Nɔ̀ɓà 8 - Ɓǎsɔ́ɔ̀ Báɓòɔ̀

Ɖáùnpò ɓěɔ̀ páún-po-po

¹ Ké Bounɓoɔ̀ cɛ̃ɛ ma Mózè gbo, ké ɔ ɖá,

² “Cɛ̃ɛ Eɖóún gbo kà ti ɓɛ́ ɔ mu ɖáùnpò mɛ̀nɛ̌ìn-sɔ̃́ ɓěɔ̀ ɓó ɖáùnpò-kɔ̃-dè-ɖɛ̀ɔ̀ kɔ̃ dèìn nyɛɛ, ɔ mɛ dè ɓó wa, nìí ɓɛ́ waà ceɔ̀ ké hwɔ ɓó ɖáùnpò-kɔ̃-dè-ɖɛ̀ɔ̀ dyúa dyí fã̀ìn nyɛ.”

³ Ké Eɖóún nyuɛ ma náa. Ɔ po ma ɖáùnpò ɓěɔ̀ páún, ɓɛ́ wa ké ma ce tò hwɔ ɓó ɖáùnpò-kɔ̃-dè-ɖɛ̀ɔ̀ dyúa dyí kà Bounɓoɔ̀ nyuɛ ma kà Mózè gbo cɛ̃ɛ kɛ.

⁴ Ɖáùnpò-kɔ̃-dè-ɖɛ̀ɔ̀ sɔ̀ìn ɖé ɓíɖíi kéà ɖéɛ dú-hwìɛ̀ dɛ̀ ɓɛ́ ɖɛ hwɔìn cu-bùè ɓěɔ̀ nìà kɛ nyiniɛɛ mɔ̀ góò ɓɛ́ wa ɓaɖa kɛɛ saá-saá. Wa nyuɛ ma náa kà Bounɓoɔ̀ nyuɛ ma kà Mózè gbo cɛ̃ɛ kɛ.

Ɖíìváà-nyɔ̀ ɓěɔ̀ mú-hwɔ-hwɔ kè wa Bounɓoɔ̀ xwáɖáún-zàìn-zàìn

⁵ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

⁶ “Zà Ɖíìváà-nyɔ̀ ɓěɔ̀ ɖé nyɔ tɔ̀ɔ̀ ɓěɔ̀ hwìɛ̀, ɓɛ́ m̀ ké wa mú hwɔ.

⁷ Kǎà m̀ mɛ nyu kà wa mú hwɔɔ. Mɛ́nɛ́ìn wa nyɔ-mú-hwɔ-nìɔ̀ kɔ̃in, ɓɛ́ m̀ kéɛ wa gbo cɛ̃, ɓɛ́ wa ké waà mí séín ɓěɔ̀ kpana, ɓɛ́ wa ké waà ɖɔ ɓěɔ̀ wɔɔ̀. Ɔ ɖǎ ná nìǐn, nìí, wa mu mú hwɛ̀ìn.

⁸ Sɔ̀ìn ɓóɛ gboɛɛ, wa mɛ ɖú ɓìɖǐ ɓíɔ́ gmɔ̀ ɖò kè ɖii-ɖɛ̀-sàǎ-zàìn-ɖɛ̀ mɔ̀ fáɖáɓà nìɛ̀-nìɛ̀ ɓɛ́ wa caìn cáná kɛɛ dyí. Ké m̀ mɛ ɖú ɓìɖǐ ɓíɔ́ gmɔ̀ ɖò dyí ɖe, ɓɛ́ ɔ ké nàmàǔn-sàǎ-zàìn-ɖɛ̀ jǔ.

⁹ Ké m̀ mɛ dyà Ɖíìváà-nyɔ̀ ɓěɔ̀ ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ dyúa, ɓɛ́ m̀ ké Éézùɖùɛ̀-dyù séín ɓěɔ̀ dyí poìn.

¹⁰ M̀ ɖǎ Ɖíìváà-nyɔ̀ ɓěɔ̀ ɓó mɔ̄ mɔ̀à Bounɓoɔ̀ kɛɛ dyúa dyà ní, nìí, Éézùɖùɛ̀-dyù ɓěɔ̀ mɛ dè wa sɔ̃ dúún.

¹¹ Ɔ ɖǎ ná nìǐn, nìí, Eɖóún mɛ zàìn ḿ Ɖíìváà-nyɔ̀ ɓěɔ̀ xwáɖáún, ɓɛ́ wa ké nyíí-ɖɛ̀ kpa ɖɛ jǔ, ɓɛ́ Éézùɖùɛ̀-dyù ɓěɔ̀ kéɛ ḿ nyí, ɓɛ́ wa ké ní kũ̀àɔ̀ nyu-nyɔ̀ ɓě jǔ.

¹² Sɔ̀ìn ɓóɛ gboɛɛ, nìí, Ɖíìváà-nyɔ̀ ɓěɔ̀ mɛ dè ɓìɖǐ ɓíɔ́ ɓěɔ̀ sɔ̃ dúún. Ɔ ɖǎ ná nìǐn, m̀ mɛ ɖáɓá ɓìɖǐ ɓíɔ́ɔ̀ ɖò, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ké m̀ mɛ ɖáɓá ɓìɖǐ ɓíɔ́ tɔ̀ɔ̀, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ ɓó ḿ bìì. Ɓìɖǐ ɓíɔ́ sɔ̃́ɔ̀ mu Ɖíìváà-nyɔ̀ ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔùn.

¹³ “Zàìn ḿ Ɖíìváà-nyɔ̀ ɓěɔ̀ xwáɖáún, ɓɛ́ wa ké nyíí-ɖɛ̀ kpa ɖɛ jǔ ɓó ḿ bìì. Ké m̀ mɛ nyuɛ ɓɛ́ wa ké Eɖóún kè ɔ dyú-gàà ɓěɔ̀ xwíɖíi kũ̀à nyu.

¹⁴ Kǎà m̀ mɛ nyu kà ɓó Ɖíìváà-nyɔ̀ ɓěɔ̀ wáká poɛ ɖé Éézùɖùɛ̀-dyù ɓěɔ̀ hwìɛ̀, ɓɛ́ Ɖíìváà-nyɔ̀ ɓěɔ̀ ké ní kɔ̃̀ɔ̀-ɖɛ̀ jǔ.

¹⁵ Ti ɓɛ́ m̀ ɖǎ Ɖíìváà-nyɔ̀ ɓěɔ̀ ḿ xwáɖáún zàìn nyɛɛ ní, nìí, wa ɓɛ́àǐn ɖé ní jàɖàìn-gbòɔ̀ mú kũ̀à nyuɛ́ muɛ.

¹⁶ Ɓě mɛ nyí ḿ Ɖíìváà-nyɔ̀ ɓěɔ̀ sɔ̀ìn ɖé Éézùɖùɛ̀-dyù ɓěɔ̀ hwìɛ̀. Ḿ ɖǎ wa dyí ɖú ɓó Éézùɖùɛ̀-dyù ɓěɔ̀ nyíɔ́-dyù-gàà séín ɓěɔ̀ bɛ̃̌ǐn, ké wa mɔ̀ ḿ ɖòǔn nììn kɔ̃̀ɔ̀-ɖɛ̀.

¹⁷ Sepóɛɖé nyíɔ́-dyù séín ɓě wóɖó ɖé Éézùɖùɛ̀-dyù ɓěɔ̀ xwíníín nyɛɛ mɔ̀ ma ní kɔ̃̀ɔ̀-ɖɛ̀ kĩ́ín, kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ kɛ. Wé kɔ̃̀ ɓaɖa ɓɛ́ ḿ ɖáɓá ma kà nyíɔ́-dyù séín nì ɖé Íjè-ɓòɖòɔ̀ kɔ̃ɛɛ, ḿ po ma wa wáká ɓó ḿ mìɔùn bìì.

¹⁸ Ké ḿ ɖǎ Ɖíìváà-nyɔ̀ ɓěɔ̀ gã, ɓɛ́ wa ké Éézùɖùɛ̀-dyù ɓěɔ̀ nyíɔ́-dyù séín ɓěɔ̀ pá dyí ɖú.

¹⁹ Ké ɓó kàǔn wɛ̃ɛ, ḿ nyí Ɖíìváà-nyɔ̀ ɓěɔ̀ Eɖóún kè ɔ dyú-gàà ɓěɔ̀ sɔ̀ìn ɖé Éézùɖùɛ̀-dyù ɓěɔ̀ hwìɛ̀, ɓɛ́ wa ké kũ̀à ɓě ɓá Éézùɖùɛ̀-dyù ɓěɔ̀ dyíɛɛ wa bìì nyu ɖé ní jàɖàìn-gbòɔ̀ mú, nìí ɓɛ́ wa ké Éézùɖùɛ̀-dyù ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ nyu, ɓɛ́ wɛ́ nyìnììn dyíin ɖò ní kɔ̃̀ ɖà Éézùɖùɛ̀-dyù ɓěɔ̀ kpɔ̃, ɔ jǔ ké wa dyi ní jàɖàìn-gbò hwɛ̀ǐn-hwɛ̀ǐnɔ̀ bũ̌in xwɛ̃́ìn ní.”

²⁰ Ké Mózè kè Eɖóún kè Éézùɖùɛ̀-nyɔ̀ séín ɓěɔ̀ nyu ma Ɖíìváà-nyɔ̀ ɓěɔ̀ ɖɛ séín ɓě kɔ̃̀ jè ɓɛ́ Bounɓoɔ̀ cɛ̃ ma kà Mózè gbo ɓá wa jè dyíɛɛ bũ̌.

²¹ Ɖíìváà-nyɔ̀ ɓěɔ̀ hwɔ ma wa mìɔùn mú, ké wa wɔɔ̀ ma waà ɖɔ ɓěɔ̀. Ké Eɖóún zàìn ma wa Bounɓoɔ̀ xwáɖáún, ké wa mɔ̀ ma nyíí-ɖɛ̀ kpa ɖɛ ɖò ɓó Bounɓoɔ̀ bìì. Ké ɔ nyu ma waà nàmàǔn ɓěɔ̀ kɔ̃in-ɓáìn-ɖɛ̀, ké wa hwɛ̀ ma mú.

²² Ké sɔ̀ìn ɓóɛ gboɛɛ, Ɖíìváà-nyɔ̀ ɓěɔ̀ mu ma ɖé Bounɓoɔ̀ jàɖàìn-gbòɔ̀ mú, ɓɛ́ wa ké ma wa nììn kũ̀à ɓě nì ɖéɛɛ nyu. Wa nì ma Eɖóún kè ɔ dyú-gàà ɓěɔ̀ xwíɖíi. Kà Bounɓoɔ̀ nyu ma Mózè ɖɛ séín ɓěɔ̀ gbo cɛ̃ɛ ɓá Ɖíìváà-nyɔ̀ ɓěɔ̀ jè dyíɛɛ, kǎà Éézùɖùɛ̀-nyɔ̀ ɓěɔ̀ nyuɛ ma nyɛ̀nɛ̀ɛ̀.

²³ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

²⁴ “Ɖɛ ɓě ɓá Ɖíìváà-nyɔ̀ ɓěɔ̀ jè dyíɛɛ kɛà kɛ̀. Nyɔ ɓɛ́ ɔ nyuá zɔ̃ kpáɖá-nyɔ sè hm̀m̌ mɔɔ zi kɔ̃ɛɛ mɔ̀ nyɔ mɛ mu ɖé ní jàɖàìn-gbòɔ̀ mú kũ̀à nyu.

²⁵ Ké nyɔ ɓɛ́ ɔ nyuá zɔ̃ kpáɖá-nyɔ sɔ̃́ ɓaɖa-bùè mɔɔ zi kɔ̃ɛɛ, ɔ mɛ táà ní jàɖàìn-gbòɔ̀ mú kũ̀àɔ̀ dyi. Ɔ mɛ ɓɔ́ ɖé kũ̀à nyuɛ ɖe.

²⁶ Nyɔ nì náa ɓɛ́ìn ɔ mǔè Ɖíìváà-nyɔ̀ ɖò gbo kpáa ɓá kũ̀à ɓě nì ɖé jàɖàìn-gbòɔ̀ múɛɛ dyí, kɛɛ ɔ ɖòùn mɛ ɓɔ́ ɖé kũ̀à ɖò nyuɛ. Kǎà m̀ mɛ nyuɛ ɓá Ɖíìváà-nyɔ̀ ɓěɔ̀ kũ̀à nyí jè dyí.”