Nɔ̀ɓà 30 - Ɓǎsɔ́ɔ̀ Báɓòɔ̀

Gma ɓě ɓá wuɖu-ɖi-ɖi jè dyíɛ

¹ Sɔ̀ìn ɓóɛ gboɛɛ, Mózè cɛ̃ɛ ma Éézùɖùɛ̀ɛ̀ xwéɖé-dù ɓěɔ̀ nyɔ vɛ̀nɛ̀ ɓěɔ̀ gbo, ké ɔ ɖá, “Gma ɓɛ́ Bounɓoɔ̀ poɛɛ kɛà kɛ̀. Ɔ ɖá,

² ‘Ɔ jǔ ké gàa ɖò dyi mɔ̄ Bounɓoɔ̀ wuɖu dyéɖéín ɖììn, mɔɔ ké ɔ dyi ḿ ɖɛ ɖò nyɛ́nɛ́ín ɖáìn ní, ɔ ní ɖá ɓɛ́ ɔ ké ɔ wuɖuɔ̀ kɔ̃ péɖé. Kɛɛ ɔ mɛ nyu ɖɛ séín ɓě ɓɛ́ ɔ ɖǎ wĩín zà kɛ.

³ “ ‘Ɔ jǔ ké màa-dyù gmɔ̀ ɖò ti ɓɛ́ ɔ nì ɖé ɔ ɓǎ ɓíɖí-taún cĩ́ɛń keɛɛ dyi mɔ̄ Bounɓoɔ̀ wuɖu dyéɖéín ɖììn, mɔɔ ké ɔ dyi ḿ ɖɛ ɖò nyɛ́nɛ́ín ɖáìn,

⁴ ké ɔ ɓǎ dyi ɖɛ kɔ̃̀ wuɖu ɔ ɖià kɛ mɔɔ ɖɛ ɔ ɖáìn ḿ nyɛ́nɛ́ín nyɛɛ jè wɔ̃́, ké ɔ se ɔ dyú-mààɔ̀ ɖɛ ɖò gbo cɛ̃ ní, nìí, màa-dyùɔ̀ ɓéɖé ɔ ké ɔ wuɖu-ɖi-ɖiɔ̀ mɔɔ ɖɛ ɔ ɖáìn ḿ nyɛ́nɛ́ín nyɛɛ nyu nyɛ̀nɛ̀ɛ̀.

⁵ Kɛɛ ɔ jǔ ké wé kɔ̃̀ ɓaɖa ɔ ɓǎɔ̀ wɔ̃́à ɔ jèɛɛ, ɔ ɓǎɔ̀ dyiɛ cɛ̃ kà ɔ hwòɖǒ seɛ gbo wɔ̃́ìn nyɛɛ ní, nìí, ɖɛ kɔ̃̀ wuɖu ɔ ɖià kɛ mɔɔ ɖɛ ɓɛ́ ɔ ɖáìn ḿ nyɛ́nɛ́ín nyɛɛ, ɔ se ɓéɖé ɔ kéɛ nyu wɛ̃́ɛ́. Ké ní mu ɔ kɔ̃in zĩ̀ìn ɓóɛ jè, sepóɛɖé ɔ ɓǎà hwòɖǒ seɛ gbo wɔ̃́ìn jè.

⁶ “ ‘Ké màa ɖò dyi dyú-ɓǎ dyi kpɔ̃ ti ɓɛ́ ɔ nì wuɖu-ɖi-ɖi ɖò mɔɔ ɖɛ kɔ̃̀ jè ɓɛ́ ɔ se hwìɖǐi poìn, ɓɛ́ ɔ ɖáìn ḿ nyɛ́nɛ́ín nyɛɛ wuɖu xwíɖíi keɛ,

⁷ ké ɔ dyú-ɓǎɔ̀ dyiɛ jè wɔ̃́, ké ɔ se ɖɛ ɖò cɛ̃ ɓáa jè dyí ɓó wé kɔ̃̀ ɓaɖa ɔ wɔ̃́à ɖɛɔ̀ jèɛɛ ní, nìí, màaɔ̀ ɓéɖé ɓɛ́ ɔ ké ɔ wuɖu-ɖi-ɖiɔ̀ mɔɔ ɖɛ ɔ ɖáìn ḿ nyɛ́nɛ́ín nyɛɛ nyu nyɛ̀nɛ̀ɛ̀.

⁸ Kɛɛ ɔ jǔ ké wé kɔ̃̀ ɓaɖa ɓɛ́ ɔ dyú-ɓǎɔ̀ wɔ̃́à ɔ jèɛɛ, ɔ dyiɛ cɛ̃ kà ɔ hwòɖǒ seɛ gbo wɔ̃́ìn nyɛɛ ní, nìí, ɔ ɓɛ́ìn nyuɛ ɓɛ́ ɔ gmààɔ̀ wuɖu-ɖi-ɖiɔ̀ mɔɔ ɖɛ kɔ̃̀ jè ɓɛ́ ɔ seà hwìɖǐi poìn, ɓɛ́ ɔ ɖáìn ḿ nyɛ́nɛ́ín nyɛɛ ké se ɖɛ ɖò kpa, ké ní mu màaɔ̀ kɔ̃in zĩ̀ìn ɓóɛ jè.

⁹ “ ‘Kɛɛ ɔ jǔ ké jɔ̌ɔ̀-màà ɖò mɔɔ màa ɓɛ́ ɔ ɖǎ ɔ dyú-ɓǎ xwa sɔ̀ɛɛ ɖò dyi wuɖu-ɖi-ɖi ɖò nyu, mɔɔ ké ɔ dyi ḿ ɖɛ ɖò nyɛ́nɛ́ín ɖáìn ní, nìí, ɔ ɓéɖé ɓɛ́ ɔ ké ɖɛ kɔ̃̀ wuɖu ɔ ɖià kɛ mɔɔ ɖɛ ɔ ɖáìn ḿ nyɛ́nɛ́ín nyɛɛ nyu wɛ̃́ɛ́.

¹⁰ “ ‘Ɔ jǔ ké màa ɖò dyi ɔ dyú-ɓǎɔ̀ xwa kpá hwɛ̀ ké ɔ dyi wuɖu-ɖi-ɖi ɖò nyu, mɔɔ hwɛ̀ ké ɔ dyi ḿ ɖɛ ɖò nyɛ́nɛ́ín ɖáìn,

¹¹ ké ɔ dyú-ɓǎɔ̀ dyiɛ jè wɔ̃́, ké ɔ seɛ ɔ gmààɔ̀ gbo cɛ̃ kà ɔ hwòɖǒ seɛ gbo wɔ̃́ìn nyɛɛ ní, nìí, màaɔ̀ ɓéɖé ɔ ké ɔ wuɖu-ɖi-ɖiɔ̀ mɔɔ ɖɛ ɔ ɖáìn ḿ nyɛ́nɛ́ín nyɛɛ nyu nyɛ̀nɛ̀ɛ̀.

¹² Kɛɛ ɔ jǔ ké wé kɔ̃̀ ɓaɖa ɔ dyú-ɓǎɔ̀ wɔ̃́à ɔ jèɛɛ, ɔ dyi ɔ ɓɔ́í po ɓóɛ jè ní, nìí, ɖɛ kɔ̃̀ wuɖu ɔ ɖià kɛ mɔɔ ɖɛ ɓɛ́ ɔ ɖáìn ḿ nyɛ́nɛ́ín nyɛɛ, ɔ se ɓéɖé ɓɛ́ ɔ kéɛ nyu, sepóɛɖé ɔ dyú-ɓǎɔ̀ seɛ gbo wɔ̃́ìn jè. Ké ní mu ɔ kɔ̃in zĩ̀ìn ɓóɛ jè.

¹³ Ɖɛ kɔ̃̀ wuɖu màaɔ̀ ɖià kɛ mɔɔ ɖɛ ɓɛ́ ɔ ɖáìn ḿ nyɛ́nɛ́ín nyɛɛ, ɔ dyú-ɓǎɔ̀ ɓɛ́ìn gbo wɔ̃́ìn, mɔɔ ɔ ɓɛ́ìn ɓɔ́í poɛ.

¹⁴ Kɛɛ ɔ jǔ ké ɔ dyú-ɓǎɔ̀ se ɖɛ ɖò cɛ̃ fɔɔ cá ɓó wé kè wé xwíníín ní, nìí, ɔ wɔ̃́ìn ɖɛ kɔ̃̀ wuɖu ɓɛ́ ɔ gmààɔ̀ ɖià, mɔɔ ɓɛ́ ɔ ɖáìn ḿ nyɛ́nɛ́ín nyɛɛ jè gbo, sepóɛɖé ɔ se ɔ gmààɔ̀ ɖɛ ɖò gbo cɛ̃ ɓó ti kɔ̃̀ ɓaɖa ɔ wɔ̃́à ɔ jèɛ.

¹⁵ Kɛɛ ɖéé ɖé nya hwɛ̀ ké ɔ dyiá ɖɛɔ̀ ɓɔ́í poín, nìí, ɔ ɓéɖé ɓɛ́ ɔ ké ɖɛ gbàɔ̀ kpa dyí ɖú ɓó ɔ gmààɔ̀ wuɖuɔ̀ kɔ̃ péɖé jè.’ ”

¹⁶ Kǎà gma ɓě ɓɛ́ Bounɓoɔ̀ tòìn ma Mózè mú ɓá gàa ɖò kè ɔ gmàà jè dyí, mɔɔ ɓá gàa ɖò kè ɔ dyú-màà jè dyí ti ɓɛ́ màa-dyùɔ̀ nì ɖé ɔ ɓǎ ɓíɖí-taún keɛɛ jè nyu nìɛ̀.