Nɔ̀ɓà 5 - Ɓǎsɔ́ɔ̀ Báɓòɔ̀

Nyɔ ɓě mɔ̀ se-mú-hwɛ̀-nyɔ̀ ɓěɛ

¹ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo ɖe, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké nyɔ kã̀ìn séín ɓě ɓɛ́ wa ɓéɖé caà-wɛ̀, mɔɔ ké wa ɓéɖé wɛ́ ɖò ké ɔ nyuɛ ké ní ɖò nì wa mú sɔ̀ǔn wɛ̃, mɔɔ ké nyɔ ɓě ɓɛ́ wa tìnììn xwɛ́ dyi ké waà xwɛ́-dyi-tìnììn-tìnììnɔ̀ nyuɛ ké wa se mú hwɛ̀ɛ wa mìɔùn hwìɛ̀ zà ɖé jàɖàìn-hwɔ̀ɖɔ̀ɔ̀ mú.

³ Wa mɛ zà gàa kè màa ɓɛ́ wa ɓéɖé wɛ́ nì ná ɓěa kɛɛ jàɖàìn-hwɔ̀ɖɔ̀ɔ̀ múin, ɓɛ́ wa ní kɔ̃̀ ɖà jàɖàìn-hwɔ̀ɖɔ̀ɔ̀ zɛ̀nɛ̌ po, sepóɛɖé ḿ cĩ́ ɖé ɓě hwìɛ̀ ɖé jàɖàìn-hwɔ̀ɖɔ̀ɔ̀ mú.”

⁴ Ké Éézùɖùɛ̀-nyɔ̀ ɓěɔ̀ nyuɛ ma náa. Wa zà ma nyɔ nì ná ɓěɔ̀ jàɖàìn-hwɔ̀ɖɔ̀ɔ̀ múin. Kà Bounɓoɔ̀ nyuɛ ma kà Mózè gbo cɛ̃ɛ kɛɛ, kǎà Éézùɖùɛ̀-nyɔ̀ ɓěɔ̀ nyuɛ ma.

Ɖɛ gbà dyí-sɛ́ɖɛ́ìn-sɛ́ɖɛ́ìn

⁵ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

⁶ “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá, ɔ jǔ ké gàa ɖò mɔɔ màa ɖò dyi mɔ̄ Bounɓoɔ̀ ɖɛ gbà bũ̌ nyu dyììn ɖé ɔ mǔè ɖòɛ̀ ɖɛ ɖò dyí-ɖú-ɖú mú ní, nìí, zaa kpɔ̃ nyɔɔ̀ ní,

⁷ ké ɔ mɛ wɔ̃́ìn ɖɛ gbà ɓɛ́ ɔ ɖǎà nyuɛɛ mú, ɓɛ́ ɔ ké ɖɛɔ̀ bɛ̃̌ǐn po. Ké ɔ mɛ poɛ wáká hm̀m̌ nììn ɓó kɔ̃in ɖe, ɓɛ́ ɔ kéɛ nyɔ ɔ nyuà ɖɛ gbàɔ̀ bũ̌ɛɛ nyí.

⁸ Kɛɛ ɔ jǔ ké nyɔ ɔ nyuà ɖɛ gbàɔ̀ bũ̌ɛɛ dyi mɛ́, ké ɔ se gbǒ-xwíníín-nyɔ̀ ɖò ɓíɖíi sè ɓɛ́ ɔ ké ɔ ɖɛ ɓěa nyí ní, nìí, ɔ mɛ nyíɛ ḿ ɓó sáa-zà-nyɔ̀ ɓěɔ̀ bìì. Ɓó kɔ̃in ɖeɛɛ, ɔ mɛ zàìn ɓáɖáá ɓíɔ́ ɖò sáa, ɓɛ́ ɔ ké ɔ nàmàǔnɔ̀ kɔ̃in-ɓáìn-ɖɛ̀ jǔ.

⁹ “Ké nyíí-ɖɛ̀ hwɛ̀ǐn-hwɛ̀ǐn séín ɓɛ́ Éézùɖùɛ̀-dyù ɓěɔ̀ mu mɔ̄ Bounɓoɔ̀ gbo dyàùn wɛ̃ɛ mɛ mɔ̀ sáa-zà-nyɔ̀ ɓɛ́ wa muà nyíí-ɖɛ̀ ɓěɔ̀ xwa nyíìn nyɛɛ kɔ̃̀ɔ̀-ɖɛ̀.

¹⁰ Nyíí-ɖɛ̀ hwɛ̀ǐn-hwɛ̀ǐn ɓě ɓɛ́ wa nyí sáa-zà-nyɔ̀ ɖò mɔ̀ùn wɛ̃ɛ, ɔ mɔ̀ nyɔ kɔ̃̀ɔ̀.”

Ɖɛ wa ké nyu ɓá gàa kɔ̃̀ hwòɖǒ gbǎ ɔ gmàà gboɛɛ jè dyíɛ

¹¹ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

^12-14 “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ti ɖòɛ̀ ɓaɖaín, màa ɖò po gmaɖe, ké ɔ se mú hwɛ̀, ké nyɔ ɖò seɛ ɔ nyuɛ dyé, ké ɔ vǐèɛ̀ ɔ dyú-ɓǎ dyí, ké ɔ dyú-ɓǎɔ̀ hwòɖǒ gbǎ ɔ gbo, ké ɔ kpá hwɛ̀nɛ̌ǐn. Mɔɔ ti ɖòɛ̀ ɓaɖaín, màaɔ̀ se gmaɖe po, kɛɛ ɔ dyú-ɓǎɔ̀ hwòɖǒ gbǎ ɔ gbo, ké ɔ kpá hwɛ̀nɛ̌ǐn.

¹⁵ Ɔ dyi ná nìǐn, gàaɔ̀ mɛ dyà ɔ gmààɔ̀ sáa-zà-nyɔ̀ ɓěɔ̀ ɖò gbo, ké ɔ mɛ dyà sáa-zàìn-ɖɛ̀ ɔ kɔ̃̀ ɔ ké dyà kɛ. Ɔ mɛ dyà báɖè-fàɖàɓà kópò-wè mɛ̀nɛ̌ìn-tã. Ɔ mɛ ɓɔ́ɔ cáná ɖò kɔ̃ púèɛ̀, ké ɔ mɛ ɓɔ́ɔ nyɔ́ún-nɔ̀mɔ̀-ɖɛ̀ ɖò kɔ̃ poɛ, sepóɛɖé ɔ mɔ̀ ɖii-ɖɛ̀-sàǎ-zàìn-ɖɛ̀ ɓá hwɛ̀nɛ̌ǐn kpá jè dyíɛ. Ɔ mɔ̀ ɖii-ɖɛ̀-sàǎ-zàìn-ɖɛ̀, ɓɛ́ ɔ kéɛ nyu ɓɛ́ wa kéɛ dyuò kɛbì màaɔ̀ nyu ɖɛɔ̀ ní, mɔɔ kɛbì ɔ seɛ nyu ní.

¹⁶ “Ɔ ɖǎ ná nìǐn, sáa-zà-nyɔ̀ɔ̀ mɛ dyà màaɔ̀, ɓɛ́ ɔ ké ɔ ɓó Bounɓoɔ̀ dyúa dyi nyànàìn.

¹⁷ Ké sáa-zà-nyɔ̀ɔ̀ mɛ po ní hwɛ̀ǐn-hwɛ̀ǐn ɖò mɛ-dyàà ɖò mú, ɓɛ́ ɔ ké púu-púu nì ɓó ní jàɖàìn-gbòɔ̀ mú ɓó ɓíɖíiɛɛ ɖò ɓó zà, ɓɛ́ ɔ kéɛ níɔ̀ gbo po.

¹⁸ Ɔ ɖǎ ná nìǐn, sáa-zà-nyɔ̀ɔ̀ mɛ buɛ̀ màa ɓɛ́ ɔ nyànàìn kà ɓó Bounɓoɔ̀ dyúa dyiɛɛ mí dúi, ɓɛ́ ɔ ké ɖii-ɖɛ̀-sàǎ-zàìn-ɖɛ̀ ɓá hwɛ̀nɛ̌ǐn kpá jè kè ɖɛɔ̀ dyí dyuò jè dyíɛɛ màaɔ̀ xwaún dè. Ké ní nɛɛ̀-nɛɛ̀ ɓɛ́ ɔ nìà ɖé mɛ-dyààɔ̀ múɛɛ mɛ nì sáa-zà-nyɔ̀ɔ̀ xwa. Ɔ mɔ̀ ní ɓɛ́ ɔ dyà nyɔ gboò-wùɖù kɔ̃ɛ.

¹⁹ Ké sáa-zà-nyɔ̀ɔ̀ mɛ cɛ̃ɛ màaɔ̀ gbo, ɓɛ́ ɔ ké níiń, ‘Màa wè, wɔ̃́ìn gboò-wùɖù nìà kɛ gbo. Ɔ jǔ ké ti m̀ nìà nì dyú-ɓǎɔ̀ wuɖu xwíɖíiɛɛ, gàa kà kò ɖò séè m̀ gbo pɛ̃́ ɖò, ɓɛ́ m̀ ké se-mú-hwɛ̀-nyɔ̀ jǔ ní, nìí, nì mu gboò-wùɖù ɓɛ́ ní nɛɛ̀-nɛɛ̀ nìà kɛ dyà nyɔ kɔ̃ɛɛ xwaún buɛ̀ìn.

²⁰ Kɛɛ ɔ jǔ ké m̀ ɖǎ hwìǐ sɔ̀ìn ti m̀ nìà nì dyú-ɓǎɔ̀ wuɖu xwíɖíiɛ, ké gàa kà kò ɖò ɓɛ́ ɔ se nì dyú-ɓǎ kɛɛ ɖǎ m̀ gbo pɛ̃́, ké m̀ se mú hwɛ̀ ní,

²¹ nìí, Bounɓoɔ̀ mɛ nyuɛ ɓɛ́ nì nyɛ́nɛ́ɔ̀ ké gboò-wùɖù jǔ ɖé nì nyɔ ɓěɔ̀ hwìɛ̀. Ɔ mɛ nyuɛ ɓɛ́ hwùɖù ké m̀ dyi jìɖǐìn, ɓɛ́ nì xwíɖí ké m̀ wɔ̃ dyá.

²² Ní nìà kɛ mɛ kpá nì xwíɖíɔ̀ mú, ɓɛ́ ɔ kéɛ nyu ɓɛ́ hwùɖù ké m̀ dyi jìɖǐìn, ɓɛ́ xwíɖíɔ̀ ké m̀ wɔ̃ dyá.’ “Màaɔ̀ mɛ zà ɖé wuɖu, ɓɛ́ ɔ ké níiń, ‘Ḿ wɔ̃́ ní. Bounɓoɔ̀ mɛ nyuɛ náa.’

²³ “Ɔ ɖǎ ná nìǐn, sáa-zà-nyɔ̀ɔ̀ mɛ céè gboò-wùɖù nìà kɛ céè-ɖɛ̀-mì ɖò kɔ̃, nìí ɓɛ́ ɔ kéɛ ɓóɛ dyi wɔɔ̀, ɓɛ́ ɔ kéɛ mɛ-dyàà kɔ̃̀ mú ɓɛ́ ní nɛɛ̀-nɛɛ̀ɔ̀ nìà kɛɛ po.

²⁴ Hwɛ̀ ɓɛ́ sáa-zà-nyɔ̀ɔ̀ kéɛ nyu ɓɛ́ màaɔ̀ ké ní nɛɛ̀-nɛɛ̀ ɓɛ́ìn kà ɔ xwíníín puàà kɛɛ náa,

²⁵ sáa-zà-nyɔ̀ɔ̀ mɛ kpɔ̃ ɖii-ɖɛ̀-sàǎ-zàìn-ɖɛ̀ ɓá hwɛ̀nɛ̌ǐn kpá jè dyíɔ̀ màaɔ̀ xwaún, ɓɛ́ ɔ kéɛ dyi vũà ɓó ḿ dyúa, nìí ɓɛ́ ɔ kéɛ ɓóɛ sáa-kɔ̃-zàìn-gbààɔ̀ kɔ̃ dyà.

²⁶ Sɔ̀ìn ɓóɛ gboɛɛ, nìí, ɔ mɛ zà ɖé ɖii-ɖɛ̀-sàǎ-zàìn-ɖɛ̀ɔ̀ xwa-wè ɖò, ɓɛ́ ɔ kéɛ ɓóɛ sáa-kɔ̃-zàìn-gbààɔ̀ kɔ̃ fɔ̃̀ìn. Ɖɛ nìà kɛ muɛ nyɔǔn dyí tɛ̀mɛ̀ìn kà gàaɔ̀ ɖǎa séín mɔ̄ mɔ̀à Bounɓoɔ̀ kɛɛ nyíɛ. Ɔ ɖǎ ná nìǐn, nìí, ɔ mɛ nyuɛ ɓɛ́ màaɔ̀ ké níɔ̀ ná.

²⁷ Ɔ jǔ ké màaɔ̀ dyi gmaɖe po, ké ɔ se mú hwɛ̀ ní, nìí, ní nɛɛ̀-nɛɛ̀ɔ̀ muɛ nyuùn ɓɛ́ màaɔ̀ xwíɖíɔ̀ mú ké puà mìɔ, ké ɔ xwíɖíɔ̀ mu ɔ wɔ̃ dyáùn, ké hwùɖù mu ɔ dyi jìɖǐìn. Ké ɔ nyɛ́nɛ́ɔ̀ mu gboò-wùɖù jǔùn ɖé ɔ nyɔ ɓěɔ̀ hwìɛ̀.

²⁸ Kɛɛ ɔ jǔ ké ɔ se ɖɛɔ̀ nyu, ké ɔ dyi mú hwɛ̀ ní, nìí, ɖɛ gbà ɖò se ɔ gbo kpáa mu, ké ɔ mu dyú wóɖóɛ̀n ɓɛ́ìn.

^29-30 “Ɖɛ nìà kɛ mɔ̀ ɖɛ wa mɛ nyu ɔ jǔ ké ti màa ɖò nì ɔ dyú-ɓǎà wuɖu xwíɖíiɛɛ, ɔ dyi gmaɖe po, ké ɔ se mú hwɛ̀, ké ɔ dyú-ɓǎɔ̀ hwòɖǒ dyi ɔ gbo gbǎ, ké ɔ dyi hwɛ̀nɛ̌ǐn kpá níɛ, mɔɔ ɔ jǔ ké màaɔ̀ se gmaɖe po, ké ɔ dyú-ɓǎɔ̀ hwòɖǒ dyi ɔ gbo gbǎ, ké ɔ dyi hwɛ̀nɛ̌ǐn kpá níɛ. Gàaɔ̀ mɛ dyà ɔ gmààɔ̀ ɓó ḿ dyúa, ké sáa-zà-nyɔ̀ɔ̀ mɛ nyu ɖɛ séín kɔ̃̀ jè gmaɔ̀ cɛ̃à kɛɛ màaɔ̀ bũ̌.

³¹ Zaa se gàaɔ̀ kpɔ̃ɔ́ mu ɓá ɖɛ nìà kɛ jè dyí, kɛɛ màaɔ̀ mu ɔ mìɔùn nììn ɖɛ gbà ɔ nyuɛɛ kpa dyí ɖúùn.”