Nɔ̀ɓà 6 - Ɓǎsɔ́ɔ̀ Báɓòɔ̀

Gma ɓě ɓá Názìwàɖà-nyɔ̀ jè dyíɛ

¹ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo ɖe, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké gàa ɖò mɔɔ màa ɖò dyi wuɖu ɖi kà ɓɛ́ ɔ ké wáká kpá, ɓɛ́ ɔ ké Názìwàɖà-nyɔ̀ jǔ ɓó mɔ̄ Bounɓoɔ̀ bììɛɛ ní,

³ nìí, nyɔ nì náa mɛ ɓɔ́ wã́ìn mɔɔ náá-ɖɛ̀ kàmà-kàmà ɖò náa. Ɔ mɛ ɓɔ́ náá-ɖɛ̀ ɖò sɔ̀ géɖéè múɛɛ náa, mɔɔ ké ɔ mɛ ɓɔ́ géɖéè-ɓò ɓɛ́ wa kpã́ ɖieɛ mɔɔ géɖéè-ɓò dyɛ-dyɛ ɖò ɖiɛ.

⁴ Ɖé ɔ Názìwàɖà-nyɔ̀ jǔ-jǔɔ̀ múɛɛ, ɔ mɛ ɓɔ́ ɖɛ ɖò ɓɛ́ ɔ sɔ̀ géɖéè múɛɛ ɖiɛ fɔɔ cá, kɛbì ɔ mɛ mɔ̀ géɖéè-ɓòɔ̀ ku nìɛ̀ bũ̌in nyɛ, mɔɔ kɛbì ɔ mɛ mɔ̀ dyɔ́ nì ɖéɛ xwíníín nyɛ.

⁵ “Ké jɛ̃̌ ɖò mɛ ɓɔ́ ɔ dú muɛ fɔɔ cá, ɓɛ́ ti kɔ̃̀ wuɖu ɔ ɖǎà ɖi ké ɔ ɖǎà ɔ mìɔùn wáká po ɓó mɔ̄ Bounɓoɔ̀ bììɛɛ ké ɖé hwɛ̀ hwɛ̀. Ɔ ɓéɖé ɔ ké mú-hwɛ̀-nyɔ̀ jǔ ɓó ḿ bìì. Ɔ mɛ táà ɔ dú-mìɔ̀ dyi, ɓɛ́ ɔ ké tɔ̀mɔ̀.

⁶ Ti kɔ̃̀ xwíníín ɔ kpáà wáká ɓó ḿ bììɛɛ, ɔ mɛ ɓɔ́ xwɛ́ ɖò bũ̌in xwɛ̃́ìn fɔɔ cá.

⁷ Kɛbì ɔ mɛ mɔ̀ ɔ ɓǎà xwɛ́ mɔɔ ɔ ɖeɛ̀ xwɛ́ mɔɔ ɔ ɖíí-gàà ɖò mɔɔ ɔ ɖíí-màà ɖòɛ̀ xwɛ́ kɛɛ, ɔ mɛ ɓɔ́ ɔ mìɔùn se-mú-hwɛ̀-nyɔ̀ mú nyuɛ, sepóɛɖé ɔ wáká-kpá-kpá ɓó ḿ bììɔ̀ nì ɖé ɔ dú-mìɔ̀ mú.

⁸ Ɖé ɔ Názìwàɖà-nyɔ̀ jǔ-jǔɔ̀ múɛɛ, ɔ kpá wáká ɓó ḿ bìì.

⁹ “Ɔ jǔ ké nyɔ ɖò dyi ɓó ɔ dyéɖé waí mɛ́ìn ní, nìí, ɔ dú-mìɔ̀ se mú hwɛ̀ ɖe. Wé mɛ̀nɛ̌ìn-ɖò dyi ziín, ɔ mɛ kpana ɔ dú-mìɔ̀ ɓó wéɔ̀ mɛ̀nɛ̌ìn-sɔ̃́ nììn mɔ̀à nyɔ-mú-hwɔ-wèɔ̀ kɛɛ ɓaɖa.

¹⁰ Ɓó wéɔ̀ mɛ̀nɛ̌ìn-tã nììnɔ̀ ɓaɖa ní, ɔ mɛ dyà gbúɛ́ sɔ̃́ mɔɔ póo-póo sɔ̃́ sáa-zà-nyɔ̀ ɓěɔ̀ ɖò gbo ɓó jàɖàìn-gbò kɔ̃̀ mú ɓɛ́ ḿ kè ní nyɔ ɓěɔ̀ dyéàìn nyɛɛ wĩín.

¹¹ Ké sáa-zà-nyɔ̀ɔ̀ mɛ zàìn dyúáɖò sáa ɓɛ́ ɔ ké nàmàǔn-sàǎ-zàìn-ɖɛ̀ jǔ, ɓɛ́ ɖò ké fɔ̃ɔ-sàǎ-zàìn-ɖɛ̀ jǔ, ɓɛ́ ɔ ké kɔ̃in-ɓáìn-ɖɛ̀ nyu ɓó nyɔɔ̀ se-mú-hwɛ̀ɔ̀ jè, sepóɛɖé ɔ ɖǎ nàmàǔn nyu ɓó xwɛ́ pɛ̃́à ɓó ɔ dyúa dyiɛɛ jè. Ɔ ɖǎ ná nìǐn, nyɔɔ̀ mɛ nyuɛ ɓɛ́ ɔ dú-mìɔ̀ ké wáká kpá ɖe ɓó ḿ bìì, ɓó wé dyúáɖòɔ̀ xwíníín.

¹² Ɔ mɛ po ɔ mìɔùn wáká ɖe ɖie ɓó ḿ bìì, ɓá ɔ Názìwàɖà-nyɔ̀ jǔ-jǔɔ̀ jè dyí, ɓɛ́ ɔ ké ɓáɖáá ɓíɔ́ ɓɛ́ ɔ nyuá zɔ̃ dyúáɖòɛɛ dyà, ɓɛ́ ɔ ké kpa-pɛ́ɛ̀ìn-sàǎ-zàìn-ɖɛ̀ jǔ. Ɔ ɓéɖé ɔ ké wáká kpá ɖe ɖie ɓó ḿ bìì, sepóɛɖé ti kĩ́ín-kĩ́ínɔ̀ jè ɖǎ ɓó hwìǐ sɔ̀ìn dyììn ɖé xwɛ́ ɓɛ́ ɔ xwɛ̃́ìn kà bũ̌in, ɓɛ́ ɔ nyuà ké ɔ seà mú hwɛ̀ɛ jè.

¹³ “Gma ɓá Názìwàɖà-nyɔ̀ jǔ-jǔɔ̀ tiɔ̀ ɖé hwɛ̀ jè dyíɛɛ kɛà kɛ̀. Ɔ mɛ dyi ɓó ní jàɖàìn-gbòɔ̀ wĩín,

¹⁴ ɓɛ́ ɔ ké sáa-zàìn-ɖɛ̀ ɓěɛ̀ mɔ̄ Bounɓoɔ̀ gbo dyà. Wa mɛ mɔ̀ ɓáɖáá ɓíɔ́ ɖò ɓɛ́ ɔ nyuá zɔ̃ dyúáɖò, ɓɛ́ ɔ se kɛɛ ɖò ɓéɖéɛ, ɓɛ́ ɔ ké fɔ̃ɔ-sàǎ-zàìn-ɖɛ̀ jǔ, kè ɓáɖáá nyɔ́nɔ́ ɖò ɓɛ́ ɔ nyuá zɔ̃ dyúáɖò, ɓɛ́ ɔ se kɛɛ ɖò ɓéɖéɛ, ɓɛ́ ɔ ké nàmàǔn-sàǎ-zàìn-ɖɛ̀ jǔ, kè ɓáɖáá ɓíɔ́ ɖò ɖe, ɓɛ́ ɔ se kɛɛ ɖò ɓéɖéɛ, ɓɛ́ ɔ ké gbo-kpɔ̃ìn-sàǎ-zàìn-ɖɛ̀ jǔ,

¹⁵ ɔ kè bɛɖɛɛ̀ se dyáìn-ɖɛ̀ gbo nìɛɛ tìě-wè dyúáɖò. Bɛɖɛɛ̀ ɓěɔ̀ mɛ mɔ̀ fáɖáɓà nìɛ̀-nìɛ̀ ɓɛ́ wa caìn cáná kɛɛ nììn bɛɖɛɛ̀-kpò kuún-kuún ɖíɛ́ ɓě kè bɛɖɛɛ̀-kpò se mú ku ɖíɛ́ ɓě ɓɛ́ wa fièɛ̀ cáná bũ̌in nyɛ. Ké ɓó kɔ̃in ɖeɛɛ, ɔ mɛ dyà ɖii-ɖɛ̀-sàǎ-zàìn-ɖɛ̀ ɓě ɔ kè náá-ɖɛ̀-sàǎ-zàìn-ɖɛ̀ ɓě.

¹⁶ “Ɔ ɖǎ ná nìǐn, sáa-zà-nyɔ̀ɔ̀ mɛ nyí ɖɛ ɓěa mɔ̄ Bounɓoɔ̀, ɓɛ́ ɔ ké nàmàǔn-sàǎ-zàìn-ɖɛ̀ɔ̀ kè fɔ̃ɔ-sàǎ-zàìn-ɖɛ̀ɔ̀ nyu.

¹⁷ Nìí, ɔ mɛ ɖáɓá ɓáɖáá ɓíɔ́ tɔ̀ɔ̀, ɓɛ́ ɔ ké gbo-kpɔ̃ìn-sàǎ-zàìn-ɖɛ̀ jǔ ɖé ḿ gbo. Ké ɔ mɛ zàìn bɛɖɛɛ̀-se-dyáìn-ɖɛ̀-gbo-nìɔ̀ tìě-wèɔ̀ kè ɖii-ɖɛ̀-sàǎ-zàìn-ɖɛ̀ ɓěɔ̀ ɖò kè náá-ɖɛ̀-sàǎ-zàìn-ɖɛ̀ ɓěɔ̀ ɖò sáa ɖekè.

¹⁸ Ɔ ɖǎ ná nìǐn, Názìwàɖà-nyɔ̀ɔ̀ mɛ kpana ɔ dú-mì kpáà wákáa ɓó dyi ɓó ní jàɖàìn-gbòɔ̀ wĩín, ɓɛ́ ɔ kéɛ dyéɖé po ɓó nyɛ nìà wãuń ɓó gbo-kpɔ̃ìn-sàǎ-zàìn-ɖɛ̀ɔ̀ xwíɖíiɛɛ mú.

¹⁹ “Ti ɓɛ́ Názìwàɖà-nyɔ̀ɔ̀ ɖǎ ɔ míɔ̀ kpanaa ní, nìí, sáa-zà-nyɔ̀ɔ̀ mɛ ɖú ɓáɖáá ɓíɔ́ ɓɛ́ wa ɖǎ pĩɛɛ sɔ̃-wĩ̀à dyí, ké ɔ mɛ zà bɛɖɛɛ̀-se-dyáìn-ɖɛ̀-gbo-nìɔ̀ kpo se mú ku dyúáɖò kèɛ̀ kpo kuún-kuún dyúáɖò ɖé tìěɔ̀ mú, ɓɛ́ ɔ kéɛ Názìwàɖà-nyɔ̀ɔ̀ xwaún dè.

²⁰ Ɔ ɖǎ ná nìǐn, sáa-zà-nyɔ̀ɔ̀ mɛ vũà ɖɛ ɓěa dyi, ɓɛ́ ɔ ké nyíí-ɖɛ̀ kpa ɖɛ jǔ ɓó mɔ̄ Bounɓoɔ̀ bìì. Ɖɛ ɓěa mɔ̀ ɖɛ hwɛ̀ǐn-hwɛ̀ǐn, ké sáa-zà-nyɔ̀ɔ̀ mɔ̀ nyɔ kɔ̃̀ wa, dè gbo-kpɔ̃ìn-sàǎ-zàìn-ɖɛ̀ɔ̀ kɛ́ ɓɛ́ wa vũà dyiɛ kèɛ̀ pɔ̃́ ɓɛ́ wa tò sáa-zà-nyɔ̀ɔ̀ dyíɛɛ kɔ̃. Sɔ̀ìn ɓóɛ gboɛɛ, nìí, Názìwàɖà-nyɔ̀ɔ̀ ɓɛ́àǐn wã́ìn náa.

²¹ “Kǎà gma ɓá sáa-zàìn-ɖɛ̀ ɓě ɓɛ́ nyɔ ɓɛ́ ɔ mɔ̀ Názìwàɖà-nyɔ̀ kɛɛ ké nyuɛɛ jè dyíɛɛ nyu nìɛ̀. Kɛɛ ɔ jǔ ké nyɔɔ̀ dyi ḿ hwòɖǒ-wáɖáá-nyìǐ-ɖɛ̀ ɖò nyɛ́nɛ́ín ɖáìn ɖe ní, ɔ ɓéɖé ɔ kéɛ tò nyɛ̀nɛ̀ɛ̀.”

Sáa-zà-nyɔ̀ ɓěɔ̀ nyɔ-mana-kɔ̃-po-po

²² Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

²³ “Cɛ̃ɛ Eɖóún kè ɔ dyú-gàà ɓěɔ̀ gbo, ɓɛ́ m̀ ké níiń, ‘Kǎà ɓě mɛ nyu kà Éézùɖùɛ̀-dyù ɓěɔ̀ mana kɔ̃ poɛ. Ɓě mɛ cɛ̃ɛ wa gbo, ɓɛ́ ɓě ké níiń,

²⁴ “Bounɓoɔ̀ mɛ po ɓě mana kɔ̃, ké ɔ mɛ gmɔ̀ ɓě dyí.

²⁵ Bounɓoɔ̀ mɛ gmɔ̀ ɓě kɔ̃ ɖé ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ mú, ké ɔ mɛ dyé ɓě wìǐn.

²⁶ Bounɓoɔ̀ mɛ gmɔ̀ ɓě kɔ̃, ɓɛ́ ɔ kéɛ nyu ɓɛ́ ɓě ké gìɖìǐ mú cĩ́.” ’ ”

²⁷ Ké Bounɓoɔ̀ ɖá, “Wa dyi mana ké Éézùɖùɛ̀-dyù ɓěɔ̀ kɔ̃ dyiɛɛ zɔ̀ ɖé ní nyɛ́nɛ́ɔ̀ mú ní, ní mu wa mana kɔ̃ poùn.”