Nɔ̀ɓà 32 - Ɓǎsɔ́ɔ̀ Báɓòɔ̀

Xwéɖé-dù ɓě ké ɖé Jɔ́nì-nìɔ̀ dyóɖó-xwáɖáún-wóɖóìn-naínɔ̀ nìɛ

¹ Ɓó tia ɓaɖaa, Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ nyɔ ɓěɔ̀ ɓéɖé ma nyúà-ɖɛ̀ ɓáún-ɓáún. Ti ɓɛ́ wa dyéɛ ma kà Jázè-ɓòɖòɔ̀ kè Gíɖèà-ɓòɖòɔ̀ nɔ̀mɔ̀ ma dyíin mìɔ ɓó waà nyúà-ɖɛ̀ ɓěɔ̀ jèɛɛ,

² púɛɛ, wa mu ma ɖé Mózè kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè Éézùɖùɛ̀-nyɔ̀ vɛ̀nɛ̀ ɓěɔ̀ gbo, ké wa ɖá,

³ “Àtáwɔ̀ɖɔ̀-hwɔ̀ɖɔ̀ɔ̀ kè Díɓɔ̀ùn-hwɔ̀ɖɔ̀ɔ̀ kè Jázè-hwɔ̀ɖɔ̀ɔ̀ kè Níwàɖà-hwɔ̀ɖɔ̀ɔ̀ kè Hɛ́ɓɔ̀ùn-hwɔ̀ɖɔ̀ɔ̀ kè Ɛ̀ɖɛ̀áɖè-hwɔ̀ɖɔ̀ɔ̀ kè Sɛ́ɓàùn-hwɔ̀ɖɔ̀ɔ̀ kè Néɓò-hwɔ̀ɖɔ̀ɔ̀ ɔ kè Bɛ́ɔ̀ùn-hwɔ̀ɖɔ̀ɔ̀

⁴ mɔ̀ hwɔɖɔ ɓě ɓɛ́ Bounɓoɔ̀ kpáà à mɔ̀ Éézùɖùɛ̀-nyɔ̀ ɓěɛ̀ gbo, ɓɛ́ à dyià toún ɖuɛ. Wa ɖei mɔ̀ pá nɔ̀mɔ̀ dyíin ɓó nyúà-ɖɛ̀ ɓě bìì. Ké gmɔ̀ nɔ̄, à mɔ̀à ɓěɛ̀ gbo-nì-nyɔ̀ ɓěɛ̀ kɛɛ ɓéɖé nyúà-ɖɛ̀ kúɖúú.

⁵ Ɔ jǔ ké ɓěɛ̀ hwòɖǒ dyi à múin dèìn ní, nìí, ɓě nyí à ɓóɖó nìà kɛ, ɓɛ́ ɔ ké à nììn kɔ̃̀ɔ̀-ɖɛ̀ jǔ. Ɓě ɓɔ́ à ɖé Jɔ́nì-nìɔ̀ ɖeín kpaa.”

⁶ Kɛɛ Mózè cɛ̃ɛ ma wa gbo, ké ɔ ɖá, “Ɓěɛ̀ hwòɖǒ ɖá ɔ mɔ̀ ɖɛ sɛ́ɖɛ́ìn dyí ɓɛ́ ɓě mɔ̀ùn ké nɔ̄ sè, nìí ɓɛ́ ɓěɛ̀ ɖíí-gàà ɓěɔ̀ mɔ̀ùn ké to vɔ̃uń nìe?

⁷ Ɖɛ́ kɔ̃̀ jè ɓě mɔ́à nyuɛ dyi ɓɛ́ ɓě mǔè Éézùɖùɛ̀-nyɔ̀ ɓěɔ̀ hwòɖǒ kéà ɖé ɖei kpá, nìí ɓɛ́ wa ké seà ɓóɖó ɓɛ́ Bounɓoɔ̀ nìà wa nyíɛń nyɛɛ kɔ̃ muɛ́?

⁸ Ɓě ɓǎ ɓě nyu ma hwɔìn-ɖɛ̀ dyúáɖòɔ̀ ɖé Káɖɛ̀-Bànéà-hwɔ̀ɖɔ̀ɔ̀ mú, ti ɓɛ́ ḿ ɖoɓo ma wa ɓɛ́ wa ké ɓóɖóɔ̀ dyéɖé gboi kpaìn nyɛ.

⁹ Wa mu, ké wa sèìn ma ɖé Ɛ́kò Bɔɔ-kpàɔ̀ kɔ̃, ké wa dyé ma ɓóɖóɔ̀. Kɛɛ ti wa kɔ́ìn ma ɖeɛɛ, wa nyuɛ ké nyɔ ɓěɔ̀ hwòɖǒ kpá ma ɖé ɖei, ké waà hwòɖǒ se ma ɓóɖó ɓɛ́ Bounɓoɔ̀ nìà wa nyíɛń nyɛɛ kɔ̃ muɛ mɔ́.

¹⁰ Ɓó wéa ɓaɖaa, Bounɓoɔ̀ kpá ma dyoɖoún, ké ɔ ɖi ma wuɖu, ké ɔ ɖá,

¹¹ ‘Gàa séín ɓě nyuá zɔ̃ kpáɖá-nyɔ kè zi kɔ̃, ɓɛ́ wa sɔ̀ ma kà ɖé Íjè-ɓòɖòɔ̀ kɔ̃ɛɛ, wa ɖò se ɓóɖó ɓɛ́ ḿ ɖáìn zɔ̃̌ɔ̀ kà Ééɓòɖòhɛ̃́ɛ̀ kè Áázè ɔ kè Jékɔ̀ nyɛ́nɛ́ín nyɛɛ dyéɛ mu fɔɔ cá, sepóɛɖé wa se ḿ kíɖíí sí hwòɖǒɛ̀-ɖé-hwɛ̀-kà.

¹² Kɛɛ ɔ sèìn Kéɖɛ̀ mɔ̀à Jɛ̀fúnɛ̀ɛ̀ dyú-gàà ɓɛ́ ɔ mɔ̀à Kɛ́nà-nyɔ̀ɔ̀ kɛ kè Jasúé mɔ̀à Núùnɛ̀ dyú-gààɔ̀ kɛ, sepóɛɖé wa sí mɔ̄ Bounɓoɔ̀ kíɖíí hwòɖǒɛ̀-ɖé-hwɛ̀-kà.’

¹³ Bounɓoɔ̀ kpáìn ma Éézùɖùɛ̀-nyɔ̀ ɓěɔ̀ dyoɖoún, ké ɔ nyuɛ ké wa gã̀ ma ɖé gbǎùn-fúɖúáɔ̀ kɔ̃ dyi bũɛń dyi tee ɓó zɔ̃ kpáɖá-nyɔ sɔ̃́ xwíníín, ké nyɔ séín ɓě ɓɛ́ wa nyu ma kà Bounɓoɔ̀ ɖɛ gbà bũ̌ɛɛ hwɛ̀ ma mɛ́ɛ hwɛ̀.

¹⁴ Ké ɓó kàǔn wɛ̃ɛ, ɓě ɖǎ ɓěɛ̀ ɓǎ ɓěɔ̀ ɓo-bɛ̃̀ mú sí, ɓɛ́ ɓě kéá nàmàǔn-nyu-xwèɖè-dù jǔ ɖe, ɓɛ́ ɓě kéɛ nyu ɓɛ́ Bounɓoɔ̀ ké Éézùɖùɛ̀-nyɔ̀ séín ɓěɔ̀ dyoɖoún kpáìn ɖe mìɔ.

¹⁵ Ɓě dyi Bounɓoɔ̀ kíɖíí-sí-síɔ̀ dyi táà ní, nìí, ɔ mu Éézùɖùɛ̀-nyɔ̀ séín ɓěɛ̀ dyi táàùn ɖe ɖé gbǎùn-fúɖúáɔ̀ kɔ̃, ké ɓě mu wa mú-gbɔɔ̀-gbɔɔ̀ kɔ̃ dyàùn.”

¹⁶ Hwɛ̀ ké Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ nyɔ ɓěɔ̀ xwɛ̃́ìn ma Mózè bũ̌in, ké wa ɖá, “Wɔ̃́ ɓɛ́ à ké nɔ̄ kòò ɓě po ɓó à nyúà-ɖɛ̀ ɓěɔ̀ bìì, ɔ kè ɓɛ́ à ké hwɔɖɔ nì gmɔ ɖei ɓě dè ɓó à gmàà ɓěɔ̀ kè à dyú ɓěɔ̀ bìì.

¹⁷ Sɔ̀ìn ɓóɛ gboɛɛ, à mu to-vɔ̃̀ìn-ɖɛ̀ ɓě dyí ɖúùn, ɓɛ́ à ké à mǔè Éézùɖùɛ̀-nyɔ̀ ɓěɔ̀ dyúa sí, ɓɛ́ à ké wa kpa, ɓɛ́ wa ké wa nììn ɓóɖóɔ̀ kɔ̃ dyi kò ɖé gìɖìǐ mú hwɛ̀. Ké à gmàà ɓěɔ̀ kè à dyú ɓěɔ̀ mu nɔ̄ hwɔɖɔ nì gmɔ ɖei ɓě mú sèìn, ɓɛ́ ɓóɖóɛ̀ nyɔ ɓěɔ̀ ní kɔ̃̀ ɖà wa ɖɛ gbà ɖò bũ̌ nyu.

¹⁸ À se nɔ̄ à ɓíɖí ɖe kɔ́ǐn mu, ɓɛ́ à mǔè Éézùɖùɛ̀-nyɔ̀ ɓěɔ̀ ɖò-ɖò séín ké wa nììn dúí-sè-ɖɛ̀ɔ̀ dyé hwɛ̀.

¹⁹ À kè wa se dúí-sè-ɖɛ̀ ɖò mú peɖeɛ̌n mu ɖé Jɔ́nì-nìɛ̀ wáká tɔ̀ɔ̀ kɔ̃, sepóɛɖé à ɖǎ à nììn dúí-sè-ɖɛ̀ dyé nɔ̀ɔ̀ nɔ̄ wáká mɔ̀à dyóɖó-xwáɖáún-wóɖóìn-naín nìà kɛɛ kɔ̃.”

²⁰ Ɔ jèɛɛ, Mózè cɛ̃ɛ ma wa gbo, ké ɔ ɖá, “Ɔ jǔ ké ɖɛ ɓě cɛ̃à kɛɛ dyi ɖé ɓě hwòɖǒ bũ̌ sɔ̀ jǎà jɛ́ɛ́ ní, nìí, ɓě dyé ti ɓó kàǔn dà Bounɓoɔ̀ dyúa, ɓɛ́ ɓě ké to gbo mu.

²¹ To-vɔ̃-nyɔ̀ séín nì ɓě hwìɛ̀ kɛɛ mɛ péɖé Jɔ́nì-nìɔ̀ ɓó Bounɓoɔ̀ dyúa. Ɓě mɛ vɔ̃ ɔ mú-nyɛ́-nyɔ̀ ɓěɔ̀ gbo tee ɓɛ́ Bounɓoɔ̀ ké wa toún ɖu hwɛ̀.

²² Ɔ jǔ ké nyɔ séín nì ɓóɖóɔ̀ kɔ̃ɛɛ ɖǎ ɓíɖíi dyi kpá ɓó Bounɓoɔ̀ dyúa ní, nìí, sɔ̀ìn ɓóɛ gboɛɛ, ɓě ɓɛ́ìn ɖe kɔ́ìn, ké Bounɓoɔ̀ kè ɓě mǔè Éézùɖùɛ̀-nyɔ̀ ɓěɔ̀ se ɓě kpaún kɔ̃̀ɔ̌ mu ɖe. Ɔ ɖǎ ná nìǐn, nìí, ɓóɖó nìà kɛ mu ɓěɛ̀ kɔ̃̀ɔ̀-ɖɛ̀ jǔùn ɓó Bounɓoɔ̀ dyúa.

²³ Kɛɛ ɔ jǔ ké ɓě seɛ náa nyu ní, nìí, ɔ mɔ̀ nàmàǔn ké ɓě nyuɛ Bounɓoɔ̀ bũ̌. Ké ɓě mɛ dyuò ɖɛ nìà kɛ dyí jɛ́ɛ́ kà ɓě mìɔùn nììn nyuu-nàmàǔnɔ̀ mu ɓě gǎ kɔ̃ dyàùn wɛ̃.

²⁴ Ɓě dè hwɔɖɔ nì gmɔ ɖei ɓě ɓó ɓěɛ̀ gmàà ɓěɔ̀ kè ɓěɛ̀ dyú ɓěɔ̀ bìì, ké ɓě po kòò ɓě ɓó ɓěɛ̀ nyúà-ɖɛ̀ ɓěɔ̀ bìì, ɓɛ́ ɓě ké ɖɛ kɔ̃̀ wuɖu ɓě ɖǎà ɖiɛɛ nyu.”

²⁵ Ké Gáà nììn xwéɖé-dùɔ̀ kè Wuɖuɓíín nììn xwéɖé-dùɔ̀ nyɔ ɓěɔ̀ cɛ̃ɛ ma Mózè gbo, ké wa ɖá, “Ɓɔ̌ɔ̀ à mɔ̀à nì gbo-nì-nyɔ̀ ɓěɛɛ mu ɖɛ m̀ cɛ̃à kɛɛ nyuùn.

²⁶ À gmàà ɓěɔ̀ kè à dyú ɓěɔ̀ ɔ kè à nyúà-ɖɛ̀ ɓěɔ̀ mu hwɔɖɔ ɓě nìà Gíɖèà-ɓòɖòɛ̀ kɔ̃ɛɛ mú sèìn.

²⁷ Kɛɛ à to-vɔ̃-nyɔ̀ séín ɓěɔ̀ mu Jɔ́nì-nìɔ̀ péɖéìn, ɓɛ́ à ké toɔ̀ gbo mu ɓó Bounɓoɔ̀ dyúa kà m̀ nyuà cɛ̃ɛ kɛ.”

²⁸ Ɔ jèɛɛ, Mózè cɛ̃ ma ɖɛ ɓá Gáà nììn xwéɖé-dùɔ̀ kè Wuɖuɓíín nììn xwéɖé-dùɔ̀ nyɔ ɓěɔ̀ jè dyíɛɛ Ɛ̀ɖɛ̀ázà kè Jasúé ɔ kè Éézùɖùɛ̀-nyɔ̀ ɓěɔ̀ gbǒ-xwíníín ɖò-ɖò wuɖuí-kɔ̃̀-nyɔ̀ ɓěɔ̀ gbo,

²⁹ ké ɔ ɖá, “Ɔ jǔ ké to-vɔ̃-nyɔ̀ séín sɔ̀ ɖé Gáà nììn xwéɖé-dùɔ̀ múɛ kè sɔ̀ ɖé Wuɖuɓíín nììn xwéɖé-dùɔ̀ múɛɛ, ɓě kè wa dyi Jɔ́nì-nìɔ̀ péɖé ɓó Bounɓoɔ̀ dyúa, ké ɓě kè wa dyi to gbo mu, ké ɓě dyi ɓóɖóɔ̀ toún ɖu ní, nìí, ɓě mɛ nyí wa Gíɖèà-ɓòɖòɔ̀, ɓɛ́ ɔ ké waà kɔ̃̀ɔ̀-ɖɛ̀ jǔ.

³⁰ Kɛɛ ɔ jǔ ké wa se waà toún-vɔ̃̀ìn-ɖɛ̀ ɓěɔ̀ dyí ɖú, ɓɛ́ ɓě kè wa ké toɔ̀ vɔ̃ ní, nìí, wa nììn pá wa ké dyéɛɛ mɛ hwɔ ɖé ɓě gbo Jɔ́nì-nìɔ̀ wáká tɔ̀ɔ̀ kɔ̃ dyí ɖé Kénà-ɓòɖòɔ̀ kɔ̃.”

³¹ Ké Gáà nììn xwéɖé-dùɔ̀ kè Wuɖuɓíín nììn xwéɖé-dùɔ̀ nyɔ ɓěɔ̀ zà ma ɖé wuɖu, ké wa ɖá, “Ɓɔ̌ɔ̀, à muɛ nyuùn kà Bounɓoɔ̀ nyuà cɛ̃ɛ kɛ.

³² À mu à to-vɔ̃̀ìn-ɖɛ̀ ɓěɔ̀ dyí ɖúùn, ɓɛ́ à ké Jɔ́nì-nìɔ̀ péɖé ɓó Bounɓoɔ̀ dyúa, ɓɛ́ à ké ɖé Kénà-ɓòɖòɔ̀ kɔ̃ mu, ɓɛ́ à ké toɔ̀ vɔ̃, nìí ɓɛ́ à nììn ɓóɖó nìà nɔ̄ Jɔ́nì-nìɔ̀ ɖeín nyɛɛ ké à kɔ̃̀ɔ̀-ɖɛ̀ jǔ kánáá pū.”

³³ Ɔ jèɛɛ, Mózè nyí ma Gáà nììn xwéɖé-dùɔ̀ kè Wuɖuɓíín nììn xwéɖé-dùɔ̀ ɔ kè Mànásì mɔ̀à Jòséɛ̀ dyú-gààɔ̀ kɛɛ nììn xwéɖé-dù fáún-fáúnɔ̀ Síhɔ̃̀ ɓɛ́ ɔ mɔ̀ ma kà Ámɔ̀-nyɔ̀ ɓěɔ̀ nììn kã́áɔ̀ kɛɛ nììn kã́á-ɓòɖòɔ̀ kè Ógì ɓɛ́ ɔ mɔ̀ ma kà Básàùn-kã̀ǎɔ̀ kɛɛ nììn kã́á-ɓòɖòɔ̀. Ɔ nyí ma wa ɓóɖó gànáɔ̀ kèɛ̀ hwɔɖɔ séín ɓěɔ̀ kè wa nììn gbɛ̌ɛ̀ ɓěɔ̀.

³⁴ Ké Gáà nììn xwéɖé-dùɔ̀ nyɔ ɓěɔ̀ po ma Díɓɔ̀ùn-hwɔ̀ɖɔ̀ɔ̀ kè Àtáwɔ̀ɖɔ̀-hwɔ̀ɖɔ̀ɔ̀ kè Àwóɖóè-hwɔ̀ɖɔ̀ɔ̀

³⁵ kè Átɔ̀ɖɔ̀-Sófàùn-hwɔ̀ɖɔ̀ɔ̀ kè Jázè-hwɔ̀ɖɔ̀ɔ̀ kè Jɔ́ɓàhà-hwɔ̀ɖɔ̀ɔ̀

³⁶ kè Bɛ̀-Níwàɖà-hwɔ̀ɖɔ̀ɔ̀ ɔ kè Bɛ̀-Háwàɖàùn-hwɔ̀ɖɔ̀ɔ̀ ɖe. Wa mɔ̀ hwɔɖɔ cɛ̃̀ìn gmɔ ɖei ɓě. Wa ɓéɖé ma ɖé nyúà-ɖɛ̀-kòò ɓě ɖekè.

³⁷ Ké Wuɖuɓíín nììn xwéɖé-dùɔ̀ nyɔ ɓěɔ̀ po ma Hɛ́ɓɔ̀ùn-hwɔ̀ɖɔ̀ɔ̀ kè Ɛ̀ɖɛ̀áɖè-hwɔ̀ɖɔ̀ɔ̀ kè Kíjàtáìn-hwɔ̀ɖɔ̀ɔ̀

³⁸ kè Néɓò-hwɔ̀ɖɔ̀ɔ̀ kè Béò-Mɛ́ɔ̀ùn-hwɔ̀ɖɔ̀ɔ̀ ɔ kè Símà-hwɔ̀ɖɔ̀ɔ̀ ɖe. Ké wa jǔìn ma hwɔɖɔ ɓě ɓɛ́ wa po ma kà ɖeɛɛ nyɛ́nɛ́ ɖìè ɓě.

³⁹ Ɓó tia ɓaɖaa, Mànásìɛ̀ dyú-gàà kɔ̃̀ nyɛ́nɛ́ mɔ̀à Mákì kɛɛ xwíníín-dyù ɓěɔ̀ kpa ma Gíɖèà-ɓòɖòɔ̀ to kɔ̃, ké wa ɖúɛ ma dyí, ké wa kúmú ma Ámɔ̀-nyɔ̀ ɓě nì ma ɖéɛɛ ɖé dyi.

⁴⁰ Ké Mózè nyí ma Gíɖèà-ɓòɖòɔ̀ Mákì mɔ̀à Mànásìɛ̀ dyú-gààɔ̀ kɛɛ xwíníín-dyù ɓěɔ̀, ké wa cĩ́ ma ɖé.

⁴¹ Mànásìɛ̀ xwíníín-dyù ɖò kɔ̃̀ nyɛ́nɛ́ mɔ̀ Jáwìɖì kɛɛ kpa ma Gíɖèà-ɓòɖòɔ̀ hwɔɖɔ-kpàǎ ɖíɛ́ ɓě to kɔ̃, ké ɔ ɖú ma wa dyí. Ké ɔ jǔìn ma wa nyɛ́nɛ́ ɖìè ɖò. Ɔ ɖáìn ma wa Jáwìɖì ɓíɖí-hwɔ̀ɖɔ̀ ɓě.

⁴² Ké gàa ɖò kɔ̃̀ nyɛ́nɛ́ mɔ̀ Nɔ́ɓà kɛɛ kpa ma Kɛ́nàfì-hwɔ̀ɖɔ̀ɔ̀ kèɛ̀ hwɔɖɔ-kpàǎ ɓěɔ̀ to kɔ̃, ké ɔ ɖuɛ ma toún. Ké ɔ jǔìn Kɛ́nàfì-hwɔ̀ɖɔ̀ɔ̀ ɔ mìɔùn nììn nyɛ́nɛ́.