Nɔ̀ɓà 33 - Ɓǎsɔ́ɔ̀ Báɓòɔ̀

Hwìè-kpà sɔ̀ Íjè mu Móà kɛ

¹ Kà Éézùɖùɛ̀-nyɔ̀ ɓěɔ̀ hwìè-kpà ɓěɔ̀ jè nyu ma nìɛ̀ ti ɓɛ́ wa sɔ̀ ma ɖé Íjè-ɓòɖòɔ̀ kɔ̃ ɖé waà kpoo ɖò-ɖò ɓě mú, ké Mózè kè Eɖóún nì ma wa nàǐn nyɛɛ kɛà kɛ̀.

² Mózè céè ma dɛ̀ ɖò-ɖò ɓě ɓɛ́ wa nyànàìn ma waà jàɖàìn-hwɔ̀ɖɔ̀ ɓě dyiɛɛ nyɛ́nɛ́ céè-ɖɛ̀ ɖò mú kà Bounɓoɔ̀ nyuɛ ma ɔ gbo cɛ̃ɛ kɛ.

³ Éézùɖùɛ̀-nyɔ̀ ɓěɔ̀ sɔ̀ ma ɖé Íjè-ɓòɖòɔ̀ kɔ̃ ɓó zɔ̃ɔ̀ dɛ̀nɛ̀ kĩ́ín-kĩ́ínɔ̀ wé ɓaɖa-bùè sè hm̀m̌ nììnɔ̀ ɓaɖa. Ɔ mɔ̀ wé kɔ ma ɓó Zĩ̀ìn-Kɔ̃in-hwɔ̀ kĩ́ín-kĩ́ínɔ̀ ɖeín dyíɛ. Éézùɖùɛ̀-nyɔ̀ ɓěɔ̀ sɔ̀ ma ɖé Wàɖàmísì-gbɛ̌ɛ̀ɔ̀ mú to-ɖu-kà ɓó Íjè-nyɔ̀ ɓěɔ̀ dyéɖé waí,

⁴ ti ɓɛ́ Íjè-nyɔ̀ ɓěɔ̀ nì ma waà nyíɔ́-dyù ɓě ɓɛ́ Bounɓoɔ̀ ɖáɓá ma kà kɛɛ dyóɖóún zàǔn wɛ̃. Kǎà Bounɓoɔ̀ nyu ma Íjè-nyɔ̀ ɓěɔ̀ gèɖèpɔ́ɔ̀ ɓěɔ̀ toún ɖuɛ.

⁵ Ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma ɖé Wàɖàmísì-gbɛ̌ɛ̀ɔ̀ mú dyíɛɛ, wa mu, ké wa nyini ma ɖé Súkò-hwɔ̀ɖɔ̀ɔ̀ mú, ké wa nyànàìn ma waà jàɖàìn-gbò ɓěɔ̀ dyi.

⁶ Ti ɓɛ́ ti wè ɖǎ ma ziɛɛ, wa sɔ̀ ma ɓó Súkò-hwɔ̀ɖɔ̀ɔ̀ mú dyí, ké wa mu, ké wa nyini ma ɖé Éfàùn-hwɔ̀ɖɔ̀ɔ̀ wĩín, ké wa nyànàìn ma waà jàɖàìn-gbò ɓěɔ̀ dyi ɓó gbǎùn-fúɖúáɔ̀ wĩín.

⁷ Ké ti wa sɔ̀ ma ɓó Éfàùn-hwɔ̀ɖɔ̀ɔ̀ wĩín dyíɛɛ, wa kɔ́ìn ma ɖe, ké wa mu ma ɖé Píhàhíwòɖò-hwɔ̀ɖɔ̀ɔ̀ mú, hwɔ ɖé Béò-Zɛ́fɔ̀ùn-hwɔ̀ɖɔ̀ɔ̀ dyóɖó-xwáɖáún-wóɖóìn-naínɔ̀ dyí, ké wa nyànàìn ma waà jàɖàìn-gbò ɓěɔ̀ dyi ɓó Míɖòò-hwɔ̀ɖɔ̀ɔ̀ gbɔ.

⁸ Ké ti wa sɔ̀ ma ɓó Píhàhíwòɖò-hwɔ̀ɖɔ̀ɔ̀ wĩín dyíɛɛ, wa zĩ̀ìn ma Dyóó Zĩ-zãɔ̀ hwòɖǒǔn, ké wa nàìn ma wé tã ɖé Éfàùn Gbǎùn-fúɖúáɔ̀ kɔ̃, hwɛ̀ ké wa nyànàìn ma waà jàɖàìn-gbò ɓěɔ̀ dyi ɖé Máwàɖàà-pàɔ̀ mú.

⁹ Ké ti wa sɔ̀ ma ɓó Máwàɖàà-pàɔ̀ múɛɛ, wa dyi ma ɖé Éɖììn-pàɔ̀ mú, ké wa nyànàìn ma waà jàɖàìn-gbò ɓěɔ̀ ɓó dyi. Ní-dù ɓaɖa-bùè sè sɔ̃́ kè hwɛ̃-cù kpáɖá-nyɔ tã ɓaɖa-bùè nì ma ɓó páɔ̀ mú.

¹⁰ Ké ti wa sɔ̀ ma ɓó Éɖììn-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ ɓó Dyóó Zĩ-zãɔ̀ wĩín dyi.

¹¹ Ké ti wa sɔ̀ ma ɓó Dyóó Zĩ-zãɔ̀ wĩín dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Sĩ́ìn Gbǎùn-fúɖúáɔ̀ kɔ̃.

¹² Ti wa sɔ̀ ma ɓó Sĩ́ìn Gbǎùn-fúɖúáɔ̀ kɔ̃ dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Dɔ́kà-pàɔ̀ mú.

¹³ Ké ti wa sɔ̀ ma ɓó Dɔ́kà-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Áɖù-pàɔ̀ mú.

¹⁴ Ti wa sɔ̀ ma ɓó Áɖù-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Wɛ̀ɖɛ̀fíɖììn-pàɔ̀ mú. Kɛɛ ní ɖò se ma ɓó nì, ɓɛ́ nyɔ ɓěɔ̀ kéɛ ná.

¹⁵ Ké ti wa sɔ̀ ma ɓó Wɛ̀ɖɛ̀fíɖììn-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Sányà Gbǎùn-fúɖúáɔ̀ kɔ̃.

¹⁶ Ké ti wa sɔ̀ ma ɓó Sányà Gbǎùn-fúɖúáɔ̀ kɔ̃ɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Kíwòɖò-Hàtáávà-pàɔ̀ mú.

¹⁷ Ké ti wa sɔ̀ ma ɓó Kíwòɖò-Hàtáávà-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Hàzéwòɖò-pàɔ̀ mú.

¹⁸ Ti wa sɔ̀ ma ɓó Hàzéwòɖò-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Wíɖímà-pàɔ̀ mú.

¹⁹ Ké ti ɓɛ́ wa sɔ̀ ma ɓó Wíɖímà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Wíɖímɔ̀-Pɛ́wɛ̀ɖɛ̀-pàɔ̀ mú.

²⁰ Ké ti wa sɔ̀ ma ɖé Wíɖímɔ̀-Pɛ́wɛ̀ɖɛ̀-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Ɖínà-hwɔ̀ɖɔ̀ɔ̀ gbɔ.

²¹ Ké ti wa sɔ̀ ma ɓó Ɖínà-hwɔ̀ɖɔ̀ɔ̀ gbɔ dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Wíɖísà-pàɔ̀ mú.

²² Ké ti wa sɔ̀ ma ɓó Wíɖísà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Kɛ́hèɖáfà-pàɔ̀ mú.

²³ Ké ti wa sɔ̀ ma ɓó Kɛ́hèɖáfà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Séfɛ̀-tòɖòɔ̀ gbo.

²⁴ Ké ti wa sɔ̀ ma ɖé Séfɛ̀-tòɖòɔ̀ gboɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Hàwáɖáɖà-pàɔ̀ mú.

²⁵ Ké ti wa sɔ̀ ma ɖé Hàwáɖáɖà-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Màhéɖɔ̀-pàɔ̀ mú.

²⁶ Ké ti wa sɔ̀ ma ɓó Màhéɖɔ̀-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Táhàfì-pàɔ̀ mú.

²⁷ Ké ti wa sɔ̀ ma ɓó Táhàfì-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Tíwàɖà-pàɔ̀ mú.

²⁸ Ké ti wa sɔ̀ ma ɓó Tíwàɖà-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Mífìkà-pàɔ̀ mú.

²⁹ Ké ti wa sɔ̀ ma ɓó Mífìkà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Hàmónà-pàɔ̀ mú.

³⁰ Ké ti wa sɔ̀ ma ɓó Hàmónà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Mòséwòɖò-pàɔ̀ mú.

³¹ Ké ti wa sɔ̀ ma ɓó Mòséwòɖò-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Bɛ́nè-Jáákàùn-pàɔ̀ mú.

³² Ké ti wa sɔ̀ ma ɓó Bɛ́nè-Jáákàùn-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Hóɔ̀-Hàgígà-pàɔ̀ mú.

³³ Ké ti wa sɔ̀ ma ɓó Hóɔ̀-Hàgígà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Jòbáfà-pàɔ̀ mú.

³⁴ Ké ti wa sɔ̀ ma ɓó Jòbáfà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Àɓóɖónà-pàɔ̀ mú.

³⁵ Ké ti wa sɔ̀ ma ɓó Àɓóɖónà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Ɛ́zìɔ̀ùn-Géɓɛ̀-hwɔ̀ɖɔ̀ɔ̀ mú.

³⁶ Ké ti wa sɔ̀ ma ɓó Ɛ́zìɔ̀ùn-Géɓɛ̀-hwɔ̀ɖɔ̀ɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Zĩ́ìn Gbǎùn-fúɖúáɔ̀ kɔ̃, ɖé Káɖɛ̀-hwɔ̀ɖɔ̀ɔ̀ mú.

³⁷ Ké ti wa sɔ̀ ma ɓó Káɖɛ̀-hwɔ̀ɖɔ̀ɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Hóɔ̀-tòɖòɔ̀ gbo, ɖé Íɖɔ̀ùn-ɓòɖòɔ̀ wĩín.

³⁸ Ti wa ɖǎ ma ɖé Hóɔ̀-tòɖòɔ̀ gbo nyiniɛɛ, Eɖóún mɔ̀à sáa-zà-nyɔ̀ vɛ̀nɛ̀ɔ̀ kɛɛ mu ma ɖé toɖoɔ̀ dya kà Bounɓoɔ̀ nyuɛ ma kà ɔ gbo cɛ̃ɛ kɛ, ké ɔ mɛ́ìn ma ɖé. Ɔ kpá ma ná ɓó zɔ̃ɔ̀ kpáɖá-nyɔ sɔ̃́ nììnɔ̀ xwíníín ti ɓɛ́ Éézùɖùɛ̀-nyɔ̀ ɓěɔ̀ sɔ̀ ma kà ɖé Íjè-ɓòɖòɔ̀ kɔ̃ɛ. Ɔ mɔ̀ ɓó zɔ̃ɔ̀ dɛ̀nɛ̀ hm̀m̌ nììnɔ̀ wé kĩ́ín-kĩ́ínɔ̀ ɓaɖa.

³⁹ Eɖóún nyu ma zɔ̃ hɔ̃dɛ̀ɖɛ̀ ɖò kè kpáɖá-nyɔ sè tã, hwɛ̀ ké ɔ mɛ́ìn ma kà ɖé Hóɔ̀-tòɖòɔ̀ dya kɛ̀.

⁴⁰ Ɓó tia ɓaɖaa, Kénà-ɓòɖòɔ̀ kã́á ɓɛ́ ɔ cĩ́ ma ɖé Áwɔ̀ɖɔ̀-hwɔ̀ɖɔ̀ɔ̀ mú ɖé Nɛ́gà-ɓòɖòɔ̀ kɔ̃ɛɛ wɔ̃́ ma Éézùɖùɛ̀-nyɔ̀ ɓěɔ̀ dyi jè.

⁴¹ Ké Éézùɖùɛ̀-nyɔ̀ ɓěɔ̀ kpá ma hwìè kɔ̃ ɖe, ké wa sɔ̀ ma ɖé Hóɔ̀-tòɖòɔ̀ gbo, ké wa mu, ké wa nyànàìn ma waà jàɖàìn-gbò ɓěɔ̀ dyi ɖé Zàmónà-pàɔ̀ mú.

⁴² Ké ti wa sɔ̀ ma ɓó Zàmónà-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Púnɔ̀ùn-pàɔ̀ mú.

⁴³ Ké ti wa sɔ̀ ma ɓó Púnɔ̀ùn-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Óɓò-pàɔ̀ mú.

⁴⁴ Ké ti wa sɔ̀ ma ɓó Óɓò-pàɔ̀ mú dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Ídyè-Àɓáwìɖììn-pàɔ̀ mú, ɖé Móà-ɓòɖòɔ̀ wĩín.

⁴⁵ Ké ti wa sɔ̀ ma ɓó Ídyè-Àɓáwìɖììn-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Díɓɔ̀ùn-Gáà-pàɔ̀ mú.

⁴⁶ Ké ti wa sɔ̀ ma ɓó Díɓɔ̀ùn-Gáà-pàɔ̀ múɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Áámɔ̀-Díɖàfáìn-pàɔ̀ mú.

⁴⁷ Ké ti wa sɔ̀ ma ɓó Áámɔ̀-Díɖàfáìn-pàɔ̀ múɛɛ, wa mu, ké nyànàìn ma waà jàɖàìn-gbò ɓěɔ̀ dyi ɖé Àbáwìɖììn-tòɖò ɓěɔ̀ gbo, hwɔ ɓó Néɓò-tòɖòɔ̀ gbo dyí.

⁴⁸ Ké ti wa sɔ̀ ma ɓó Àbáwìɖììn-tòɖò ɓěɔ̀ gbo dyíɛɛ, wa mu, ké wa nyànàìn ma waà jàɖàìn-gbò ɓěɔ̀ dyi ɖé Móà-ɓòɖòɔ̀ bɔɔ-kpàɔ̀ kɔ̃, ɓó Jɔ́nì-nìɔ̀ wĩín, ɓó Jɛ́ɖèkóò-hwɔ̀ɖɔ̀ɔ̀ gbɔ.

⁴⁹ Dɛ̀ wa nyànàìn ma kà waà jàɖàìn-gbò ɓěɔ̀ dyi ɖé Jɔ́nì-nìɔ̀ wĩín ɖé Móà-ɓòɖòɔ̀ bɔɔ-kpàɔ̀ kɔ̃ɛɛ mɔ̀ sɔ̀ìn ɖé Bɛ̀-Jɛ̀símɔ̀-hwɔ̀ɖɔ̀ɔ̀ mú, mu tee nyinià Éɓò-Sítììn-hwɔ̀ɖɔ̀ɔ̀ múɛ.

Ɖɛ ɓě ɓɛ́ Bounɓoɔ̀ cɛ̃ Éézùɖùɛ̀-nyɔ̀ ɓěɔ̀ gbo hwɛ̀ ɓɛ́ wa ké Jɔ́nì-nìɔ̀ péɖéɛ

⁵⁰ Ɓó tia ɓaɖaa, Bounɓoɔ̀ cɛ̃ɛ ma Mózè gbo ɖé Móà-ɓòɖòɔ̀ bɔɔ-kpàɔ̀ kɔ̃, ɖé Jɔ́nì-nìɔ̀ wĩín, ɖé Jɛ́ɖèkóò-hwɔ̀ɖɔ̀ɔ̀ gbɔ, ké ɔ ɖá,

⁵¹ “Cɛ̃ɛ Éézùɖùɛ̀-dyù ɓěɔ̀ gbo kà ti ɓɛ́ wa mu Jɔ́nì-nìɔ̀ péɖéìn, ɓɛ́ wa ké ɖé Kénà-ɓòɖòɔ̀ mú nyiniɛɛ,

⁵² nìí, wa mɛ kúmú nyɔ séín ɓě cĩ́à ɖé ɓóɖóɔ̀ kɔ̃ɛɛ ɖé dyi nyɛ̀nɛ̀ɛ̀, ɓɛ́ wa ké waà sɔ́ɔ́-kpò sɛ-sɛ ɓěɔ̀ kè waà kũùn-kpò mɛ-mɛ ɓěɔ̀ séín mú gbɔɔ̀, ɓɛ́ wa ké waà kũùn-kpò ɓièìn-naín séín ɓě nìà ɖé toɖo ɓěɔ̀ dyaa dyi gbaà.

⁵³ Ɔ ɖǎ ná nìǐn, nìí, wa mɛ ɖú ɓóɖóɔ̀ dyí, ɓɛ́ wa ké ɖé cĩ́, sepóɛɖé ḿ ɖǎ wa ɓóɖóɔ̀ nyí, ɓɛ́ ɔ ké waà kɔ̃̀ɔ̀-ɖɛ̀ jǔ.

⁵⁴ Wa mɛ geìn ɓóɖóɔ̀ dyììn ɖé gbo-ɖàɓàìn-ɖɛ̀ nyu-nyu mú, dyììn ɖé kà gbǒ-xwíníín ɖò-ɖò nyu nìɛ̀ kɛɛ mú. Xwéɖé-dùɔ̀ nyɔ kɔ̃̀ mú nyɔ ɓáún-ɓáún nìɛɛ, wa mɛ nyí wa pá vɛ̀nɛ̀. Ké dɛ̀ nyɔ ɓáún-ɓáún se nìɛɛ, wa mɛ nyí wa pá tííwè. Dɛ̀ kã̀ìn séín ɓɛ́ gbo-ɖàɓàìn-ɖɛ̀ɔ̀ mu kpáùn ɓá nyɔ ɖò mɔ̀ùn jè dyíɛɛ, ɓó mɔ̀ ɔ nììn pá. Nyɔ ɖò-ɖò séín mɛ kɔ̃̀ ɔ nììn pá dyììn ɖé ɔ ɓǎà xwéɖé-dùɔ̀ mú.

⁵⁵ Kɛɛ ɔ jǔ ké Éézùɖùɛ̀-dyù ɓěɔ̀ se ɓóɖóɔ̀ nyɔ séín ɓěɔ̀ ɖé dyi kúmú ní, nìí, nyɔ ɓě muà ɖé sèìn nyɛɛ, wa mu nììn kà sĩ̀ɔ̌ ɖò nìà nyɔ dyéɖéín nyɛ, mɔɔ kà wí taɓaà nyɔ wáún wɛ̃ɛ ɓó wa bìì, ké wa mu wa fũ̀à-fṹá nyùìn kánáá pū ɖé ɓóɖóɔ̀ kɔ̃, dɛ̀ ɓɛ́ wa muà cĩ́ìn nyɛ.

⁵⁶ Ké ɖɛ mɔ̀ ɖɛ ɓɛ́ ḿ sɔ́ dyí, ɓɛ́ ḿ kéɔ́ kà ɓóɖóɔ̀ nyɔ ɓěɔ̀ bũ̌ nyuɛɛ, ní muɛ wa bũ̌ nyuùn.”