Nɔ̀ɓà 29 - Ɓǎsɔ́ɔ̀ Báɓòɔ̀

Sáa-zàìn-ɖɛ̀ ɓá Gã̀à-Ɓaɖa-hwɔ̀ɔ̀ jè dyíɛ

¹ “Ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé kĩ́ín-kĩ́ínɔ̀ ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè. Ɔ mɔ̀ wé kɔ̃̀ ɓaɖa ɓɛ́ ɓě ké ɓěɛ̀ gã̀à ɓěɔ̀ ɓaɖa kɛ.

² Ɓě mɛ nyu fɔ̃ɔ-sàǎ-zàìn-ɖɛ̀ ɓě kɔ̃̀ nyɔ́ dè mɔ̄ Bounɓoɔ̀ hwìɖǐiɛ. Wa mɛ mɔ̀ ɓìɖǐ ɓíɔ́ gmɔ̀ dyúáɖò kè ɓáɖáá ɓíɔ́ vɛ̀nɛ̀ dyúáɖò ɔ kè ɓáɖáá ɓíɔ́ mɛ̀nɛ̌ìn-sɔ̃́ ɖò ɖe ɓɛ́ wa nyuá zɔ̃ dyúáɖòɛ. Wa mɛ ɓɔ́ kɛɛ ɖò ɓéɖéɛ.

³ Ké ɓě mɛ dyà ɖii-ɖɛ̀-sàǎ-zàìn-ɖɛ̀ ɓó fɔ̃ɔ-sàǎ-zàìn-ɖɛ̀ ɓěɔ̀ ɖò-ɖò bìì. Ɖii-ɖɛ̀-sàǎ-zàìn-ɖɛ̀ɔ̀ mɛ mɔ̀ fáɖáɓà nìɛ̀-nìɛ̀ ɓɛ́ wa caìn cánáà kópò-wè kpáɖá-nyɔ sè hĩinyɛ kɛɛ ɓó ɓìɖǐ ɓíɔ́ɔ̀ bìì, ké ɔ mɛ mɔ̀ kópò-wè ɓaɖa-bùè sè mɛ̀nɛ̌ìn-ɖò ɓó ɓáɖáá ɓíɔ́ vɛ̀nɛ̀ɔ̀ bìì,

⁴ ké ɔ mɛ mɔ̀ kópò-wè mɛ̀nɛ̌ìn-tã ɓó ɓáɖáá ɓíɔ́ mɛ̀nɛ̌ìn-sɔ̃́ ɓɛ́ wa nyuá kà zɔ̃ dyúáɖòɛɛ ɖò-ɖò bìì.

⁵ Ké ɓě mɛ zàìn vã́á dyúáɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ, ɓɛ́ ɔ ké ɓěɛ̀ nàmàǔn ɓěɔ̀ kɔ̃in-ɓáìn-ɖɛ̀ jǔ.

⁶ Ɓě mɛ nyuɛ náa ɓó dɛ̀nɛ̀ ɖìèɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ kè wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in, dyììn ɖé kà wa nììn gmaɔ̀ nyu nìɛ̀ kɛɛ mú. Wa mɔ̀ ɖii-ɖɛ̀-nyìǐ-ɖɛ̀ kɔ̃̀ nyɔ́ dè mɔ̄ Bounɓoɔ̀ hwìɖǐiɛ.

Sáa-zàìn-ɖɛ̀ ɓá Nàmàǔn-Ɖɛ-Kɔ̃in-Ɓáìn-wèɔ̀ jè dyíɛ

⁷ “Ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè nììnɔ̀ ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè. Ɓě mɛ hwèɖè wɔ̃ kɔ̃ ɓó wéa ɓaɖa.

⁸ Ké ɓě mɛ nyu fɔ̃ɔ-sàǎ-zàìn-ɖɛ̀ ɓě kɔ̃̀ nyɔ́ dè mɔ̄ Bounɓoɔ̀ hwìɖǐiɛ. Wa mɛ mɔ̀ ɓìɖǐ ɓíɔ́ gmɔ̀ dyúáɖò kè ɓáɖáá ɓíɔ́ vɛ̀nɛ̀ dyúáɖò ɔ kè ɓáɖáá ɓíɔ́ mɛ̀nɛ̌ìn-sɔ̃́ ɖò ɖe ɓɛ́ wa nyuá zɔ̃ dyúáɖòɛ. Wa mɛ ɓɔ́ kɛɛ ɖò ɓéɖéɛ.

⁹ Ké ɓě mɛ dyà ɖii-ɖɛ̀-sàǎ-zàìn-ɖɛ̀ ɓó fɔ̃ɔ-sàǎ-zàìn-ɖɛ̀ ɓěɔ̀ ɖò-ɖò bìì. Ɖii-ɖɛ̀-sàǎ-zàìn-ɖɛ̀ɔ̀ mɛ mɔ̀ fáɖáɓà nìɛ̀-nìɛ̀ caìn cánáà kópò-wè kpáɖá-nyɔ sè hĩinyɛ ɓó ɓìɖǐ ɓíɔ́ɔ̀ bìì, ké ɔ mɛ mɔ̀ kópò-wè ɓaɖa-bùè sè mɛ̀nɛ̌ìn-ɖò ɓó ɓáɖáá ɓíɔ́ vɛ̀nɛ̀ɔ̀ bìì,

¹⁰ ké ɔ mɛ mɔ̀ kópò-wè mɛ̀nɛ̌ìn-tã ɓó ɓáɖáá ɓíɔ́ mɛ̀nɛ̌ìn-sɔ̃́ ɓɛ́ wa nyuá kà zɔ̃ dyúáɖòɛɛ ɖò-ɖò bìì.

¹¹ Ké ɓě mɛ zàìn vã́á dyúáɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ké ɓě mɛ zàìn ɖò sáa ɖe, ɓɛ́ ɔ ké nàmàǔn-sàǎ-zàìn-ɖɛ̀ jǔ, ɓɛ́ ɔ ké ɓěɛ̀ nàmàǔn ɓěɔ̀ ɖɛ-kɔ̃in-ɓáìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

Sáa-zàìn-ɖɛ̀ ɓá Ɓeè-Dyù-hwɔ̀ɔ̀ jè dyíɛ

¹² “Ɓó dɛ̀nɛ̀ mɛ̀nɛ̌ìn-sɔ̃́ nììnɔ̀ wé ɓaɖa-bùè sè hm̀m̌ nììnɔ̀ ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè. Ɓó wéa ɓaɖaa, ɓě mɛ dè Ɓeè-Dyù-hwɔ̀ɔ̀ paa gbɔ, ké ɓě mɛ pàìn hwɔ nìà kɛ wé mɛ̀nɛ̌ìn-sɔ̃́ xwíníín ɓó ḿ bìì.

¹³ Ɓó wéɔ̀ kĩ́ín-kĩ́ínɔ̀ ɓaɖaa, ɓě mɛ dyà fɔ̃ɔ-sàǎ-zàìn-ɖɛ̀ ɓě mɔ̀à ɖii-ɖɛ̀-nyìǐ-ɖɛ̀ kɔ̃̀ nyɔ́ dè ḿ hwìɖǐiɛ. Wa mɛ mɔ̀ ɓìɖǐ ɓíɔ́ gmɔ̀ ɓaɖa-bùè sè tã kè ɓáɖáá ɓíɔ́ vɛ̀nɛ̀ sɔ̃́ ɔ kè ɓáɖáá ɓíɔ́ ɓaɖa-bùè sè hĩinyɛ ɖò ɖe ɓɛ́ wa nyuá zɔ̃ dyúáɖòɛ. Wa mɛ ɓɔ́ kɛɛ ɖò ɓéɖéɛ.

¹⁴ Ké ɓě mɛ dyà ɖii-ɖɛ̀-sàǎ-zàìn-ɖɛ̀ ɓó fɔ̃ɔ-sàǎ-zàìn-ɖɛ̀ ɓěɔ̀ ɖò-ɖò bìì. Ɖii-ɖɛ̀-sàǎ-zàìn-ɖɛ̀ɔ̀ mɛ mɔ̀ fáɖáɓà nìɛ̀-nìɛ̀ caìn cánáà kópò-wè kpáɖá-nyɔ sè hĩinyɛ ɓó ɓìɖǐ ɓíɔ́ ɓaɖa-bùè sè tã ɓěɔ̀ ɖò-ɖò bìì, ké ɔ mɛ mɔ̀ kópò-wè ɓaɖa-bùè sè mɛ̀nɛ̌ìn-ɖò ɓó ɓáɖáá ɓíɔ́ vɛ̀nɛ̀ sɔ̃́ ɓěɔ̀ ɖò-ɖò bìì,

¹⁵ ké ɔ mɛ mɔ̀ kópò-wè mɛ̀nɛ̌ìn-tã ɓó ɓáɖáá ɓíɔ́ ɓaɖa-bùè sè hĩinyɛ ɓěɔ̀ ɖò-ɖò bìì.

¹⁶ Ké ɓě mɛ zàìn vã́á dyúáɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

¹⁷ “Ɓó wéɔ̀ sɔ̃́ nììnɔ̀ ɓaɖaa, ɓě mɛ zàìn ɓìɖǐ ɓíɔ́ gmɔ̀ ɓaɖa-bùè sè sɔ̃́ kè ɓáɖáá ɓíɔ́ vɛ̀nɛ̀ sɔ̃́ ɔ kè ɓáɖáá ɓíɔ́ ɓaɖa-bùè sè hĩinyɛ ɖò ɖe ɓɛ́ wa nyuá zɔ̃ dyúáɖòɛɛ sáa. Wa mɛ ɓɔ́ kɛɛ ɖò ɓéɖéɛ.

¹⁸ Ké ɓě mɛ tòìn wa kè waà ɖii-ɖɛ̀-sàǎ-zàìn-ɖɛ̀ ɓě kè waà náá-ɖɛ̀-sàǎ-zàìn-ɖɛ̀ ɓě. Ɓě mɛ nyuɛ náa dyììn ɖé kà ɓìɖǐ ɓíɔ́ ɓěɔ̀ kè ɓáɖáá ɓíɔ́ vɛ̀nɛ̀ ɓěɔ̀ ɔ kè ɓáɖáá ɓíɔ́ tɔ̀ɔ̀ ɓěɔ̀ nyu jĩ̀ɛ̀ kɛ kè kà gmaɔ̀ nyuɛ cɛ̃ɛ kɛɛ mú.

¹⁹ Ké ɓě mɛ zàìn vã́á ɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

²⁰ “Ɓó wéɔ̀ tã nììnɔ̀ ɓaɖaa, ɓě mɛ zàìn ɓìɖǐ ɓíɔ́ gmɔ̀ ɓaɖa-bùè sè ɖò kè ɓáɖáá ɓíɔ́ vɛ̀nɛ̀ sɔ̃́ ɔ kè ɓáɖáá ɓíɔ́ ɓaɖa-bùè sè hĩinyɛ ɖò ɖe ɓɛ́ wa nyuá zɔ̃ dyúáɖòɛɛ sáa. Wa mɛ ɓɔ́ kɛɛ ɖò ɓéɖéɛ.

²¹ Ké ɓě mɛ tòìn wa kè waà ɖii-ɖɛ̀-sàǎ-zàìn-ɖɛ̀ ɓě kè waà náá-ɖɛ̀-sàǎ-zàìn-ɖɛ̀ ɓě. Ɓě mɛ nyuɛ náa dyììn ɖé kà ɓìɖǐ ɓíɔ́ ɓěɔ̀ kè ɓáɖáá ɓíɔ́ vɛ̀nɛ̀ ɓěɔ̀ ɔ kè ɓáɖáá ɓíɔ́ tɔ̀ɔ̀ ɓěɔ̀ nyu jĩ̀ɛ̀ kɛ kè kà gmaɔ̀ nyuɛ cɛ̃ɛ kɛɛ mú.

²² Ké ɓě mɛ zàìn vã́á ɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

²³ “Ɓó wéɔ̀ hĩinyɛ nììnɔ̀ ɓaɖaa, ɓě mɛ zàìn ɓìɖǐ ɓíɔ́ gmɔ̀ ɓaɖa-bùè kè ɓáɖáá ɓíɔ́ vɛ̀nɛ̀ sɔ̃́ ɔ kè ɓáɖáá ɓíɔ́ ɓaɖa-bùè sè hĩinyɛ ɖò ɖe ɓɛ́ wa nyuá zɔ̃ dyúáɖòɛɛ sáa. Wa mɛ ɓɔ́ kɛɛ ɖò ɓéɖéɛ.

²⁴ Ké ɓě mɛ tòìn wa kè waà ɖii-ɖɛ̀-sàǎ-zàìn-ɖɛ̀ ɓě kè waà náá-ɖɛ̀-sàǎ-zàìn-ɖɛ̀ ɓě. Ɓě mɛ nyuɛ náa dyììn ɖé kà ɓìɖǐ ɓíɔ́ ɓěɔ̀ kè ɓáɖáá ɓíɔ́ vɛ̀nɛ̀ ɓěɔ̀ ɔ kè ɓáɖáá ɓíɔ́ tɔ̀ɔ̀ ɓěɔ̀ nyu jĩ̀ɛ̀ kɛ kè kà gmaɔ̀ nyuɛ cɛ̃ɛ kɛɛ mú.

²⁵ Ké ɓě mɛ zàìn vã́á ɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

²⁶ “Ɓó wéɔ̀ hm̀m̌ nììnɔ̀ ɓaɖaa, ɓě mɛ zàìn ɓìɖǐ ɓíɔ́ gmɔ̀ mɛ̀nɛ̌ìn-hĩinyɛ kè ɓáɖáá ɓíɔ́ vɛ̀nɛ̀ sɔ̃́ ɔ kè ɓáɖáá ɓíɔ́ ɓaɖa-bùè sè hĩinyɛ ɖò ɖe ɓɛ́ wa nyuá zɔ̃ dyúáɖòɛɛ sáa. Wa mɛ ɓɔ́ kɛɛ ɖò ɓéɖéɛ.

²⁷ Ké ɓě mɛ tòìn wa kè waà ɖii-ɖɛ̀-sàǎ-zàìn-ɖɛ̀ ɓě kè waà náá-ɖɛ̀-sàǎ-zàìn-ɖɛ̀ ɓě. Ɓě mɛ nyuɛ náa dyììn ɖé kà ɓìɖǐ ɓíɔ́ ɓěɔ̀ kè ɓáɖáá ɓíɔ́ vɛ̀nɛ̀ ɓěɔ̀ ɔ kè ɓáɖáá ɓíɔ́ tɔ̀ɔ̀ ɓěɔ̀ nyu jĩ̀ɛ̀ kɛ kè kà gmaɔ̀ nyuɛ cɛ̃ɛ kɛɛ mú.

²⁸ Ké ɓě mɛ zàìn vã́á ɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

²⁹ “Ɓó wéɔ̀ mɛ̀nɛ̌ìn-ɖò nììnɔ̀ ɓaɖaa, ɓě mɛ zàìn ɓìɖǐ ɓíɔ́ gmɔ̀ mɛ̀nɛ̌ìn-tã kè ɓáɖáá ɓíɔ́ vɛ̀nɛ̀ sɔ̃́ ɔ kè ɓáɖáá ɓíɔ́ ɓaɖa-bùè sè hĩinyɛ ɖò ɖe ɓɛ́ wa nyuá zɔ̃ dyúáɖòɛɛ sáa. Wa mɛ ɓɔ́ kɛɛ ɖò ɓéɖéɛ.

³⁰ Ké ɓě mɛ tòìn wa kè waà ɖii-ɖɛ̀-sàǎ-zàìn-ɖɛ̀ ɓě kè waà náá-ɖɛ̀-sàǎ-zàìn-ɖɛ̀ ɓě. Ɓě mɛ nyuɛ náa dyììn ɖé kà ɓìɖǐ ɓíɔ́ ɓěɔ̀ kè ɓáɖáá ɓíɔ́ vɛ̀nɛ̀ ɓěɔ̀ ɔ kè ɓáɖáá ɓíɔ́ tɔ̀ɔ̀ ɓěɔ̀ nyu jĩ̀ɛ̀ kɛ kè kà gmaɔ̀ nyuɛ cɛ̃ɛ kɛɛ mú.

³¹ Ké ɓě mɛ zàìn vã́á ɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

³² “Ɓó wéɔ̀ mɛ̀nɛ̌ìn-sɔ̃́ nììnɔ̀ ɓaɖaa, ɓě mɛ zàìn ɓìɖǐ ɓíɔ́ gmɔ̀ mɛ̀nɛ̌ìn-sɔ̃́ kè ɓáɖáá ɓíɔ́ vɛ̀nɛ̀ sɔ̃́ ɔ kè ɓáɖáá ɓíɔ́ ɓaɖa-bùè sè hĩinyɛ ɖò ɖe ɓɛ́ wa nyuá zɔ̃ dyúáɖòɛɛ sáa. Wa mɛ ɓɔ́ kɛɛ ɖò ɓéɖéɛ.

³³ Ké ɓě mɛ tòìn wa kè waà ɖii-ɖɛ̀-sàǎ-zàìn-ɖɛ̀ ɓě kè waà náá-ɖɛ̀-sàǎ-zàìn-ɖɛ̀ ɓě. Ɓě mɛ nyuɛ náa dyììn ɖé kà ɓìɖǐ ɓíɔ́ ɓěɔ̀ kè ɓáɖáá ɓíɔ́ vɛ̀nɛ̀ ɓěɔ̀ ɔ kè ɓáɖáá ɓíɔ́ tɔ̀ɔ̀ ɓěɔ̀ nyu jĩ̀ɛ̀ kɛ kè kà gmaɔ̀ nyuɛ cɛ̃ɛ kɛɛ mú.

³⁴ Ké ɓě mɛ zàìn vã́á ɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

³⁵ “Ɓó wéɔ̀ mɛ̀nɛ̌ìn-tã nììnɔ̀ ɓaɖaa, ɓě mɛ ɓɔ́ gana-kũ̀à ɖò nyuɛ, kɛɛ ɓě ɓéɖé ɓɛ́ ɓě ké dyí poìn, ɓɛ́ ɓě ké ḿ ɓiè.

³⁶ Ɓě mɛ dyà fɔ̃ɔ-sàǎ-zàìn-ɖɛ̀ ɓě mɔ̀à ɖii-ɖɛ̀-sàǎ-zàìn-ɖɛ̀ kɔ̃̀ nyɔ́ dè mɔ̄ Bounɓoɔ̀ hwìɖǐiɛ. Wa mɛ mɔ̀ ɓìɖǐ ɓíɔ́ dyúáɖò kè ɓáɖáá ɓíɔ́ vɛ̀nɛ̀ dyúáɖò ɔ kè ɓáɖáá ɓíɔ́ mɛ̀nɛ̌ìn-sɔ̃́ ɖò ɖe ɓɛ́ wa nyuá zɔ̃ dyúáɖòɛ. Wa mɛ ɓɔ́ kɛɛ ɖò ɓéɖéɛ.

³⁷ Ké ɓě mɛ tòìn wa kè waà ɖii-ɖɛ̀-sàǎ-zàìn-ɖɛ̀ ɓě kè waà náá-ɖɛ̀-sàǎ-zàìn-ɖɛ̀ ɓě. Ɓě mɛ nyuɛ náa dyììn ɖé kà ɓìɖǐ ɓíɔ́ɔ̀ kè ɓáɖáá ɓíɔ́ vɛ̀nɛ̀ɔ̀ ɔ kè ɓáɖáá ɓíɔ́ tɔ̀ɔ̀ ɓěɔ̀ nyu jĩ̀ɛ̀ kɛ kè kà gmaɔ̀ nyuɛ cɛ̃ɛ kɛɛ mú.

³⁸ Ké ɓě mɛ zàìn vã́á ɖò sáa ɖekè, ɓɛ́ ɔ ké nàmàǔn-sàǎ-zàìn-ɖɛ̀ jǔ. Ɓě mɛ nyuɛ náa ɓó wé séínɛ̀ fɔ̃ɔ-sàǎ-zàìn-ɖɛ̀ ɓěɔ̀ kè wa nììn ɖii-ɖɛ̀-sàǎ-zàìn-ɖɛ̀ ɓěɔ̀ ɔ kè wa nììn náá-ɖɛ̀-sàǎ-zàìn-ɖɛ̀ ɓěɔ̀ kɔ̃in.

³⁹ “Ɓě mɛ nyu sáa-zàìn-ɖɛ̀ ɓě nìà kɛ ɓó mɔ̄ Bounɓoɔ̀ bìì, ɓó ɓěɛ̀ hwɔ ɓěɔ̀ pa-tìǐn. Wa mɔ̀ ɓěɛ̀ fɔ̃ɔ-sàǎ-zàìn-ɖɛ̀ ɓěɔ̀ kè ɓěɛ̀ ɖii-ɖɛ̀-sàǎ-zàìn-ɖɛ̀ ɓěɔ̀ kè ɓěɛ̀ náá-ɖɛ̀-sàǎ-zàìn-ɖɛ̀ ɓěɔ̀ ɔ kè ɓěɛ̀ gbo-kpɔ̃ìn-sàǎ-zàìn-ɖɛ̀ ɓěɔ̀. Ɓě mɛ nyuɛ náa ɓó ɓěɛ̀ sáa-zàìn-ɖɛ̀ ɓě ɓá wuɖu-ɖi-ɖi jè dyíɛ kè ɓěɛ̀ hwòɖǒ-wáɖáá-nyìǐ-ɖɛ̀ ɓěɔ̀ kɔ̃in.”

⁴⁰ Ké Mózè zaìn ma ɖɛ séín ɓě ɓɛ́ Bounɓoɔ̀ cɛ̃ ma kà ɔ gboɛɛ Éézùɖùɛ̀-nyɔ̀ séín ɓěɔ̀ gbo kɔ̃in nyɛ̀nɛ̀ɛ̀.