíníín.

²² Kɛbì ní-kpòɔ̀ mɛ nyu ɓó dà ɖò wé sɔ̃́ mɔɔ dɛ̀nɛ̀ gàná mɔɔ zi kɔ̃ɛɛ, ti jĩ̀ kà ní-kpòɔ̀ mu ɓó jàɖàìn-gbòɔ̀ kɔ̃in nyuùn wɛ̃ɛ, Éézùɖùɛ̀-nyɔ̀ ɓěɔ̀ nì waà jàɖàìn-hwɔ̀ɖɔ̀ɔ̀ mú ke kánáá pū. Kɛɛ ti ɓɛ́ ní-kpòɔ̀ sɔ̀ìn daí nyɛ̀nɛ̀ɛ̀ kɛɛ, nìí, wa mɔ̀ùn sɔ̀ìn daí.

²³ Bounɓoɔ̀ cɛ̃ɛ wa gbo, hwɛ̀ ké wa dɔ̀ ɓo ké wa nyànàìn waà jàɖàìn-gbò ɓěɔ̀ dyi, ké Bounɓoɔ̀ zà wa wuɖu kɔ̃, hwɛ̀ ké wa sɔ̀ìn daí. Wa kpɔ̃ gma ɓɛ́ Bounɓoɔ̀ nyí ma kà wa dyììn ɖé Mózè múɛɛ dyi kóɖó-kóɖó.