Nɔ̀ɓà 36 - Ɓǎsɔ́ɔ̀ Báɓòɔ̀

Ɖɛ ɓá màa ɓɛ́ ɔ kpɔ̃ dyú-ɓǎ dyiɛɛ nììn dúí-sè-ɖɛ̀ɔ̀ jè dyíɛ

¹ Wé ɖòɛ̀ ɓaɖaa, Gíɖèà nììn xwíníín-dyù ɓěɔ̀ gbǒ-xwíníín ɖò-ɖò wuɖuí-kɔ̃̀-nyɔ̀ ɓěɔ̀ dyi ma Mózè kè Éézùɖùɛ̀-nyɔ̀ ɓěɔ̀ gbǒ-xwíníín ɖò-ɖò ɓěɔ̀ wuɖuí-kɔ̃̀-nyɔ̀ ɓěɔ̀ gbo. Gíɖèà ɓǎ ɓěɛ̀ gbǒ-xwíníínɔ̀ kɛà kɛ̀. Jòséɛ̀ dyú-gàà mɔ̀à Mànásì kɛɛ wóɖóìn ma Mákì, hwɛ̀ ké Mákì wóɖóìn ma kà Gíɖèà kɛ̀.

² Wa cɛ̃ɛ ma Mózè gbo, ké wa ɖá, “Ɓɔ̌ɔ̀, Bounɓoɔ̀ cɛ̃ɛ ma m̀ gbo, ɓɛ́ m̀ ké ma ɓóɖóɔ̀ à mɔ̀à Éézùɖùɛ̀-nyɔ̀ ɓěɛ̀ kɛɛ múin geìn dyììn ɖé gbo-ɖàɓàìn-ɖɛ̀ mú, nìí ɓɛ́ ɔ ké à dúí-sè-ɖɛ̀ jǔ. Ké Bounɓoɔ̀ cɛ̃ɛ ma m̀ gbo ɖekè, ɓɛ́ m̀ ké à ɖíí-gàà mɔ̀à Zɛ̀ɖàfɛ́hà kɛɛ nììn dúí-sè-ɖɛ̀ɔ̀ ɔ dyú-màà ɓěɔ̀ nyí.

³ Kɛɛ ɔ jǔ ké wa dyi gàa sɔ̀ Éézùɖùɛ̀ɛ̀ xwéɖé-dù kà kò ɖò múɛɛ ɖò dyi kpɔ̃ ní, nìí, wa nììn dúí-sè-ɖɛ̀ɔ̀ mu à ɓǎ ɓě nììn dúí-sè-ɖɛ̀ɔ̀ hwìɛ̀ sɔ̀ùn, ɓɛ́ ɔ ké xwéɖé-dù kɔ̃̀ mú ɓɛ́ wa kpɔ̃à dyú-ɓǎ dyiɛɛ kpá. Ɔ ɖǎ ná nìǐn, à seɛ kɔ̃̀ ɖe.

⁴ Ké ti ɓɛ́ Éézùɖùɛ̀-nyɔ̀ ɓěɔ̀ ɖɛ-séín-ɖe-tò-zɔ̃̀ɔ̀ mu dyiìn nyɛɛ, nìí, wa nììn dúí-sè-ɖɛ̀ɔ̀ muá xwéɖé-dù kɔ̃̀ mú ɓɛ́ wa kpɔ̃à dyú-ɓǎ dyiɛɛ kpáùn gàná cá, ké ɔ se à nììn ɓǎ ɓěɛ̀ xwéɖé-dùɔ̀ mú nìɛ̌ mu ɖe.”

⁵ Ké Mózè nyìnììn ma Éézùɖùɛ̀-nyɔ̀ ɓěɔ̀ wuɖu ɓɛ́ Bounɓoɔ̀ cɛ̃ ma ɔ gboɛɛ wa dyí, ké ɔ ɖá, “Ɖɛ ɓɛ́ Jòséɛ̀ dyú-gàà ɓěɔ̀ nììn xwéɖé-dùɔ̀ cɛ̃à kɛɛ mɔ̀ jǎà.

⁶ Ɔ ná nì jèɛɛ, ɖɛ Bounɓoɔ̀ cɛ̃ ɓá Zɛ̀ɖàfɛ́hàà dyú-màà ɓěɔ̀ jè dyíɛɛ kɛà kɛ̀. Ɔ ɖá, ‘Zɛ̀ɖàfɛ́hàà dyú-màà ɓěɔ̀ mɛ kpɔ̃ nyɔ waà hwòɖǒ mɔ́ dyi kpɔ̃ɔ dyiɛɛ dyi. Kɛɛ ɔ ɓéɖé ɓɛ́ ɔ ké nyɔ sɔ̀ ɖé waà ɓǎ nììn xwéɖé-dùɔ̀ múɛɛ jǔ.

⁷ Éézùɖùɛ̀-dyù ɓěɔ̀ dúí-sè-ɖɛ̀ɔ̀ mɛ ɓɔ́ xwéɖé-dù ɖò mú sɔ̀ɔ̀, ɓɛ́ ɔ ké xwéɖé-dù kà kò ɖò mú kpá. Éézùɖùɛ̀-dyù ɖò-ɖò séín ɓéɖé ɓɛ́ ɔ ké dúí-sè-ɖɛ̀ nì ɖé ɔ ɓǎ nììn xwéɖé-dùɔ̀ múɛɛ gbo dyi kpɔ̃ kóɖó-kóɖó.

⁸ Ké màa séín ɓɛ́ wa sè wa ɓǎ dúí ɖé Éézùɖùɛ̀ɛ̀ xwéɖé-dù ɖò múɛɛ ɓéɖé ɓɛ́ ɔ ké gàa ɖò ɓɛ́ ɔ sɔ̀ ɖé ɔ ɓǎà xwéɖé-dùɔ̀ múɛɛ dyi kpɔ̃, nìí ɓɛ́ Éézùɖùɛ̀-dyù ɖò-ɖò séín nììn dúí-sè-ɖɛ̀ɔ̀ ké ɖé ɔ ɓǎà gbǒ-xwíníínɔ̀ mú sè.

⁹ Dúí-sè-ɖɛ̀ ɖò mɛ ɓɔ́ xwéɖé-dù ɖò mú sɔ̀ɔ̀, ɓɛ́ ɔ ké ɖò mú kpá. Éézùɖùɛ̀ɛ̀ xwéɖé-dù ɖò-ɖò séín mɛ kpɔ̃ ɓó ɔ nììn dúí-sè-ɖɛ̀ gbo dyi kóɖó-kóɖó.’ ”

¹⁰ Ké Zɛ̀ɖàfɛ́hàà dyú-màà ɓěɔ̀ nyuɛ ma kà Bounɓoɔ̀ nyuɛ ma kà Mózè gbo cɛ̃ɛ kɛ.

¹¹ Máhàɖà kè Tízà kè Hágàɖà kè Míókà ɔ kè Nóà ɓɛ́ wa mɔ̀à Zɛ̀ɖàfɛ́hàà dyú-màà ɓěɔ̀ kɛɛ kpɔ̃ ma gàa-dyù ɓě mɔ̀ wa ɓǎà ɖíí-gàà ɓěɛ̀ dyú ɓěɛɛ dyi.

¹² Wa kpɔ̃ ma gàa-dyù ɓě ɓɛ́ wa sɔ̀ ɖé Mànásì mɔ̀à Jòséɛ̀ dyú-gààɔ̀ kɛɛ nììn xwéɖé-dùɔ̀ múɛɛ dyi, ké wa nììn dúí-sè-ɖɛ̀ɔ̀ se ɖé wa ɓǎà xwéɖé-dùɔ̀ mú sɔ̀.

¹³ Kǎà gma ɓě Bounɓoɔ̀ nyí ma Éézùɖùɛ̀-nyɔ̀ ɓěɔ̀ ɖé Móà-ɓòɖòɔ̀ bɔɔ-kpàɔ̀ kɔ̃ ɖé Jɔ́nì-nìɔ̀ wĩín ɖé Jɛ́ɖèkóò-hwɔ̀ɖɔ̀ɔ̀ gbɔ kɛɛ jè nyu nìɛ̀. Ɔ tòìn ma gma ɓěɔ̀ Mózè mú.