Nɔ̀ɓà 27 - Ɓǎsɔ́ɔ̀ Báɓòɔ̀

Zɛ̀ɖàfɛ́hàà dyú-màà ɓěɔ̀ jè

^1-2 Wé ɖòɛ̀ ɓaɖaa, Zɛ̀ɖàfɛ́hàà dyú-màà ɓěɔ̀ dyi ma ɓó Mózè kè Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ ɔ kè Éézùɖùɛ̀-nyɔ̀ vɛ̀nɛ̀ ɓěɔ̀ dyúa ɓó jàɖàìn-gbò kɔ̃̀ mú ɓɛ́ Bounɓoɔ̀ kè ɔ nyɔ ɓěɔ̀ dyéàìn nyɛɛ wĩín. Zɛ̀ɖàfɛ́hàà dyú-màà ɓěɔ̀ nyɛ́nɛ́ mɔ̀ ma Máhàɖà kè Nóà kè Hágàɖà kè Míókà ɔ kè Tízà. Zɛ̀ɖàfɛ́hà ɓǎ ɓěɛ̀ gbǒ-xwíníínɔ̀ kɛà kɛ̀. Jòsé wóɖóìn ma Mànásì, ké Mànásì wóɖóìn ma Mákì, ké Mákì wóɖóìn ma Gíɖèà, ké Gíɖèà wóɖóìn ma Héfɛ̀, hwɛ̀ ké Héfɛ̀ wóɖóìn ma kà Zɛ̀ɖàfɛ́hà kɛ̀. Ti ɓɛ́ Zɛ̀ɖàfɛ́hàà dyú-màà ɓěɔ̀ dyi ma nyɔ ɓěɔ̀ gboɛɛ, wa ɖá,

³ “À ɓǎ mɛ́ìn ma ɖé gbǎùn-fúɖúáɔ̀ kɔ̃. Ɔ se ma Kówàɖà kè ɔ nyɔ ɓě ɓɛ́ wa vɔ̃ ma kà Bounɓoɔ̀ gboɛɛ ɖò, kɛɛ ɔ mɛ́ ma ní ɓó ɔ mìɔùn nììn ɖɛ gbà ɓɛ́ ɔ nyuɛɛ jè. Ké ɔ se gàa-dyù ɖò ɓíɖíi sè.

⁴ Ɖɛ́ kɔ̃̀ jè à ɓǎ nììn nyɛ́nɛ́ muà dyi paùn ɖé ɔ nyɔ ɓěɔ̀ hwìɛ̀ ɓó ɔ nììn se gàa-dyù ɖò ɓíɖíi sè jè kɛ́? Nyí à mɔ̀ùn pá ɖò ɖé à ɓǎà ɖíí-gàà ɓěɔ̀ hwìɛ̀.”

⁵ Ké Mózè kpa ɖɛ màa-dyù ɓěɔ̀ cɛ̃ ma kàa Bounɓoɔ̀ dyúa.

⁶ Hwɛ̀ ké Bounɓoɔ̀ cɛ̃ɛ ma Mózè gbo, ké ɔ ɖá,

⁷ “Ɖɛ ɓɛ́ Zɛ̀ɖàfɛ́hàà dyú-màà ɓěɔ̀ cɛ̃à kɛɛ mɔ̀ jǎà. Nyí wa pá ɖò, ɓɛ́ ɔ ké wa nììn dúí-sè-ɖɛ̀ jǔ ɖé waà ɓǎà ɖíí-gàà ɓěɔ̀ hwìɛ̀. M̀ mɛ hwɔ̀ìn pá kéɔ́ kà waà ɓǎ nììn kɔ̃̀ɔ̀-ɖɛ̀ jǔɛɛ ɖé wa gboí.

⁸ Ké m̀ mɛ cɛ̃ɛ Éézùɖùɛ̀-dyù ɓěɔ̀ gbo kà ḿ ɖá ɔ jǔ ké gàa ɖò dyi mɛ́, ké ɔ se gàa-dyù ɖò ɓíɖíi sèǐn, ɓě mɛ hwɔ̀ìn ɔ nììn pá mɔ̀à ɔ dúí-sè-ɖɛ̀ɔ̀ kɛɛ ɖé ɔ dyú-mààɔ̀ gboí.

⁹ Ɔ jǔ ké ɔ se dyú-màà ɖò ɓíɖíi sèǐn, ɓě mɛ hwɔ̀ìn ɔ nììn dúí-sè-ɖɛ̀ɔ̀ ɖé ɔ ɖíí-gàà ɓěɔ̀ gboí.

¹⁰ Ɔ jǔ ké gàaɔ̀ se ɖíí-gàà ɖò ɓéɖé ní, nìí, ɓě mɛ hwɔ̀ìn ɔ dúí-sè-ɖɛ̀ɔ̀ ɖé ɔ ɓǎà ɖíí-gàà ɓěɔ̀ gboí.

¹¹ Ɔ jǔ ké ɔ ɓǎ se ɖíí-gàà ɖò ɓéɖé ní, nìí, ɓě mɛ hwɔ̀ìn ɔ dúí-sè-ɖɛ̀ɔ̀ gbǒ-xwíníín-nyɔ̀ mɔ̀ nyɔ xwɛ̃́ìn ɔ bũ̌in nyɛɛ gboí, ɓɛ́ ɔ ké ɔ kɔ̃̀ɔ̀-ɖɛ̀ jǔ. Ɖɛ nìà kɛ mɛ mɔ̀ gma kánáá pū ɖé Éézùɖùɛ̀-dyù ɓěɔ̀ hwìɛ̀ kà mɔ̄ Bounɓoɔ̀ nyuà m̀ gbo cɛ̃ɛ kɛ.”

Bounɓoɔ̀ gã Jasúé ɓɛ́ ɔ ké Mózè bɛ̃̌ǐn sè

¹² Wé ɖòɛ̀ ɓaɖaa, Bounɓoɔ̀ cɛ̃ɛ ma Mózè gbo, ké ɔ ɖá, “Mu ɖé Àbáwìɖììn-tòɖò ɓěɔ̀ dya, ɓɛ́ m̀ ké ɓóɖó ɓɛ́ ḿ nìà Éézùɖùɛ̀-dyù ɓěɔ̀ nyíɛń dyiɛń nyɛɛ dyé.

¹³ Ké m̀ ɖǎ ɓóɖóɔ̀ dyéín, nì mu mɛ́ìn, ɓɛ́ m̀ ké nì nyɔ ɓěɔ̀ gbo mu ɖekè, kà m̀ ɖíí-gàà Eɖóún nyuɛ ma kà kɛ.

¹⁴ Ɔ nì ná, sepóɛɖé m̀ kè Eɖóún jaɖa ma ní wuɖuɔ̀ mú ɖé Zĩ́ìn Gbǎùn-fúɖúáɔ̀ kɔ̃ ɓó ti kɔ̃̀ ɓaɖa ɓɛ́ Éézùɖùɛ̀-dyù ɓěɔ̀ nì ma kà ḿ gbo vɔ̃uń wɛ̃. Ɓě se ma ní dĩ́ín-dĩ̀ìnɔ̀ wa dyí tɛ̀mɛ̀ìn ɖé níɔ̀ wĩín ɓó wa dyéɖé waí.” Ɔ mɔ̀ Mɛ̀wíɖíɓà-nì nìà ɖé Zĩ́ìn Gbǎùn-fúɖúáɔ̀ kɔ̃ ɖé Káɖɛ̀-hwɔ̀ɖɔ̀ɔ̀ múɛ.

¹⁵ Ké Mózè cɛ̃ɛ ma Bounɓoɔ̀ gbo, ké ɔ ɖá,

¹⁶ “Bounɓo Gèɖèpɔ́ɔ̀, mɔ̀ mɔ̀à fɛ̀ɛ̀-séín-tò-nyɔ̀ kɛɛ, ní ɓaà m̀ ní, gã gàa ɖò, ɓɛ́ ɔ ké Éézùɖùɛ̀-nyɔ̀ ɓěɔ̀ nàìn,

¹⁷ ɓɛ́ ɔ ké wa to gbo kpa, ɓɛ́ ɔ ké wa ɖe dyà, nì nyɔ ɓěɔ̀ ní kɔ̃̀ ɖà nì kà ɓáɖáá ɓě ɓɛ́ wa se dyí-gmɔ̀-nyɔ̀ ɖò ɓéɖéɛɛ nìà kɛ.”

¹⁸ Ké Bounɓoɔ̀ cɛ̃ɛ ma Mózè gbo, ké ɔ ɖá, “Ɖú Jasúé mɔ̀à Núùnɛ̀ dyú-gààɔ̀ kɛɛ dyí, ɓɛ́ m̀ ké ɔ sɔ̃ dúún dè. Ɔ mɔ̀ nyɔ ní Zùùɔ̀ nìà múɛ.

¹⁹ M̀ mɛ nyuɛ ɓɛ́ ɔ ké ɓó Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ kè Éézùɖùɛ̀-dyù séín ɓěɔ̀ dyúa dyi nyànà, nìí ɓɛ́ m̀ ké ɔ kũ̀à kɔ̃ún po ɓó m̀ bɛ̃̌ǐn, ɓó wa dyéɖé waí.

²⁰ M̀ mɛ nyí ɔ nì nyɔ-wuɖuí-kɔ̃̀-kpèɔ̀ ɖò, nìí ɓɛ́ Éézùɖùɛ̀-dyù séín ɓěɔ̀ ké ɔ wuɖu nyu.

²¹ Ɔ mɛ nyànà ɓó Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛɛ dyúa dyi, ɓɛ́ Ɛ̀ɖɛ̀ázà ké ḿ dyi diè ɓó ɔ bìì dyììn ɖé Dyúwìɖììn mɔ̀à gbo-ɖàɓàìn-ɖɛ̀ɔ̀ kɛɛ mú, ɓɛ́ ɔ ké ɖɛ mɔ̀ ní mɔ́ɔ́-ɖɛ̀ kɛɛ dyí dyuò. Dyììn ɖéɛ múɛɛ, Ɛ̀ɖɛ̀ázà mu Jasúé kè Éézùɖùɛ̀-dyù tɔ̀ɔ̀ ɓěɔ̀ ɖɛ mɔ̀ dyí-sɛ́ɖɛ́ìn-ɖɛ̀ ɓɛ́ wa ɓéɖé wa ké nyuɛɛ gbo cɛ̃ìn.”

²² Ké Mózè nyu ma ɖɛ Bounɓoɔ̀ cɛ̃ ma kà ɔ gboɛ. Ɔ nyuɛ ké Jasúé nyànà ma ɓó Ɛ̀ɖɛ̀ázà mɔ̀à sáa-zà-nyɔ̀ vɛ̀nɛ̀ɔ̀ kɛ kè Éézùɖùɛ̀-nyɔ̀ tɔ̀ɔ̀ ɓěɔ̀ dyúa dyi.

²³ Ké Mózè dè ma Jasúé sɔ̃ dúún, ké ɔ po ma wuɖui kà Jasúé mɔ̀ nyɔ nì ma ɔ bɛ̃̌ǐn sèɛ̌n nyɛ. Ɔ nyuɛ ma kà Bounɓoɔ̀ nyuɛ ma kà ɔ gbo cɛ̃ɛ kɛ.