Nɔ̀ɓà 31 - Ɓǎsɔ́ɔ̀ Báɓòɔ̀

To ɓɛ́ Éézùɖùɛ̀-nyɔ̀ ɓěɔ̀ kpa ma Míɖìàùn-nyɔ̀ ɓěɔ̀ kɔ̃ɛ

¹ Wé ɖòɛ̀ ɓaɖaa, Bounɓoɔ̀ cɛ̃ɛ ma Mózè gbo, ké ɔ ɖá,

² “Zàìn Míɖìàùn-nyɔ̀ ɓěɔ̀ kpa kɔ̃in ɓó ɖɛ wa nyu ma kà Éézùɖùɛ̀-dyù ɓěɔ̀ bũ̌ɛɛ jè. Sɔ̀ìn ɓóɛ gboɛɛ, nìí, nì mu mɛ́ìn, ɓɛ́ m̀ ké nì nyɔ ɓěɔ̀ gbo mu.”

³ Ké Mózè cɛ̃ɛ ma Éézùɖùɛ̀-nyɔ̀ ɓěɔ̀ gbo, ké ɔ ɖá, “Gàa ɓě nì ɓě hwìɛ̀ kɛɛ mɛ ɖú to-vɔ̃̀ìn-ɖɛ̀ dyí, ɓɛ́ wa ké Míɖìàùn-nyɔ̀ ɓěɔ̀ to kɔ̃ kpa, ɓɛ́ Bounɓoɔ̀ ké Míɖìàùn-nyɔ̀ ɓěɔ̀ kpa kɔ̃in zàìn.

⁴ Ɓěɛ̀ xwéɖé-dù ɖò-ɖò séín mɛ tò nyɔ táázĩ̀ìn ɖò-ɖò, ɓɛ́ wa ké toɔ̀ gbo mu.”

⁵ Ɔ jèɛɛ, to-vɔ̃-nyɔ̀ táázĩ̀ìn ɓaɖa-bùè sè sɔ̃́ sɔ̀ ma ɖé Éézùɖùɛ̀ɛ̀ xwéɖé-dù ɓaɖa-bùè sè sɔ̃́ ɓěɔ̀ hwìɛ̀.

⁶ Ké Mózè tò ma wa toɔ̀ gbo. Waà nyɔ-kpò táázĩ̀ìn sɔ̀ ma xwéɖé-dù ɖò-ɖò mú. Wa kè Fíníhà mɔ̀à Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ kɛɛ mu ma. Fíníhà kpa ma ɖɛ hwɛ̀ǐn-hwɛ̀ǐn ɓě sɔ̀ ma ɖé Bounɓoɔ̀ jàɖàìn-gbòɔ̀ múɛ kè gã̀à ɓě ɓɛ́ wa kéà ɓaɖa ɓɛ́ ɔ kéà nyɔ ɓěɔ̀ bɔ̃̌ǔn-pòìn-ɖɛ̀ jǔɛ.

⁷ Ké wa kpa ma Míɖìàùn-nyɔ̀ ɓěɔ̀ to kɔ̃ kà Bounɓoɔ̀ nyuɛ ma kà Mózè gbo cɛ̃ɛ kɛ. Ké wa ɖáɓá ma Míɖìàùn-nyɔ̀ ɓěɔ̀ gàa séín ɓěɔ̀.

⁸ Wa ɖáɓá ma Míɖìàùn-ɓòɖòɔ̀ kã́á hm̀m̌ ɓě kɔ̃̀ nyɛ́nɛ́ mɔ̀ ma Ɛ́vì kè Wɛ́ɖɛ́kɛ̃̀ìn kè Zúɔ̀ kè Húɔ̀ ɔ kè Wɛ́ɖɛ́ɓà kɛ, ké wa ɖáɓá ma Béɖàùn mɔ̀à Bɛ́òɛ̀ dyú-gààɔ̀ kɛɛ gàsíà dyí ɖekè.

⁹ Ké Éézùɖùɛ̀-nyɔ̀ ɓěɔ̀ kpa ma Míɖìàùn-màà ɓěɔ̀ kè waà dyú mɛ́nɛ́ɛ́ ɓěɔ̀, ké wa kpa ma waà ɓìɖǐ ɓěɔ̀ kè waà ɓáɖáá ɓěɔ̀ kè waà wiɖi ɓěɔ̀ ɔ kè waà kɔ̃̀ɔ̀-ɖɛ̀ séín ɓěɔ̀.

¹⁰ Ké wa fɔ̃ ma Míɖìàùn-nyɔ̀ ɓěɔ̀ hwɔɖɔ séín ɓěɔ̀ kè waà jàɖàìn-hwɔ̀ɖɔ̀ séín ɓěɔ̀.

¹¹ Ké wa ɖú to-gbo-zà-ɖɛ̀ séín ɓěɔ̀ dyí, kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ kɛ.

¹² Hwɛ̀ ké wa dyà ma nyɔǔn-dyù kè kɔ̃̀ɔ̀-ɖɛ̀ séín ɓě ɓɛ́ wa zà ma kà toɔ̀ gboɛɛ Mózè kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè Éézùɖùɛ̀-nyɔ̀ tɔ̀ɔ̀ ɓěɔ̀ gbo ɖé jàɖàìn-hwɔ̀ɖɔ̀ɔ̀ mú, ɖé Móà-ɓòɖòɔ̀ bɔɔ-kpàɔ̀ kɔ̃, ɖé Jɔ́nì-nìɔ̀ wĩín, ɖé Jɛ́ɖèkóò-hwɔ̀ɖɔ̀ɔ̀ gbɔ.

¹³ Ti ɓɛ́ wa nì ma toɔ̀ gbo sɔ̀ǔn wɛ̃ɛ, Mózè kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè Éézùɖùɛ̀-nyɔ̀ ɓěɔ̀ nyɔ vɛ̀nɛ̀ séín ɓěɔ̀ sɔ̀ ma jàɖàìn-hwɔ̀ɖɔ̀ɔ̀ mú, ké wa mu ma to-vɔ̃-nyɔ̀ ɓěɔ̀ hwìǐ kpɔ̃uń.

¹⁴ Ké Mózè kpáìn ma sójà kúɖúú ɓěɔ̀ wuɖuí-kɔ̃̀-nyɔ̀ ɓěɔ̀ dyoɖoún. Wa mɔ̀ sójà táázĩ̀ìn ɓě wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓěɔ̀.

¹⁵ Ké Mózè diè ma wa dyi, ké ɔ ɖá, “Ɖɛ́ kɔ̃̀ jè ɓě seà màa séín ɓěɔ̀ ɖáɓá kɛ́?

¹⁶ Gmɔ̀ nɔ̄, má, màa ɓěɔ̀ mɔ̀ nyɔ sí ma kà Béɖàùn nììn ná-wùɖùɔ̀ kíɖíí, ké wa nyuɛ ké Éézùɖùɛ̀-nyɔ̀ ɓěɔ̀ nyu ma kà Bounɓoɔ̀ ɖɛ gbà bũ̌ dyììn ɖé waà kũùn-kpò ɓěɔ̀ ɓiè-ɓiè mú ɖé Píò-tòɖòɔ̀ gboɛ̀e? Ké má, dyììn ɖé kũùn-kpò ɓěɔ̀ ɓiè-ɓiè múɛɛ, wɛ́ nyìnììn dyíin dyi ma Bounɓoɔ̀ nyɔ ɓěɔ̀ hwìɛ̀e?

¹⁷ Ɔ ná nì jèɛɛ, ɓě ɖáɓá gàa-dyù séín nì ɖé dyú mɛ́nɛ́ɛ́ ɓěɔ̀ hwìɛ̀ kɛ, ɓɛ́ ɓě ké màa séín ɓě ɓɛ́ wa ɖǎ toɖo kɔ̃ jè dyuòɛɛ ɖáɓá ɖekè.

¹⁸ Kɛɛ màa-dyù gmɔ̀ séín ɓě ɓɛ́ wa séè toɖo kɔ̃ jè dyuòɛɛ, ɓě mɛ ɓɔ́ wa ɖáɓáa. Ɓě ɖú wa dyí ɓó ɓě mìɔùn bìì.

¹⁹ Ɓě mɔ̀ nyɔ kã̀ìn séín ɓě ɓɛ́ ɓě ɖǎ kú ɖáɓá, mɔɔ ɓɛ́ ɓě ɖǎ xwɛ́ dyi tìnììn nyɛɛ, ɓě mɛ nì ɖé jàɖàìn-hwɔ̀ɖɔ̀ɔ̀ ɖeín ɓó wé mɛ̀nɛ̌ìn-sɔ̃́ xwíníín. Ké ɓě kè nyɔ ɓě ɓɛ́ ɓě kpɔ̃à ɖé toɔ̀ gboɛɛ mɛ hwɔ ɓě mìɔùn mú ɓó wéɔ̀ tã nììnɔ̀ kè wéɔ̀ mɛ̀nɛ̌ìn-sɔ̃́ nììnɔ̀ ɓaɖa.

²⁰ Ké ɓě mɛ hwɔ ɓěɛ̀ mú-po-ɖɔ̀ séín ɓěɔ̀ ɔ kè kúɖúù-kpã̀-ɖɛ̀ séín ɓěɔ̀ kè ɖɛ séín ɓě ɓá wiɖi-mì dyíɛ ɔ kè cu-ɖɛ̀ séín ɓěɔ̀ mú.”

²¹ Ké Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ cɛ̃ɛ ma to-vɔ̃-gàà ɓě ɓɛ́ wa sɔ̀ ma kà toɔ̀ gboɛɛ gbo, ké ɔ ɖá, “Gma ɓɛ́ Bounɓoɔ̀ ɖǎ Mózè mú tòìn nyɛɛ kɛà kɛ̀. Ɔ ɖá,

^22-23 ‘Ɖɛ kã̀ìn séín ɓɛ́ nyɔ ɓɛ́ìn dyéɖé poɛ ɓɛ́ ɔ ké se ɓó dyi sĩɛɛ, ɓě mɛ zĩ̀ɛ̀n nyɛ mú, nìí, ɔ mu mú hwɛ̀ìn. Ɖɛ ɓěɔ̀ hwɔìn kà góò kè séɓàɖà kè bàɖàsǐ kè nɛɛ̀-kpà ɔ kè ɓàǎ-dù kò-kò ɓě. Kɛɛ wɛ̃́ɛ́ kɛɛ, ɓě mɛ hwɔ̀ìn ní mɔ̀à ɖɛ-mú-hwɔ-nìɛɛ wa mú ɖekè. Ké ɖɛ mɔ̀ ɖɛ ɓɛ́ nyɔ dyi dyéɖé po ní ɔ ɓɛ́ìn ɓó dyi sĩɛ kɛɛ, ɓě mɛ hwɔ̀ìn níɔ̀ mú.

²⁴ Ɓě mɛ wɔɔ̀ ɓěɛ̀ mú-po-ɖɔ̀ ɓěɔ̀ ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖa. Ɔ ɖǎ ná nìǐn, nìí, ɓě ɖǎ mú hwɛ̀, ké sɔ̀ìn ɓóɛ gboɛɛ, nìí, ɓě ɓɛ́ìn jàɖàìn-hwɔ̀ɖɔ̀ɔ̀ mú dyiɛ ɖe.’ ”

To-gbo-zà-ɖɛ̀ ɓěɔ̀ geìn-geìn

²⁵ Ké Bounɓoɔ̀ cɛ̃ɛ ma Mózè gbo, ké ɔ ɖá,

²⁶ “M̀ kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ kè gbǒ-xwíníín wuɖuí-kɔ̃̀-nyɔ̀ ɓě nì ɖé Éézùɖùɛ̀-dyù ɓěɔ̀ hwìɛ̀ kɛɛ mɛ zɛɖɛ to-gbo-zà-ɖɛ̀ séín ɓěɔ̀, kɛbì ɔ mɛ mɔ̀ nyɔǔn-dyù mɔɔ nyúà-ɖɛ̀ kɛ.

²⁷ Ɔ ɖǎ ná nìǐn, m̀ mɛ ge to-gbo-zà-ɖɛ̀ ɓěɔ̀ dú sɔ̃́ mú. Geɛ̀n to-vɔ̃-nyɔ̀ ɓěɔ̀ kè Éézùɖùɛ̀-dyù tɔ̀ɔ̀ ɓěɔ̀ múin.

²⁸ Ké m̀ mɛ kpɔ̃ sójà ɓěɔ̀ nììnɔ̀ tácì kɔ̃in ɓó mɔ̄ Bounɓoɔ̀ bìì. Toɛ̀-kpɔ̃-nyɔ̀ hɔ̃dɛ̀ɖɛ̀ hm̀m̌ ní, nyɔ dyúáɖò mɔ̀ tácìɔ̀. Ké kà dyúáɖòɔ̀ kǎà m̀ mɛ nyu ɓìɖǐ ɓěɔ̀ kè jǎkasì ɓěɔ̀ kè ɓáɖáá ɓěɔ̀ ɔ kè wiɖi ɓěɔ̀ ɖekè.

²⁹ M̀ mɛ nyí wa Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ xwa, ɓɛ́ ɔ ké nyíí-ɖɛ̀ kpa ɖɛ jǔ ɓó mɔ̄ Bounɓoɔ̀ bìì.

³⁰ Ké ɖé Éézùɖùɛ̀-dyù tɔ̀ɔ̀ ɓěɔ̀ nììnɔ̀ hwìɛ̀ kɛɛ, m̀ mɛ zà nyɔ dyúáɖò ɖé toɛ̀-kpɔ̃-nyɔ̀ kpáɖá-nyɔ sɔ̃́ ɓaɖa-bùè séín hwìɛ̀. Ké kà dyúáɖòɔ̀ kǎà m̀ mɛ nyuɛ ɓá ɓìɖǐ ɓěɔ̀ kè jǎkasì ɓěɔ̀ kè ɓáɖáá ɓěɔ̀ ɔ kè wiɖi ɓěɔ̀ jè dyí ɖekè. M̀ mɛ nyí wa Ɖíìváà-nyɔ̀ ɓě ɓɛ́ wa kɔ̃̀à ní jàɖàìn-gbòɔ̀ jè kpé gboɛ.”

³¹ Ké Mózè kè Ɛ̀ɖɛ̀ázà nyu ma ɖɛ séín ɓěɔ̀ kà Bounɓoɔ̀ nyuɛ ma kà Mózè gbo cɛ̃ɛ kɛ.

³² Ɖɛ ɓě ɓɛ́ sójà ɓěɔ̀ zà ma kà ɖé toɔ̀ gboɛɛ kɛà kɛ̀. Ɖɛ jĩ̀ kà ɓɛ́ wa ɖú dyí ɓó wa mìɔùn bììɛɛ se ɖé kpá. Ɖɛ ɓěɔ̀ mɔ̀ ɓáɖáá kè wiɖi táázĩ̀ìn hɔ̃dɛ̀ɖɛ̀ mɛ̀nɛ̌ìn-ɖò kpáɖá-nyɔ tã ɓaɖa-bùè sè hm̀m̌

³³ kè ɓìɖǐ táázĩ̀ìn kpáɖá-nyɔ tã ɓaɖa-bùè sè sɔ̃́

³⁴ ɔ kè jǎkasì táázĩ̀ìn kpáɖá-nyɔ tã sè dyúáɖò.

³⁵ Ké màa séè toɖo kɔ̃ jè dyuò ɓě ɓɛ́ wa zà ma toɔ̀ gboɛɛ mɔ̀ nyɔ-kpò táázĩ̀ìn kpáɖá-nyɔ ɓaɖa-bùè sè sɔ̃́.

³⁶ Ɓáɖáá kè wiɖi ɓěɔ̀ fáún-fáún ɓɛ́ to-vɔ̃-nyɔ̀ ɓěɔ̀ kɔ̃̀ ma ɓóɛɛ mɔ̀ táázĩ̀ìn hɔ̃dɛ̀ɖɛ̀ tã kpáɖá-nyɔ ɓaɖa-bùè sè mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌.

³⁷ Ké waà hɔ̃dɛ̀ɖɛ̀ mɛ̀nɛ̌ìn-ɖò kè kpáɖá-nyɔ tã ɓaɖa-bùè sè hm̀m̌ sɔ̀ ma ɓó, ké wa mɔ̀ Bounɓoɔ̀ tácì.

³⁸ Ɓìɖǐ ɓěɔ̀ fáún-fáún ɓɛ́ to-vɔ̃-nyɔ̀ ɓěɔ̀ kɔ̃̀ ma ɓóɛɛ mɔ̀ táázĩ̀ìn kpáɖá-nyɔ ɓaɖa-bùè sè mɛ̀nɛ̌ìn-ɖò. Ké waà kpáɖá-nyɔ tã ɓaɖa-bùè sè sɔ̃́ sɔ̀ ma ɓó, ké wa mɔ̀ Bounɓoɔ̀ tácì.

³⁹ Jǎkasì ɓěɔ̀ fáún-fáún ɓɛ́ to-vɔ̃-nyɔ̀ ɓěɔ̀ kɔ̃̀ ma ɓóɛɛ mɔ̀ táázĩ̀ìn kpáɖá-nyɔ ɓaɖa-bùè kè hɔ̃dɛ̀ɖɛ̀ hm̀m̌. Ké waà kpáɖá-nyɔ tã sè ɖò sɔ̀ ma ɓó, ké wa mɔ̀ Bounɓoɔ̀ tácì.

⁴⁰ Nyɔǔn-dyù ɓěɔ̀ fáún-fáún ɓɛ́ to-vɔ̃-nyɔ̀ ɓěɔ̀ kɔ̃̀ ma ɓóɛɛ mɔ̀ nyɔ-kpò táázĩ̀ìn ɓaɖa-bùè sè mɛ̀nɛ̌ìn-ɖò. Ké waà nyɔ-kpò kpáɖá-nyɔ ɓaɖa-bùè sè sɔ̃́ sɔ̀ ma ɓó, ké wa mɔ̀ Bounɓoɔ̀ tácì.

⁴¹ Ké Mózè nyí ma ɖɛ ɓěɔ̀ tácì ɓɛ́ wa nyí ma kà Bounɓoɔ̀ kɛɛ Ɛ̀ɖɛ̀ázà xwa kà Bounɓoɔ̀ nyuɛ ma kà Mózè gbo cɛ̃ɛ kɛ.

⁴² Ké Éézùɖùɛ̀-nyɔ̀ tɔ̀ɔ̀ ɓěɔ̀ nììn fáún-fáún ɓɛ́ Mózè po ma kà wáká sɔ̀ìn ɓó to-vɔ̃-nyɔ̀ ɓěɔ̀ nììnɔ̀ gboɛɛ

⁴³ mɔ̀ ɓáɖáá kè wiɖi táázĩ̀ìn hɔ̃dɛ̀ɖɛ̀ tã kpáɖá-nyɔ ɓaɖa-bùè sè mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌

⁴⁴ kè ɓìɖǐ táázĩ̀ìn kpáɖá-nyɔ ɓaɖa-bùè sè mɛ̀nɛ̌ìn-ɖò

⁴⁵ kè jǎkasì táázĩ̀ìn kpáɖá-nyɔ ɓaɖa-bùè kè hɔ̃dɛ̀ɖɛ̀ hm̀m̌

⁴⁶ ɔ kè nyɔǔn-dyù táázĩ̀ìn ɓaɖa-bùè sè mɛ̀nɛ̌ìn-ɖò.

⁴⁷ Ɖé Éézùɖùɛ̀-nyɔ̀ tɔ̀ɔ̀ ɓěɔ̀ nììn to-gbo-zà-nyɔ̀ ɓěɔ̀ hwìɛ̀ kɛɛ, Mózè zà ma nyɔ dyúáɖò ɖé nyɔ kpáɖá-nyɔ sɔ̃́ ɓaɖa-bùè séín hwìɛ̀. Kǎà ɔ nyuɛ ma ɓá nyɔǔn-dyù kè nyúà-ɖɛ̀ jè dyí. Ké ɔ nyí ma wa Ɖíìváà-nyɔ̀ ɓě ɓɛ́ wa kɔ̃̀ ma kà Bounɓoɔ̀ jàɖàìn-gbòɔ̀ jè kpé gboɛɛ xwa kà Bounɓoɔ̀ nyuɛ ma kà ɔ gbo cɛ̃ɛ kɛ.

⁴⁸ Hwɛ̀ ké sójà táázĩ̀ìn kúɖúú wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ kúɖúú wuɖuí-kɔ̃̀-nyɔ̀ ɓěɔ̀ dyi ma Mózè gbo,

⁴⁹ ké wa ɖá, “Ɓɔ̌ɔ̀, à mɔ̀à nì gbo-nì-nyɔ̀ ɓěɔ̀ kɛɛ ɖǎ à sójà séín ɓěɔ̀ zɛɖɛ, ké nyɔ dyúáɖò dyɛ mɔ̀ùn se à hwìɛ̀ sɔ̀.

⁵⁰ Ɔ jèɛɛ, góò-bɛ̃̀ìn-ɖɛ̀ séín ɓɛ́ gàa ɖò-ɖò zàà ɖé toɔ̀ gboɛɛ, kɛbì ɔ mɛ mɔ̀ sɔ̃-gbɔ̀ǔn-po-ɖɛ̀ mɔɔ sɔ̃-po-ɖɛ̀ mɔɔ ɖɛ-sɔ̃-bɛ̃̀-kɔ̃-pòìn-ɖɛ̀ mɔɔ ɖùǔn-po-ɖɛ̀ mɔɔ ɖɔ-po-ɖɛ̀ɛ, à ɖǎa dyà, ɓɛ́ à kéɛ Bounɓoɔ̀ nyí, ɓɛ́ ɔ ké à nàmàǔn ɓěɔ̀ kɔ̃in-ɓáìn-ɖɛ̀ jǔ ɓó Bounɓoɔ̀ dyúa.”

⁵¹ Ké Mózè kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ kpɔ̃ ma wa góò-bɛ̃̀ìn-ɖɛ̀ séín ɓěɔ̀ wa xwaún.

⁵² Ké góò-bɛ̃̀ìn-ɖɛ̀ séín ɓě ɓɛ́ sójà táázĩ̀ìn kúɖúú wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ kúɖúú wuɖuí-kɔ̃̀-nyɔ̀ ɓěɔ̀ nyí ma kà Bounɓoɔ̀ kɛɛ xwa-ku-ku ɓɛ́ìn ma pṹá-dyèɖè hɔ̃dɛ̀ɖɛ̀ hĩinyɛ kè kpáɖá-nyɔ jǔɛ.

⁵³ Kɛɛ to-vɔ̃-nyɔ̀ tɔ̀ɔ̀ ɓěɔ̀ se ma ɖɛ ɓě wa zà ma kà toɔ̀ gboɛɛ tò.

⁵⁴ Ké Mózè kè Ɛ̀ɖɛ̀ázà kpɔ̃ ma góò-bɛ̃̀ìn-ɖɛ̀ ɓě ɓɛ́ sójà táázĩ̀ìn kúɖúú wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ kúɖúú wuɖuí-kɔ̃̀-nyɔ̀ ɓěɔ̀ dyà ma kàa dyi, ké wa dyàà ɖéɛ jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛɛ mú, ɓɛ́ Éézùɖùɛ̀-nyɔ̀ ɓěɔ̀ jè ké Bounɓoɔ̀ hwìɖǐi dyi.