Nɔ̀ɓà 35 - Ɓǎsɔ́ɔ̀ Báɓòɔ̀

Hwɔɖɔ ɓě ɓɛ́ wa nyí Ɖíìváà-nyɔ̀ ɓěɔ̀ kɛ

¹ Sɔ̀ìn ɓóɛ gboɛɛ, Bounɓoɔ̀ cɛ̃ɛ ma Mózè gbo ɖé Móà-ɓòɖòɔ̀ bɔɔ-kpàɔ̀ kɔ̃, ɖé Jɔ́nì-nìɔ̀ wĩín, ɖé Jɛ́ɖèkóò-hwɔ̀ɖɔ̀ɔ̀ gbɔ, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo, ɓɛ́ wa ké Ɖíìváà-nyɔ̀ ɓěɔ̀ hwɔɖɔ ɓě wa ké mú cĩ́ɛɛ nyí sɔ̀ìn ɖé ɓóɖó wa muà kɔ̃̀ùn ɓɛ́ ɔ kéà waà dúí-sè-ɖɛ̀ jǔɛɛ kɔ̃. Ké wa mɛ nyí Ɖíìváà-nyɔ̀ ɓěɔ̀ pá ɓě ɓó waà hwɔɖɔ ɓěɔ̀ ɖei, ɓɛ́ wa ké waà nyúà-ɖɛ̀ ɓěɔ̀ dyi-ɖi-naín jǔ.

³ Hwɔɖɔ ɓěɔ̀ mú, ɖéɛ̀ Ɖíìváà-nyɔ̀ ɓěɔ̀ mu cĩ́ìn, ké pá ɓě nìà hwɔɖɔ ɓěɔ̀ ɖeiɛɛ mu waà ɓìɖǐ ɓěɔ̀ kè waà nyúà-ɖɛ̀ tɔ̀ɔ̀ ɓěɔ̀ dyi-ɖi-naín jǔùn.

⁴ Pá muà Ɖíìváà-nyɔ̀ ɓěɔ̀ hwɔɖɔ ɓěɔ̀ ɖò-ɖò ɖei nììn nyɛɛ mɛ mɔ̀ ɓáɖáa hɔ̃dɛ̀ɖɛ̀ sɔ̃́ kè kpáɖá-nyɔ sɔ̃́ ɓaɖa-bùè sɔ̀ìn ɓó gmɔɔ̀ dyéɖéín, ɖé wáká séín kɔ̃.

⁵ Wa ɖàɓàìn ɓáɖáa hɔ̃dɛ̀ɖɛ̀ hm̀m̌ ɓó hwɔɖɔ ɓěɔ̀ ɖò-ɖò ɖei. Ɓáɖáa hɔ̃dɛ̀ɖɛ̀ hm̀m̌ɔ̀ mɛ nì hwɔɖɔ ɓěɔ̀ dyóɖó-xwáɖáún-wóɖóìn-naínɔ̀ kè waà zɔ̃̌in-wàkáɔ̀ kè waà dyóɖó-dyi-kpáìn-naínɔ̀ ɔ kè waà xwía-wàkáɔ̀ kɔ̃, ɓɛ́ hwɔɖɔ ɓěɔ̀ ɖò-ɖò ké ɓó hwòɖǒǔn nì. Pá nìà kɛ mɛ mɔ̀ pá ɓó Ɖíìváà-nyɔ̀ ɓěɔ̀ nyúà-ɖɛ̀ ɓěɔ̀ dyi-ɖi-naín jè.

⁶ Wa mɛ nyí Ɖíìváà-nyɔ̀ ɓěɔ̀ hwɔɖɔ mɛ̀nɛ̌ìn-ɖò, ɓɛ́ ɖé ké nyɔ mɔ̀ nyɔ ɓɛ́ ɔ mu kú ɖáɓáùn seó-ɖei-dyé-kà kɛɛ mú-vǐè-hwɔ̀ɖɔ̀ jǔ. Ké ɓó kɔ̃in ɖeɛɛ, wa mɛ nyí wa hwɔɖɔ kpáɖá-nyɔ sɔ̃́ sè sɔ̃́ ɖò ɖe.

⁷ Hwɔɖɔ séín ɓě ɓɛ́ wa muà Ɖíìváà-nyɔ̀ ɓěɔ̀ nyíìn nyɛɛ poìn dyí mɔ̀ hwɔɖɔ kpáɖá-nyɔ sɔ̃́ sè mɛ̀nɛ̌ìn-tã. Ké wa ɖò-ɖò séín mɛ ɓéɖé nyúà-ɖɛ̀ dyi-ɖi-naín ɓóɛ ɖei.

⁸ Ké ɓá hwɔɖɔ ɓě ɓɛ́ wa muà Ɖíìváà-nyɔ̀ ɓěɔ̀ nyíìn nyɛɛ jè dyíɛɛ, xwéɖé-dùɔ̀ nyɔ ɓúá dyí ké ɔ dyé pá vɛ̀nɛ̀ ɓɛ́ ɔ ké ɔ dúí-sè-ɖɛ̀ jǔɛɛ hwìɛ̀, wa mɛ zà ɖé hwɔɖɔ kúɖúú, ké xwéɖé-dùɔ̀ nyɔ ɓíè dyí ké ɔ se pá vɛ̀nɛ̀ dyéɛɛ hwìɛ̀, wa mɛ ɓɔ́ ɖé hwɔɖɔ kúɖúú zàà. Kà xwéɖé-dùɔ̀ nyu ɓɛ́ɛ kɛɛ, kǎà hwɔɖɔ wa mu ɖé wa hwìɛ̀ gãùn wɛ̃ɛ mɛ nyu jĩ̀ɛ̀, ɓɛ́ wa kéɛ Ɖíìváà-nyɔ̀ ɓěɔ̀ nyí.”

Mú-vǐè-hwɔ̀ɖɔ̀ ɓě

⁹ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

¹⁰ “Cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ti ɓɛ́ wa mu Jɔ́nì-nìɔ̀ péɖéìn, ɓɛ́ wa ké ɖé Kénà-ɓòɖòɔ̀ kɔ̃ muɛɛ,

¹¹ nìí, wa mɛ gã ɖé hwɔɖɔ ɓě, ɓɛ́ wa ké mú-vǐè-hwɔ̀ɖɔ̀ ɓě jǔ ɓó wa bìì, ɓɛ́ ɔ jǔ ké nyɔ ɖò seó ɖei dyé, ké ɔ dyi kú ɖáɓá ní, nìí, ɔ ké ɖé pèɖèìn.

¹² Hwɔɖɔ ɓěɔ̀ mɛ mɔ̀ mú-vǐè-hwɔ̀ɖɔ̀ ɓó nyɔ ɓě ɖáɓá kúɛɛ bìì sɔ̀ìn ɖé nyɔ ɓě mɔ̀ nyɔ mɔ́ nyɔ ɓě ɖǎà mɛ́ɛ kpa zàà dyiɛɛ xwaún, ɓɛ́ nyɔ mɔ̀ nyɔ ɖáɓá kú seó-ɖei-dyé-kàa ní kɔ̃̀ ɖà mɛ́, kɛɛ ɓɛ́ zaa-wɔ̃-po-nyɔ̀ ɓěɔ̀ ké ɔ zaaɔ̀ wɔ̃ po.

¹³ Éézùɖùɛ̀-dyù ɓěɔ̀ mɛ gã hwɔɖɔ mɛ̀nɛ̌ìn-ɖò, ɓɛ́ wa ké waà mú-vǐè-hwɔ̀ɖɔ̀ ɓě jǔ.

¹⁴ Hwɔɖɔ ɓěɔ̀ tã mɛ nì nɔ̄ Jɔ́nì-nìɔ̀ ɖeín, ɓɛ́ tã ké ɖé Kénà-ɓòɖòɔ̀ kɔ̃ nì, ɓɛ́ wa ké mú-vǐè-hwɔ̀ɖɔ̀ ɓě jǔ.

¹⁵ Hwɔɖɔ mɛ̀nɛ̌ìn-ɖò ɓěɔ̀ mɛ mɔ̀ vǐè-naín ɓó Éézùɖùɛ̀-dyù ɓěɔ̀ kè ɖíà ɓě mu wa hwìɛ̀ cĩ́ìn nyɛɛ bìì, nìí ɓɛ́ nyɔ mɔ̀ nyɔ seó ɖei dyé, ké ɔ mu nyɔ ɖò ɖáɓáùn wɛ̃ɛ ké peɖeɛ kpa, ɓɛ́ ɔ ké ɖé pèɖèìn.

¹⁶ “Kɛɛ ɔ jǔ ké nyɔ ɖò dyi ɔ mǔè ɖò nɛɛ̀-kpà ɖò dya po, ké ɔ dyi mɛ́ ní, nìí, nyɔɔ̀ ɖáɓá kú gmɔ̀ǐn-gmɔ̀-kà, ké wa ɓéɖé ɓɛ́ wa ké kú-ɖáɓá-nyɔ̀ɔ̀ mɔ̀ùn ɖáɓá ɖekè.

¹⁷ Mɔɔ ɔ jǔ ké nyɔ ɖò dyi ɔ mǔè ɖò sɔ́ɔ́-kpò nì ɔ xwaún wɛ̃ɛ taɓa, ké ɔ dyi mɛ́ín, nìí, nyɔɔ̀ ɖáɓá kú gmɔ̀ǐn-gmɔ̀-kà, ké kú-ɖáɓá-nyɔ̀ɔ̀ ɓéɖé ɔ ké mɛ́.

¹⁸ Mɔɔ ɔ jǔ ké nyɔ ɖò dyi ɔ mǔè ɖò cu-kpóɖó nì ɔ xwa kɛɛ nàmàìn, ké ɔ dyi mɛ́ín, nìí, nyɔɔ̀ ɖáɓá kú gmɔ̀ǐn-gmɔ̀-kà, ké kú-ɖáɓá-nyɔ̀ɔ̀ ɓéɖé ɔ ké mɛ́.

¹⁹ Nyɔ ɓɛ́ ɔ mɔ̀à nyɔ mɛ́à kɛɛ nyɔmɔɔ̀ kpa-zà-nyɔ̀ɛɛ mìɔùn mɛ ɖáɓá kú-ɖáɓá-nyɔ̀ɔ̀. Dɛ̀ séín ɔ kèɔ̀ kè mu gmɔ̌ìn nyɛɛ, ɔ mɛ ɖáɓá ɔ.

²⁰ “Ɔ jǔ ké nyɔ ɖò dyi ɔ mǔè ɖòɛ̀ hwòɖǒ gbà ɓéɖé jè, ké ɔ dyi ɔ mǔèɔ̀ ɓíɖíi dyi po, ké ɔ dyi mɛ́ ní, mɔɔ ké ɔ dyi pìǐn kò, ké ɔ dyi ɔ mǔèɔ̀ ɖɛ ɖò dya po, ké ɔ dyi mɛ́ ní,

²¹ mɔɔ ké ɔ dyi ɔ mǔèɔ̀ ɓɔ̀táà dyí ɖáɓáín, nìí, nyɔɔ̀ ɖáɓá kú gmɔ̀ǐn-gmɔ̀-kà, ké kú-ɖáɓá-nyɔ̀ɔ̀ ɓéɖé ɔ ké mɛ́. Nyɔ ɓɛ́ ɔ mɔ̀à nyɔ mɛ́à kɛɛ nyɔmɔɔ̀ kpa-zà-nyɔ̀ɛɛ mɛ ɖáɓá ɔ, ti ɔ kè ɔ mu gmɔ̌ìn nyɛ.

²² “Kɛɛ ɔ jǔ ké nyɔ ɖò dyi ɔ mǔè ɖò ɖáɓá seó-ɖei-dyé-kà, ké ɔ mǔèɔ̀ hwòɖǒ gbà ɖò se ɔ xwíníín nì kĩ́ín ní, kɛbì ɔ mɛ ɖáɓá nyɔɔ̀ dyììn ɖé ɔ ɓíɖíi dyi po-po mú, mɔɔ dyììn ɖé ɔ ɖɛ ɖò dya po-po mú,

²³ mɔɔ ké ɔ se ɔ mǔèɔ̀ dyé, ké ɔ dyi ɔ mǔèɔ̀ sɔ́ɔ́-kpò ɖò dya po seó-ɖei-dyé-kà, ké ɔ dyi mɛ́ín,

²⁴ nìí, zaa-wɔ̃-po-nyɔ̀ ɓěɔ̀ mɛ po zaa nìà ɓó nyɔ ɖáɓáà kúɔ̀ seó-ɖei-dyé-kà kɛ kè nyɔ ɓɛ́ ɔ mɔ̀à nyɔ mɛ́à kɛɛ nyɔmɔɔ̀ kpa-zà-nyɔ̀ɛɛ pṹa kɛɛ wɔ̃. Gma ɓě wa ké zaaɔ̀ wɔ̃ pòìn nyɛɛ kɛà kɛ̀.

²⁵ Zaa-wɔ̃-po-nyɔ̀ ɓěɔ̀ mɛ póìn nyɔ ɖáɓáà kúɔ̀ seó-ɖei-dyé-kà kɛɛ sɔ̀ìn ɖé nyɔ mɛ́à kɛɛ nyɔmɔɔ̀ kpa-zà-nyɔ̀ɔ̀ xwaún, ɓɛ́ wa ké ɔ ɖé ɔ nììn mú-vǐè-hwɔ̀ɖɔ̀ kɔ̃̀ mú ɔ pèɖèìn kà kɛɛ kpa ɖe. Ké ɔ mɛ gã̀ ɖé hwɔɖɔɔ̀ mú dyi tee, ɓɛ́ sáa-zà-nyɔ̀ vɛ̀nɛ̀ kɔ̃̀ kũ̀à-tìǐn ɔ ɖáɓáà kúɔ̀ kɛɛ ké mɛ́ hwɛ̀.

²⁶ Kɛɛ ɔ jǔ ké nyɔ ɓɛ́ ɔ ɖáɓáà kúɔ̀ seó-ɖei-dyé-kà kɛɛ dyi hwɔɖɔ kɔ̃̀ mú ɔ pèɖèìn kà kɛɛ sɔ̀, ké ɔ dyi píé sí ní,

²⁷ ké nyɔ mɛ́à kɛɛ nyɔmɔɔ̀ kpa-zà-nyɔ̀ɔ̀ dyi ɖé ɔ dyi dyɛ̀ìn, ké ɔ dyi ɔ ɖáɓá ní, nìí, nyɔmɔɔ̀ kpa-zà-nyɔ̀ɔ̀ seɛ kpa dyí ɖúɛ mu.

²⁸ Nyɔ ɓɛ́ ɔ ɖáɓáà kúɔ̀ seó-ɖei-dyé-kà kɛɛ ɓéɖé ɓɛ́ ɔ ké ɔ mú-vǐè-hwɔ̀ɖɔ̀ɔ̀ mú dyi gã̀ tee ɓɛ́ sáa-zà-nyɔ̀ vɛ̀nɛ̀ɔ̀ ké mɛ́ hwɛ̀. Sɔ̀ìn ɓóɛ gboɛɛ, nìí, ɔ ɓɛ́ìn pá ɔ kɔ̃̀à kɛɛ kɔ̃ muɛ ɖe.

²⁹ Gma ɓěa mɔ̀ gma ɓó Éézùɖùɛ̀-dyù ɓěɔ̀ kè waà xwéɖé-dù deìn dúún ɓěɔ̀ bìì, dɛ̀ séín wa mu cĩ́ìn nyɛ.

³⁰ “Ɔ jǔ ké nyɔ ɖò dyi kú ɖáɓá ní, kú-ɖáɓá-nyɔ̀ɔ̀ ɓéɖé ɔ ké mɛ́ dyììn ɖé zàse-nyɔ̀ ɓěɛ̀ wuɖu mú. Kɛɛ nyɔ ɖò mɛ ɓɔ́ mɛ́ɛ dyììn ɖé zàse-nyɔ̀ dyúáɖòɛ̀ wuɖu mú.

³¹ Ké ɓó kɔ̃in ɖeɛɛ, wa ní ɖá ɓɛ́ wa ké wíɖí ɖò dyi kpɔ̃, ɓɛ́ ɔ ké kú-ɖáɓá-nyɔ̀ ɖòɛ̀ gbǎà-wìɖì jǔ. Kú-ɖáɓá-nyɔ̀ɔ̀ mɔ̀ nyɔ ɓɛ́ zaa ɖǎ dúún wáɖá, ké ɔ ɓéɖé ɔ ké mɛ́ɛ. Wa ɓéɖé ɓɛ́ wa ké ɔ ɖáɓá wɛ̃́ɛ́ pū.

³² Ké wa ní ɖá ɓɛ́ wa ké gbǎà-wìɖì ɖò dyi kpɔ̃ ɓó nyɔ mɔ̀ nyɔ ɓɛ́ ɔ nìà ɖé mú-vǐè-hwɔ̀ɖɔ̀ɔ̀ múɛɛ jè, nìí ɓɛ́ ɔ ké ɔ ɓíɖí-hwɔ̀ɖɔ̀ɔ̀ mú ɖe mu ti ɓɛ́ sáa-zà-nyɔ̀ vɛ̀nɛ̀ɔ̀ nì toɖo kɔ̃ keɛ.

³³ Wa ní ɖá ɓɛ́ wa ké ɓóɖó kɔ̃̀ kɔ̃ wa nìà cĩ́ɛń muɛń nyɛɛ zɛ̀nɛ̌ po dyììn ɖé ɖɛ nì náa nyu-nyu mú, sepóɛɖé nyɔmɔɔ-dyi-wáɖáìn-wáɖáìn po ɓóɖóɔ̀ zɛ̀nɛ̌, ké ɖɛ kà kò ɖò se nì ɓɛ́ nyɔ ké nyu, ɓɛ́ ɓóɖóɔ̀ ké mú hwɛ̀ ɖe ɓá nyɔmɔɔ ɖǎà ɖé dyi wáɖáìn nyɛɛ jè dyí, ɔ sèìn nyɔ ɓɛ́ ɔ wáɖáìn kà nyɔmɔɔ̀ dyiɛɛ nììn nyɔmɔɔ ké dyi wáɖáìn.

³⁴ Éézùɖùɛ̀-dyù ɓěɔ̀ ní ɖá ɓɛ́ wa ké ɓóɖó kɔ̃̀ kɔ̃ ɓɛ́ ḿ kè wa muà cĩ́ìn nyɛɛ zɛ̀nɛ̌ po, sepóɛɖé mɔ̄ Bounɓoɔ̀ cĩ́ ɖé wa hwìɛ̀.”