Nɔ̀ɓà 34 - Ɓǎsɔ́ɔ̀ Báɓòɔ̀

Ɖɛ ɓá ɓóɖóɔ̀ bã̀à ɓě jè dyíɛ

¹ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

² “Cɛ̃ɛ Éézùɖùɛ̀-dyù ɓěɔ̀ gbo kà ti ɓɛ́ wa mu Kénà-ɓòɖò ɓɛ́ ḿ nìà wa nyíɛń ɓɛ́ ɔ kéà waà kɔ̃̀ɔ̀-ɖɛ̀ jǔ kánáá pūɛɛ kɔ̃ nyiniìn nyɛɛ, dɛ̀ ɓɛ́ ɓóɖóɔ̀ mu dyi kpɔ̃̀ìn nyɛɛ kɛà kɛ̀.

³ Waà ɓóɖóɔ̀ zɔ̃̌in-wàkáɔ̀ bã̀àɔ̀ mu Zĩ́ìn Gbǎùn-fúɖúáɔ̀ kè Íɖɔ̀ùn-ɓòɖòɔ̀ dyi kpɔ̃̀ìn. Ɔ zɔ̃̌in-wàkáɔ̀ bã̀àɔ̀ mu Tɔ̃́ Dòùnɓìǎɔ̀ zɔ̃̌in gbɔ dèìn, hwɔ ɖé dyóɖó-xwáɖáún-wóɖóìn-naínɔ̀ dyí.

⁴ Sɔ̀ìn ɓó Tɔ̃́ Dòùnɓìǎɔ̀ gboɛɛ, bã̀àɔ̀ mu ɓíɖíi muùn tee, ɓɛ́ ɔ ké ɖé Àkáɖáɓììn-tòɖò ɓěɔ̀ gbo zĩ̀ìn, ɓɛ́ ɔ ké ɖé Zĩ́ìn Gbǎùn-fúɖúáɔ̀ kɔ̃ mùìn. Sɔ̀ìn ɓóɛɛ, ɔ mu ɖé Káɖɛ̀-Bànéà-hwɔ̀ɖɔ̀ɔ̀ ɓíɖíi zĩ̀ìn, ɓɛ́ ɔ ké ɖé Házà-Áɖɔ̀-hwɔ̀ɖɔ̀ɔ̀ mú mùìn, ɓɛ́ ɔ ké ɖé Ázìmɔ̀-hwɔ̀ɖɔ̀ɔ̀ mú zĩ̀ìn.

⁵ Sɔ̀ìn ɓóɛɛ, ɔ mu ní nìà ɖé Íjè-ɓòɖòɔ̀ bã̀àɔ̀ dyíɛɛ dyi kpɔ̃̀ìn, ɓɛ́ ɔ ké ɖé Mɛ́ɖɛ̀tɔ̀wéɖénìà-dyòǒɔ̀ wĩín sèìn.

⁶ “Ké waà ɓóɖóɔ̀ bã̀à mu ɖé dyóɖó-dyi-kpáìn-naínɔ̀ nììn nyɛɛ mu Mɛ́ɖɛ̀tɔ̀wéɖénìà-dyòǒɔ̀ jǔùn.

⁷ “Ké waà ɓóɖóɔ̀ xwía-wàkáɔ̀ bã̀à mu ɖé Mɛ́ɖɛ̀tɔ̀wéɖénìà-dyòǒɔ̀ wĩín gbɔ dèìn, ɓɛ́ ɔ ké mu tee, ɓɛ́ ɔ ké Hóɔ̀-tòɖòɔ̀ dyɛ̀ìn.

⁸ Ké sɔ̀ìn ɓó Hóɔ̀-tòɖòɔ̀ gboɛɛ, ɔ mu muùn tee, ɓɛ́ ɔ ké ɖé Ɖíɓò-Hámà-hwɔ̀ɖɔ̀ɔ̀ mú zĩ̀ìn, ɓɛ́ ɔ ké Zɛ́ɖà-hwɔ̀ɖɔ̀ɔ̀ dyɛ̀ìn.

⁹ Sɔ̀ìn ɓóɛɛ, ɔ mu ɖé Zífɔ̀nɔ̀-hwɔ̀ɖɔ̀ɔ̀ mú zĩ̀ìn, ɓɛ́ ɔ ké ɖé Házà-Énà-hwɔ̀ɖɔ̀ɔ̀ mú sèìn. Kǎà waà ɓóɖóɔ̀ xwía-wàkáɔ̀ bã̀àɔ̀ mu nììn.

¹⁰ “Ké waà ɓóɖóɔ̀ bã̀à mu ɖé dyóɖó-xwáɖáún-wóɖóìn-naínɔ̀ nììn nyɛɛ mu ɖé Házà-Énà-hwɔ̀ɖɔ̀ɔ̀ mú gbɔ dèìn, ɓɛ́ ɔ ké Sɛ́fã̀ùn-hwɔ̀ɖɔ̀ɔ̀ dyɛ̀ìn.

¹¹ Sɔ̀ìn ɓóɛɛ, ɔ mu ɓíɖíi muùn tee, ɓɛ́ ɔ ké ɖé Wíɖíɓàɖà-hwɔ̀ɖɔ̀ɔ̀ mú zĩ̀ìn, hwɔ ɖé Ádyììn-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀ dyí, ɓɛ́ ɔ ké ɖé toɖo ɓě nìà ɖé Kìnɛ́wɛ̀ɖɛ̀ Dòùnɓìǎɔ̀ dyóɖó-xwáɖáún-wóɖóìn-naínɔ̀ kɛɛ nyini.

¹² Sɔ̀ìn ɓóɛɛ, ɔ mu Jɔ́nì-nìɔ̀ dyi dèɖěìn, ɓɛ́ ɔ ké ɖé Tɔ̃́ Dòùnɓìǎɔ̀ wĩín sèìn. “Kǎà waà ɓóɖóɔ̀ bã̀àɔ̀ mu nììn.”

¹³ Ti ɓɛ́ Mózè ɖǎ ma ɓóɖóɔ̀ bã̀àɔ̀ jè Éézùɖùɛ̀-nyɔ̀ ɓěɔ̀ gbo cɛ̃ɛ hwɔɛɛ, ɔ ɖá, “Ɓóɖó nìà kɛ mɔ̀ ɓóɖó ɓɛ́ ɔ ké ɓěɛ̀ kɔ̃̀ɔ̀-ɖɛ̀ jǔ dyììn ɖé gbo-ɖàɓàìn-ɖɛ̀ múɛ. Ɔ mɔ̀ ɓóɖó ɓɛ́ Bounɓoɔ̀ nì ɓěɛ̀ xwéɖé-dù mɛ̀nɛ̌ìn-hĩinyɛ kè fáún-fáúnɔ̀ nyíɛń nyɛ.

^14-15 Wuɖuɓíín nììn xwéɖé-dùɔ̀ dyììn ɖé ɔ ɓǎ ɓěɛ̀ gbǒ-xwíníín ɓěɔ̀ múɛ, kè Gáà nììn xwéɖé-dùɔ̀ dyììn ɖé ɔ ɓǎ ɓěɛ̀ gbǒ-xwíníín ɓěɔ̀ múɛ, ɔ kè Mànásì nììn xwéɖé-dù fáún-fáúnɔ̀ dyììn ɖé ɔ ɓǎ ɓěɛ̀ gbǒ-xwíníín ɓěɔ̀ múɛɛ ɖǎ wa nììn pá dyé nɔ̄ Jɔ́nì-nìɛ̀ dyóɖó-xwáɖáún-wóɖóìn-naínɔ̀, ɖé Jɛ́ɖèkóò-hwɔ̀ɖɔ̀ɔ̀ gbɔ.”

Nyɔ vɛ̀nɛ̀ ɓě ɓɛ́ wa kɔ̃̀ ma ɓóɖóɔ̀ geìn jè kpé gboɛ

¹⁶ Ké Bounɓoɔ̀ cɛ̃ɛ ma Mózè gbo ɖe, ké ɔ ɖá,

¹⁷ “Gàa ɓě ɓɛ́ wa kéà ɓóɖóɔ̀ nyɔ ɓěɔ̀ múin geìn ɓɛ́ ɔ kéà waà dúí-sè-ɖɛ̀ jǔɛɛ, wa kɛà kɛ̀. Wa mɛ mɔ̀ Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ kè Jasúé mɔ̀à Núùnɛ̀ dyú-gààɔ̀ kɛ.

¹⁸ Ɓó kɔ̃in ɖeɛɛ, m̀ mɛ zà nyɔ vɛ̀nɛ̀ dyúáɖò ɖé xwéɖé-dù ɖò-ɖò mú, ɓɛ́ wa ké ɓóɖóɔ̀ geìn, ɓɛ́ ɔ ké nyɔ ɓěɔ̀ dúí-sè-ɖɛ̀ jǔ.

¹⁹ Nyɔ vɛ̀nɛ̀ ɓěɔ̀ nyɛ́nɛ́ kɛà kɛ̀. Ɖé Júɖà nììn xwéɖé-dùɔ̀ múɛɛ, m̀ mɛ gã ɖé Kéɖɛ̀ mɔ̀à Jɛ̀fúnɛ̀ɛ̀ dyú-gààɔ̀ kɛ.

²⁰ Ɖé Símìɔ̀ nììn xwéɖé-dùɔ̀ múɛɛ, m̀ mɛ gã ɖé Sɛ̀múè mɔ̀à Àmíhùɛ̀ dyú-gààɔ̀ kɛ.

²¹ Ɖé Bɛ̃́címà nììn xwéɖé-dùɔ̀ múɛɛ, m̀ mɛ gã ɖé Ɛ̀ɖíɖà mɔ̀à Kísɔ̀nɔ̀ɛ̀ dyú-gààɔ̀ kɛ.

²² Ɖé Dɛ̃́ìn nììn xwéɖé-dùɔ̀ múɛɛ, m̀ mɛ gã ɖé Búkì mɔ̀à Jógìɖìɛ̀ dyú-gààɔ̀ kɛ.

²³ Ɖé Jòsé nììn dyú-gàà mɔ̀à Mànásì kɛɛ nììn xwéɖé-dùɔ̀ múɛɛ, m̀ mɛ gã ɖé Hánìè mɔ̀à Éfòɛ̀ dyú-gààɔ̀ kɛ.

²⁴ Ɖé Jòsé nììn dyú-gàà mɔ̀à Ífèɖèìn kɛɛ nììn xwéɖé-dùɔ̀ múɛɛ, m̀ mɛ gã ɖé Kɛ̀múè mɔ̀à Sítɔ̀ùnɛ̀ dyú-gààɔ̀ kɛ.

²⁵ Ɖé Zɛ́ɓíúɖɔ̀ùn nììn xwéɖé-dùɔ̀ múɛɛ, m̀ mɛ gã ɖé Ɛ̀ɖìzáfàùn mɔ̀à Pánàà dyú-gààɔ̀ kɛ.

²⁶ Ɖé Ɛ́sàkà nììn xwéɖé-dùɔ̀ múɛɛ, m̀ mɛ gã ɖé Páátèò mɔ̀à Ázàùnɛ̀ dyú-gààɔ̀ kɛ.

²⁷ Ɖé Ásè nììn xwéɖé-dùɔ̀ múɛɛ, m̀ mɛ gã ɖé Àhíhù mɔ̀à Sɛ̀ɖómìɛ̀ dyú-gààɔ̀ kɛ.

²⁸ Ɖé Náfátàɖì nììn xwéɖé-dùɔ̀ múɛɛ, m̀ mɛ gã ɖé Pɛ̀ɖáhè mɔ̀à Àmíhùɛ̀ dyú-gààɔ̀ kɛ.”

²⁹ Nyɔ vɛ̀nɛ̀ ɓěa mɔ̀ nyɔ ɓě ɓɛ́ Bounɓoɔ̀ tò ma jìì, ɓɛ́ wa ké ma Kénà-ɓòɖòɔ̀ Éézùɖùɛ̀-nyɔ̀ ɓěɔ̀ múin geìn, ɓɛ́ ɔ ké waà dúí-sè-ɖɛ̀ jǔɛ.